ဢွၼ်ႇယိင်းလုၵ်ႈႁဵၼ်းၸၼ်ႉၸွမ် ဝဵင်းတူၼ်ႈတီႈ ၸိုင်ႈတႆးပွတ်းၸၢၼ်ႈ ၺႃးယႃႈဢမ် (တူဝ်ႉသေး) သေ  ႁွင်ႉၵႂႃႇၵုမ်းၶင် ၶိုၼ်းၼိုင်ႈယဝ်ႉၸင်ႇလွတ်ႈမႃးၶိုၼ်းႁိူၼ်း ။  

လွင်ႈၼႆႉပဵၼ်ၵႂႃႇ ၼႂ်းဝၼ်းတီႈ 23 / 9/ 2025 ယၢမ်းဝၢႆးဝၼ်း 2 မူင်း။  ဢွၼ်ႇယိင်း လုၵ်ႈႁဵၼ်းၸၼ်ႉၸွမ် ယူႇပွၵ်ႉၼမ်ႉၵတ်း(ရေအေးကွင်း ) လၢတ်ႈၵူၼ်းတီႈႁိူၼ်းဝႃႈ တေၵႂႃႇဢဝ်ပပ်ႉတီႈ ၸၼ်ႉၸွမ်ၼႆသေ ႁၢႆၵႂႃႇ ၵူၼ်းႁိူၼ်းၸွမ်းႁႃ ဢမ်ႇႁၼ် တိတ်းတေႃႇဢမ်ႇလႆႈ ၶိုၼ်းၼိုင်ႈ။

ထိုင်မႃးဝၢႆးဝၼ်း မွၵ်ႈ 2 မူင်းၼႂ်းဝၼ်းတီႈ 24/09/2025 မၼ်းၼၢင်းၸင်ႇၵပ်းၾူၼ်းၸူးၵူၼ်းတၢင်းႁိူၼ်း ႁႂ်ႈမႃးႁပ်ႉမၼ်းၼၢင်းတီႈဝၢၼ်ႈဢွင်ႇသပေႇ (ဝၢၼ်ႈဢၼ်မီးတပ်ႉ တေႃႉသူင်ႇ တၢင်းၵိၼ် သိုၵ်းမၢၼ်ႈ) ၸႄႈဝဵင်းသူၺ်ႇၺွင်ႇ  ။ ၽိူဝ်ႇၵူၼ်းတၢင်းႁိူၼ်းၵႂႃႇႁပ်ႉတူဝ်မၼ်းမႃး   ၸင်ႇလႆႈႁူႉဝႃႈမၼ်းၼၢင်းၺႃးယႃႈဢမ် တူဝ်ႉသေး ၸွမ်းတၢင်းသေ ထုၵ်ႇႁွင်ႉတူဝ်ၵႂႃႇၵုမ်းၶင်ဝႆႉတီႈ ၵူဝ်ႇတွင်ႇ (တီႈၵဵပ်းၶူဝ်းၶွင်) ၼႂ်းထိူၼ်ႇတီႈၼိုင်ႈ တၢင်းတွင်ႇလေးလူင်း (ၶွၵ်ႈလူင်ၼႂ်းမိူင်းတႆး) ၼႆယဝ်ႉ ။

လုၵ်ႈႁဵၼ်းၸၼ်ႉၸွမ် ဢၼ် ၺႃးယႃႈဢမ်သေ ႁွင်ႉၵႂႃႇၼႆႉ ၸိုဝ်ႈႁွင်ႉ မသူၺ်ႇသိၼ်ႇ ( ၸိုဝ်ႈပွမ် ) ဢႃယု 25 ပီ ၶိုၼ်ႈႁဵၼ်း ပၢႆးလႅင်ႊမိူင်း( ပထဝီ ) ပီသၢမ် ဝႆႉတီႈၸၼ်ႉၸွမ် ဝဵင်းတူၼ်ႈတီး  ။

