ၸွမ်းၼင်ႇ ပဵၼ်ၵူၼ်းမႃးၼိုင်ႈၵေႃႉ ၵိူတ်ႇမႃးၼႂ်းမိူင်းလႂ်ၵေႃႈယဝ်ႉ တီႈဢေႇသုတ်းမၼ်း တၵ်းလႆႈမီးသုၼ်ႇလိပ်းၶီးမီးၸႂ်လႄႈ သုၼ်ႇတႅပ်းတတ်းႁင်းၶေႃ။

ၵူၺ်းၵႃႈ ပေႃးမိူၼ်ၵူၼ်းမိူင်းတႆး ပႃးၸဵမ်ၵူၼ်းၼႂ်းမိူင်းႁူမ်ႈတုမ်မၢၼ်ႈပတ်းပိုၼ်ႉတႄႉ ပဵၼ်ၵူၼ်းမီးမိူင်းသေတႃႉ ဢမ်ႇၸႂ်ႈၵူၼ်းမီးသုၼ်ႇတဵမ်ထူၼ်ႈ။ တေႃႈၼင်ႇ ပပ်ႉၶၢမ်ႈမိူင်း ၽၢတ်ႉသ်ပွတ်ႇ ဢၼ်မိူင်းပိူၼ်ႈ တိုတ်ႉႁႂ်ႈမီးၽွၼ်းလီတႃႇၵူၼ်းမိူင်းယူႇၼၼ်ႉ မိူင်းမၢၼ်ႈသမ်ႉ ဢဝ်ႁဵတ်းပဵၼ်ၶိူင်ႈမိုဝ်း တႃႇၵမ်ၵိၼ်းၵူၼ်းမိူင်းၶိုၼ်း။

မိူဝ်ႈလဵဝ် ဢၼ်လိုဝ်းၵၼ်ယူႇၵေႃႈ ႁႅင်းၵၢၼ်ယၢၼ်မိူင်းၸိူဝ်းယိပ်းပပ်ႉၶဵဝ် CI သေ ၸိူဝ်းလႅၵ်ႈပဵၼ် ပပ်ႉလႅင် PJ ၸိူဝ်းၼၼ်ႉ လိူဝ်သေၸႂ်ႉမိူင်းထႆးယဝ်ႉ ဢမ်ႇၸၢင်ႈၵႂႃႇၸႂ်ႉတၢင်ႇၸိုင်ႈမိူင်းထႅင်ႈ။ ၵမ်ႈၼမ် ႁၼ်ဝႃႈ သိုၵ်းမၢၼ်ႈတင်ႈၸႂ် ပိၵ်ႉဢိုတ်းသဵၼ်ႈတၢင်းၶိုၼ်ႈယႂ်ႇၵူၼ်းမိူင်းတူဝ်ၵဝ်ႇၵူၺ်း ၼႆယူႇ။

မိူင်းထႆးၼႆႉ ႁႅင်းၵၢၼ်ဢၼ်လုၵ်ႉမိူင်းႁူမ်ႈတုမ်မၢၼ်ႈ ႁွတ်ႈထိုင်ဝႆႉ မီးမွၵ်ႈ 4 လၢၼ်ႉၵေႃႉ ၼႂ်းၼၼ်ႉ 2 လၢၼ်ႉပၢႆၼႆႉ ၶဝ်ႈမိူင်းယူႇသဝ်းၸွမ်းပၵ်းပိူင်ၸိုင်ႈမိူင်းသေ ထႅင်ႈ 1 လၢၼ်ႉပၢႆၼၼ်ႉသမ်ႉ ဢမ်ႇမီးဝတ်းဝႂ်သင်သေ ၶဝ်ႈမိူင်းလႄႈ ၾၢႆႇၵဵဝ်ႇၶွင်ႈၶဝ် ၸင်ႇႁဵတ်းပၼ်ပပ်ႉၶဵဝ် CI သေ ယူႇဝႆႉၼႆ ယူႇတီႈ ၸုမ်းလူလွမ်ႁႅင်းၵၢၼ် လၢတ်ႈဝႆႉၼင်ႇၼႆ။

