တီႈပွၵ်ႉသၢမ် ဝဵင်းၵၢတ်ႇလေႃႉ ၸိုင်ႈတႆးပွတ်းၸၢၼ်းၼၼ်ႉ သိုၵ်းမၢၼ်ႈဝႃႈ ၵူၼ်းဝၢၼ်ႈၶၢမ်းၶဝ်ႈယူႇၼႂ်းတီႈလိၼ်တပ်ႉသိုၵ်းမၢၼ်ႈဢၼ်ၵဝ်ႇၼႆသေ ႁေႃႈလိုပ်ႈၶၢႆႉဢွၵ်ႇဢမ်ႇယွမ်း 30 လင်ၶႃးႁိူၼ်းဝႃႈၼႆ။

ဝၼ်းတီႈ 14/09/2025 ၽူႈၵွၼ်းၸႄႈဝဵင်း ႁွင်ႉဢဝ်ၵူၼ်းပိုၼ်ႉတီႈသေပၢင်ၵုမ်ဢုပ်ႇၸႅင်ႈၼေဝႃႈ ၼႂ်းၼႃႈလိၼ်တပ်ႉသိုၵ်း ဢၼ်သိုၵ်းမၢၼ်ႈမၢပ်ႇမႂ်ၵူၼ်းဝၢၼ်ႈၼႆႉ မီးလွၵ်းလိၼ်ပဝ်ႇ ဢၼ်ၶၢတ်ႈႁူဝ်ႉဝႆႉ 10 လွၵ်းလႄႈ ဢၼ်ပဵၼ်ႁိူၼ်းယေးသုမ်ႉသွင်းယဝ်ႉသမ်ႉမီး 26 လွၵ်း ႁူမ်ႈၵၼ်တင်းမူတ်းလွၵ်းလိၼ် 36 လွၵ်း ဝႃႈၼႆ။

တီႈပၢင်ၵုမ်ၼၼ်ႉ ၽူႈၵွၼ်းပလိၵ်ႈၸႄႈဝဵင်းလၢတ်ႈၵူၼ်းဝၢၼ်ႈဝႃႈ – “ လူင်ပွင်ၸိုင်ႈတႅပ်းတတ်းသေ သင်ႇမႃးႁႂ်ႈႁဝ်းၸတ်းၵၢၼ်။ ႁဝ်းၵေႃႈမႃးပွင်ႇၶၢဝ်ႇပၼ်သူ။ သင်ဝႃႈသူဢမ်ႇႁဵတ်းၸွမ်းၼႆ တေလႆႈဢဝ်ပၵ်းပိူင်မၢႆမီႈမႃးၸႂ်ႉယဝ်ႉ”- ၼႆ ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈၼင်ႇၼႆ။

လိူဝ်ၼၼ်ႉ လူင်ပွင်ၸိုင်ႈမိူင်းတႆးၵေႃႈသင်ႇမႃး ႁႂ်ႈၵူၼ်းမိူင်းၸိူဝ်းပူၼ်ႉပႅၼ်ၶဝ်ႈယူႇၼႂ်းလိၼ်တပ်ႉသိုၵ်းၼၼ်ႉ ၶၢႆႉဢွၵ်ႇသေ ၵူၼ်ႇယႃႉပႅတ်ႈ ႁႂ်ႈယဝ်ႉၼႂ်းလိူၼ်သႅပ်ႉထႅမ်ႊပိူဝ်ႊၼႆႉ။ သင်ဝႃႈ ဢမ်ႇယွမ်းဢွၵ်ႇၼႆ တေဢဝ်ၸၢၵ်ႈထုၺ်လိၼ်မႃးၽဵဝ်ႈ ဝႃႈၼႆ။

“ ပေႃးလူင်ပွင်ၸိုင်ႈၸီႉသင်ႇၼႆတၵ်းလႆႈႁဵတ်းၸွမ်း။ ပေႃးဢဝ်ပိူင်ငဝ်ႈပိုင်းၸိုင်ႈမိူင်းဝႃႈၼႆ လိၼ်၊ ၼမ်ႉ၊ လူမ်းၼႂ်းၸိုင်ႈမိူင်းၼႆႉ ၸိုင်ႈမိူင်းပဵၼ်ၸဝ်ႈၶွင်” -ၼႆ ၽူႈၵွၼ်းပလိၵ်ႈၸႄႈဝဵင်းၼၼ်ႉပၢႆလွၵ်ႇငိုတ်ႈလၢတ်ႈထႅင်ႈၼင်ႇၼႆ။