ၵူၼ်းမုင်ႉႁေႃႁိူၼ်း မသူၺ်ႇသိၼ်ႇ လၢတ်ႈၽူႈတွႆႇႁွၵ်ႈဝႃႈ -“ၽွင်းမၼ်းၵႂႃႇတီႈၸၼ်ႉၸွမ် သေဢၢၼ်း ပွၵ်ႈႁိူၼ်းၼၼ်ႉ ၺႃးယႃႈဢမ် ( တူဝ်ႉသေး) ၸွမ်းတၢင်းသေ ႁွင်ႉမၼ်းၵႂႃႇၼႆဢေႃႈ။   ၽႂ်ၵေႃႉႁွင်ႉၵႂႃႇ ႁဵတ်းႁိုဝ်လႄႈပႃးၵႂႃႇၸွမ်းဢၼ်ဝႃႈၼၼ်ႉ မၼ်းတမ်ႉဢမ်ႇႁူႉၶိုၼ်းသေဢိတ်း ဢမ်ႇတွင်းသေဢိတ်း ယဝ်ႉၼႆဢေႃႈ။  ဢၼ်မၼ်းတွင်းသေလၢတ်ႈၼေၶိုၼ်းတႄႉ   ၶဝ်သမ်းပၼ်ယႃသင်ၵေႃႈဢမ်ႇႁူႉ။   မၼ်းၵေႃႈဢမ်ႇႁူႉတူဝ် ဢမ်ႇတွင်းသေဢိတ်းယဝ်ႉလႆႈႁဵတ်းသင်လၢႆလၢႆ။ တူဝ်ၶိင်းၼႆႉ ပေႃးၵူၼ်ႉ ၵူၼ်ႉၶိုၼ်ႈၶိုၼ်ႈၵႂႃႇမူတ်းၼႆ။ ၼၵ်းၼႃသေ မိူၼ်ႇမိုင်ဝႆႉယူႇၶႃႈဢေႃႈ”- ဝႃႈၼႆ ။ 

ၽွင်း မသူၺ်ႇသိၼ်ႇ  ႁူႉတူဝ်မႃးၶိုၼ်းၵေႃႈ  ၼႅတ်ႈပၢႆႈဢွၵ်ႇတီႈႁွင်ႈၵဵပ်းၶူဝ်းၶွင်ၼၼ်ႉမႃး။ ထိုင်တီႈ ဝၢၼ်ႈဢွင်ႇသပေႇယဝ်ႉၸင်ႇႁူႉတူဝ်ၶိုၼ်းလီလီသေ ၼႅတ်ႈၵပ်းသိုပ်ႇၾူၼ်ႊ ၸူးပေႃႈမႄႈတၢင်းႁိူၼ်း ႁႂ်ႈမႃးႁပ်ႉဝႃႈၼႆ ။

ၵူၼ်းမုင်ႉႁေႃႁိူၼ်းမသူၺ်ႇသိၼ်ႇ လၢတ်ႈၽူႈတွႆႇႁွၵ်ႈဝႃႈ -“ ၵတ်ႉၵႃႈလႃႈ ၵၢမ်ႇလီလွတ်ႈဢွၵ်ႇမႃးၶိုၼ်းလႆႈ ။ မၼ်းဝႃႈ တီႈၵူဝ်ႇတွင်ႇၼၼ်ႉၽိူဝ်ႇမၼ်းတိုၼ်ႇသေ ႁူႉတူဝ်ၶိုၼ်းၼၼ်ႉမၼ်းလႆႈယိၼ်း  သဵင်ႁႆႈ ၼၢင်းယိင်း ဢွၼ်ႇ ႁိမ်းၶၢင်ႈမၼ်းၼႆ။ လႆႈယိၼ်းပႃးသဵင်မိူၼ်ပေႃႉပေႃႉႁႅမ်ႁႅမ်ပႃးၼႆဝႃႇ။ မၼ်းၵေႃႈၼႅတ်ႈလၵ်ႉပၢႆႈဢွၵ်ႇမႃးတီႈၼၼ်ႈ။    မိူဝ်ႈ ႁဝ်းၵႂႃႇႁပ်ႉၼၼ်ႉ ၶႅပ်းတိၼ်ၵေႃႈဢမ်ႇလႆႈမႃးၶိုၼ်း ၊ ထူင်ဝႃႇမၢႆၾၢင်ဝႃႇၵေႃႈ  ဢမ်ႇႁၼ်လႆႈမႃးၶိုၼ်း။ ၵႂႃႇတူၵ်းပႅတ်ႈတီႈလႂ်ၵေႃႈမၼ်းဢမ်ႇႁူႉတူဝ်။ ထၢမ်သင် ၵေႃႈဢမ်ႇလႆႈ မၼ်းၵူဝ်တူဝ်မၼ်းပေႃးသၼ်ႇ။ လႆႈဢဝ်မၼ်းၵႂႃႇၵူတ်ႇထတ်း ပၢႆးယူႇလီသေယူတ်းယႃ တူဝ်ဝႆႉဢေႃႈ။ ၸွမ်းၼင်ႇမၼ်းလၢတ်ႈမႃးၼၼ်ႉသေလႆႈလၢတ်ႈဝႆႉတီႈႁူင်းပလိၵ်ႈမူတ်းယဝ်ႉၼင်ႇၵဝ်ႇၶႃႈ” – ဝႃႈၼႆ။  