တႄႇဢဝ် ဝၼ်းတီႈ 24-25/09/2025 ၼၼ်ႉမႃး ၾၢႆႇႁဵတ်းဝတ်းဝႂ် တီႈမႁႃႇၶျႆႊ ၸႄႈတွၼ်ႈသမုတ်ႇသႃ ၶွၼ်ႊ တွၵ်ႇပၼ်ပႃးၸုမ်ႈမႂ်ႇ – ဢၼ်တႅမ်ႈဝႆႉဝႃႈ Passport for Thailand Only ပွင်ႇဝႃႈ ၽၢတ်ႇသ်ပွတ်ႇ တႃႇၸႂ်ႉၼႂ်းမိူင်းထႆးၵူၺ်း။ လိၵ်ႈဢၼ်ၼႆႉ ၶဝ်တွၵ်ႇပၼ်ၼႂ်းပပ်ႉၶၢမ်ႈမိူင်း ဢၼ်လုၵ်ႉတီႈပပ်ႉၶဵဝ် သီႊဢၢႆႊ CI ၼၼ်ႉသေ ႁဵတ်းပပ်ႉလႅင် PJ ဢၼ်မႂ်ႇ။

လွင်ႈၼႆႉ ဢမ်ႇမီးၽႂ်ႁူႉဝႆႉလူင်ႈၼႃႈ ၾၢႆႇၵဵဝ်ႇၶွင်ႈမိူင်းမၢၼ်ႈမိူင်းထႆးၵေႃႈ ဢမ်ႇဢွၵ်ႇလိၵ်ႈပိုၼ်ၽၢဝ်ႇ လူင်ႈၼႃႈပဵၼ်တၢင်းၵၢၼ်သင်။ ၵိုင်ႉၵၢင်ႉမႃးတွၵ်ႇပၼ်ၸိူင်ႉၼႆလႄႈ မိူၼ်တၢင်းလူလၢႆၵူၼ်းမိူင်းႁူမ်ႈတုမ်မၢၼ်ႈ ၸိူဝ်းပဵၼ်ႁႅင်းၵၢၼ်ၸိူဝ်းၼႆႉၵူၺ်းၼႆ ၽူႈတူင်ႉၼိုင်ၾၢႆႇလူလွမ်ႁႅင်းၵၢၼ်ၵေႃႉၼိုင်ႈလၢတ်ႈ။

မိူဝ်ႈလဵဝ် ဢမ်ႇၸႂ်ႈၵူၼ်းၸိူဝ်းလၢႆႈပပ်ႉၶဵဝ်သီႊဢၢႆႊ လႅၵ်ႈပိၼ်ႇပဵၼ်ပပ်ႉလႅင်ၵူၺ်း ၵူၼ်းၸိူဝ်းယၢမ်ႈ ယိပ်းပပ်ႉလႅင်သေ တေႃႇဢႃယုယဝ်ႉလႅၵ်ႈပဵၼ်ပပ်ႉမႂ်ႇ ၸိူဝ်းၼၼ်ႉၵေႃႈ မႆႈၸႂ်ၵူဝ်ၺႃးတွၵ်ႇပၼ်ၸုမ်ႈ ဢၼ်ႁႄႉႁၢမ်ႈသုၼ်ႇတႃႇၵႂႃႇမိူင်းတႂ်ႈမိူင်းၼိူဝ်ထႅင်ႈ။

ပိူင်ပဵၼ်ၸိူဝ်းၼႆႉ ပႆႇႁၼ် ၾၢႆႇလႂ်ဢွၵ်ႇလိၵ်ႈပိုၼ်ၽၢဝ်ႇပဵၼ်တၢင်းၵၢၼ်၊ ၾၢႆႇႁဵတ်းဝတ်းဝႂ် ဢၼ်ယူႇ တႂ်ႈသိုၵ်းမၢၼ်ႈ ၶႂ်ႈႁဵတ်းသင်ၵေႃႈ ႁဵတ်းလႄႈ ယူႇတီႈ သုၼ်ၶေႃႈမုၼ်း ႁႅင်းၵၢၼ်ယၢၼ်မိူင်း MIC တႄႉ ႁၢႆးငၢၼ်းဝႆႉဝႃႈ -“ပဵၼ်ႁိုဝ်ၵေႃႈယႃႇ လွင်ႈပပ်ႉၶၢမ်ႈမိူင်း မီးလွင်ႈလႅၵ်ႈလၢႆႈၸိူင်ႉၼႆၼႆႉ ယူႇတီႈ လုမ်းၽွင်းတၢင်မၢၼ်ႈလႄႈ လုမ်းၵူင်းသုၼ်မၢၼ်ႈၶဝ် ပႆႇဢွၵ်ႇလိၵ်ႈပိုၼ်ၽၢဝ်ႇပဵၼ်တၢင်းၵၢၼ်လႄႈ ပွင်ႇဝႃႈ ႁႅင်းၵၢၼ် တိုၵ်ႉၸႂ်ႉတိုဝ်းလႆႈမိူၼ်ၵဝ်ႇ ဢမ်ႇဝႃႈ တေဢွၵ်ႇတၢင်းၵႂႃႇၼႂ်းၵုၼ်လူင်ဢေႊသျႃႊႁႃႉ မိူင်းဝၼ်းတူၵ်း”- ဝႃႈၼႆဝႆႉ။

