ဝၼ်းတီႈ 29/09/2025 ယၢမ်းၵၢင်ၼႂ်ၸဝ်ႉ 1 မူင်း လူမ်းလႅင်ႉပူဝ်ႊလွႆႊ ဢၼ်လုၵ်ႉတၢင်းပၢင်ႇလၢႆႇ မိူင်းၾိလိပ်ႉပိၼ်ႊသ်မႃးၼၼ်ႉ လတ်းပွတ်းႁွင်ႇမိူင်းဝႅတ်ႉၼၢမ်ႊ ၽတ်ႉပဝ်ႇၶဝ်ႈဝဵင်းငႄႊဢၼ်ႊ ႁဵတ်းႁႂ်ႈႁိူၼ်းယေးၵူၼ်းမိူင်းလူႉၵွႆ ၵူၼ်းမၢတ်ႇၸဵပ်းလူႉတၢႆမီး 1 ၵေႃႉလႄႈ ႁၢႆဝႆႉ 12 ၵေႃႉ၊ ၵူၼ်းမိူင်း 12,000 ပၢႆ လႆႈပၢႆႈၽေးဝႆႉလူင်ႈၼႃႈ – ဝႃႈၼႆ။
လူမ်းလႅင်ႉပူဝ်ႊလွႆႊၼႆႉ ၽွင်းၶဝ်ႈၽတ်ႉပဝ်ႇ မိူင်းၾိလိပ်ႉပိၼ်ႊသ်ၼၼ်ႉ ၵူၼ်းတၢႆယွၼ်ႉလူမ်းလႅင်ႉမီး 6 ၵေႃႉ၊ ထိုင်မႃးၶဝ်ႈမိူင်းဝႅတ်ႉၼၢမ်ႊၼၼ်ႉ ႁႅင်းပဝ်ႇ လုၵ်ႉတီႈၼိုင်ႈၸူဝ်ႈမူင်း 135 လၵ်းသေ လူတ်းယွမ်း လူင်းယဵၼ်းပဵၼ် ၼိုင်ႈၸူဝ်ႈမူင်း 88 လၵ်း။ သိုပ်ႇမုင်ႈၼႃႈၸူး ဝၼ်းတူၵ်းလႄႈ ၸဵင်ႇႁွင်ႇဝၼ်းတူၵ်းမႃး တိၵ်းတိၵ်းသေ လတ်းၶဝ်ႈမိူင်းလၢဝ်း။
ၾၢႆႇပႂ်ႉတူၺ်းၾိင်ႈၾႃႉရႃႇသီႇ မိူင်းထႆးမိူင်းမၢၼ်ႈ တႅမ်ႈတၢင်ႇဝႆႉဝႃႈ ၶမ်ႈၶိုၼ်းဝၼ်းတီႈ 29 လႄႈ မိူဝ်ႈၽုၵ်ႈ 30/09/2025 ၼႆႉ ၸၢင်ႈထိုင်မိူင်းထႆးပွတ်းၼိူဝ် – မိူင်းတႆးလႄႈ မိူင်းမၢၼ်ႈတွၼ်ႈတႂ်ႈ ၸိူဝ်းၼႆႉ ဝႃႈၼႆ။
လူမ်းလႅင်ႉ ပူဝ်ႊလွႆႊၼႆႉ ႁႅင်းတေလူတ်းယွမ်းလူင်း သိုပ်ႇပဵၼ်လူမ်းလႅင်ႉၸူၼ်ႊႁွၼ်ႉ (အပူပိုင်းမုန်တိုင်း) သေ ၽတ်ႉပဝ်ႇၶဝ်ႈၼႂ်းမိူင်းတႆး မိူင်းယၢင်းလႅင်၊ မိူင်းယၢင်းၽိူၵ်ႇ၊ မိူင်းမွၼ်း၊ မိူင်းၶၢင်၊ တိူင်းတႃႈလိူဝ်ႇ(မၼ်းတလေး)၊ တိူင်းမၵူၺ်း၊ တိူင်းၸႄႈၵႅင်း၊ တိူင်းပႃႇၵိူဝ်၊ တိူင်းတႃႈၵုင်ႈ၊ တိူင်းထုင်ႉၵုၼ်ၵဵဝ် (ဢီႊရႃႊဝတီႊ)၊ တိူင်းတၼၢဝ်းသီ ၸိူဝ်းၼႆႉသေ ၾူၼ်လႄႈလူမ်းတေၽတ်ႉပဝ်ႇတူၵ်းမႃး။ ၸွမ်းၾင်ႇပၢင်ႇလၢႆႇၼမ်ႉလိုၵ်ႉ မိူင်းမၢၼ်ႈၼၼ်ႉ ႁွၼ်ၼမ်ႉၸၢင်ႈသုင်ထိုင် 10 ထိုင် 12 ပေႇ။ ၽွင်းလူမ်းလႅင်ႉၶဝ်ႈ မိူင်းတႆး မိူင်းမၢၼ်ႈ ၼၼ်ႉႁႅင်းလူမ်းၽတ်ႉပဝ်ႇ ၼိုင်ႈၸူဝ်ႈမူင်းတေမီး 35 လၵ်း ဝႃႈၼႆ။
ၵွပ်ႈၼႆ ၽွင်းၾူၼ်တူၵ်းလူမ်းၽတ်ႉပဝ်ႇၼၼ်ႉ ၾႃႇၽႃႇ ၾႃႉလင် မၢၵ်ႇႁဵပ်းတူၵ်း ၼမ်ႉၸၢင်ႈၵိုင်ႉၵၢင်ႉ ၼွင်းထူမ်ႈ ၼမ်ႉလွႆၸၢင်ႈၼွင်းၶဝ်ႈဝၢၼ်ႈၶဝ်ႈသူၼ်လႄႈ ႁႂ်ႈၵူၼ်းမိူင်းၾၢင်ႉၵႂႃႇမႃး။ တႃႇႁႂ်ႈလွတ်ႈၽေး ၶိုတ်းတၼ်းၶၢဝ်းယၢမ်းၼၼ်ႉ ႁႂ်ႈၵူၼ်းမိူင်းၾၢင်ႉထွမ်ႇၶၢဝ်ႇထွမ်ႇငၢဝ်းယူႇတႃႇသေႇ။ ၵူၼ်းၸိူဝ်းယူႇႁိမ်း တူၼ်ႈမႆႉယႂ်ႇလူင်၊ ၸိူဝ်းမီးပၢႆႉၶူတ်းသၼႃး (ၵျေႃႇၺႃႇ) ႁိမ်းႁိူၼ်းႁိမ်းယေး၊ ၵူၼ်းၸိူဝ်းႁဵတ်းၵၢၼ်ၸွမ်း ၼမ်ႉၸွမ်းၼွင်လႄႈ ၵူၼ်းၸိူဝ်းတေဢွၵ်ႇတႃႈပႆတၢင်း မိူၼ်ၼင်ႇ တၢင်းၼမ်ႉ၊ တၢင်းၵၢင်ႁၢဝ်ၵေႃႈ ႁႂ်ႈဢွၼ်ၵၼ်ၾၢင်ႉထွမ်ႇငိၼ်းဝူၼ်ႉတူၺ်းလီလီ – ဝႃႈၼႆ။
တီႈမိူင်းထႆးတႄႉ လူင်ပွင်ၸိုင်ႈထႆး မိူင်းၵဵင်းမႂ်ႇ ပိုၼ်ၽၢဝ်ႇပၼ်ၾၢင်ႉ ဢၼ်တေၸၢင်ႈတုမ်ႉတိူဝ်ႉယွၼ်ႉ လူမ်းလႅင်ႉပူဝ်ႊလွႆႊ ႁၢဝ်ႈႁႅင်း ပဵၼ်ဝဵင်းၵဵင်းလၢဝ် ဝဵင်းႁႅင်လႄႈ ၾၢင် ၸိူဝ်း ၼႆႉ။ ၵွပ်ႈၼႆလႄႈ ၵူၼ်းၸိူဝ်း ယူႇၸွမ်းတူၼ်းႁၢဝ်းသၼ်လွႆ တီႈသုင်တီႈတႅမ်ႇႁႂ်ႈလႆႈၾၢင်ႉၼမ်ႉလွႆၼွင်းထူမ်ႈ – ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