ယၢမ်းလဵဝ်  တီႈဝဵင်းတူၼ်ႈတီး မီးၵူၼ်းဢမ်ႇႁူႉၾၢႆႇ ပဵၼ်မူႇပဵၼ်ၸုမ်း ၵႆႉၸူၼ်ဢဝ် ရူတ်ႉၶိူင်ႈ/ ၾူၼ်းမိုဝ်းထိုဝ်တီႈလုၵ်ႈႁဵၼ်းၸၼ်ႉၸွမ်။ ၵမ်ႈၼမ်ပဵၼ်လုၵ်ႈႁဵၼ်းယိင်း။   ၼႂ်းၶၢဝ်းတၢင်းလိူၼ်လဵဝ်  လုၵ်ႈႁဵၼ်းၺႃးၸူၼ်ႁိမ် ရူတ်ႉၶိူင်ႈလႄႈ ၾူၼ်ႊမိုဝ်းထိုဝ် ဢမ်ႇယွမ်း 5 ပွၵ်ႈယဝ်ႉ ။ ၵႂႃႇတိူင်ႇလၢတ်ႈ ပလိၵ်ႈဝႆႉယူႇၵေႃႈ ပလိၵ်ႈဢမ်ႇဢဝ်လိူင်ႈပၼ်— လုၵ်ႈႁဵၼ်း ၸၼ်ႉၸွမ်တူၼ်ႈတီးလၢတ်ႈၼင်ႇၼႆ ။

ၼႂ်းဝၼ်းတီႈ 23/9/2025 ယၢမ်းႁူဝ်ၶမ်ႈၼၼ်ႉ မီးၵူၼ်းၸၢႆးသွင်ၵေႃႉ ၵိုတ်းပႂ်ႉၶၢင်ႈတၢင်းႁိမ်းၸၼ်ႉၸွမ် ႁႄႉရူတ်ႉၶိူင်ႈၵူၼ်းၵႂႃႇမႃးၸွမ်းတၢင်း- လၢတ်ႈဝႃႈ ရူတ်ႉၶိူင်ႈၶဝ်ၼမ်ႉမၼ်းမူတ်းၼႆသေ ယွၼ်းတၢင်းၸွႆႈထႅမ်။ ပေႃးပိူၼ်ႈၵိုတ်းပၼ်ရူတ်ႉၵေႃႈ ၸၵ်ႉရူတ်ႉပိူၼ်ႈသေပၢႆႈ  ၸူၼ်ဢဝ်လိပ်းလႅင်- လႆႈႁူႉၼင်ႇၼႆ။

လုၵ်ႈႁဵၼ်းၸၼ်ႉၸွမ်တူၼ်ႈတီးၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ၸူဝ်ႈဝူင်ႈဝၢင်ႈၼႆႉ ၵူၼ်းၸူၼ်ၼႆႉ ၼမ်မႃးၼႃႇ ၼႂ်းလိူၼ်ၼႆႉၵူၺ်း မီး 5 ပွၵ်ႈယဝ်ႉ ၊ ပဵၼ်မူႇပဵၼ်ၸုမ်း ၵႆႉလႄႇလမ်းၸူၼ်ဢဝ်ၾူၼ်ႊ ရူတ်ႉၶိူင်ႈ လုၵ်ႈဢွၼ်ႇဢၼ်လုၵ်ႉတင်းဝၢၼ်ႈ မႃးႁဵၼ်းလိၵ်ႈ  ၊ ပေႃးတေဢွၵ်ႇတၢင်းၼွၵ်ႈၼႆႉ ဢမ်ႇၵႂႃႇၵေႃႉလဵဝ်ၼႆႉလီသေပိူၼ်ႈယဝ်ႉ”- ဝႃႈၼႆ ။ 

