ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၵျွၵ်ႉမႄး ပွၵ်ႈမိူဝ်းဢဝ်ၶူဝ်းၶွင်ၶိုၼ်းတီႈဝၢၼ်ႈၼွင်ပဵတ်း ထုင်ႉၼွင်ပိင် ယဵပ်ႇၺႃးမၢၵ်ႇ လူႉတၢႆထင်တီႈ 2 ၵေႃႉ ဝႃႈၼႆ ။
မိူဝ်ႈဝႃး ဝၼ်းတီႈ 21/9/2025 ယၢမ်းဝၢႆးဝၼ်း 3 မူင်း ၵူၼ်းဝၢၼ်ႈပၢႆႈၽေးသိုၵ်း တီႈဝၢၼ်ႈ ပၢင်မၢၵ်ႇလုပ်ႇ ယဵပ်ႇၺႃးမၢၵ်ႇလူႉတၢႆမၢတ်ႇၸဵပ်း ၽွင်းပွၵ်ႈမိူဝ်းဢဝ် ၶူဝ်းၶွင် ၼႂ်းဝၢၼ်ႈၼွင်ပဵတ်း ။
ၵူၼ်းဢၼ်ယဵပ်ႇၺႃးမၢၵ်ႇလႆႈလူႉတၢႆၵႂႃႇၼၼ်ႉ ပဵၼ်ၸၢႆးသွၵ်ႈၵျႃႇ ဢႃယု – 39 ပီ မီးလုၵ်ႈသွင်ၵေႃႉ။ ထႅင်ႈၵေႃႉၼိုင်ႈပဵၼ်ၸၢႆးမူဝ်း ဢႃယု 45 ပီ ပဵၼ်ၵူၼ်းဝၢၼ်ႈပၢင်မၢၵ်ႇလုပ်ႇ လူႉတၢႆ ထင်တီႈ ဝႃႈၼႆ ။
သွင်ၵေႃႉၶီႇရူတ်ႉၶိူင်ႈ ယဵပ်ႇၺႃးမၢၵ်ႇ ၼိူဝ်သဵၼ်ႈတၢင်းလူင် ၼႂ်းၵႄႈဝၢၼ်ႈၶၢႆးလူင်လႄႈ ပၢင်မၢၵ်ႇၶေႃႉ တီႈတၢင်းၽႄၵႂႃႇ ဝၢၼ်ႈၼွင်ပဵတ်း ၽွင်းတေပွၵ်ႈမိူဝ်းၶိုၼ်းဝၢၼ်ႈပၢင်မၢၵ်ႇလုပ်ႇ ၼႆယဝ်ႉ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ယိၼ်းသဵင်မၢၵ်ႇ မိူဝ်ႈ 3 မူင်းပၢႆပၢႆၼႆႉၵမ်းၼိုင်ႈ ၊ ထိုင်ႁူဝ်ၶမ်ႈ 6 မူင်းလႄႈ ၶႃသွင်ၵေႃႉ ဢမ်ႇႁွတ်ႈမႃးထိုင်ဢွင်ႈတီႈ ပၢႆႈၽေးသိုၵ်းၼႆႉလႄႈ ၵႂႃႇၸွမ်းႁႃၼၼ်ႉ ႁၼ်တူဝ်တၢႆၵူၺ်းယဝ်ႉ ယဵပ်ႇၺႃးမၢၵ်ႇဝႆႉ”- ဝႃႈၼႆ ။
