ၶၢဝ်းဝၢၼ်ႈမိူင်းယုင်ႈၼႆႉ ၵူၼ်းမိူင်းတႆးလႄႈပတ်းပိုၼ်ႉမိူင်းႁူမ်ႈတုမ် ႁႃၵိၼ်လဵင်ႉတွင်ႉယၢပ်ႇၽိုတ်ႇ ၊  ယွၼ်ႉပိူဝ်ႈပၢင်တိုၵ်းၼႂ်းမိူင်းတႆးလႄႈ ပၢႆးမၢၵ်ႈမီးတူၵ်းသေ – ၵူၼ်းမိူင်းတႆးၵမ်ႈၼမ် ပၢႆႈသွၼ်ႈၶဝ်ႈမိူင်းထႆး  ႁႃၵိၼ်လဵင်ႉတွင်ႉၽႂ်မၼ်း ။ လႆႈၶတ်းၸႂ်ယူႇၸွမ်းၶွပ်ႇၸွမ်းပိူင်မိူင်းပိူၼ်ႈ။ ၼႂ်းၵႄႈၼႆႉ သင်ဝႃႈမီး လုၵ်ႈလၢၼ် ႁႅင်းၵၢၼ်ယၢၼ်မိူင်းၵႆႉဢႅဝ်ႇႁႃၽိတ်းမေႃးပေႃႉထုပ်ႉပိူၼ်ႈၸိုင်    ပလိၵ်ႈထႆး ၵႆႉၶဵင်ႈၶႅင်ၵၢၼ် ၵူတ်ႇထတ်း ။ ႁဵတ်းႁႂ်ႈႁႅင်းၵၢၼ်ၸိူဝ်းဢမ်ႇၵဵဝ်ႇၶွင်ႈၵေႃႈ လႆႈယၢပ်ႇၸွမ်း ။ ၼႂ်းလိူၼ်သႅပ်ႊထႅမ်ႊပိူဝ်ႊၼႆႉၵူၺ်း  ၵူၼ်းၼုမ်ႇတႆး လမ်းၽၼ်းပိူၼ်ႈထႅင်ႈ ။ ဢွၼ်ႇယိင်းၵေႃႉၼိုင်ႈ မိုဝ်းပေႃးပုတ်း ။  

ၼႂ်းၵဵင်းမႂ်ႇၸိုင်ႈထႆးၼႆႉ ၵူၼ်းတႆး မီးၼပ်ႉႁူဝ်သႅၼ် ၊ မၢင်ၸိူဝ်း မႃးထင်သဝ်းႁိုင်ၼၢၼ်းသေ ထိုင်တီႈ မီးလုၵ်ႈလၢၼ်လိၼ် ။ မၢင်ၸိူဝ်း လူင်ပွင်ၸိုင်ႈထႆး သမ်ႉပေႃးမၵ်းမၼ်ႈ  ပဵၼ်ၵူၼ်းထႆးသေ ဢွၵ်ႇပၼ်မၢႆၾၢင်ထႆးယဝ်ႉ။  

လုၵ်ႈလၢၼ်လိၼ် သႅၼ်းႁုၼ်ႈမႂ်ႇ မၢင်ၸိူဝ်းလၵ်းလႅမ်သႅမ်းၵႃႈ ၵတ်ႉလႅၼ်ႇ ၼႂ်းၵၢၼ်ႁဵၼ်းၵၢၼ်သွၼ် ၼႂ်းၼႃႈတီႈၵၢၼ်ငၢၼ်းၵူႈတီႈတီႈ ။ သႅၼ်းႁုၼ်ႈမႂ်ႇ မၢင်ၸိူဝ်းၵေႃႈ ႁၼ်ၽိတ်းဝူၼ်ႉၽိတ်းသေ ၵႆႉလႄႇပၢၼ်းၽိတ်းပၢၼ်းငင်ႇပိူၼ်ႈ လူၺ်ႈဢမ်ႇမီးလွင်ႈမီးတၢင်း။

ၵူၼ်းၼုမ်ႇတႆးတီႈၵဵင်းမႂ်ႇ  ၵေႃႇၵၢၼ်ႁၢႆႉၼႆၼၼ်ႉ ယၢမ်ႈပဵၼ်မႃးၶိူဝ်းယႂ်းလႄႈ ၵူၼ်းၼုမ်ႇၽိတ်းၵၼ်တီႈလႂ်ၵေႃႈ ၵမ်ႈၼမ် သမ်ႉပေႃးထုၵ်ႇၼႄးထႃႈဝႃႈ ပဵၼ်လုၵ်ႈမႄႈတႆး ၼႆ လွၼ်ႉလွၼ်ႉ။

