ႁႅင်းၵၢၼ်မိူင်းမၢၼ်ႈ ၸိူဝ်းႁဵတ်းၵၢၼ်ဝႆႉ ၼႂ်းမိူင်းၶူဝ်ႊရီႊယိူဝ်ႊၸၢၼ်း တိတ်းၸပ်းၸိူဝ်ႉမႅင်းတၢင်းပဵၼ် HIV ဝႆႉ 15 ၵေႃႉ ဝႃႈၼႆ။
ၵဵဝ်ႇလူၺ်ႈငဝ်းလၢႆး ၵၢၼ်ၵူတ်ႇထတ်းၵူၼ်းတိတ်းၸပ်း ၸိူဝ်ႉမႅင်းတၢင်း ပဵၼ် HIV တီႈၼႂ်းမိူင်းသေ ၼႂ်းဝၼ်းတီႈ 23 လိူၼ်သႅပ်ႊထႅမ်ႊပိူဝ်ႊၼႆႉ ႁွင်ႈၵၢၼ်ၽွင်းလူင်ၾၢႆႇပၢႆးယူႇလီ မိူင်းၶူဝ်ႊရီႊယိူဝ်ႊၸၢၼ်း လႆႈၵဵပ်းၶေႃႈမုလ်း ယိုၼ်ႈတၢင်ႇၼႄတီႈ ၼႂ်းသၽႃး၊ ၼႂ်းသဵၼ်ႈမၢႆၼၼ်ႉ ပႃးႁႅင်းၵၢၼ်ၵူၼ်းမိူင်းမၢၼ်ႈ လႆႈႁူႉၼင်ႇၼႆ။
မိူဝ်ႈပီ 2024 ပူၼ်ႉမႃးၼႆႉ လႆႈၵူတ်ႇထတ်းၵူၼ်းၼွၵ်ႈမိူင်း 8 မိူင်း၊ ထူပ်းႁၼ်ၵူၼ်းၼွၵ်ႈမိူင်း ၸိူဝ်းတိတ်းၸပ်း ၸိူဝ်ႉမႅင်းတၢင်းပဵၼ် HIV တင်းမူတ်း 261 ၵေႃႉ၊ ၼႂ်းၼၼ်ႉပႃး ၵူၼ်းမိူင်းမၢၼ်ႈ 15 ၵေႃႉၼႆ -သိုဝ်ႇၶၢဝ်ႇ မိူင်းၶူဝ်ႊရီႊယိူဝ်ႊၸၢၼ်း ႁၢႆးငၢၼ်းဝႆႉၼင်ႇၼႆ။
ၼႂ်းၵူၼ်းၼွၵ်ႈမိူင်း ၸိူဝ်းတိတ်းၸပ်းၸိူဝ်ႉမႅင်းတၢင်းပဵၼ် HIV ၼမ်လိူဝ်ပိူၼ်ႈၼၼ်ႉ ပဵၼ်ၵူၼ်းမိူင်းထႆး မီး 37 ၵေႃႉ၊ မိူင်းဝႅတ်ႉၼမ်း 18 ၵေႃႉ၊ မိူင်းၵမ်ႇပူးၶျႃး 18 ၵေႃႉ၊ မိူင်းမၢၼ်ႈ 15 ၵေႃႉ ။
ၼႂ်းၵူၼ်းၼွၵ်ႈမိူင်း ၸိူဝ်းၵူတ်ႇထတ်းထူပ်းႁၼ်ဝႃႈ တိတ်းၸပ်း ၸိူဝ်ႉမႅင်း HIV ၼၼ်ႉ တႃႇ 69.7% ပဵၼ်ၵူၼ်းၸၢႆးသေ ၼႂ်းၼၼ်ႉတႃႇ 68.6% ပဵၼ်ၼုမ်ႇၸၢႆး ၼႂ်းၵႄႈဢႃယု 20 ထိုင် 39 ပီ ဝႃႈၼႆ။
ၸွမ်းၼင်ႇၶေႃႈမုလ်း ဢၼ်ၵဵပ်းမၢႆဝႆႉသေ ႁႅင်းၵၢၼ်မိူင်းမၢၼ်ႈ ၸိူဝ်းၵႂႃႇႁဵတ်းၵၢၼ်တီႈၼႂ်းမိူင်းၶူဝ်ႊရီႊယိူဝ်း ၸၢၼ်းၼႆႉ မီး ႁိမ်းၸမ် 8 မိုၼ်ႇ လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