ၽူႈၸွႆႈထႅမ်ၾၢႆႇဝတ်းဝႂ်ႁႅင်းၵၢၼ်ၵေႃႉၼိုင်ႈတႄႉ လၢတ်ႈတၢင်းႁၼ်ထိုင်ဝႆႉဝႃႈ -“ပေႃးပဵၼ်ၸိူင်ႉၼၼ် ၵူၼ်းၸိူဝ်းဢၼ် ပိၼ်ႇပဵၼ်ပပ်ႉလႅင်ၸိူဝ်းၼႆႉၵေႃႈ ယၢပ်ႇမူတ်းယဝ်ႉဢေႃႈ။ ၸိူင်ႉၼႆတႄႉ ဢမ်ႇလႅပ်ႈ ပဵၼ်လႆႈၶႃႈ။ ၶဝ်လႅပ်ႈတေၸႂ်ႉၶိုၼ်းမိူၼ်ၵဝ်ႇၵူၺ်း၊ ပႆႇႁၼ်ပၵ်းပိူင်မၢႆမီႈ ဢၼ်ၾၢႆႇမိူင်းမၢၼ်ႈ ဢွၵ်ႇမႃးတႄႉတႄႉၼႃ။ ၶဝ်လၢတ်ႈၵၼ်ယူႇၸိူဝ်းၼႆႉၵေႃႈ ဢဝ်ပၢႆမၼ်းၵူၺ်း။ ပႆႇႁူႉငဝ်ႈႁူႉႁၢၵ်ႈ”- ဝႃႈၼႆ။

ၵွပ်ႈပႆႇမီးလိၵ်ႈသင် ဢွၵ်ႇပဵၼ်တၢင်းၵၢၼ်လႄႈ ပႆႇႁူႉလႆႈဝႃႈ သိုၵ်းမၢၼ်ႈဢၼ်ၵုမ်းမိူင်းယူႇမိူဝ်ႈလဵဝ် တေဢဝ်ၶေႃႈဢၢင်ႈသင်သေႁဵတ်းလွင်ႈၼႆႉ။ သင်ၶဝ်ၼႄၶေႃႈဢၢင်ႈဝႃႈ ပပ်ႉၶၢမ်ႈမိူင်းသီလႅင် ဢၼ်ႁဵတ်းမႂ်ႇၸိူဝ်းၼႆႉ ၵွပ်ႈႁဵတ်းၼႂ်းမိူင်းထႆးလႄႈ ၸင်ႇၸႂ်ႉလႆႈမိူင်းထႆးၵူၺ်းၼႆတႄႉ ၽႂ်ၽႂ်ၵေႃႈ ႁႃလၢႆးတၢင်းသေ တေႁဵတ်းထႅင်ႈလၢႆးၼိုင်ႈယူႇ။ တီႈဢမ်ႇသင် ၵေႃႈ ပွၵ်ႈႁဵတ်းၶိုၼ်းတီႈတႃႈၶီႈလဵၵ်း ဢၼ်ၸမ်လႅၼ်လိၼ်ထႆးၸိူဝ်းၼႆႉၵေႃႈ ယင်းလႆႈ။ ၼႆႉသမ်ႉ ဢမ်ႇပွင်ႇၶၢဝ်ႇသင်ပၼ်လူင်ႈၼႃႈ တႃႇၵူၼ်းတေႁဵတ်းပပ်ႉၶၢမ်ႈမိူင်းသေ ၵိုင်ႉၵၢင်ႉမႃးလႅၵ်ႈၸိူင်ႉၼႆ ႁဵတ်းႁႂ်ႈႁႅင်းၵၢၼ်ၵူၼ်းမိူင်းမၢၼ်ႈ တိုၼ်ႇသၢၼ်ႈတူၵ်းၸႂ်ၵၼ်မူတ်းၼႆ ၽူႈၸွႆႈၾၢႆႇဝတ်းဝႂ်ႁႅင်းၵၢၼ် ၵေႃႉၼိုင်ႈလၢတ်ႈ။

