သိုၵ်းမၢၼ်ႈ ထႅမ်ႁႅင်းသိုၵ်းထူဝ်းသိုၵ်းၶဝ်ႈ ၾၢႆႇႁွင်ႇဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်းယဝ်ႉ  တီႉၺွပ်ႉၵူၼ်းဝၢၼ်ႈၵႂႃႇၸွမ်း10 ၵေႃႉ ႁႂ်ႈၵႂႃႇၼႄတၢင်းၶဝ် ထိုင်ဝၼ်းမိူဝ်ႈၼႆႉ လႆႈမႃးၶၢဝ်းတၢင်း 10 ဝၼ်းယဝ်ႉ ပႆႇပွႆႇပၼ်ၶိုၼ်း ဝႃႈၼႆ ။

ၼႂ်းဝၼ်းတီႈ 21/9/2025 သိုၵ်းမၢၼ်ႈဢဝ်ဢဵၼ်ႁႅင်းသိုၵ်း 200 ပၢႆ ထူဝ်းသိုၵ်းၶဝ်ႈၼႂ်းဝၢၼ်ႈတပိၼ်ႇပျေႃႇ လႄႈ ဝၢၼ်ႈတၽၢၼ်းပိၼ်ႇသေ တီႉၺွပ်း ၵူၼ်းၸၢႆးၼႂ်းဝၢၼ်ႈၵႂႃႇ 10 ၵေႃႉ။  ပွႆႇတူဝ်မႃးၶိုၼ်း 3 ၵေႃႉ ။ ႁွင်ႉၵႂႃႇၸွမ်းၶဝ် 7 ၵေႃႉ တေႃႇထိုင်ဝၼ်းမိူဝ်ႈၼႆႉ  ပႆႇပွႆႇမႃးၶိုၼ်း ႁဵတ်းႁႂ်ႈၵူၼ်းတၢင်းႁိူၼ်းမႆႈၸႂ် တၢႆႁိုဝ်လိပ်းၶီးၵေႃႈဢမ်ႇႁူႉ ဝႃႈၼႆ။

ၵူၼ်းဝၢၼ်ႈတပိၼ်ႇပျေႃႇလၢတ်ႈၽူႈတွႆႇႁွၵ်ႈဝႃႈ -“ ဢၼ်တီႉၺွပ်းၵႂႃႇၼႆႉ မီး 10  ဝၼ်းယဝ်ႉ ၊   ဢမ်ႇလႆႈယိၼ်းၶၢဝ်ႇသင်ထႅင်ႈ ၊ ပေႃးၶဝ် ထူဝ်းသိုၵ်းၶဝ်ႈမႃးၼႆ လႄႇလမ်းႁႃတီႉၵူၼ်းဝၢၼ်ႈ၊ ဢမ်ႇသၢင်ႇထုၵ်ႇ ပေႃႉထုပ်ႉပႃးထႅင်ႈ  ၊ ၵူၼ်းဢၼ်ၶဝ်တီႉၺွပ်းၵႂႃႇၼၼ်ႉၶဝ်ၸႂ်ႉတေႃႉၶူဝ်းၸွႆႈၶဝ်၊ ၶဝ်ၸႂ်ႉၼႄတၢင်း၊ တီႇၽဵဝ်ႈသဵၼ်ႈတၢင်းပၼ်တႃႇၶဝ်ပႆ ၸိူဝ်းၼႆႉ”   – ဝႃႈၼႆ ။

ၸွမ်းသဵၼ်ႈသၢႆတၢင်းဢၼ်သိုၵ်းမၢၼ်ႈထူဝ်းသိုၵ်းၼၼ်ႉ ႁႂ်ႈၵၢင်ႉၵႄႇၵဵပ်းသဵၼ်ႈမၢႆ ၵူၼ်း/ၵႃး/ၸၢၵ်ႈ သေ ၶၢၼ်းႁႂ်ႈပၼ်ႇပုတ်ႈၵၼ်မႃးတေႃးၶူဝ်းၶဝ်ၸွႆႈသူင်ႇတႂ်ႈမိူဝ်းၼိူဝ်။ ၼိုင်ႈဝၼ်း လႆႈၵႂႃႇၸွႆႈၶဝ် 2 လမ်း။ ပေႃးပဵၼ်ရူတ်ႉၵႃးဢမ်ႇမီးဝႂ်ၶွၼ်ႇ ရူတ်ႉၵႃးဢၼ်ၸႂ်ႉတိုဝ်းလီၸိူဝ်းၼႆႉ သိုၵ်းမၢၼ်ႈဢမ်ႇပၼ်ၶိုၼ်းၸဝ်ႈမၼ်းၵေႃႈမီး- ၵူၼ်းပိုၼ်ႉတီႈလၢတ်ႈၼင်ႇၼႆ။

