ဝၼ်းတီႈ 30/09/2025 ယၢမ်းၵၢင်ၶိုၼ်း မွၵ်ႈ 9 မူင်း ၽႅၼ်ႇလိၼ်ဝႆတီႈမိူင်းၾိလိပ်ႉပိၼ်ႊသ် ႁႅင်းသၼ်ႇ 6.9 ရိတ်ႉတိူဝ်ႉ ႁိူၼ်းယေးၵူၼ်းမိူင်းၵူၼ်ႇပင်းလူႉၵွႆ ၵူၼ်းတၢႆယဝ်ႉဢမ်ႇယွမ်း 20 ၵေႃႉ။

ၽႅၼ်ႇလိၼ်ၼႆႉဝႆတီႈ ဝဵင်း ပူဝ်ႊၵူဝ်ႊ ဢၼ်မီႊၸဵင်ႇႁွင်ႇဝၼ်းဢွၵ်ႇ ၸႄႈတွၼ်ႈ သီႊပူႊ (ႁူဝ်ၼပ်ႉၵူၼ်းမီးမွၵ်ႈ 90000 ၵေႃႉ)မွၵ်ႈ 17 ၵီႊလူဝ်ႊမီႊတႃႊ။ ပဵၼ်ၵၢင်မိူင်းၾိလိပ်ႉပိၼ်ႊသ်ၼႆၵေႃႈဝႃႈလႆႈ။ ႁွင်ႈၵၢၼ်ၾၢႆႇပႂ်ႉတူၺ်းၸွႆႈထႅမ်ၵူၼ်းထူပ်းၽေးသၽႃႇဝ ၸိုင်ႈမိူင်းတႄႉလၢတ်ႈဝႃႈ ၵူၼ်းတၢႆယဝ်ႉ 26 ၵေႃႉ မၢတ်ႇၸဵပ်း 147 ၵေႃႉ ႁိူၼ်းယေးၵူၼ်ႇပင်းလူႉၵွႆ 22 လင်။

သုၼ်ၽႅၼ်လိၼ်ဝႆၼႆႉ လိုၵ်ႉလူင်းတႂ်ႈလိၼ်မွၵ်ႈ 10 ၵီႊလူဝ်ႊမီႊတႃႊၵူၺ်းလႄႈ ႁဵတ်းႁႂ်ႈ ႁႅင်းသၼ်ႇတူဝ်ႈတၢင်းၸႄႈတွၼ်ႈ။

တေႃႇထိုင်ၼႂ်ၼႆႉ တီႈ ၾႆးၾႃႉၵေႃႈမွတ်ႇဝႆႉသေ ၽႅၼ်ႇလိၼ်ဢွၼ်ႇဢၼ်ဝႆမႃးပႃႈလင် After shock ၵေႃႈ မီးမႃးၵပ်းၵပ်းတၢမ်းတၢမ်းၵၼ် ၾၢႆႇၸွႆႈထႅမ်ၵူၼ်းထူပ်းၽေးသၽႃႇဝ တိုၵ်ႉၸွႆႈထႅမ်ယူႇတိၵ်းတိၵ်းပႆႇယဝ်ႉပႆႇတူဝ်ႈ။ မီးလွင်ႈပိုၼ်ၽၢဝ်ႇပၼ်ၾၢင်ႉလွင်ႈ သိုဝ်ႊၼႃႊမီႊ ၽေးၽႅၼ်ႇလိၼ်ဝႆတႂ်ၼမ်ႉပၢင်ႇလၢႆႇဝႆႉ- လႆႈႁူႉၼင်ႇၼႆ။

ၵုၼ်ၾိလိပ်ႉပိၼ်ႊသ်ၼႆႉ ၼႂ်းလိူၼ်သႅပ်ႉထႅမ်ႊပိူဝ်ႊပူၼ်ႉမႃးၼႆႉ လူမ်းလႅင်ႉႁႅင်းယႂ်ႇ ရႃႊၵႃႊသႃႊ လႄႈ ပူဝ်ႊလွႆႊ လူင်တိုၵ်ႉၽတ်ႉပဝ်ႇၶဝ်ႈယဝ်ႉၵႂႃႇ 2လုၵ်ႈၵူၺ်း။ ၸိုင်ႈမိူင်းၼႆႉမီးၼိူဝ်သၢႆၵူမ်ႇၾႆး Ring of Fire (တႂ်ႈၼမ်ႉပၢင်ႇလၢႆႇ ပသိၾိၵ်ႉ) လႄႈ ၵႆႉထူပ်းၽေးလွႆၾႆးတႅၵ်ႇ၊ ၽႅၼ်ႇလိၼ်ဝႆ လႄႈ လူမ်းလႅင်ႉလူင် တၢႆႊၾုၼ်ႊ။ ၼိုင်ႈပီထူပ်းၽေးလူမ်းလႅင်ႉဢမ်ႇယွမ်း 20 လုၵ်ႈ ၾၢႆႇၸွႆႈထႅမ်ထူပ်းၽေးသၽႃႇဝပိုၼ်ၽၢဝ်ႇဝႆႉၼင်ႇၼႆ။