ၼႂ်းၶၢဝ်းဝၢၼ်ႈမိူင်းသုၵ်ႉယုင်ႈၼႆႉ ႁႅင်းၵၢၼ်တႆးၼင်ႇၵၼ်ၵေႃႈလႅၼ်ၵိၼ်ၵၼ် ပဵၼ်ဢၼ်လီတိူဝ်ႉၸႂ်

မႂ်ႇသုင်ၶႃႈ ၸုမ်းၶၢဝ်ႇၽူႈတွႆႇႁွၵ်ႈလႄႈ ၽူႈဢၢၼ်ႇလိၵ်ႈလၢႆး ၽူႈပၼ်ႁႅင်းတင်းသဵင်ႈ

ၶႃႈပဵၼ် ၵူၼ်းမိူင်းတႆးပွတ်းႁွင်ႇၵေႃႉၼိုင်ႈဢေႃႈ ။ ၶႃႈမႃးႁဵတ်းၵၢၼ်မိူင်းထႆးၼႆႉႁိုင်ယဝ်ႉ။

ၼႂ်းဝၼ်းမိူဝ်ႈၼႆႉ  ၵၢၼ်လွၵ်ႇလႅၼ်ၵိၼ်ၵၼ်ၼႆႉ မီးမႃးၵူႈလၢႆးတၢင်းယဝ်ႉၶႃႈ။ ပေႃးယူႇမိူင်းမၢၼ်ႈ-မိူင်းတႆးၼႆ လွင်ႈႁူမ်ႇလူမ်ႈတၢင်းဢိၼ်ႊထိူဝ်ႊၼႅတ်ႊလႄႈ လွင်ႈႁူမ်ႇလူမ်ႈတၢင်းၶူဝ်းၶွင်ငိုၼ်းၶမ်း တီႈႁိူၼ်းတီႈယေး ဢမ်ႇလီလႄႈ ၵူၼ်းမိူင်းၵႆႉထုၵ်ႇၺႃးလႅၼ်ၵိၼ် ၊ၵႆႉၺႃးၸူၼ် ၺႃးလၵ်ႉ ။ ဢၼ်ၼႆႉပဵၼ်သၽႃႇဝ ဢၼ်ၵူၼ်းမိူင်းလႆႈႁူပ်ႉ ယွၼ်ႉဝၢၼ်ႈမိူင်းလူႉ ႁၢမ်းၶုၼ်လူးၵွၼ်ႇၶႃႈယဝ်ႉ။

ၼႂ်းဝၼ်းမိူဝ်ႈၼႆႉ ၽွင်းၵူၼ်းမိူင်းတင်းလုမ်ႈၾႃႉ ႁႃၵိၼ်လဵင်ႉတွင်ႉယၢပ်ႇၽိုတ်ႇ ပၢႆးမၢၵ်ႈမီးတူၵ်း ၊ ၵူၼ်းမိူင်းတႆးႁဝ်းၵေႃႈ လႆႈပၢႆႈၽေးသိုၵ်းသိူဝ် ပၢႆႈၽေးသိုၵ်းမၢၼ်ႈႁွင်ႉၵူၼ်းၼုမ်ႇၵႂႃႇႁၢပ်ႇၵၢၼ်သိုၵ်း၊  ဢမ်ႇမီးႁိူၼ်းယေးတီႈယူႇ ၊ ၵမ်ႈၼမ်ဢွၼ်ၵၼ်ပၢႆႈၶဝ်ႈမိူင်းၶႄႇ – မိူင်းထႆး။ ႁဵတ်းၵၢၼ်ႁႃငိုၼ်းသေ သူင်ႇပၼ်ၵူၼ်းတၢင်းႁိူၼ်းတၢင်းယေး ၸိူဝ်းလႆႈပၢႆႈၽေးသိုၵ်းဝႆႉယူႇၸိူဝ်းၼၼ်ႉၶိုၼ်း။

ၼႂ်းဝၼ်းမိူဝ်ႈၼႆႉ ႁႅင်းၵၢၼ်ယၢၼ်မိူင်းၼႆႉ ဢွၼ်ၵၼ်ၶိုတ်းၵၢပ်ႈၶိုတ်းပၢၼ်ၼႃႇယဝ်ႉ။ မေႃလဵၼ်ႈ မိုဝ်းထိုဝ် လႄႈ ဢိၼ်ႊထိူဝ်ႊ ၼႅတ်ႉၵၼ်ၵူႈၵေႃႉ။ ၵွပ်ႈၼႆ လွင်ႈသူင်ႇငိုၼ်းဢူၼ်း ငိုၼ်းမိူဝ်းပၼ် ၵူၼ်းႁိူၼ်း ၵူၼ်း ယေးႁဝ်း တၢင်းမိူင်း တႆးၵေႃႈ ငၢႆႈငႅမ်ႈလူမ်ၸႂ် ။  ၵူၺ်းၵႃႈ ပေႃးဢမ်ႇမေႃလိူၵ်ႈတီႈသူင်ႇ ဢမ်ႇမေႃတူၺ်း ပိုၼ်းၵူၼ်းသူင်ႇငိုၼ်းလီလီတႄႉ ၸၢင်ႈၺႃးလွင်ႈယၢပ်ႇၽိုတ်ႇလူင်ၸိူင်ႉႁဝ်းၶႃႈၼႆႉ ၶႃႈဢေႃႈ။

