ပျီႇတူႉၸိတ်ႉပဢူဝ်း PNO/PNA တႂ်ႈသိုၵ်းမၢၼ်ႈယိုတ်းမိူင်း လၢတ်ႈဝႃႈ – ယိုတ်းၵုမ်းလႆႈၶိုၼ်း ၼႃႈတီႈ ၸုမ်းလုၵ်ႉၽိုၼ်ႉၶဝ်ၵုမ်းဝႆႉ ၼႂ်းၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း ဝႃႈၼႆ။

မိူဝ်ႈပီ 2023 လိူၼ်မၢတ်ႉၶျ် ၸုမ်းၽွမ်ႉႁူမ်ႈ သိုၵ်းယၢင်းလႅင် KNDF လႄႈ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်းႁူမ်ႈၵၼ်ဝႆႉၼၼ်ႉ ပဵၼ်ပၢင်တိုၵ်းၵၼ် တၢင်းဝၢၼ်ႈ ၵေႃမႆႉသၢင်း၊ ဝၢၼ်ႈၼမ်ႉၼဵင်ႈ၊ လူင်ပႅၼ်ႈ ၼႂ်းၸႄႈဝဵင်းပၢင်လွင်းသေ ၾၢႆႇသိုၵ်းယၢင်းလႅင် ယိုတ်းၵုမ်းလႆႈ ။

ၼႂ်းႁူဝ်ပီၼႆႉ သိုၵ်းမၢၼ်ႈ ထႅမ်ႁႅင်းသိုၵ်း ႁႅင်းၵွင်ႈၵၢင်ႇ ႁူမ်ႈတင်း ပျီႇတူႉၸိတ်ႉပဢူဝ်းသေ ထူဝ်းသိုၵ်းလေႃႇတိုၵ်းၸုမ်းလုၵ်ႉၽိုၼ်ႉႁၢဝ်ႈႁႅင်း။ ဝၢႆးၼၼ်ႉ တၢင်းဝၢၼ်ႈ ၵေႃမႆႉသၢင်း၊ ဝၢၼ်ႈၼမ်ႉၼဵင်ႈ၊ လူင်ပႅၼ်ႈၸိူဝ်းၼၼ်ႉ သိုၵ်းမၢၼ်ႈတင်း ပျီႇတူႉၸိတ်ႉ ယိုတ်းၵုမ်းလႆႈၶိုၼ်း။

ၶုၼ်ႇၸၢၼ်ႇဢွင်ႇ ၽူႈမီးပုၼ်ႈၽွၼ်းတီႈလုမ်းၾၢႆႇပွင်ႇၶၢဝ်ႇ PNA လၢတ်ႈၽူႈတွႆႇႁွၵ်ႈဝႃႈ – “ တလဵဝ်တၢင်းဝၢၼ်ႈၼမ်ႉၼဵင်ႈၼႆႉတႄႉ ဢမ်ႇမီးပၢင်တိုၵ်း။ ၵူၼ်းဝၢၼ်ႈတႄႉပႆႇၸၢင်ႈပွၵ်ႈၶိုၼ်းႁိူၼ်းယေး။ ႁဝ်းၶႃႈတိုၵ်ႉၽဵဝ်ႈမၢၵ်ႇမႅင်းၼႂ်းဝၢင်းၼႂ်းဝၢၼ်ႈပၼ်ၵူၼ်းဝၢၼ်ႈယူႇ။  လႆႈဝႃႈ ႁဝ်းၶႃႈၵုမ်းလႆႈၶိုၼ်း ၵွၼ်ႇပၢင်လိူၵ်ႈတင်ႈတႄႉၼင်ႇၵဝ်ႇဢေႃႈ။  ပေႃးပၢင်လိူၵ်ႈတင်ႈယဝ်ႉယဝ်ႉတႄႉ ဝၢၼ်ႈမိူင်းၵေႃႈတေၵတ်းယဵၼ် ၵူၼ်းမိူင်းၵေႃႈတေလွတ်ႈလႅဝ်းယဝ်ႉ” – ဝႃႈၼႆ။  

သိုၵ်းမၢၼ်ႈပိုၼ်ၽၢဝ်ႇဝႆႉဝႃႈပၢင်လိူၵ်ႈတင်ႈၼႆႉတေၸတ်းၼႂ်းလိူၼ်ၻီႊသႅမ်ႊပိူဝ်ႊ တေမႃးၼႆႉ။ ၼႆလႄႈၼႂ်းပိုၼ်ႉတီႈ သီႇသႅင်ႇ ပၢင်လွင်း ၼႆႉ သိုၵ်းပဢူဝ်းသမ်ႉပေႃးလူင်းလႄႇၼႂ်းဝၢၼ်ႈၼႂ်းသူၼ်သေ တဵၵ်းၵူၼ်းမိူင်းသႂ်ႇၶႅပ်းၵၢင်ၸႂ်ပၼ် ပႃႇတီႇဢၼ်သိုၵ်းမၢၼ်ႈၵမ်ႉထႅမ်ပၼ်ႁႅင်းၼၼ်ႉယူႇ ၵူၼ်းမိူင်းပၢင်လွင်းလၢတ်ႈၼင်ႇၼႆ။

ၼႂ်းမိူင်းတႆးတႄႉ တေၸတ်းႁဵတ်းၵႂႃႇၼႂ်း 12 ၸႄႈဝဵင်း သိုၵ်းမၢၼ်ႈပိုၼ်ၽၢဝ်ႇဝႆႉပႃးၼင်ႇၼႆ။

 ဢိင်ၼိူဝ်ပၢင်တိုၵ်း သေ ၵူၼ်းမိူင်းၸိူဝ်းလႆႈပၢႆႈၽေးသိုၵ်းဝႆႉတႄႉပႆႇၸၢင်ႈပွၵ်ႈၶိုၼ်းႁိူၼ်းယေး။ ယၢမ်းလဵဝ်ပဵၼ်ဢၼ်ယၢပ်ႇၽိုတ်ႇတႃႇလွင်ႈယူႇလွင်ႈၵိၼ်။ ၸဝ်ႈတႃႇၼ ၵေႃႈဢမ်ႇၸၢင်ႈၶဝ်ႈထိုင်ၸွႆႈထႅမ်လႆႈထိုင်တီႈပၢင်သဝ်းၵူၼ်းပၢႆႈၽေးသိုၵ်း။

တႅမ်ႈၾၢႆႇမၢၼ်ႈ- ၼၢင်းၶမ်းၵူႇ