ၵၢင်လိူၼ်သႅပ်ႉထႅမ်ႊပိူဝ်ႊၼႆႉ ၵူၼ်းၼုမ်ႇၸုမ်းၼိုင်ႈ ႁဵတ်းႁၢႆႉ ၽၼ်းၼၢင်းယိင်းဢွၼ်ႇၵေႃႉၼိုင်ႈ ထိုင်တီႈမိုဝ်းပုတ်းမၢတ်ႇၸဵပ်း ၼႂ်းဝဵင်းၵဵင်းမႂ်ႇ မိူင်းထႆး။
ယွၼ်ႉပိူဝ်ႈၼၼ်ႉသေ တႄႇဢဝ်ဝၼ်းတီႈ 18 တေႃႇထိုင် 24/09/2025 ၶၢဝ်းတၢင်းဝူင်ႈလဵဝ် ၸဝ်ႈၼႃႈတီႈထႆးထႅမ်ႁႅင်း ၵူတ်ႇထတ်း ၼႂ်းဝဵင်းၵဵင်းမႂ်ႇ၊ လမ်းပုၼ်းသေ တီႉၺွပ်းႁႅင်းၵၢၼ်ၵူၼ်းၼွၵ်ႈမိူင်း 200 ပၢႆ၊ ၼႂ်းၼၼ်ႉပႃး ႁႅင်းၵၢၼ်ၵူၼ်းမိူင်းမၢၼ်ႈ 150 ပၢႆ။
ၵမ်ႈၼမ် ပဵၼ်ႁႅင်းၵၢၼ်ယၢၼ်မိူင်း ဢၼ်ႁဵတ်းလွင်ႈ ဢူၼ်ဢၢၼ်မေႃးမႄး သၢင်ႈလွင်ႈလိူတ်ႇႁွၼ်ႉမႆႈၸႂ်ၵူၼ်းပိုၼ်ႉတီႈ ၸွမ်းပွၵ်ႉယွမ်ႇလႄႈ ၸွမ်းႁၢၼ်ႉတၢင်းၵိၼ်ၵၢင်ၶမ်ႈၵၢင်ၶိုၼ်းၸိူဝ်းၼႆႉၵေႃႈပႃး ၊ ပိူင်လူင်ၵူတ်ႇထတ်း ႁႅင်းၵၢၼ်ၸိူဝ်းယူႇသဝ်းလူၺ်ႈဢမ်ႇမီးဝတ်းဝႂ်ႁဵတ်းၵၢၼ် ဢမ်ႇၼၼ် ႁဵတ်းၵၢၼ်ဢမ်ႇမႅၼ်ႈတီႈၸိူဝ်းၼႆႉ – ဝႃႈၼႆ။
ဢိင်ၼိူဝ်လွင်ႈၼႆႉသေ ႁႅင်းၵၢၼ်ၵူၼ်းမိူင်းမၢၼ်ႈ ၸိူဝ်းယူႇသဝ်းဝႆႉၼႂ်းမိူင်းထႆး ၵႂႃႇမႃးတၢင်းလႂ်ၵေႃႈ ႁႂ်ႈဢဝ်ဝႂ်ၵပ်းတူဝ်ပႃးၵႂႃႇၸွမ်းတႃႇသေႇ၊ ႁႂ်ႈမေႃယူႇၸွမ်းငဝ်းလၢႆးၼႂ်းပိုၼ်ႉတီႈၼႆ ၽူႈတူင်ႉၼိုင်ၸွႆႈထႅမ်ႁႅင်းၵၢၼ်ၼွၵ်ႈမိူင်း တိုၵ်းသူၼ်းလၢတ်ႈဝႆႉၼင်ႇၼႆ။
ပူၼ်ႉမႃး ဝၼ်းတီႈ 16 ယၢမ်းၵၢင်ၶိုၼ်း 11 မူင်းပၢႆ ႁႅင်းၵၢၼ် ၸုမ်းၵူၼ်းၼုမ်ႇၸုမ်းၼိုင်ႈ ႁဵတ်းႁၢႆႉၽိတ်းမေႃးၵၼ်တင်း ၸုမ်းၵူၼ်းၼုမ်ႇထႆးသေ ဢဝ်ၽႃႉၽၼ်း ထိုင်တီႈမၢတ်ႇၸဵပ်းႁႅင်းမိုဝ်းပုတ်းၵႂႃႇ ။ ဢဝ်ၵႂႃႇယူတ်းယႃတူဝ် မေႃယႃၽႃႇတတ်းယဵပ်ႉတေႃႇပၼ်ႁိုင်ၶၢဝ်းယၢမ်း 20 ၸူဝ်ႈမူင်း။ ယၢမ်းလဵဝ်တႄႉ လီၶႅၼ်းၶိုၼ်ႈမႃးယဝ်ႉ။
ဝၢႆးၼၼ်ႉ ပလိၵ်ႈထႆးၵူတ်ႇထတ်းတီႉၺွပ်းဝႆႉၸုမ်းၵူၼ်းၼုမ်ႇ 15 ၵေႃႉ၊ ၸိူဝ်းၶဝ်ယွၼ်းႁပ်ႉဝႃႈ ပဵၼ်ၸုမ်းလဵဝ်ၵၼ်တင်းၸုမ်းၵူၼ်းၼုမ်ႇတႆး 999 တီႈဝဵင်းလူင်ၵုင်းထဵပ်ႈၼၼ်ႉၼႆလႄႈ ပလိၵ်ႈထႆး သိုပ်ႇလိုပ်ႇလမ်းတီႉၺွပ်းၵူၼ်းၼုမ်ႇတႆးဢမ်ႇထၢတ်ႇဢမ်ႇဝၢႆးတေႃႇထိုင်ဝၼ်းမိူဝ်ႈၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