လွင်ႈၼႆႉ တႆးၼႂ်းမိူင်းထႆး တၵ်းလူဝ်ႇႁႃလၢႆးတၢင်းပိူင်းထွင်ႇပၼ် ၵူၼ်းၼုမ်ႇသႅၼ်းႁုၼ်ႈမႂ်ႇ ႁႂ်ႈႁူပွင်ႇတႃလႅင်း ႁႂ်ႈမေႃယူႇသဝ်းလူၺ်ႈတင်းၵတ်းယဵၼ် ၼႂ်းၸိုင်ႈမိူင်းပိူၼ်ႈ။

“ၼႂ်းၵဵင်းမႂ်ႇၼႆႉ  ၸုမ်းတူင်ႇၵူၼ်းဢၼ်ႁဵတ်းၵၢၼ်တႆးၼႆ ၼမ်သေတႃႉ ပႆႇပဵၼ်ၼမ်ႉၼိုင်ႈၸႂ်လဵဝ်ၵၼ် ၊ ပႆႇပဵၼ်ၵွၼ်ႈပဵၼ်တုမ်ၵၼ်လႆႈ ။ ၵူႈမူႇၵူႈၸုမ်း တၵ်းလူဝ်ႇမေႃၶဝ်ႈႁႃၵၼ်သေ  ႁႃလၢႆးႁူမ်ႈမိုဝ်းၸဝ်ႈၼႃႈတီႈထႆး တမ်းၽႅၼ်ၵၢၼ် တႃႇယိပ်းၵမ်လႆႈလွင်ႈႁုၵ်ႉႁၢႆႉၸိူဝ်းၼႆႉ ၼင်ႇႁိုဝ်တေဢမ်ႇပဵၼ်ထႅင်ႈ” – ၼႆ ၸၢႆးသႅင်မိူင်း မင်းၵွၼ်း ႁူဝ်ပဝ်ႈသိုဝ်ႇၶၢဝ်ႇၸၢဝ်းၶိူဝ်း မိူင်းထႆးတွၼ်ႈၼိူဝ်/ ၽူႈၸတ်းၵၢၼ်လူင် ႁူင်းပွႆႇသဵင် MAP , FM 99 ၵဵင်းမႂ်ႇ/ ႁူဝ်ပဝ်ႈၵေႃသိုဝ်ႇၶၢဝ်ႇတႆး-  လၢတ်ႈၼင်ႇၼႆ။

ပိူင်ပဵၼ်ဢုၼ်ႇဢုၼ်ႇမႆႈမႆႈတိုၵ်ႉယဝ်ႉၵႂႃႇၼႆႉပဵၼ်မိူဝ်ႈ တဵင်ႈၶိုၼ်း ဝၼ်းတီႈ 16/9/2025 ။  ၵူၼ်းၼုမ်ႇၸၢႆး ၸုမ်းၼိုင်ႈ  ဢမ်ႇယွမ်း 10 ၵေႃႉ ဢမ်ႇမီးၶေႃႈဢၢင်ႈသင်သေ လမ်းၽၼ်းၵူၼ်းၼုမ်ႇၼင်ႇၵၼ်။  ပဵၼ်ၵႂႃႇတီႈႁၢၼ်ႉသၵ်ႉၽႃႈၾႆးၾႃႉ တီႈၼိုင်ႈ ဢၼ်မီးၼႂ်းၵႄႈသဵၼ်ႈတၢင်း သၼ်ၵမ်ႇၽႅင်း – ၵဵင်းမႂ်ႇ ။   