ၵူၺ်းၵႃႈ ၵူၼ်းပိုၼ်ႉတီႈ ယူႇဝဵင်းၵၢတ်ႇလေႃႉ တႄႉလၢတ်ႈတီႈၽူႈတွႆႇႁွၵ်ႈဝႃႈ- ၸိူဝ်းၶဝ်ယူႇသဝ်းတီႈၼၼ်ႉမႃးၸဵမ်ပၢၼ်ပေႃႈပၢၼ်မႄႈမႃး ႁိုင်ၼၢၼ်းဢမ်ႇယွမ်း 50 ပီယဝ်ႉ။ လႆႈသႂ်ႇၶွၼ်ႇတီႈလူင်ပွင်ၸိုင်ႈမႃးပၢၼ်သိုပ်ႇပၢၼ် မီးလၵ်းထၢၼ်သၢၵ်ႈသေႇဝႂ်ၶွၼ်ႇလႄႈဝႂ်ၵၢင်းလွတ်ႈၵူႈဢၼ်ဝႃႈၼႆ။

“ ပဵၼ်ၽူႈၵွၼ်းၾၢႆႇၽွင်းငမ်းၸႄႈတွၼ်ႈၵၢတ်ႇလေႃႉလႄႈ ၾၢႆႇၼႃႈလိၼ်ၶဝ်ႁူမ်ႈၵၼ်သေႁဵတ်းၵိၼ်ၵူၺ်း။ ႁဝ်းၶႃႈၵူၼ်းမိူင်းယူႇမႃးတီႈၼႆႉလႆႈပဵၼ် 50 ပီပၢႆယဝ်ႉ။ ၶဝ်မႃးၼႄးႁဝ်းဝႃႈ ႁဝ်းပူၼ်ႉပႅၼ်ယူႇတီႈလိၼ်ၶဝ်ၼႆသေ ၶဝ်ၶိုင်ယႃႉႁိူၼ်းယေးႁဝ်း။ ၶဝ်ၸႂ်ႉၵူၼ်းဝၢၼ်ႈလူင်းလၢႆးမိုဝ်းယွမ်းႁပ်ႉဝႃႇ။ ၽႂ်ဢမ်ႇလူင်းလၢႆးမိုဝ်းပၼ်ၶဝ်” – ဝႃႈၼႆ။

ၽူႈၵွၼ်းပလိၵ်ႈၼၼ်ႉတင်းလွၵ်ႇ တင်းလၢတ်ႈတီႈၵူၼ်းဝၢၼ်ႈဝႃႈ – ၽႂ်ၶၢႆႉဢွၵ်ႇပိုၼ်ႉတီႈၼၼ်ႉၸိုင် လူင်ပွင်ၸိုင်ႈမိူင်းတႆး တေပၼ်တီႈယူႇတႅၼ်းၶိုၼ်း ဢၼ်ပဵၼ်လွၵ်းလိၼ်ဢၼ်မီးတၢင်းၵႂၢင်ႈ 60-40 ပေႇၼၼ်ႉ ဝႃႈၼႆ။

“တီႈတႄႉမၼ်း ပေႃးဢဝ်ပိူင်ငဝ်ႈပိုင်းမိူင်းဝႃႈၸိုင် ႁဝ်းလိုပ်ႈသူဢွၵ်ႇပိုၼ်ႉတီႈလႆႈဢိူဝ်ႈ။ ၼႆႉမၼ်းဢမ်ႇၸႂ်ႈပိုၼ်ႉတီႈသူၶဝ်ယူႇ။ ၼႂ်းၽႅၼ်ႇတီႈ တီႈလိၼ်လူင်ပွင်ၸိုင်ႈၸိုင်ႈမိူင်းဢၼ်မီးသုၼ်ႇလႆႈၸတ်းပွင်ၼၼ်ႉပႃးဝႆႉတီႈၼႆႈၼႆႉ။ ဢၼ်ၼႆႉလူင်ပွင်ၸိုင်ႈၵေႃႈမၵ်းမၼ်ႈဝႆႉယဝ်ႉ။ ဢၼ်မႃးထၢမ်သူယၢမ်းလဵဝ်ၵေႃႈ ယွၼ်ႉပိူဝ်ႈဝူၼ်ႉႁၼ်ထိုင်ၵၢင်ၸႂ်ၵၼ်(ၵူၼ်းတေႃႇၵူၼ်းဢီးလူတူၺ်းထိုင်ၵၼ်) ၼၼ်ႉလႄႈၸင်ႇလႆႈမႃးထၢမ်ၵူၺ်း၊ ”- ဝႃႈၼႆ။