ဢၼ်ၶႃႈၶႂ်ႈလၢတ်ႈၼေသေ ပၼ်ၾၢင်ႉပီႈၼွင်ႉတႆး ၵူႈတီႈၵူႈလႅၼ်ယၢမ်းလဵဝ်  ႁႂ်ႈလႆႈႁူႉဝႆႉသေ ၸၢင်ႈ ငိူင်ႉ ဝႄႈတႄႉ    – မီးၵူၼ်းႁဵတ်းၵၢၼ်ဢူၼ်းငိုၼ်းၵေႃႉၼိုင်ႈ  မၼ်းၼၢင်း ဢမ်ႇႁၼ်ထိုင်ၵၢင်ၸႂ် တၢင်းယၢပ်ႇ ၽိုတ်ႇၵူၼ်းႁဵတ်းၵၢၼ်တၢင်းမိူင်းထႆး လႄႈ ၵူၼ်းၸိူဝ်းထူပ်းၽေးသိုၵ်း ထူပ်းၽေးဢိုပ်းယူႇမိူင်းတႆး။  မၼ်းၼၢင်းႁပ်ႉငိုၼ်းဢူၼ်း တႃႇဢူၼ်းမိူဝ်းမိူင်းတႆးယဝ်ႉ မၼ်းၼၢင်းဢမ်ႇယွမ်းဢူၼ်းပၼ်။  ႁဝ်းၶႃႈ ၵူၼ်းတၢင်းၼႆႉဢၼ်သူင်ႇငိုၼ်းပၼ်ၼႆႉ ၵႂႃႇယွၼ်းၶိုၼ်းၵေႃႈမၼ်းၼၢင်းဢမ်ႇယွမ်းပၼ်ၶိုၼ်း။

မၼ်းၼၢင်းၼႆႉၸိုဝ်ႈၼၢင်းၵီႇ  ဢႃယု 38 ပီပဵၼ်ၵူၼ်းဝၢၼ်ႈၵွင်းတပ်ႉ ဢိူင်ႇၵွင်းၵေး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ လႃႈသုတ်း ဝၼ်းတီႈ 4/5/2023 ၼၼ်ႉ ႁဝ်းၶႃႈသူင်ႇငိုၼ်းမိူဝ်းတၢင်းႁိူၼ်း မိူင်းတႆး။

မၼ်းၼၢင်းဢမ်ႇသူင်ႇပၼ်သေဢမ်ႇၵႃး ယွၼ်းၶိုၼ်းငိုၼ်းဢၼ်ႁဝ်းၶႃႈဢူၼ်းပၼ်တၢင်းမိူင်းထႆးၼႆႉၵေႃႈ မၼ်းၼၢင်းဢမ်ႇယွမ်းပၼ်။   ၵပ်းသိုပ်ႇလၢႆလၢႆပွၵ်ႈၵေႃႈ ၼႄၶေႃႈဢၢင်ႈဢၼ်ၼိုင်ႈယဝ်ႉဢၼ်ၼိုင်ႈ ။ ၵမ်ႉဝႃႈ ၵႂႃႇပၼ်ၼႃႉၶဝ်ၸႂ်ႉ ၊ ၵမ်ႉဝႃႈၵႂႃႇလူင်းတိုၼ်းလၢင်း ၊ ၵမ်ႉဝႃႈ ယေးငိုၼ်းမီးပၼ်ႁႃ  လၢတ်ႈမဵဝ်း ယဝ်ႉမဵဝ်းၼိုင်ႈ ။

ႁဝ်းၶႃႈတႄႉ ပဵၼ်ၵူၼ်းဝၢၼ်ႈလဵဝ်ၵၼ် ယုမ်ႇယမ်ၵၼ်သေဢူၼ်းငိုၼ်းတီႈမၼ်းၼၢင်း ။  မၼ်းၼၢင်းသမ်ႉ လူလၢႆလွင်ႈယုမ်ႇယမ်ႁဝ်း။  ငိုၼ်းၼၼ်ႉ ၵႂႃႇယွၼ်းၸိူင်ႉႁိုဝ်ၵေႃႈ ဢမ်ႇလႆႈၶိုၼ်း ၊ မၼ်းဢမ်ႇဢူၼ်းပၼ် ၶိုၼ်း။ မၼ်းၼၢင်းဝႃႈ ဢမ်ႇမီးငိုၼ်းတႃႇသၢႆႈတႅၼ်းၶိုၼ်း။ တေမိူဝ်းၶၢႆတူင်ႈၼႃးလႄႈသူၼ် ဢိၵ်ႇႁိူၼ်း ယေးမိူင်းတႆးၼၼ်ႉသေ တေမႃးသၢႆႈတႅၼ်းၶိုၼ်းၼႆ။

