မိူဝ်ႈၼႆႉဝၼ်းတီႈ 24/09/2025 ယၢမ်းၵၢင်ၼႂ်မွၵ်ႈ 7 မူင်း 40 မိၼိတ်ႉ လိၼ်လူမ်ႇတီႈၶဵတ်ႇ ၻူႊသိတ်ႊ ၵၢင်ဝဵင်းၵုင်းထဵပ်ႈ ႁိမ်းႁူင်းယႃလူင် ဝၶျီရႃႊလူင်ႊၵွၼ်ႊ လႄႈ ႁူင်းပလိၵ်ႈ သၢမ်သဵၼ်   လူမ်ႇလူင်းလိုၵ်ႉမွၵ်ႈ 50 မီႊတႃႊ သေ တေႃႇထိုင်ယၢမ်းဝၢႆးဝၼ်းၼႆႉ သိုပ်ႇလူမ်ႇလႆယူပ်ႈလူင်းယူႇတိၵ်းတိၵ်း ထိုင်တီႈလႆႈၶၢႆႉၵူၼ်းပဵၼ် 3500 ပၢႆလႄႈၵူၼ်းမိူင်းၸိူဝ်းယူႇႁိမ်းႁွမ်းၼၼ်ႉ။

လိၼ်လူမ်ႇလူင်းၼၼ်ႉၵႂၢင်ႈ 30 မီႊတႃႊပၼ်ႇမူၼ်း ( 30 ဝႃးဝၢႆႈပၼ်ႇမူၼ်း) ။ သုမ်ႉသွင်းတီႈဝႆႉရူတ်ႉၵႃး၊ သဝ်လၵ်းၾႆး၊ မေႃႈၾႆးထရၼ်ႊသ်ၾေႃႊမႃႊ လႄႈ ရူတ်ႉၵႃး 2 လမ်း လူမ်ႇလူင်းၶဝ်ႈၵႂႃႇၸွမ်းလိၼ်။  ၵူၼ်းမၢတ်ႇၸဵပ်းလူႉတၢႆတႄႉဢမ်ႇမီး။

မီးရူတ်ႉၵႃးလမ်းၼိုင်ႈ တၢင်ႇဝႆႉတီႈၵုၼ်ၵၢင်လုမ် (ဢမ်ႇတူၵ်းလူင်းၵႂႃႇၸွမ်း) ၼၼ်ႉၵေႃႈ ယူႇတီႈၸဝ်ႈၼႃႈတီႈၾၢႆႇၸွႆႈထႅမ် ဢဝ်ၸိူၵ်ႈမတ်ႉ ဢဝ်ၶရဵၼ်ႊ ယုၵ်ႉဢွၵ်ႇမႃးၶၢႆႉဝႆႉတီႈလွတ်ႈၽေးယဝ်ႉ။

ရူတ်ႉဢၼ်တူၵ်းၵႂႃႇ 2 လမ်းၼၼ်ႉတႄႉ တႃႇလမ်းၼိုင်ႈ လိၼ်ထူမ်တဵင်သႂ်ႇဢမ်ႇႁၼ်ယဝ်ႉ၊ ထႅင်ႈလမ်းၼိုင်ႈပဵၼ်ရူတ်ႉ(ၵဵင်)ဢွၼ်ႇသႅၼ်းၸႂ်ႉၵိုၵ်းႁိူၼ်း။ ပဵၼ်ရူတ်ႉပလိၵ်ႈ ၶုၼ်သိုၵ်းလူင်  ရၢတ်ႉၶျ်ဝိတ်း သိတ်ႊထိၶျူၵ်ႉ  ပလိၵ်ႈၵုမ်းရူတ်ႉ ပႂ်ႉသဵၼ်ႈတၢင်း  ဢၼ်မႃးၶဝ်ႈၵၢၼ်ဝႆႉတီႈၶဵတ်ႇၼႃႈလိၼ်ၼၼ်ႉ။ ယူႇၾင်ႇလုၵ်းလုမ်သေမုင်ႈတူၺ်းႁၼ်ယူႇလႄႈ ယၢမ်းဝၢႆးဝၼ်းမွၵ်ႈ 3 မူင်း ၸုမ်းၸွႆႈထႅမ်ၶဝ် ဢၢၼ်းလူင်းၸွႆႈဢဝ်ရူတ်ႉဢွၵ်ႇ။ လိၼ်သမ်ႉၵူၼ်ႇၸူမ်မႃးထႅင်ႈၵမ်းၼိုင်ႈလႄႈ  ၸဝ်ႈၼႃႈတီႈၼႅတ်ႈဢွၼ်ၵၼ်ပၢႆႈဢဝ်သၢႆၸႂ်လွတ်ႈ။

