ၾၢႆႇပၵ်းတႃပႂ်ႉတူၺ်းၾိင်ႈၾႃႉရႃႇသီႇ မိူင်းထႆးပိုၼ်ၽၢဝ်ႇဝႃႈ လူမ်းလႅင်ႉ ရႃႊၵႃႊသႃႊ ဢၼ်လုၵ်ႉတီႈမိူင်းၾိလိပ်ႉပိၼ်ႊသ် မႃးဝၼ်းတီႈ 21/09/2025 ၼႆႉၼၼ်ႉ သုတ်ႉၶဝ်ႈမႃးတၢင်းဝၼ်းတူၵ်းၼႆႉတိၵ်းတိၵ်းသေ တေၶိုၼ်ႈၾင်ႇတွၼ်ႈတၢင်းၼိူဝ်မိူင်းဝႅတ်ႉၼၢမ်း၊ ၶၢမ်ႈမိူင်းလၢဝ်း ၶဝ်ႈထိုင်မိူင်းထႆးတွၼ်ႈၼိူဝ် ၊ မိူင်းတႆးပွတ်းဢွၵ်ႇ လႄႈပွတ်းၸၢၼ်း ၼႂ်း ဝၼ်းတီႈ 23 ထိုင် 26 လိူၼ်သႅပ်ႉထႅမ်ႊပိူဝ်ႊၼႆႉ ဝႃႈၼႆ။

လူမ်းလႅင်ႉလုၵ်ႈၼႆႉ လုၵ်ႉတီႈၼႃႈၼမ်ႉပၢင်ႇလၢႆႇဝၼ်းဢွၵ်ႇမိူင်းၾိလိပ်ႉပိၼ်ႊသ်ၶိုၼ်ႈမႃးၼၼ်ႉ မီးႁႅင်းလူမ်းၽတ်ႉ 185 ၵီႊလူဝ်ႊမီႊတိူဝ်ႊ တေႃႇၸူဝ်ႈမူင်း။ ဝၼ်းတီႈ 22 မိူဝ်ႈၼႆႉ ၶဝ်ႈမႃးထိုင်ပၢင်ႇလၢႆႇၶႄႇၸၢၼ်းသေ တေလၢမ်းမႃးတၢင်းတူၵ်းၼႆႉ မႃးထိုင်ၵုၼ်ႁွင်ႊၶွင်ႊ။ ၶိုၼ်ႈမႃးၸွမ်းၾင်ႇပၢင်ႇလၢႆႇၶႄႇသေ ၶဝ်ႈၵုၼ်ႁၢႆႊလမ်ႊ။ဝၢႆးၼၼ်ႉတေယဵၼ်းပဵၼ်လူမ်းလႅင်ႉႁႅင်းဢွၼ်ႇသေ ၶိုၼ်ႈၸွမ်းၾင်ႇဝႅတ်ႊၼၢမ်ႊ၊ လၢဝ်း သေ ၼႂ်းဝၼ်းတီႈ 23 ထိုင် 26 ၼၼ်ႉ တေၶဝ်ႈထိုင် မိူင်းထႆးတွၼ်ႈၼိူဝ် ၊ တွၼ်ႈဢိသၢၼ် လႄႈ တွၼ်ႈၵၢင်ဢိၵ်ႇ တွၼ်ႈဝၼ်းဢွၵ်ႇ ၸၢင်ႈထိုင်ပႃးဝဵင်းလူင် ၵုင်းထဵပ်ႈ ဝႃႈၼႆ။

ၵွပ်ႈၼႆလႄႈ လူမ်းလႅင်ႉၼႆႉ လႅပ်ႈတေႁႅင်းဝႆႉလႄႈ ၵူၼ်းယူႇၸွမ်းတူၼ်းႁၢဝ်းသၼ်လွႆ ဢိၵ်ႇၸွမ်းႁူၺ်ႈၸွမ်းတူင်ႈ တီႈဢၼ် ၼမ်ႉၵႆႉထူမ်ႈၼၼ်ႉ ႁႂ်ႈဢွၼ်ၵၼ်ၾၢင်ႉတူဝ်။ ၸၢင်ႈမီးၼမ်ႉႁူၺ်ႈၼမ်ႉလွႆၵိုင်ႉၵၢင်ႉၼွင်းထူမ်ႈ။ ၵဵပ်းဝႆႉၶူဝ်းၶွင်ဢၼ်မီးၵႃႈၶၼ်၊ ၶူဝ်းၵႃႈယႂ်ႇၸိူဝ်းၼၼ်ႉၶိုၼ်ႈဝႆႉတီႈသုင်၊ ႁႂ်ႈၾၢင်ႉတူၺ်း/ထွမ်ႇၶၢဝ်ႇငၢဝ်းၾူၼ်လူမ်းယူႇတႃႇသေႇ ။

