မိူဝ်ႈၼႆႉ ဝၼ်းတီႈ 01/10/2025 ယၢမ်းဝၢႆးဝၼ်း သိုၵ်းမၢၼ်ႈ ၶဝ်ႈယိုဝ်းသိုၵ်းတဢၢင်း TNLA ၼႂ်းဝဵင်းၵျွၵ်ႉမႄးသေ ၶဝ်ႈပုတ်ႈဢဝ်တီႈယူႇတႅၼ်းဝႆႉၶိုၼ်း- ထၢႆႇႁၢင်ႈတူင်ႉ ၶႅပ်းႁၢင်ႈလွင်ႈၵူၼ်းၸိူဝ်းၵမ်ႉထႅမ်ၶဝ်ပႂ်ႉႁပ်ႉတွၼ်ႈမူၼ်ႈမူၼ်ႈသိူဝ်းသိူဝ်းသေ ပိုၼ်ၽႄႈတၢင်းသိုဝ်ႇၼႅင်ႈသၢၼ်လၢႆလၢႆတၢင်း ၼႄၾၢင်ႁၢင်ႈၶဝ်ၶိုၼ်းၵုမ်းဝဵင်းၵျွၵ်ႉမႄးယဝ်ႉ။
သိုၵ်းမၢၼ်ႈၼႆႉ လုၵ်ႉတၢင်းဝၢၼ်ႈၶူဝ်မုင်း ၶဝ်ႈၵႂႃႇထိုင်ပၢႆႉတၢင်းၶဝ်ႈဝဵင်းၵျွၵ်ႉမႄးသေ သိုပ်ႇၶဝ်ႈၵႂႃႇပၵ်းတပ်ႉပၢင်သဝ်းထိုင် ၼႂ်းဝဵင်းၵျွၵ်ႉမႄးၶိုၼ်း။
သိုၵ်းတဢၢင်း (TNLA) တႄႉ လုၵ်ႉတၢင်းတူဝ်းၵဵၵ်ႉဝဵင်းၵျွၵ်ႉမႄး ဢွၵ်ႇၵႂႃႇတၢင်းဝဵင်းသီႇပေႃႉဝႆႉလႄႈ ၵူၼ်းဝၢၼ်ႈၸိူဝ်းယူႇသဝ်းဝႆႉ ၵႄႈၵၢင်ဝဵင်းၵျွၵ်ႉမႄး- သီႇပေႃႉ လႆႈဢွၼ်ၵၼ်ငိူင်ႉဝႄႈဝႆႉၸူဝ်ႈၶၢဝ်းၼႆ ၵူၼ်းမိူင်းၵျွၵ်ႉမႄး ၵေႃႉယူႇဝႆႉ ၼႂ်းပိုၼ်ႉတီႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။
“ၶဝ်လုၵ်ႉတီႈသဵၼ်ႈတၢင်းလူင်ၶဝ်ႈၵႂႃႇၼႂ်းဝဵင်း ၸွမ်းသဵၼ်ႈတၢင်းၼၼ်ႉ မီးႁွင်ႈၵၢၼ်လုမ်းလူင်ပွင်ၸိုင်ႈၶဝ် ၶပ်ႉယႆၵၼ်ဝႆႉ။ သိုၵ်းမၢၼ်ႈၼႆႉ ၶဝ်ႈၵႂႃႇထိုင်လႆႈၼႂ်းၵၢင်ဝဵင်းၵျွၵ်ႉမႄး ၸွမ်းႁိမ်းႁွမ်း မဵဝ်ႉတေႃႇၶၢၼ်းမ ၼၼ်ႉယဝ်ႉ။ သိုၵ်းလွႆၶဝ်တႄႉ လုၵ်ႉတီႈ တူဝ်းၵဵၵ်ႉႁႄ ထွႆဢွၵ်ႇၵႂႃႇမီးယူႇတီႈတၢင်းငွၵ်းဝၢၼ်ႈလွႆၶေႃၼၼ်ႉ။ ၵူၼ်းဝၢၼ်ႈပူးၶႃး၊ ၵူၼ်းဝၢၼ်ႈၼမ်ႉဢုၼ်ႇၶဝ်ၸိူဝ်းၼႆႉ ဢွၼ်ၵၼ် တေႃႉၶူဝ်းတေႃႉလဵင်းၶဝ် တၢင်ႇထေႃႈတၢင်ႇၵႃးငိူင်ႉဢွၵ်ႇ ၼမ်ဝႃႈၼမ်ယဝ်ႉ။”
လႆႈႁူႉဝႃႈ သိုၵ်းမၢၼ်ႈၸိူဝ်းၶဝ်ႈၵႂႃႇထိုင်လႆႈၶိုၼ်း ၼႂ်းဝဵင်းၵျွၵ်ႉမႄးၼႆႉ ၵႂႃႇသွၵ်ႈတဝ်ႁိူၼ်းယေး ၸၢဝ်းၶိူဝ်းတဢၢင်း (ပလွင်ႈ) ၸွမ်းဝၢၼ်ႈတိုဝ်ႉလႅင် ပွၵ်ႉ (9) ၊ ဝၢၼ်ႈလွႆပဝ်း (အင်ကြင်းတောင်) ပွၵ်ႉ (8) ၸိူဝ်းၼၼ်ႉသေ ႁၢင်ႈႁႅၼ်းတႃႇပၼ်ႇၵၢၼ်ၽွင်းငမ်း ၼႂ်းဝဵင်းၵျွၵ်ႉမႄးဝႆႉယူႇ ဝႃႈၼႆ။
ယွၼ်ႉသိုၵ်းမၢၼ်ႈၶဝ်ႈၵုမ်းၶိုၼ်း ဝဵင်းၵျွၵ်ႉမႄးလႆႈယဝ်ႉလႄႈ ၽူႈၵွၼ်းသၢႆသိုၵ်းမၢၼ်ႈ တေသိုပ်ႇၸတ်းငႃးသိုၵ်းၵႂႃႇတၢင်းမိူင်းငေႃႉ၊ မိူင်းၵုတ်ႈ ဢမ်ႇၼၼ် ဝဵင်းသီႇပေႃႉႁိုဝ်ၼႆၼၼ်ႉ ပဵၼ်ဢၼ်လီသိုပ်ႇပၵ်းတႃပႂ်ႉတူၺ်း။ ၵူၼ်းမိူင်းၸိူဝ်းယူႇၸွမ်းသၢႆသဵၼ်ႈတၢင်းၼၼ်ႉၵေႃႈထုၵ်ႇလီၾၢင်ႉတူဝ်တူဝ်ႈတၼ်း – ၵူၼ်းမိူင်းဝဵင်းၵျွၵ်ႉမႄး လၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