ၽူႈၵွၼ်းၸႄႈတွၼ်ႈ လူင်းပိုၼ်ႉတီႈၵူတ်ႇထတ်းပိူင်ပဵၼ်သေ သင်ႇႁႂ်ႈၶၢႆႉၵူၼ်းပဵၼ်တီႈႁူင်းယႃၼၼ်ႉဢွၵ်ႇတင်းမူတ်း 3500 ၵေႃႉ သူင်ႇယူတ်းယႃတူဝ်ဝႆႉတီႈလွတ်ႈၽေး။ ႁူင်းပလိၵ်ႈသၢမ်သဵၼ်ၼၼ်ႉတႄႉပဵၼ်ႁူင်းပလိၵ်ႈဢၼ်တိုၵ်ႉၵေႃႇသၢင်ႈယဝ်ႉမႂ်ႇမႂ်ႇလႄႈပႆႇမီးၵူၼ်းမႃးလူင်းၵၢၼ်။ ၵူၺ်းၵႃႈ ယွၼ်ႉလိၼ်ၵူၼ်ႇၸူမ်သေ ႁဵတ်းႁႂ်ႈ သဝ်ၶဵမ်ႁူင်းပလိၵ်ႈမႂ်ႇၼၼ်ႉၶၢတ်ႇပုတ်းၽႅၼ်ဝႆႉယူႇယဝ်ႉလႄႈ ပဵၼ်ဢၼ်ဢမ်ႇလွတ်ႈၽေး။

ယၢမ်းဝၢႆးဝၼ်းၼႆႉတႄႉ ၸဝ်ႈၼႃႈတီႈသင်ႇႁႂ်ႈၵူၼ်းၸိူဝ်းယူႇႁိမ်းႁွမ်းလႄႈၵူၼ်းမႃးဢဝ်ၶၢဝ်ႇ ၵူၼ်းမႃးတူၺ်း ၸိူဝ်းၼၼ်ႉၶၢႆႉပၢႆႈဢွၵ်ႇပိုၼ်ႉတီႈဝႆႉ ယွၼ်ႉပိူဝ်ႈတေႃႈလွတ်ႇၼမ်ႉတႂ်ႈလိၼ်ၶၢတ်ႇပွင်ႇ ၼမ်ႉလႆႈဢမ်ႇထၢတ်ႇလႄႈ လိၼ်သိုပ်ႇ ၵူၼ်ႇယူႇၵမ်းဢိတ်းဢိတ်း  ပႆႇၵိုတ်း။ ။

ၽူႈၵွၼ်းၸႄႈတွၼ်ႈဝဵင်းလူင်ၵုင်းထဵပ်ႈ ၶျတ်ႊၶျၢတ်ႊ  သိတ်ႊထိၽၼ်ႊ တႄႉလၢတ်ႈဝႃႈ – ပိုၼ်ႉတီႈတႂ်ႈလိၼ်ၼၼ်ႉ တိုၵ်ႉၵေႃႇသၢင်ႈသဵၼ်ႈတၢင်းရူတ်ႉၾႆးတႂ်ႈလိၼ် (သီၵမ်ႇ) ၊ တေႃႈၼမ်ႉသမ်ႉၶၢတ်ႇဝႆႉလႄႈ လႆႈပိၵ်ႉသဵၼ်ႈတၢင်းသေမႄးဝႆႉယဝ်ႉၵမ်းၼိုင်ႈ- ဝႃႈၼႆ။  

 ၼႂ်ၼႆႉၸဵမ်ၸဝ်ႉၵွၼ်ႇသဵၼ်ႈတၢင်းတေလူမ်ႇပဵၼ်လုမ်ၼၼ်ႉၵေႃႈ ၽိဝ်ၼႃႈသဵၼ်ႈတၢင်း တႅၵ်ႇသေယဵၼ်းပဵၼ်သဵၼ်ႈတၢင်းႁၢၵ်းၶၢတ်ႇၵွႆ ၼမ်ႉယိုင်ႈဝႆႉ။

ယွၼ်ႉၼမ်ႉလႆၼႂ်းလိၼ်လႄႈႁဵတ်းႁႂ်ႈလိၼ်ယူၼ်ႈသေလူမ်ႇလူင်းၸူး ၶူၺ်လိၼ်ဢၼ်တိုၵ်ႉၵေႃႇသၢင်ႈသဵၼ်ႈတၢင်းရူတ်ႉၾႆးတႂ်ႈလိၼ်။

ယၢမ်းလဵဝ်တႄႉ သင်ႇတတ်းၼမ်ႉတတ်းၾႆးဝႆႉသေ ႁၢင်ႈႁႅၼ်းတႃႇၶိုၼ်းၵုမ်းၵေႃႇလုၵ်းလုမ်လူင်ၵၢင်ဝဵင်းၼၼ်ႉယူႇ။ သဵၼ်ႈတၢင်းႁိမ်းႁွမ်းၼၼ်ႉၵေႃႈ လႆႈပိၵ်ႉဝႆႉ ႁၢမ်ႈၵူၼ်းမိူင်းလတ်းၽၢၼ်ႇၵႂႃႇမႃး။