ယၢမ်းလဵဝ်ၵူၼ်းပၢႆႈၽေးသိုၵ်းတီႈဝၢၼ်ႈၼွင်ပဵတ်း ႁဵတ်းသုမ်ႉႁဵတ်းသွင်း ယူႇၼႂ်းထိူၼ်ႇ ၼႂ်းႁႆႈ ႁူဝ်ၵူၼ်းမီး 200 ပၢႆ ။ ယၢမ်းလဵဝ် လူဝ်ႇတင်းၸွႆႈထႅမ်ၶဝ်ႈၼမ်ႉတင်းၵိၼ်ဝႆႉ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ သုမ်ႉၼိုင်ႈလင်ၼႆႉ လႆႈယူႇၸွမ်းၵၼ်မွၵ်ႈ 20 ၵေႃႉၼႆႉ။ တႃႇၵိၼ်တႃႇယႅမ်ႉၵေႃႈဢမ်ႇမီး ၊ မၢင်ၸိူဝ်းၵေႃႈလႆႈၵႂႃႇႁႃၵူႈသေမႃးၵိၼ် လႆႈၸွႆႈထႅမ်ၵၼ်ၵႂႃႇၸိူင်ႉၼႆ ၊ပေႃးပွၵ်ႈႁိူၼ်းၵေႃႈ သမ်ႉၵႆႉမိူဝ်းယဵပ်ႇၺႃးမၢၵ်ႇ ၊ ဢမ်ႇမိူဝ်းၼႆႉလီယဝ်ႉ ၊ ၵူၼ်းၸွႆႈထႅမ်ၵေႃႈဢမ်ႇမႃးႁွတ်ႈထိုင်၊ သဵၼ်ႈတၢင်းၵႂႃႇမႃးၵေႃႈယၢပ်ႇၼႃႇ ”- ဝႃႈၼႆ ။
မိူၼ်ၼႆၼင်ႇၵဝ်ႇ ၼႂ်းဝၼ်းတီႈ 18/9/2025 ယၢမ်းၵၢင်ၼႂ် ပီႈၵျေႃႇတဵင်း ဢႃယု40 ၵူၼ်းဝၢၼ်ႈၼွင်ပဵတ်း ပွၵ်ႈမိူဝ်း ၸႂ်းႁိူၼ်း မိူဝ်းယဵပ်ႇၺႃးမၢၵ်ႇၼင်ႇၵဝ်ႇ။ ပဵၼ်ၸုမ်းလႂ်ၾင်ဝႆႉဢမ်ႇႁူႉပဵၼ် တၢင်းၼႃႈႁိူၼ်းမၼ်းၸၢႆးလီလီ။ ႁဵတ်းႁႂ်ႈတိၼ်မၼ်းၸၢႆးပုတ်းၶၢတ်ႇၵႂႃႇ။
ၼႂ်းဝၼ်းတီႈ 17/9/2025 ပၢင်တိုၵ်းသိုၵ်းမၢၼ်ႈတင်း သိုၵ်းတဢၢင်းသိုပ်ႇပဵၼ်ႁၢဝ်ႈႁႅင်း တီႈတၢင်းဝၢၼ်ႈၶၢႆးလူင် ။ ၽွင်းပၢင်တိုၵ်းၼၼ်ႉ လုင်းထုၼ်းၸိင်ႇ ဢႃႇယု 50 ပၢႆ ၺႃးယိုဝ်းတီႈတွင်ႉ လူႉတၢႆၵႂႃႇ တီႈႁူင်းယႃႇဝဵင်းပၢင်ႇဢူႈလူင် ( ပြင်ဉီးလွင်) ၽွင်းယူတ်းယႃတူဝ်ဝႆႉ- ၼႆယဝ်ႉ ။
ၼႂ်းၶၢဝ်းတၢင်း 4 ပီၵူၺ်း ၵူၼ်းတၢႆယွၼ်ႉမၢၵ်ႇမႅင်းၾင်လိၼ်ၼႆႉမီးထိုင် 2998 ၵေႃႉယဝ်ႉ ၊ ၽတ်ႉၽဵင်ႇမီးၵူၼ်းတၢႆယွၼ်ႉမၢၵ်ႇမႅင်းၾင်လိၼ်ၼိုင်ႈဝၼ်း 2 ၵေႃႉၼႆ – UNOCHA ပိုၼ်ၽၢဝ်ႇဢွၵ်ႇမႃး မိူဝ်ႈဝၼ်းတီႈ 19/02/2025 ၼင်ႇၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