ယူႇတီႈၵူၼ်းၶၢႆတီႈလိၼ်လႄႈႁိူၼ်းယေး တီႈဝဵင်းၵၢတ်ႇလေႃႉတႄႉလၢတ်ႈဝႃႈ – ၶဝ်ဝႃႈၶဝ်တေသၢႆႈတႅၼ်းပၼ်ၶိုၼ်းလွၵ်းလိၼ်ၵေႃႉလွၵ်းၼႆ- တေယုမ်ႇလႆႈၵႃႈႁိုဝ် ပေႃးဝႂ်လွၵ်းလိၼ်ယင်းပႆႇမႃးမီးၼႂ်းမိုဝ်းႁဝ်းႁေ ၼေႃႈ။

ၵူၼ်းပိုၼ်ႉတီႈလၢတ်ႈဝႃႈ – ယွၼ်ႉပႃးၼႂ်းလိၼ်တပ်ႉသိုၵ်းလႄႈလိုပ်ႈၵူၼ်းဝၢၼ်ႈဢွၵ်ႇပိုၼ်ႉတီႈၼႆၵူၺ်းတႄႉဢမ်ႇလႅပ်ႈၸႂ်ႈ။ ၾၢႆႇၼိုင်ႈၵေႃႈလႆႈယိၼ်းမႃးဝႃႈ သိုၵ်းမၢၼ်ႈ မီးၶူင်းၵၢၼ်ၵေႃႇသၢင်ႈႁိူၼ်းလႄႈၸႂ်ႉၵူၼ်းဝၢၼ်ႈပၢႆႈ – ဝႃႈၼႆ။ ၵူၺ်းၵႃႈလွင်ႈၼႆႉ ၾၢႆႇတၢင်းၸုမ်းၶၢဝ်ႇၽူႈတွႆႇႁွၵ်ႈၵေႃႈပႆႇယိုၼ်ယၼ်လႆႈ။

ယွၼ်ႉဝႃႈ ဝဵင်းၵၢတ်ႇလေႃႉၼႆႉ ပဵၼ်ဝဵင်းဢၼ်ယူႇၼိူဝ်လွႆ၊ မီးလိၼ်ၸမ်ႉၼမ်ႉလိူင်ႇ တူၼ်ႈမႆႉလႄႈသၼ်လွႆၶဵဝ်ႁၢင်ႈလီ၊ ပဵၼ်တီႈၵူၼ်းဢႅဝ်ႇယဵမ်ႈတွင်ႈတဵဝ်းၶဝ် သူၼ်ၸႂ်မႃးဢႅဝ်ႇလႄႇ။ ၵွပ်ႈၼႆ ၸဵမ်မိူဝ်ႈၶၢဝ်းသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးတေႃႇထိုင်ယၢမ်းလဵဝ် ၸဝ်ႈငိုၼ်းသႃးၶဝ် ဢိၵ်ႇပႃးၽူႈမၢၵ်ႈၵူၼ်းမီးၼႂ်းပိုၼ်ႉတီႈ ၶိုင်ပွင်ပၢႆးမၢၵ်ႈမီးၵေႃႇသၢင်ႈႁိူၼ်းယေး လႄႈ တီႈလိုဝ်ႈၸႂ် Resort ၼႂ်းၵႄႈပႃႇပႅၵ်ႇၸွမ်းတူၼ်းႁၢဝ်းသၼ်လွႆမႃး။ ၼႂ်းၶၢဝ်းတၢင်း 3-4 ပီၼႆႉ ၶူင်းၵၢၼ်ၵေႃႇသၢင်ႈႁိူၼ်းယေး ၸွမ်းသၢပ်ႇဝဵင်းၵၢတ်ႇလေႃႉ မီးမႃးဢမ်ႇယွမ်း 30 တီႈယဝ်ႉ ၵူၼ်းပိုၼ်ႉတီႈလၢတ်ႈၼင်ႇၼႆ။

တႅမ်ႈၾၢႆႇမၢၼ်ႈ-ၸၢႆးႁၢၼ်လႅင်း