သိုဝ်ႇၶၢဝ်ႇထႆး ၵဵင်းမႂ်ႇ chiangmainews တႄႉ ႁၢႆးငၢၼ်းဝႆႉဝႃႈ – “ ဢၼ်ၺႃးၽၼ်းၵေႃႉဢွၼ်တၢင်းၼႆႉ ပဵၼ်ဢွၼ်ႇယိင်း ဢႃယု ၼႂ်းၵႄႈ 18-20 ပီ ။ မၼ်းၼၢင်းဢဝ်မိုဝ်းႁႄႉလႄႈ ၽၼ်းၺႃးမိုဝ်းထိုင်ပုတ်းၶၢတ်ႇ ။ ထႅင်ႈ ၼုမ်ႇၸၢႆး 2 ၵေႃႉၵေႃႈ ၺႃး ၽၼ်းၼိဝ်ႉၸီႉပုတ်းၵေႃႉၼိုင်ႈလႄႈ ၺႃၽၼ်းတီႈၵွင်းလင် ၵေႃႉၼိုင်ႈ” – ဝႃႈၼႆဝႆႉ ။

ၸွမ်းၼင်ႇ ၵူၼ်းပိုၼ်ႉတီႈ လၢတ်ႈတီႈၸဝ်ႈၼႃႈတီႈထႆးတႄႉ ၵူၼ်းၼုမ်ႇၸိူဝ်းၵေႃႇၵၢၼ်ႁၢႆႉၼႆႉ ၵႆႉတုမ်ၵၼ်တီႈၼႃႈႁၢၼ်ႉသႄႊဝႅၼ်ႉ  ဢၼ်မီးတၢင်းႁၢင်ၻူင်ႊ ၼိူဝ်သဵၼ်ႈတၢင်းၶၢၼ်းၶွင်း ၵွၼ်ႇထိုင်သီႇယႅၵ်ႈ သူၼ်မွၵ်ႇႁေႃၶမ်းလူင်။

ၸိူဝ်းၶဝ် ၶီႇရူတ်ႉၶိူင်ႈဢၼ်သႂ်ႇတေႃႈၵႂၼ်းသဵင်လင် ၊ မၢင်လမ်း ဢမ်ႇမီးပၢႆႉရူတ်ႉ ။ ၵူၼ်းၶီႇၸွမ်းလင်ၵေႃႈ ပႃးၶိူင်ႈမႆႉၶိူင်ႈမိုဝ်း ၸဵမ်မိတ်ႇၸဵမ်လႅဝ်း ။  ပေႃးၵႂႃႇႁူပ်ႉၺႃးၸုမ်းၶဝ် ဢၼ်ႇဝႃႈၸဝ်ႈရူတ်ႉၵႃး ဢမ်ႇဝႃႈ
ရူတ်ႉၶိူင်ႈ သမ်ႉပေႃးၶႂ်ႈယုပ်းၽၢၼ်ႈ  ဝႃႈၼႆ။

ၵူၼ်းၼုမ်ႇ 3 ၵေႃႉဢၼ်ၺႃးႁဵတ်းႁၢႆႉၼႆႉ ဢႃယုၶဝ်ဢမ်ႇပေႃးပိူင်ႈၵၼ် ။ ၸွမ်းၼင်ႇၶဝ်လၢတ်ႈၼႄတီႈသိုဝ်ႇၶၢဝ်ႇထႆးဝႆႉတႄႉ – တင်းသဵင်ႈ ၶဝ်ႈၵႂႃႇၸွမ်းၵၼ် 9 ၵေႃႉ ၵူၺ်းၵႃႈ မီးၶဝ် 3 ၵေႃႉၼႆႉၵူၺ်း ၽွင်းဢွၵ်ႇႁၢၼ်ႉမႃးၼၼ်ႉ ၺႃးၵူၼ်းၼုမ်ႇဝႆႊရုၼ်ႉၸိူဝ်းၼႆႉႁဵတ်းႁၢႆႉ။ လႅပ်ႈၵူၼ်းၼုမ်ႇဝႆႊရုၼ်ႉၸိူဝ်းၼၼ်ႉ မီးပၼ်ႁႃၵၼ်တင်းဝႆႊရုၼ်ႉသေၸုမ်းၸုမ်းသေ လမ်းႁဵတ်းႁၢႆႉၽိတ်းၵေႃႉမၼ်းႁိုဝ်  ၼႆယူႇ။

