ယၢမ်းလဵဝ် ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ ႁွင်ႈၵၢၼ် ၾၢႆႇလိူမ်ႈလႆႇ ဢၼ်ယူႇတႂ်ႈသိုၵ်းမၢၼ်ႈ ၵုမ်းၵမ် ၸႂ်ႉႁူဝ်ၶေႃႈလၢႆဢၼ်သေ ၵဵပ်းၶွၼ်ႇၵူၼ်းမိူင်း ၸွမ်းႁၢၼ်ႉၶၢႆၵုၼ်ႇ ၸွမ်းၵၢတ်ႇႁၢဝ်ႈႁႅင်းမႃးၵူႈဝၼ်း ႁဵတ်းႁႂ်ႈၸဝ်ႈႁၢၼ်ႉၵမ်ႈၽွင်ႈ လႆႈပၼ်ငိုၼ်းၼိုင်ႈလိူၼ် ဢမ်ႇယွမ်း 4−5 မိုၼ်ႇပျႃး။

ၵူၼ်းႁဵတ်းၵၢၼ်ၵႃႉၶၢႆ ၼႂ်းဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၶွၼ်ႇယုၵ်းယၢၵ်းၼႆႉၵူၺ်းၵေႃႈ မိုၼ်ႇႁႃႈႁဵင်၊ ၶွၼ်ႇလွင်ႈႁူမ်ႇလူမ်ႈသမ်ႉ ၼိုင်ႈမိုၼ်ႇ၊ ၶွၼ်ႇႁူဝ်လိူၼ် (လစဉ် ကြေး) သမ်ႉ 7 ႁဵင်။ ဢမႅတ်ႉၶုၼ်ႇ (အမြတ်ခွန်) ၵေႃႈသမ်ႉလႆႈပၼ်ထႅင်ႈ ဢၼ်ၼႆႉတႄႉ ၵႃႈႁိုဝ်ပႆႇႁူႉ။ ဢၼ်မႃးၵဵပ်းငိုၼ်းၼႆႉ ပဵၼ်ၾၢႆႇသေးၶွင်းယူင်း (ဈေးခေါင်းရုံး) ၼၼ်ႉၼႃႇ။ ၶဝ်ၸိူဝ်းၼႆႉ ပဵၼ်ၾၢႆႇတႂ်ႈ(စည်ပင်) ၵမ်းလဵဝ်ယဝ်ႉ။ ၶွၼ်ႇၼႆႉၵေႃႈ မႃးၵဵပ်းထႅင်ႈ မဵဝ်းၼိုင်ႈယဝ်ႉ မဵဝ်းၼိုင်ႈ ၶဝ်ၵေႃႈဢွၼ်ၵၼ်ပွင်ႉယူႇ ယွၼ်ႉဝႃႈၵမ်းၵမ်းလႆႈၵဵပ်းၼႆဝႃႇ။ တႃႇၼိုင်ႈလိူၼ်ၼႆႉ ပေႃးၼပ်ႉတူၺ်း ၶွၼ်ႇတင်းသီႇမဵဝ်းၼႆ ၼိုင်ႈႁၢၼ်ႉၼႆႉ တေမႅၼ်ႈယူႇ 4−5 မိုၼ်ႇယဝ်ႉ။ ပေႃးဢမ်ႇပၼ်ငိုၼ်းၼႆ သမ်ႉဝႃႈ မႃးၵႄႈလိတ်ႈၵၼ်တီႈလုမ်းလႄႈၼႆၸိူဝ်းၼႆႉထႅင်ႈဢိူဝ်ႈ”- ဝႃႈၼႆ။

ၼွၵ်ႈလိူဝ် လႆႈပၼ်ၶွၼ်ႇၼမ်ႁႅင်းယဝ်ႉ ၵၢၼ်ႁႃၵိၼ်လဵင်ႉတွင်ႉၵူၼ်းမိူင်းတူၵ်းတႅမ်ႇ လူင်းမႃးၵူႈဝၼ်း ၸဝ်ႈႁၢၼ်ႉၸိူဝ်းၵႃႉၶၢႆၸွမ်းၵၢတ်ႇၶဝ် ၶၢင်းပွင်ႉ ယွၼ်ႉဢမ်ႇၵႃႉငၢႆႈၶၢႆလီမိူၼ်ၵူႈပွၵ်ႈ ဝႃႈၼႆ။

