ယွၼ်ႉပိူၼ်ႈလူမ်းလႅင်ႉရႃႊၵႃႊဢၼ်လုၵ်ႉတၢင်းမိူင်းၾိလိပ်ႉပိၼ်ႊသ်မႃးၼၼ်ႉသေ ဝၼ်းတီႈ 23 ထိုင် 25 ၼႆႉ ၾူၼ်တူၵ်းၼႂ်းၸႄႈတွၼ်ႈၵဵင်းမႂ်ႇ ၸိုင်ႈထႆးႁႃႇယႂ်ႇ။ ဝၼ်းတီႈ 24- 25/09/2025 လိၼ်လွႆၵူၼ်ႇတဵင်တၢင်းၵႃး တီႈႁိမ်းဝၢၼ်ႈမႄႈၵျႃႊ ၼိူဝ်သဵၼ်ႈတၢင်း တၢင်းမိူဝ်းဝဵင်းႁႅင် ။ တေႃႇထိုင် ယၢမ်းၵၢင်ၼႂ် 25/09/2025 ၸဝ်ႈၼႃႈတီႈတိုၵ်ႉၸွႆႈၵၼ် ၽဵဝ်ႈၶီႈၵူမ်ႇၶီႈလိၼ်ၸိူဝ်းၼၼ်ႉယူႇ။

တၢင်းၵဵင်းလၢဝ်ၵေႃႈ ၼမ်ႉၶွင်းလူၼ်ႉၾင်ႇၸဵမ်မိူဝ်ႈဝႃး တေႃႇၼႂ်ၼႆႉယင်းပႆႇယွမ်း ။

တီႈဝဵင်းမႄႈတႅင် သမ်ႉ ၼမ်ႉတႅင်ၶိုၼ်ႈၼွင်းလူၼ်ႉၾင်ႇလႄႈ ယူႇတီႈ ၾၢႆႇၽွင်းၵမ်း ၸႄႈဝဵင်းမႄႈတႅင် ပိုၼ်ၽၢဝ်ႇပၼ်ၾၢင်ႉဝႃႈ ၼမ်ႉၸၢင်ႈထူမ်ႈၶဝ်ႈထိုင်ၼႂ်းဢိူင်ႇၸၢင်ႉၵိုတ်ႈ။ ၵူၼ်းမိူင်းၸိူဝ်းယူႇသၢပ်ႇၼမ်ႉတႅင် ၼႂ်းဢိူင်ႇၸၢင်ႉၵိုတ်ႈ ႁႂ်ႈၾၢင်ႉ ဢဝ်ၶူဝ်းၶွင်ၶိုၼ်ႈဝႆႉတီႈသုင် တႃႇႁႂ်ႈလွတ်ႈၽေးၼမ်ႉဝႃႈၼႆ။

တၢင်းမႄႈႁွင်ႈသွၼ်သမ်ႉ တီႈဝၢၼ်ႈမႄႈသၢႆလႅပ်ႈ သူပ်းမိူၺ်းၼၼ်ႉ လိၼ်လွႆၵူၼ်ႇ တူၼ်ႈမႆႉလူမ်ႉတဵင်တၢင်း သဵၼ်ႈတၢင်းၵႃးၵေႃႈၶၢတ်ႇ။

တီႈမႄႈၸႅမ်ႇ ၵေႃႈၼမ်ႉၸႅမ်ႇလူၼ်ႉၾင်ႇထူမ်ႈၶဝ်ႈၼႂ်းဢိူင်ႇ သၼ်ပႃႇတွင်း (မႄႈၸႅမ်ႇ) ႁိူၼ်းယေးၵူၼ်းမိူင်း 700 လင်ပၢႆ ၺႃးၼမ်ႉထူမ်ႈလူႉသုမ်း။

ၽွင်းလၢႆလၢႆတီႈ တိုၵ်ႉထူပ်းၽေးၼမ်ႉထူမ်ႈၼမ်ႉၼွင်းယွၼ်ႉလူမ်းလႅင်း ရႃႊၵႃႊသႃး ယင်းပႆႇယဝ်ႉ ႁွင်ႈၵၢၼ်ၾၢႆႇလၢမ်းၶၢတ်ႈၾိင်ႈၾႃႉရႃႇသီႇ မိူင်းထႆး ပိုၼ်ၽၢဝ်ႇထႅင်ႈၼႂ်ႈၼႆႉ 25/09/2025 ဝႃႈ – လူမ်းလႅင်ႉ တႄႇလုၵ်ႉတီႈ ပၢင်ႇလၢႆႇ ၾိလိပ်ႉပိၼ်ႊသ်မႃးထႅင်ႈလုၵ်ႈၼိုင်ႈ။

ဢၼ်မႃးလုၵ်ႈမႂ်ႇၼႆႉၸိုဝ်ႈႁွင်ႉဝႃႈ လူမ်းလႅင်ႉ ပူဝ်ႊလွႆႊ သၢႆတၢင်းၵေႃႈမႃးမိူၼ် လူမ်းလႅင်ႉလုၵ်ႈဝၼ်းၵွၼ်ႇၸိူဝ်းၼၼ်ႉၵူၺ်း ။ ဝၼ်းတီႈ 26-27/09/2025 ၶဝ်ႈမိူင်းၾိလိပ်ႉပိၼ်ႊသ် ဝၼ်းတီႈ 28 မုင်ႈၼႃႈၶဝ်ႈၸူး ပၢင်ႇလၢႆႇၶႄႇၸၢၼ်း။ဝၼ်းတီႈ 29 တေၶဝ်ႈထိုင်ၵုၼ် တင်ႊၵေႊ မိူင်းၶႄႇသေ သင်ဝႃႈ တိုၵ်ႉသိုပ်ႇႁႅင်း ၸွင်ႇသၢႆတၢင်းတေလႅၵ်ႈ – တေသိုပ်ႇၶိုၼ်ႈၵုင်းႁိုဝ်ဢမ်ႇၼၼ် ဝၢႆႇၼႃႈၸူးၵုၼ်ႁၢတ်ႇၼွႆႉ မိူင်းဝႅတ်ႉၼၢမ်းႁိုဝ်တႄႉပႆႇၸၢင်ႈလၢမ်းလၢႆႈ။ တၵ်းလႆႈပၵ်းတႃပႂ်ႉတူၺ်း ပႂ်ႉထွမ်ႇၶၢဝ်ႇငၢဝ်း တႃႇယူႇလီလွတ်ႈၽေး – တႅမ်ႈတၢင်ႇဝႆႉၼင်ႇၼႆ။