ၼၢင်းယိင်းယူႇဝၢၼ်ႈၵုင်းသိမ်ႇ လၢတ်ႈၽူႈတွႆႇႁွၵ်ႈဝႃႈ -“ ၶဝ် ထူဝ်းသိုၵ်းၶဝ်ႈမႃး တၢင်းဝၢၼ်ႈ ႁဝ်းၶႃႈၼႆႉ ၵူႈဝၼ်းယဝ်ႉ။  ၼႂ်းဢိူင်ႇၵုင်းသိမ်ႇၼႆႉၶဝ်မႃးၵဵပ်းသဵၼ်ႈမၢႆၵႃး  ၼိုင်ႈဝၢၼ်ႈၼႆႉ လႆႈပၼ်ၵႃးသွင်လမ်း ၊ ဢၼ်လႆႈပၼ်ၼႆႉတေမီးမွၵ်ႈ 6 ဝၢၼ်ႈၼႆႉ ၊ ၵႃးၵေႃႈပေႃးဢဝ်ၵႂႃႇယဝ်ႉ ဢမ်ႇသူင်ႇၶိုၼ်း ၊ ၵွႆတီႈလႂ်ၵေႃႈ ပႅတ်ႈဝႆႉတီႈၼၼ်ႈ ၊ ၵႃးဢၼ်ၶဝ်ဢဝ်ၵႂႃႇၸႂ်ႉၼၼ်ႉၵေႃႈ ပေႃးပွၵ်ႈမႃးၶိုၼ်းၼႆ ပေႃးယွၵ်းယွႆႇၵႂႃႇမူတ်း ”- ဝႃႈၼႆ ။

ဝၢၼ်ႈဢၼ်သိုၵ်းမၢၼ်ႈ ၶၢၼ်းရူတ်ႉၵႃး ၵူၼ်းဝၢၼ်ႈၼၼ်ႉ ပဵၼ်ဝၢၼ်ႈ ၵုင်းသိမ်ႇ ၊ ၼွင်လူင် (အင်းကြီး) ၊ ငူၺ်ႇတွင်ႇ(ငွေတောင်) ၊ ဢၼွၵ်ႉၵုင်း (အနောက်ကုန်း )  ၊ ၵျွၵ်ႉၵူႇတီ့ ၊ ထၢၼ်းလႃႉ ( ထန်းလှ)  ၊ တပိၼ်ႇပျေႃႇ ၊ ဝၢၼ်ႈၼူၵ်ႉၸွၵ်ႇ(ဌက်သောက် )  ၊ တၽၢၼ်းပိၼ်ႇ ၸဵမ်ၸိူဝ်းၼႆႉ  ။

လိူဝ်ၼၼ်ႉ တႄႇႁူဝ်လိူၼ် သႅပ်ႉထႅမ်ႊပိူဝ်ႊၼႆႉ ၵၢင်ႉၵႄႇ ၼႂ်းဢိူင်ႇ ၵုင်းသိမ်ႇ( သိမ်ကုန်း )  ႁွင်ႉ ပၢင်ၵုမ် ၵူၼ်းဝၢၼ်ႈသေ ၵဵပ်းငိုၼ်းၵူၼ်းဝၢၼ်ႈ ၼိုင်ႈႁိူၼ်း ႁႃႈႁဵင်ပျႃး  တွၼ်ႈတႃႇၵႃႈၸႂ်ႉၸၢႆႇ သိုၵ်းမၢၼ်ႈ ဝႃႈၼႆ ။

မိူၼ်ၼင်ႇၼႆ ၼႂ်းဝၼ်းတီႈ 14 /9/2025 ၼၼ်ႉၵေႃႈသိုၵ်းမၢၼ်ႈဢဝ်ဢဵၼ်ႁႅင်းသိုၵ်း 200 ထူဝ်း သိုၵ်း ၶဝ်ႈၼႂ်းဝၢၼ်ႈဢလႄႇၶျွင်းသေ တီႉၺွပ်းၵႂႃႇ ၵူၼ်းဝၢၼ်ႈ 10 ၵေႃႉ ။ ၼႂ်းသိုၵ်းမၢၼ်ႈ တီႉၺွပ်းၵႂႃႇၼၼ်ႉ ပႃးၼၢင်းယိင်း ဢႃယု ၸမ် 30  သွင်ၵေႃႉ ၊ ၵူၼ်းၸၢႆး 8 ၵေႃႉ ဝႃႈၼႆ ။

ယၢမ်းလဵဝ် သိုၵ်းမၢၼ်ႈထႅမ်ႁႅင်းသိုၵ်းၶဝ်ႈၼႂ်းၸႄႈဝဵင်းယႂႃႇငၢၼ်ႇ ၵူႈဝၼ်းသေ သိုၵ်းမၢၼ်ႈတင်း ၸုမ်းလုၵ်ႉၽိုၼ်ႉ PDF တုမ်ႉတိုဝ်ႉ ပဵၼ်ပၢင်တိုၵ်းၵၼ်ဝႆႉၼႆ – ၵူၼ်းပိုၼ်ႉတီႈလၢတ်ႈၼင်ႇၼႆ ။

ၵူၼ်းမိူင်းၼႆႉဢမ်ႇမီးၶိူင်ႈၵွင်ႈၵၢင်ႇသင်။ ဢမ်ႇလႆႈပိုတ်းယိုဝ်းၽႂ်။ ၵွပ်ႈၼႆပေႃးပဵၼ်ပၢင်တိုၵ်းမႃး လူၺ်ႈလွင်ႈတၢင်းသင်ၵေႃႈယဝ်ႉ သိုၵ်း/ၸုမ်းယိပ်းၵွင်ႈၵၢင်ႇၸိူဝ်းၼႆႉႁၢမ်ႈတီႉၺွပ်းၵူၼ်းမိူင်းၵႂႃႇပဵၼ်တူဝ်ယိူဝ်ႇၼႂ်းၵၢၼ်သိုၵ်းသိူဝ်- ၼႆၼႂ်းၶေႃႈတူၵ်းလူင်း ၵျီႊၼီႊဝႃႊၶွၼ်ႊဝႅၼ်ႊသျိၼ်ႊ ပႃးဝႆႉၼင်ႇၼႆ။