ဢၼ်လူင်ပွင်ၸိုင်ႈ သွင်ၸိုင်ႈမိူင်းၵိုင်ႉၵၢင်ႉႁဵတ်းတေႃႇႁႅင်းၵၢၼ်မိူင်းမၢၼ်ႈၸိူင်ႉၼႆၼႆႉ တုမ်ႉတိူဝ်ႉ တေႃႇႁႅင်းၵၢၼ် ၵူႈသႅၼ်းပၢၼ်။ မၢင်ၸိူဝ်း ပဵၼ်သႅၼ်းၵူၼ်းၶၢဝ်ႉၵူၼ်းၵႄႇ ဢမ်ႇလႆႈႁဵတ်းၵၢၼ်ယဝ်ႉသေတႃႉ ၸိူဝ်းၶႂ်ႈဢႅဝ်ႇယဵမ်ႈ ဝၢၼ်ႈတႂ်ႈမိူင်းၼိူဝ်လႄႈ ၸိူဝ်းၶႂ်ႈသူႇၶႂ်ႈၸႂ်းလုၵ်ႈလၢၼ် တၢင်ႇၸိုင်ႈမိူင်း တေယၢပ်ႇ။

သႅၼ်းႁႅင်းၵၢၼ်ၵူၼ်းၼုမ်ႇ ဢၼ်လႆႈၸပ်းၸွမ်းႁွမ်းပႆ ပေႃႈလဵင်ႉၼၢႆးၸၢင်ႈ ဢွၵ်ႇၶၢဝ်းတၢင်းၵႂႃႇၼွၵ်ႈမိူင်းၸိူဝ်းၼၼ်ႉၵေႃႈ တေယၢပ်ႇၽိုတ်ႇၵိၼ်းၸႂ်။ ၸဵမ်လုၵ်ႈလဵင်ႉလႄႈ ပေႃႈလဵင်ႉတင်းသွင်ၾၢႆႇ။ 

ထႅင်ႈသႅၼ်းၼိုင်ႈသမ်ႉပဵၼ်ႁႅင်းၵၢၼ်ယၢၼ်မိူင်း ဢၼ်လႆႈတႄႇၼႃႈႁိူၼ်းပဵၼ်ၵူပ်ႉပဵၼ်ၵူႈၵၼ်တင်း ၵူၼ်းမိူင်းဝၼ်းတူၵ်းဝၼ်းဢွၵ်ႇ ၸိူဝ်းမႃးမီးၼႂ်းမိူင်းထႆးၼင်ႇၵၼ်။ ၼၼ်ႉၵေႃႈ တႃႇတေၵႂႃႇမႃးၸွမ်း ၵူပ်ႉၸွမ်းၵူႈမိူင်းတႂ်ႈမိူင်းၼိူဝ်ပဵၼ်ဢၼ်ယၢပ်ႇၸႂ်မိူၼ်ၵၼ်။

ဢၼ်တုမ်ႉယွၼ်ႈႁႅင်းၵေႃႈ တေပဵၼ်သႅၼ်းၵူၼ်းၼုမ်ႇ ဢၼ်လုၵ်ႉမိူင်းမၢၼ်ႈ ၶဝ်ႈယူႇမိူင်းထႆးၸူဝ်ႈၶၢဝ်းသေ မီးဢဵၼ်းဢၢၼ်းတေၵႂႃႇသိုပ်ႇႁဵၼ်းလိၵ်ႈ၊ တေၵႂႃႇႁႃတၢင်းၶိုၼ်ႈယႂ်ႇတၢင်ႇၸိုင်ႈမိူင်း ၸိူဝ်းၼၼ်ႉ။ သိုၵ်းမၢၼ်ႈ မႃးၵိုင်ႉၵၢင်ႉႁဵတ်းၼႆၼႆႉမိူၼ်တၢင်းႁၵ်းၶႃ တတ်းတၢင်းတႃႇၵူၼ်းမိူင်းမၢၼ်ႈ တေတုၵ်ႉၶယၢပ်ႇၽိုတ်ႇၵိၼ်းၸႂ်သေ ႁွတ်ႈထိုင်တၢင်းတိူၵ်ႈတၢင်းတၼ်၊ ႁဵတ်းႁႂ်ႈၵူၼ်းမိူင်း ၸဝ်ႈၵဝ်ႇၼႃႈလဵၵ်ႉတႃတႅမ်ႇၵူၺ်းယဝ်ႉ။ 