မိူဝ်ႈဝၼ်းတီႈ 21/9/2025 ယၢမ်းဝၢႆးဝၼ်း 4 မူင်း ၼၼ်ႉၵေႃႈ မီးၵူၼ်းဢမ်ႇႁူႉၾၢႆႇ မႃးႁိမ်ၸူၼ်ဢဝ် ၾူၼ်ႊလုၵ်ႈႁဵၼ်း ၸၼ်ႉၸွမ် 2 ၵေႃႉတီႈတၢင်းၼႃႈ ၸၼ်ႉၸွမ်ထႅင်ႈ   ။  

ၵူၼ်းၸၢႆးဢႃယု 40 ပၢႆလၢတ်ႈၽူႈတွႆႇႁွၵ်ႈဝႃႈ -“တင်းၸၼ်ႉၸွမ်ၼၼ်ႉ ၵႆႉပဵၼ်ပၼ်ႁႃ ႁိမ်ၸူၼ်ၵၼ်ၼႃႇ ၊ ၵမ်ႈၼမ်ၵႆႉၸူၼ်ဢဝ်ၾူၼ်ႊမိုဝ်းထိုဝ် တီႈလုၵ်ႈႁဵၼ်းဢၼ်မႃးၶိုၼ်ႈႁဵၼ်းတီႈၸၼ်ႉၸွမ် ၊ ဝၼ်းတီႈ 21 ပူၼ်ႉမႃးၼႆႉၵေႃႈ လုၵ်ႈႁဵၼ်းသွင်ၵေႃႉ တိုၵ်ႉလၢတ်ႈၾူၼ်ႊယူႇ မီးၵူၼ်းၶီႇရူတ်ႉမႃးတင်းလင်သေ မႃးၸၵ်ႉဢဝ်ၵႂႃႇသိုဝ်ႈၼႃႈတၼ်းတႃ ”- ဝႃႈၼႆ ။

ဝၢႆးသိုၵ်းမၢၼ်ႈ ယိုတ်းဢဝ်ဢႃႇၼႃႇဝၢၼ်ႈမိူင်းမႃးၼႆႉ တီႈဝဵင်းတူၼ်ႈတီး မီးၵူၼ်းပႅၵ်ႇၼႃႈ ၶဝ်ႈလၵ်ႉ သွၵ်ႈတဝ် ၼႂ်းပွၵ်ႉၼႂ်းယွမ်ႇ ရူတ်ႉၶိူင်ႈၵႆႉႁၢႆ သေဢမ်ႇၵႃး ၵႆႉႁိမ်ၸူၼ် ႁဵတ်းႁၢႆႉပႃးလႄႈ ႁဵတ်းႁႂ်ႈၵူၼ်းပိုၼ်ႉတီႈ ယူႇဢမ်ႇမီးလွင်ႈႁူမ်ႇလူမ်ႈမႃး ။

ယွၼ်ႉၼၼ် ပေႃးဢွၵ်ႇတၢင်းၼွၵ်ႈ ယႃႇပေၵႂႃႇမႃးၵေႃႉလဵဝ် ၊ ယႃႇပေၵႂႃႇတီႈဢမ်ႇမီးၵူၼ်း၊ ၵူၼ်းၶၢတ်ႇ ၊ ၽွင်းၵႂႃႇၸွမ်းတၢင်း ပေႃးၵူၼ်းပႅၵ်ႇၼႃႈ ႁႄႉရူတ်ႉၵေႃႈ တိုၼ်းယႃႇပေၵိုတ်းပၼ် ၊ ႁႂ်ႈၾၢင်ႉၵၼ်ၵႂႃႇမႃးၼႆ -ၼၢင်းယိင်းၽူႈၸွႆႈထႅမ်ၼႂ်းဝၢၼ်ႈၼႂ်းၶူင်ႇ တီႈဝဵင်းတူၼ်ႈတီးၵေႃႉၼိုင်ႈပၼ်ၾၢင်ႉလၢတ်ႈၼင်ႇၼႆ ။