ဝၼ်းတီႈ 22/09/2025 ယၢမ်းၵၢင်ၼႂ်ၸဝ်ႉမွၵ်ႈ 5 မူင်းၶိုင်ႈ ရူတ်ႉၵႃးတၢင်ႇႁႅင်းၵၢၼ်ၵူၼ်းမိူင်းမၢၼ်ႈ လမ်းၼိုင်ႈ ပိၼ်ႈၶွမ်ႈတီႈၼိူဝ်သဵၼ်ႈတၢင်းလူင်မၢႆ 3111 ပထုမ်ႊထႃႊၼီႊ တီႈၸႄႈတွၼ်ႈပထုမ်ႊထႃႊၼီႊ မိူင်းထႆး ႁႅင်းၵၢၼ်ယၢၼ်မိူင်းတၢႆ 2 ၵေႃႉ။
ပလိၵ်ႈထႆးပိုၼ်ၽၢဝ်ႇသပ်းၸႅင်ႈဝႃႈ ၵူၼ်းၶပ်းရူတ်ႉငဝ်လပ်းလႄႈ ႁဵတ်းႁႂ်ႈရူတ်ႉၵႃးၽႃႇၺႃးႁူဝ်ႉဢုတ်ႇ ဢၼ်ၶႅၼ်ႈဝႆႉၵၢင်သဵၼ်ႈတၢင်းလူင်သေ ၵႃးပိၼ်ႈ၊ ၵူၼ်းၶီႇမႃးၸွမ်းၼႂ်းရူတ်ႉၵႃးၼၼ်ႉ တၢႆ 2 ၵေႃႉ မၢတ်ႇၸဵပ်း 7 ၵေႃႉ။ ၼႂ်းၼၼ်ႉပဵၼ် ၵူၼ်းၸၢႆး 7 ၵေႃႉလႄႈ ၼၢင်းယိင်း 2 ၵေႃႉ။ ၵူၼ်းၶပ်းရူတ်ႉလႄႈ ၼၢင်းယိင်းၵေႃႉၼိုင်ႈ ၶမ်ဝႆႉလႄႈ ၸုမ်းၸွႆႈထႅမ်ပေႃးလႆႈမႃးယႃႉငၢၵ်ႈၽၵ်းတူရူတ်ႉသေၸွႆႈဢဝ်ဢွၵ်ႇဝႃႈၼႆ။
ၵူၼ်းမၢတ်ႇၸဵပ်း 7 ၵေႃႉၼၼ်ႉတႄႉ ၸုမ်းၸွႆႈထႅမ်ဢဝ်ၵႂႃႇသူင်ႇႁူင်းယႃ ပထုမ်ႊထႃႊၼီႊဝႆႉယဝ်ႉ- ၼႆၸုမ်းၸွႆႈထႅမ်တႅမ်ႈတၢင်ႇဝႆႉၼင်ႇၼႆ။
ၵူၼ်းဢၼ်ပႃးမႃးၼႂ်းရူတ်ႉၵႃး 8 ၵေႃႉၼၼ်ႉတႄႉ ပဵၼ်ၵူၼ်းမိူင်းမၢၼ်ႈမူတ်းၼႆသေတႃႉ ပဵၼ်ၵူၼ်းလၵ်ႉလွမ်ၶဝ်ႈမိူင်းထႆးႁိုဝ်ဢမ်ႇၼၼ် ပဵၼ်ႁႅင်းၵၢၼ် ဢၼ်ထုၵ်ႇၸွမ်းပၵ်းပိူင်မီႈႁိုဝ်ၼႆၼၼ်ႉတႄႉတိုၵ်ႉၸွပ်ႇထၢမ်ၵူတ်ႇထတ်းတူၺ်းယူႇ ပလိၵ်ႈထႆးပိုၼ်ၽၢဝ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