မၢင်ၸိူဝ်း ႁဵတ်းပပ်ႉၶၢမ်ႈမိူင်း ၼႂ်းမိူင်းႁူမ်ႈတုမ်မၢၼ်ႈ ဢမ်ႇလႆႈလႄႈ တင်ႈၸႂ်ၶဝ်ႈမိူင်းထႆးသေ ၸင်ႇႁႃလၢႆးတၢင်းႁဵတ်းပပ်ႉၶၢမ်ႈမိူင်းဢၼ်မႂ်ႇ။ ၵူၺ်းၵႃႈ သမ်ႉမႃးၺႃးပၼ်ႁႃ ၸိူင်ႉၼႆထႅင်ႈလႄႈ ၵူၼ်းၼုမ်ႇတႄႉ သုမ်းသုၼ်ႇၼိုင်ႈယဝ်ႉသွင်ၼႆ ႁႅင်းၵၢၼ်ယိင်းၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ၵူၼ်းၼုမ်ႇၸိူဝ်းၶႂ်ႈၵႂႃႇထႅင်ႈတၢင်ႇမိူင်း ၸိူဝ်းၶႂ်ႈၵႂႃႇႁဵတ်းၵၢၼ်လႄႈ ၵႂႃႇႁဵၼ်းလိၵ်ႈထႅင်ႈတၢင်ႇမိူင်း ၸိူဝ်းၼၼ်ႉတႄႉၵေႃႈ တေတုမ်ႉယွၼ်ႈႁႅင်း။ လုၵ်ႉတီႈမိူင်းမၢၼ်ႈသေ ဢမ်ႇၸၢင်ႈ ၵႂႃႇၵမ်းသိုဝ်ႈ။ မႃးမိူင်းထႆးၼႆႉလီတီႈသုတ်း။ ပေႃးႁဵတ်းပပ်ႉသီလႅင်ၵေႃႈ တေၸၢင်ႈၵႂႃႇလႆႈထႅင်ႈတၢင်ႇမိူင်း။ ၶဝ်ၵေႃႈမုင်ႈ မွင်းၸိူင်ႉၼၼ်သေမႃး။ လွင်ႈတုမ်ႉယွၼ်ႈတႄႉ ႁူဝ်ပၢၵ်ႇတဵမ်ယဝ်ႉ ၶဝ်တႄႉ”။

ပပ်ႉၶၢမ်ႈမိူင်း ၽၢတ်ႉသ်ပွတ်ႇ ဢၼ်ဝႃႈၼႆႉ ပိူင်လူင်မၼ်း ၸိုင်ႈမိူင်းလႂ်ၵေႃႈ ယိူင်းၸူးတႃႇၵူၼ်းမိူင်း လႆႈလီလႆႈပဵၼ် လႆႈဢႅဝ်ႇလႆႈယဵမ်ႈ။ မိူဝ်ႈလဵဝ် သမ်ႉဝႃႈ ဢမ်ႇႁႂ်ႈၵူၼ်းမိူင်းၵႂႃႇလႂ်လႆႈၼႆၼၼ်ႉတႄႉ သိုၵ်းမၢၼ်ႈ တင်ႈၸႂ်မိပ်ႇငႅၼ်း ၵူၼ်းမိူင်းတႄႉတႄႉဝႃႈဝႃႈ။