လိုၼ်းသုတ်း သိုပ်ႇၾူၼ်းၵေႃႈဢမ်ႇႁပ်ႉ။  ဢမ်ႇလႆႈတၢင်းၵပ်းသိုပ်ႇလႃးလႃးမီး 2 လိူၼ်ယဝ်ႉ ၊     ၵူၼ်း တၢင်း ဝၢၼ်ႈတႄႉလၢတ်ႈဝႃႈလွၵ်းလိၼ်လႄႈလွၵ်းၼႃး ႁိူၼ်းယေး ဢမ်ႇၸႂ်ႈၶွင်မၼ်းၼၢင်းလႄႈ မၼ်းၼၢင်း ဢမ်ႇမီးသင်တေၶၢႆပၼ်ၼီႈ – ဝႃႈၼႆ။

ငိုၼ်းၶႃႈၵေႃႉလဵဝ်ၵူၺ်းလူဝ်ႇလႆႈတီႈမၼ်း    4 သႅၼ် 7 မိုၼ်ႇ ငိုၼ်းထႆး ။ ပေႃးပႃးငိုၼ်းဢၼ်ၵူၼ်းၶႃႈ ႁူႉၸၵ်း ၸိူဝ်းလူဝ်ႇလႆႈတီႈမၼ်း မီးယူႇ 6 ၵေႃႉၼႆတႄႉ ၼပ်ႉႁူဝ်လၢၼ်ႉဝၢတ်ႇမၼ်းဢေႃႈ ။

မၼ်းၼၢင်းၼႆႉ ႁဵတ်းၵၢၼ်ဢူၼ်းငိုၼ်းၵူၺ်းဢမ်ႇၵႃးမၼ်းၼၢင်းလဵၼ်ႈၸူႉၵျေး ငိုၼ်းၶူၺ်ႇၼွၵ်ႈမၢႆမီႈပႃး။ ႁဵတ်းၵၢၼ် ၼၢႆးၼႃး (ပွႆးသႃး ) ၊ ၶၢႆထီႇ 2-3 တူဝ် ၸိူဝ်းၼႆႉပႃးၼႆၶႃႈ ဢေႃႈ။  မၼ်းၼၢင်းႁဵတ်းၸိူင်ႉၼႆ တေႃႇၵူၼ်းမိုတ်ႈၵိုဝ်းၸမ်ၸႂ်ၼႆႉ ၼႃႇလိူဝ် ၸုမ်းၵျႃႊၽျႅၼ်ႉ ဢၼ်လႅၼ်ၵိၼ်ၵၼ်ယူႇ ၼႂ်းလုမ်ႈၾႃႉဝၼ်း မိူဝ်ႈၼႆႉယဝ်ႉၶႃႈ။

ၵွပ်ႈၼႆ ၽႂ်ႁူႉၸၵ်း ၼၢင်းၵီႇ ၵူၼ်းဝၢၼ်ႈၵွင်းတပ်ႉ ဢိူင်ႇၵွင်းၵေး ၸႄႈဝဵင်းလႃႈသဵဝ်ႈ ၼႆႉၵေႃႈ ၸွႆႈလၢတ်ႈ ပၼ်ႁႂ်ႈမၼ်းၼၢင်းတႅၼ်းၼီႈႁဝ်းၶႃႈၵူၼ်းႁဵတ်းၵၢၼ်ႁႃၵိၼ်လဵင်ႉတွင်ႉဝၼ်းလႂ်ဝၼ်းၼၼ်ႉၼႆႉၶိုၼ်းဝႆးဝႆးသေၵမ်း။ 

ၼင်ႇႁိုဝ်တေဢမ်ႇလႆႈၼႅင်ၸႂ်ယၢပ်ႇၸႂ်ၸိူင်ႉႁဝ်းၶႃႈၵေႃႈ ႁႂ်ႈဢွၼ်ၵၼ်မီးသတိလီလီ လွင်ႈသူင်ႇငိုၼ်း ဢူၼ်းငိုၼ်းၼႆႉႁႂ်ႈၾၢင်ႉဝႆႉၼၵ်းလီလီသေၵမ်း။

 ၼပ်ႉယမ်ယႂ်ႇၼမ်သေ

ဢေးယိင်း (လႃႈသဵဝ်ႈ)