 သိုဝ်ႇၶၢဝ်ႇ เสพข่าวเชียงใหม่ ၵေႃႈ ႁၢႆးငၢၼ်းဝႆႉဝႃႈ – မိူဝ်ႈၸဝ်ႈၼႃႈတီႈၵူတ်ႇထတ်းတူၺ်း ၵွင်ႇထၢႆႇ CCTV ၸွမ်းသဵၼ်ႈတႃႈသၢႆတၢင်း လႆႈႁၼ် ဝႆႊရုၼ်ႉ ၸုမ်းလုၵ်ႈဢွၼ်ႇ ဢမ်ႇယွမ်း 30 ၵေႃႉ ၶီႇရူတ်ႉၶိူင်ႈ တဵမ်တၢင်း ၽွင်းၵၢင်ၶမ်ႈၵၢင်ၶိုၼ်း – ၵူၼ်းပိုၼ်ႉတီႈလၢမ်းၶၢတ်ႈဝႃႈ ပဵၼ်ၸုမ်းၵူၼ်းၼုမ်ႇ ၸိူဝ်းဢၼ်ၵေႃႇၵၢၼ်ႁၢႆႉၸိူဝ်းၼၼ်ႉ ။ ဢႃယု မီးၼႂ်းၵႄႈ 16 – 18  ဝႃႈၼႆ။

ၵူၼ်းၼုမ်ႇဢၼ်ထုၵ်ႇႁဵတ်းႁၢႆႉလၢတ်ႈၸဝ်ႈၼႃႈတီႈဝႃႈ ၵူၼ်းၼုမ်ႇၸိူဝ်းမႃးၵေႃႇၵၢၼ်ႁၢႆႉၼၼ်ႉ ၼႃႈတႃ မိူၼ် မိူၼ်ၵူၼ်းတႆး(ထႆးယႂ်ႇ) ၊ ထိုင်တီႈပူၵ်ႉၼႃႈပူၵ်ႉတႃဝႆႉၵေႃႈ လၢမ်းႁူႉလႆႈဝႃႈ မိူၼ်ၵူၼ်းတႆး -ဝႃႈၼႆ။

ၵူၼ်းၼုမ်ႇၵေႃႇၵၢၼ်ႁၢႆႉၸိူဝ်းၼႆႉ ၸဝ်ႈၼႃႈတီႈထႆး တီႉၺွပ်းလႆႈဝႆႉယဝ်ႉ 5 ၵေႃႉ တၢင်းမူတ်း ပဵၼ်လုၵ်ႈလၢင်းႁႅင်းၵၢၼ်ဢၼ်လုၵ်ႉမိူင်းႁူမ်ႈတုမ်မၢၼ်ႈမႃး ။ ၵူၼ်းၼုမ်ႇၸိူဝ်းၼႆႉ ယိုၼ်တူဝ်လၢတ်ႈၼႄၸဝ်ႈၼႃႈတီႈဝႃႈ ၶဝ်ၶိၼ်းၵၼ် လၢႆသိပ်းၵေႃႉ ဢၢၼ်းႁႃတွပ်ႇတႅၼ်းၶိုၼ်း ၵူၼ်းၸိူဝ်းယၢမ်ႈမီးလိူင်ႈၵၼ်မႃးမိူဝ်ႈဢွၼ်တၢင်း။ သမ်ႉမႃးၺႃးသႂ်ႇၸုမ်းၵူၼ်းၼုမ်ႇထႆးၸိူဝ်းၼၼ်ႉလႄႈ ထၢင်ႇဝႃႈ ပဵၼ်ၸုမ်းဢၼ်ယၢမ်ႈမီးလိူင်ႈၵၼ်ၼၼ်ႉ ဝႃႈၼႆ။

ဝၼ်းတီႈ 17 ၼၼ်ႉ ၸဝ်ႈၼႃႈတီႈထႆး တီႉၺွပ်းလႆႈထႅင်ႈၸုမ်းၵူၼ်းၼုမ်ႇဢၼ်ၵေႃႇၵၢၼ်ႁၢႆႉထႅင်ႈၵေႃႉၼိုင်ႈ တီႈၵဵတ်ႉလၢၼ်ႇမႄႈထႃး ၼႂ်းၸႄႈတွၼ်ႈလမ်းပုၼ်း ၸိုဝ်ႈ ၸၢႆးမွင်ႇ ႁိုဝ် ဢဵမ်ႊ ဢၢၼ်းပၢႆႈၵႂႃႇၵုင်းထဵပ်ႈ ။ ၵိုတ်းထႅင်ႈၵေႃႉၼိုင်ႈ ၸိုဝ်ႈႁွင်ႉ ၸၢႆးလၢဝ် တိုၵ်ႉပၢႆႈလွတ်ႈဝႆႉ ။ ၾၢႆႇၸဝ်ႈၼႃႈတီႈတေဢၢၼ်းၺွပ်းၵုမ်းႁႂ်ႈလႆႈ ၼႆယဝ်ႉ။