မၼ်းမိူၼ်ဝႃႈ ၶဝ်တင်ႈၸႂ် ၶႂ်ႈၵမ်ၵိၼ်းတေႃႇၵူၼ်းမိူင်းၸိူဝ်းၶဝ်ႈႁဵတ်းၵၢၼ်မိူင်းထႆး။ ဢဝ်ပိူင်မၼ်းဝႃႈတႄႉ ပပ်ႉၶၢမ်ႈမိူင်းဢၼ်ဝႃႈၼႆႉ တၵ်းၵႂႃႇလႆႈၵူႈမိူင်းယဝ်ႉ။ မၼ်းပဵၼ်ပိူင်ၵူႈၸိုင်ႈမိူင်းယဝ်ႉ။ သမ်ႉဝႃႈ ႁႂ်ႈယူႇမိူင်းထႆးၼႆႉၵူၺ်း ၼႆတႄႉ တင်ႈၸႂ်ႁဵတ်းႁႂ်ႈၵူၼ်းမိူင်းယူႇယၢပ်ႇၵူၺ်း။ ၵူၼ်းၸိူဝ်းလုၵ်ႉၽိုၼ်ႉ သိုၵ်းမၢၼ်ႈ ၵမ်ႈၼမ်ၵေႃႈ ပၢႆႈၶဝ်ႈမိူင်းထႆးလႄႈ ၶဝ်ၸင်ႇ ႁဵတ်းၸိူင်ႉၼႆၵေႃႈပဵၼ်လႆႈၼႆ ၵူဝ်ႇယေးမိၼ်း AAC ၾၢႆႇလူလွမ်ႁႅင်းၵၢၼ်မိူင်းမၢၼ်ႈ လၢတ်ႈတီႈသိုဝ်ႇ DVB ဝႆႉၼင်ႇၼႆ။

သိုၵ်းမၢၼ်ႈၼႆႉ ၸဵမ်မိူဝ်ႈယိုတ်းဢႃႇၼႃႇ ဝၢၼ်ႈမိူင်း ပီ 2021 ၼၼ်ႉမႃး ဢွၵ်ႇပၵ်းပိူင်ဢၼ်ဢမ်ႇမီး ၽွၼ်းလီတေႃႇၵူၼ်းၼႂ်းမိူင်းၼွၵ်ႈမိူင်း ဢၼ်ၼိုင်ႈယဝ်ႉဢၼ်ၼိုင်ႈ။ ၵူၼ်းၸိူဝ်းယူႇၼႂ်းမိူင်းၵေႃႈ ၵုမ်ႇလႆႈသုၵ်ႉၸႂ် ၵုမ်ႇလႆႈပၢႆႈ လႆႈတၢႆ ၵုမ်ႇၺႃးၺွပ်းၸွမ်းပိူင်ဢၼ်သိုၵ်းမၢၼ်ႈ ႁဵတ်းဢွၵ်ႇၼၼ်ႉၵူၺ်း။

ၸဵမ်ဢဝ်ပိူင်ၵဵပ်းသိုၵ်း၊ ပိူင်ၵဵပ်းၶွၼ်ႇလႄႈ ပိူင်ဢိၼ်ႊထိူဝ်ႊၼႅတ်ႉ ၸိူဝ်းၼႆႉ ႁဵတ်းႁႂ်ႈၵူၼ်းမိူင်းယူႇ ယၢပ်ႇတႄႉတႄႉ။ ၸိူဝ်းပၢႆႈဢွၵ်ႇမိူင်းၵေႃႈ ယင်းတိုၵ်ႉၺႃးၽွၼ်းယွၼ်ႈပိူင်ဢၼ်သိုၵ်းမၢၼ်ႈ ႁဵတ်းဢွၵ်ႇ။ ၸူးၸႂ်ၵူၼ်းမိူင်းတႄႉ မုင်ႈမွင်း ၶႂ်ႈႁႂ်ႈၸဵဝ်းပူၼ်ႉပိူင်ဢၼ်ယူႇတႂ်ႈသိုၵ်းၼႃႇ ဢမ်ႇဝႃႈ သိုၵ်းၸုမ်းလႂ်ၵေႃႈယဝ်ႉ ပေႃးၶဝ်ႈၸိုဝ်ႈဝႃႈသိုၵ်းၼႆ ၵူၼ်းမိူင်းဢမ်ႇသူႈလႆႈၵတ်းယဵၼ်ၸႂ်ၸွမ်းသေပွၵ်ႈ ဝႃႈၼႆ။