ၼႂ်းၸႄႈတွၼ်ႈၵဵင်းမႂ်ႇတႄႉ ၵူၼ်းၸိူဝ်းယူႇၼႂ်းၸႄႈဝဵင်းမိူင်း ၊ ႁၢင်ၻူင်ႊ၊ မႄႈရိမ်း၊ ၸွမ်တွင်း၊ ၵဵင်းလၢဝ်၊ သမိူင်း၊ လွႆသၵဵတ်း၊ မႄႈတႅင်၊ မႄႈဢၢႆး၊ ၾၢင်၊ မႄႈၸႅမ်ႇ၊ မႄႈဝၢင်း၊ မႄႈဢွၼ်ႊ၊ ႁွတ်ႉ၊ ၶျႆးပရၵၢၼ်ႊ၊ ဢူမ်ႊၵွႆ၊ ၽရၢဝ်ႉ၊ ဝဵင်းမႂ်ႇၵလျႃႊၼိဝတ်ႉထၼႃႊ၊ လွႆလေႃႇ ၊ ဝဵင်းႁႅင်ၸိူဝ်းၼႆႉ ႁႂ်ႈၾၢင်ႉတူၺ်းၾိင်ႈၾႃႉရႃႇသီႇ။ တေၵႂႃႇတႃႈပႆတၢင်းႁႂ်ႈႁၢင်ႈႁႅၼ်းတူဝ်လီလီ၊ ႁႂ်ႈမေႃထွမ်ႇၶၢဝ်ႇငၢဝ်းသဵၼ်ႈတႃႈသၢႆတၢင်းလီလီဝႃႈၼႆဝႆႉ။

မိူင်းတႆးတႄႉ မိူင်းတႆးပွတ်းဢွၵ်ႇလႄႈပွတ်းၸၢၼ်း ၾူၼ်လူမ်းတေတူၵ်းႁႅင်းတေမီးၾႃႉၽႅတ်ႇၾႃႉလင်။ ဝၼ်းတီႈ 22/09/2025 ၼႆႉၵူၺ်း တီႈတႃႈၶီႈလဵၵ်း ပဵၼ်ႈၼမ်ႉပဵၼ်ၼွင်ထူမ်ႈၶဝ်ႈၼႂ်းဝဵင်းယူႇယဝ်ႉ။ မိူင်းတႆးပွတ်းႁွင်ႇတႄႉ ပဵၼ်ယွတ်ႈပဵၼ်ပၢႆလူမ်းလႅင်ႉလႄႈ ၾူၼ်တေတူၵ်းယူႇ ၵူၺ်းၵႃႈ ဢမ်ႇႁႃႇယႂ်ႇႁႅင်းလႄႈဢမ်ႇပေႃးလႆႈမႆႈၸႂ်ႁႅင်း – ဝႃႈၼႆ။

ၼႃႈၼမ်ႉပၢင်ႇလၢႆႇ တေမီးႁွၼ်ႇၼမ်ႉသုင်ထိုင် 3 မဵတ်ႉ၊ ၵွပ်ႈၼႆ ႁိူဝ်းဢွၼ်ႇ ႁၢမ်ႈဢွၵ်ႇတႃႈ ထုၵ်ႇလီၵိုတ်ႉလိုဝ်ႈၵၢၼ်ဝႆႉၼႂ်းဝူင်ႈဝၢင်ႈၼႆႉ ၾၢႆႇလူင်ႉလႅၼ်ႇၾိင်ႈၾႃႉရႃႇသီႇ ပိုၼ်ၽၢဝ်ႇဝႆႉၼင်ႇၼႆ။

ပီၵၢႆ 2024 ၵေႃႈ လူမ်းလႅင်ႉယႃႊၵိ ဢၼ်လုၵ်ႉတၢင်းၾိလိပ်ႉပိၼ်ႊသ် မႃး ပဵၼ်သၢႆတၢင်းလဵဝ်ၵၼ်ဢၼ်တေမႃးၵမ်းၼႆႉ၊ ၼၼ်ႉၵေႃႈ ၾူၼ်လူမ်းတူၵ်းႁႅင်း ႁဵတ်းႁႂ်ႈၼမ်ႉထူမ်ႈမိူင်းတႆး မိူင်းမၢၼ်ႈ မိူင်းထႆး ႁၢဝ်ႈႁႅင်းသုတ်းၼႂ်းပိုၼ်း။