ဢိင်ၼိူဝ်လွင်ႈၸိူဝ်းၼႆႉသေ ယၢမ်းလဵဝ် ၵူၼ်းၸၢဝ်းတႆးၼႂ်းမိူင်းထႆး ပဵၼ်တီႈပိူၼ်ႈ သႄႉၼႄးႁႄႈတႃဝႆႉ။ 

ဢၼ်ၵူၼ်းၼုမ်ႇတႆး ၵေႃႇၵၢၼ်ႁၢႆႉၼႂ်းဝၢၼ်ႈပိူင်ႈမိူင်းပိူၼ်ႈၼႆႉဢမ်ႇၸႂ်ႈတိုၵ်ႉမႃးပဵၼ်ယၢမ်းလဵဝ်။ ၸဵမ်မိူဝ်ႈပူၼ်ႉမႃး 10 ပီယၢဝ်း 20 ပီႁိုင်ၼၼ်ႉၵေႃႈ ယၢမ်ႈပဵၼ်လွင်ႈႁၢႆႉၸႃႉမႃးယဝ်ႉလၢႆပွၵ်ႈ။  

မိူၼ်ၼင်ႇၽွင်းပီ 2009 – ၼၼ်ႉၵေႃႈ မီးၵူၼ်းၼုမ်ႇႁႅင်းၵၢၼ်တႆး 2 ၵေႃႉၵႂႃႇၵၼ်ႉၸၼ်လုၵ်ႈႁဵၼ်းၸၼ်ႉၸွမ်ၸိုဝ်ႈယႂ်ႇ တီႈၵဵင်းမႂ်ႇဢၼ်ၼိုင်ႈသေ ၶႃႈႁႅမ်တၢႆပႅတ်ႈ။ ၽွင်းၼၼ်ႉၵေႃႈၵူၼ်းမိူင်းထႆး ၸဵပ်းၸႂ်ၼိူဝ်ပီႈၼွင်ႉတႆး။ ပလိၵ်ႈထႆး ၵေႃႈလိုပ်ႈလမ်းတီႉၺွပ်းႁႅင်းၵၢၼ်တႆး – ၵူၼ်းထဝ်ႈၵူၼ်းၵႄႇလႄႈလုၵ်ႈဢွၼ်ႇလဵၵ်ႉလႆႈပၢႆႈၶဝ်ႈၵႂႃႇၼွၼ်းၼႂ်းၶၢႆး ၼႂ်းၼႃး ပဵၼ်ဢၼ်ယူႇယၢပ်ႇၵိၼ်းၸႂ်။

ထိုင်ၽွင်းပီ 2011-2012  မႃး ၸုမ်းၵူၼ်းၼုမ်ႇ  သႃႊမူႊရၢႆႊ ပႃးလႅဝ်းပႃးမိတ်ႈသေလမ်းၽၼ်းၵူၼ်းမိူင်းၵႂႃႇမႃးၼႂ်းဝဵင်းၵဵင်းမႂ်ႇ။ ၽွင်းၼၼ်ႉၵေႃႈ ပလိၵ်ႈထႆး လိုပ်ႈလမ်းတီႉၺွပ်းၽဵဝ်ႈမူၺ်ႉ တေႃႇထိုင်ပေႃးဢမ်ႇလႆႈငိၼ်းၶၢဝ်ႇငၢဝ်းၵူၼ်းၸုမ်းၼႆႉထႅင်ႈ။ ၽွင်းၼၼ်ႉသိုဝ်ႇၶၢဝ်းဢွၼ်ၵၼ်ဢွၵ်ႇၶၢဝ်ႇဝႃႈပဵၼ်ၸုမ်းၵူၼ်းၼုမ်ႇတႆးၼႆၼင်ႇၵဝ်ႇ။

