သိုၵ်းမၢၼ်ႈဢၼ်ပႂ်ႉၵဵတ်ႉ/လၢၼ်ႇ တၢင်းၶဝ်ႈ/ဢွၵ်ႇဝဵင်းတႃႈၶီႈလဵၵ်း ႁႄႉၵူတ်ႇထတ်းၸဝ်ႈၵႃးလႄႈၵူၼ်းမိူင်းၸိူဝ်းၶဝ်ႈဢွၵ်ႇၵႂႃႇမႃးႁၢဝ်ႈႁႅင်း။

ၸဝ်ႈရူတ်ႉၵႃးၵေႃႉၼိုင်ႈ ဢႃယုမွၵ်ႈ 30 ပီ လၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈတီႈၵဵတ်ႉ/လၢၼ်ႇ ၶဝ်ႈ/ဢွၵ်ႇတႃႈၶီႈလဵၵ်းၼၼ်ႉ ၵူတ်ႇထတ်း ၸဝ်ႈၵႃးႁႅင်းၼႃႇ ။ ၸဵမ်မိူဝ်ႈႁၢင်လိူၼ် ဢေႃႊၵတ်ႉသ်ပူၼ်ႉမႃး တေႃႇထိုင်ယၢမ်းလဵဝ်ၼႆႉၼေႈ ။ ဝၢႆးလင် ဢၼ်ၶဝ်ဢမ်ႇပၼ် တၢင်ႇၶူဝ်းၵုၼ်ႇ မိူင်းထႆး ၶဝ်ႈဢွၵ်ႇၼၼ်ႉၼေႈ။ ဢၼ်ထတ်းႁႅင်းၼႆႉပဵၼ်တီႈၵဵတ်ႉ/လၢၼ်ႇ မၢၵ်ႇယၢၼ်း ။ ၶဝ်ဝႃႈၶႃႈတၢင်ႇၵုၼ်ႇဢၼ်ၼၼ်ႉဢၼ်ၼႆႉၼႆသေ ၶႃႈတင်းလႆႈပၼ် ငိုၼ်းသႅၼ်ပၢႆ လူးၵွၼ်ႇ။ မိူဝ်ႈၵွၼ်ႇၶဝ်ဢမ်ႇထတ်းပဵင်းၼႆႉ။ ” ဝႃႈၼႆ။

တေႃႇထိုင်ယၢမ်းလဵဝ် သိုၵ်းမၢၼ်ႈဢမ်ႇပၼ်ၸဝ်ႈၵႃးတၢင်ႇၶူဝ်းၵုၼ်ႇသင်လႄႈ ၸဝ်ႈရူတ်ႉၵႃးလႆႈၵိုတ်းၵၢၼ်ဝႆႉတင်းၼမ်။

ၸဝ်ႈရူတ်ႉၵႃးၵေႃႉၼၼ်ႉသိုပ်ႇလၢတ်ႈထႅင်ႈဝႃႈ – “ ဢမ်ႇပၼ်တၢင်ႇၶူဝ်းၵုၼ်ႇယဝ်ႉလႄႈ ႁဝ်းၶႃႈလႆႈတၢင်ႇၵူၼ်းတႅၼ်းတၢင်။ၵူၼ်းၵႂႃႇမႃးၵေႃႈဢမ်ႇပေႃးမီး ၼႂ်းၶၢဝ်းၶိဝ်းၼႆႉ ။ ၵွပ်ႈၼႆၸဝ်ႈၵႃးၵမ်ႈၽွင်ႈပေႃးလႆႈၵိုတ်းၵၢၼ်ဝႆႉ။ သိုၵ်းမၢၼ်ႈတႄႉဝႃႈ ပီၼႆႉသဵင်ႈၶဝ်ၸင်ႇတေပၼ်တၢင်ႇၵုၼ်ႇၶိုၼ်းၼႆသေတႃႉ ပႆႇၸၢင်ႈယုမ်ႇလႆႈ။”- ဝႃႈၼႆ။

ဢၼ်သိုၵ်းမၢၼ်ႈတႄႇသင်ႇႁၢမ်ႈၸဝ်ႈၵႃးတၢင်ႇၶူဝ်းၵုၼ်ႇမိူင်းထႆးမိူင်းၶႄႇၼႆႉ တႄႇမႃးၼႂ်းလိူၼ်ၵျုၼ်ႊ ပီ 2025 ၼႆႉမႃး။ ထိုင်မႃးၼႂ်းလိူၼ်ဢေႃႊၵတ်ႉသ် ၶိုၼ်းသင်ႇပိၵ်ႉၶူဝ်းၵုၼ်ႇထႅင်ႈ 34 သႅၼ်း၊ ၵူတ်ႇထတ်းၵဵတ်ႉ/လၢၼ်ႇ ၸွမ်းလႅၼ်လိၼ်လႄႈ ၸွမ်းတႃႈႁိူဝ်းၼမ်ႉပၢင်ႇလၢႆႇၸိူဝ်းၼႆႉ။ ႁဵတ်းႁႂ်ႈၶူဝ်းၵုၼ်ႇမိူင်းထႆး-မိူင်းၶႄႇ ဢမ်ႇၸၢင်ႈၶဝ်ႈမိူင်းမၢၼ်ႈ။ သင်ဝႃႈႁၼ်ၶူဝ်းၵုၼ်ႇလၢၵ်ႇလၢႆးဢိတ်းဢွတ်းၵေႃႈသိုၵ်းမၢၼ်ႈမႂ်ငိုၼ်းၸဝ်ႈရူတ်ႉၵႃး ၸဝ်ႈႁိူဝ်း။

တႅမ်ႈၾၢႆႇမၢၼ်ႈ- ၸၢႆးသႅင်ဢၢႆႈ