“မိူဝ်ႈလဵဝ် ၶွၼ်ႇၼႆႉ လႆႈပၼ်ဢေႇဢေႇၵူၺ်းၵေႃႈ ႁဝ်းသမ်ႉဢမ်ႇၶႂ်ႈပၼ်လႆႈယဝ်ႉဢိူဝ်ႈ။ မိူဝ်ႈလဵဝ်ၵၢၼ် ပၢႆးမၢၵ်ႈမီးၼႆႉ မၼ်းယၢပ်ႇၸႂ်ၼႅၼ်ႇ။ လွင်ႈတၢင်းဢၼ်ၼိုင်ႈၵေႃႈ ယွၼ်ႉပိူဝ်ႈမၼ်း ဢမ်ႇပေႃးၶၢႆလီၼၼ်ႉၼႃႇ။ ပေႃးဝႃႈမၼ်းၶၢႆလီတႄႉ ငိုၼ်းမွၵ်ႈၼႆႉ ၽႂ်ဢမ်ႇတူၺ်းႁၼ်ၼင်ႇၵဝ်ႇၼေႃႈ။ ပေႃးမႃးတူၺ်းၶူဝ်း ၼုင်ႈဝႃႇ သင်ဝႃႇၸိူဝ်းၼႆႉ။ ပေႃးပိူၼ်ႈဢမ်ႇလူဝ်ႇႁႅင်းႁႅင်း ပိူၼ်ႈၵေႃႈ ဢမ်ႇသိုဝ်ႉလူး ၵၢပ်ႈမိူဝ်ႈလဵဝ်ၼႆႉ။ ၵွပ်ႈပိူဝ်ႈၸိူင်ႉၼၼ်လႄႈ မၼ်းၵေႃႈသမ်ႉၶၢၼ်ၸႂ်သေ ငိုၼ်းဢွၼ်ႇၼိုင်ႈမိုၼ်ႇၵူၺ်းၵေႃႈ မႃးတိူဝ်ႉၶိူၵ်ႈႁဝ်းယူႇလႄႈ ၶႂ်ႈဝူၼ်ႉယၢပ်ႇဝႆႉယူႇဢိူဝ်ႈ”- ၵူၼ်းႁဵတ်းၵၢၼ်ၵႃႉၶၢႆ ၼႂ်းဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။

ၼႂ်းဝဵင်းလႃႈသဵဝ်ႈၼႆႉ သိုၵ်းမၢၼ်ႈ ယိုတ်းမိူင်း ယုၵ်ႉဢဝ်တပ်ႉၵွင် ၾၢႆႇၵၢၼ်ယူတ်းယႃလႄႈ ယႃႈယႃ၊ တပ်ႉၵွင် ၾၢႆႇၵမ်ႉၸွႆႈၶိူင်ႈၶူဝ်းသိုၵ်း (626)၊ တပ်ႉၾၢႆႇပၢႆးပၺ်ႇၺႃႇ မၢႆ (8)၊ တပ်ႉၵွင် ၶလယ (68) ၊ တပ်ႉၵွင် ရူတ်ႉၵႃးၵၢပ်ႇလဵၵ်း၊ တပ်ႉၵွင် ၾၢႆႇၵဵပ်းၶူဝ်းၶွင်သိုၵ်း၊ တပ်ႉၵွင် ၾၢႆႇတေႃႉသူင်ႇရူတ်ႉၵႃး၊ ၾၢႆႇၵေႃႇသၢင်ႈ၊ ၾၢႆႇၵပ်းသိုပ်ႇၸိူဝ်းၼႆႉ ပၵ်းသဝ်းယူႇဝႆႉတင်းၼမ် ၼႆယဝ်ႉ။

ၸႄႈဝဵင်းလႃႈသဵဝ်ႈၼႆႉ ၾၢႆႇသိုၵ်းမၢၼ်ႈ ၵုမ်းၵမ်ဝႆႉ ၼႂ်းဝဵင်း 12 ပွၵ်ႉသေ သိုၵ်းၵဝ်ႈၵၢင်ႉ MNDAA သမ်ႉ ၵုမ်းၵမ်ဝႆႉၾၢႆႇၼွၵ်ႈဝဵင်း ၸွမ်းဝၢၼ်ႈၸွမ်းဢိူင်ႇၸိူဝ်းၼၼ်ႉသေ တိုတ်ႉ ၸၼ်ၶဝ်ႈဝႆႉပႃး ၼႂ်းၸႄႈဝဵင်းသႅၼ်ဝီ ၼႆယဝ်ႉ။