ဝၼ်းတီႈ 17/09/2025 ၽူႈၵုမ်းတပ်ႉလူမ်း (တပ်ႉၵၢင်ႁၢဝ်) ၸဝ်ႈႁေႃၶမ်းမိူင်းထႆး ဢွၵ်ႇၶၢဝ်းတၢင်းၵႂႃႇ ႁူပ်ႉထူပ်း  ၽူႈၵုမ်းၵၢၼ် ၾၢႆႇတပ်ႉလူမ်း (တပ်ႉၵၢင်ႁၢဝ်) မိူင်းမၢၼ်ႈ တီႈဝဵင်းၼေႇပျီႇတေႃႇ မိူင်းမၢၼ်ႈထုင်ႉပဵင်း  ဢုပ်ႇဢူဝ်း တႃႇႁူမ်ႈမိုဝ်းႁဵတ်းသၢင်ႈၼႃႈၵၢၼ်ၵႂႃႇၸွမ်းၵၼ် ဝႃႈၼႆ။

ပိူဝ်ႈတႃႇ ႁွင်ႈၵၢၼ်တပ်ႉလူမ်း (တပ်ႉၵၢင်ႁၢဝ်) တင်းသွင်ၸိုင်ႈမိူင်း တေမီးလွင်ႈၸမ်ၸႂ်ၵၼ်မႃးလိူဝ်ၵဝ်ႇၼၼ်ႉ ၽူႈၵုမ်းၵၢၼ် ၾၢႆႇတပ်ႉလူမ်း (တပ်ႉၵၢင်ႁၢဝ်) မိူင်းမၢၼ်ႈ ၸွမ်သိုၵ်းလူင် ထုၼ်းဢွင်ႇ လႆႈယိုၼ်ႈလိၵ်ႈမွၵ်ႇႁွင်ႉဢဝ် ၽူႈၵုမ်းၵၢၼ် တပ်ႉလူမ်း (တပ်ႉၵၢင်ႁၢဝ်) မိူင်းထႆး Air Chief Marshal Punpakdee Pattanakul လႄႈ မေးၼၢင်းမၼ်း  ဢႅဝ်ႇယဵမ်ႈမိူင်းမၢၼ်ႈ ။

ၼႂ်းပၢင်ႁူပ်ႉထူပ်း တပ်ႉလူမ်း (တပ်ႉၵၢင်ႁၢဝ်) တင်းသွင်ၸိုင်ႈမိူင်းပွၵ်ႈၼႆႉ လႆႈတူၵ်းလူင်းၵၼ်ၵႂႃႇဝႃႈ မိူဝ်းၼႃႈတေႁူမ်ႈၵၼ်ႁဵတ်းသၢင်ႈ ၼႃႈၵၢၼ်ၵႂႃႇ ဝႃႈၼႆ။

လႆႈႁူႉဝႃႈ ၾၢႆႇတူဝ်တႅၼ်းတပ်ႉလူမ်း (တပ်ႉၵၢင်ႁၢဝ်) မိူင်းထႆး ၶီႇႁိူဝ်းမိၼ် သႅၼ်း ATR-72 ၵႂႃႇလူင်းတီႈဝၢင်းႁိူဝ်းမိၼ် ၼေႇပျီႇတေႃႇ သေ ၽူႈမီးၸၼ်ႉ ၼႂ်းတပ်ႉသိုၵ်းမၢၼ်ႈ ၾၢႆႇႁွင်ႈၵၢၼ်တပ်ႉလူမ်း (တပ်ႉၵၢင်ႁၢဝ်) လႄႈ ၽူႈတၢင်ၼႃႈ ၾၢႆႇသိုၵ်းႁေႃၶမ်းမိူင်းထႆး ဢၼ်မီးယူႇၼႂ်းမိူင်းမၢၼ်ႈ ၵႂႃႇပႂ်ႉႁပ်ႉတွၼ်ႈ ဝႃႈၼႆ။

တႅမ်ႈ-ၽူၺ်းၼုမ်ႇ