ၵွပ်ႈၼႆလႄႈ သင်ဝႃႈ ပီႈၼွင်ႉတႆး ႁဵတ်းလွင်ႈႁုၵ်ႉႁၢႆႉၼႂ်းမိူင်းပိူၼ်ႈမႃးၵမ်းလႂ်ၵေႃႈ ႁဵတ်းႁႂ်ႈ   ႁႅင်းၵၢၼ်တႆးၸိူဝ်း ႁဵတ်းၵၢၼ်ႁႃၵိၼ်လဵင်ႉတွင်ႉၵူႈ ဝၼ်းဝၼ်းၼၼ်ႉၵူၺ်းလႆႈယၢပ်ႇၽိုတ်ႇၸွမ်း ။

ၸၢႆးသႅင်မိူင်း မင်းၵွၼ်း ႁူဝ်ပဝ်ႈသိုဝ်ႇၶၢဝ်ႇၸၢဝ်းၶိူဝ်း မိူင်းထႆးတွၼ်ႈၼိူဝ်/ ၽူႈၸတ်းၵၢၼ်လူင် ႁူင်းပွႆႇသဵင် FM 99 ၵဵင်းမႂ်ႇ လၢတ်ႈတီႈၽူႈတွႆႇႁွၵ်ႈဝႃႈ – “

ပေႃးဝႃႈ ပဵၼ်မႃးၸိူင်ႉၼႆ ပိူၼ်ႈၵေႃႈ ၵႂႃႇမၢပ်ႇၼႄးတႆး ၊ ႁၼ်ပိူၼ်ႈလႃႇတႆးၸိူင်ႉၼႆၵေႃႈ ယင်းပႆႇႁၼ်ၽႂ်ဢွၵ်ႇမႃး ဢွၼ်ႁဵတ်းဢွၼ်ၼမ်းဝႃႈ ႁဝ်းတေဢွၼ်ၵၼ်ၵႄႈလိတ်ႈၸိူင်ႉႁိုဝ်ၽွင်ႈ။သင်ပဵၼ်လႆႈၼႆၵေႃႈ ယွၼ်းၽိတ်ႈမွၵ်ႇထိုင် ၵူႈၵေႃႉၵူႈမူႇၵူႈၸုမ်း ဝႆႉပဵၼ်ၶေႃႈလမ်ႇလွင်ႈသေလႄႈ ဢွၼ်ၵၼ်ထတ်းထွင် ၊ ဢွၼ်ၵၼ်တူၺ်းထိုင် ၸိူဝ်းဢၼ်ပဵၼ်လုၵ်ႈလၢၼ်ႁဝ်းႁႃႉ ပဵၼ်ဢူၺ်းၵေႃႉဢူၺ်းသႄႈႁဝ်းႁႃႉ ႁႂ်ႈႁႄႉလွင်ႈတၢင်းဢမ်ႇလီသေၵမ်းၼႆ ၸိုဝ်ႈသဵင်တႆးႁဝ်းၵေႃႈ ပိူၼ်ႈၵေႃႈ တေဢမ်ႇလႃႇ ဢမ်ႇထၢင်ႇလဵၵ်ႉတႆးႁဝ်း

ၸုမ်းတူင်ႇၵူၼ်းတႆးၼႂ်းမိူင်းထႆးၵေႃႈ ၵိုင်ႇလီ ဢွၵ်ႇလိၵ်ႈ ပိူင်းၼႄဝႃႈ ဢမ်ႇႁၼ်လီၸွမ်း ၵူၼ်းၼုမ်ႇၵေႃႇၵၢၼ်ႁၢႆႉၸိူင်ႉၼႆ ။ ႁႂ်ႈလၢတ်ႈပႃးဝႃႈ လွင်ႈႁုၵ်ႉႁၢႆႉၸိူဝ်းၼႆႉ တုမ်ႉယွၼ်ႈထိုင် ႁႅင်းၵၢၼ်ၸိူဝ်းႁဵတ်းၵၢၼ်လူၺ်ႈသိုဝ်ႈယူဝ်း  ။ ဢၼ်ပဵၼ်ယူႇၸိူဝ်းၼႆႉ ဢမ်ႇၸႂ်ႈတႆးတင်းၸိူဝ်ႉတင်းၶိူဝ်းလႄႈ ႁႂ်ႈၵူၼ်းပိုၼ်ႉတီႈ ၸႅၵ်ႇႁၼ်ပဵၼ်ဢၼ်လႂ်ဢၼ်ၼၼ်ႉ ၼႆ ၸၢႆးသႅင်မိူင်း မင်းၵွၼ်းပၼ်တၢင်းႁၼ်ထိုင်ၼင်ႇၼႆ။