လူင်ပွင်ၸိုင်ႈ မိူင်းၵျပၼ်ႊ ပိုၼ်ၽၢဝ်ႇဝႃႈ ၼႂ်းပီ 2025 ၼႆႉ ၵူၼ်းမိူင်းၵျပၼ်ႊ ၸိူဝ်းဢႃယု 100 ပီၶိုၼ်ႈၼိူဝ် မီးႁိမ်းၸမ် 1 သႅၼ်ၵေႃႉ၊ ပဵၼ်ဢၼ်ႁူဝ်ၼပ်ႉၼမ်သုတ်းၼႂ်းပိုၼ်း၊ ၼႂ်းၼၼ်ႉတႃႇ 88% ပဵၼ်ၼၢင်းယိင်း ဝႃႈၼႆ။

တီႈမိူင်းၵျပၼ်ႊၼႆႉ ႁူဝ်ၼပ်ႉၵူၼ်း ၸိူဝ်းမီးဢႃယု 100 ပီၶိုၼ်ႈၼိူဝ် ပုင်ႈၶိုၼ်ႈမႃးထပ်းၵၼ်ၼႆႉ မီးမႃး ၶၢဝ်းတၢင်း 55 ပီယဝ်ႉ။ တေႃႇထိုင်ၼႂ်းလိူၼ်သႅပ်ႊထႅမ်ႊပိူဝ်ႊ ပီ 2025 ၼႆႉ ၵူၼ်းၸိူဝ်းမီးဢႃယု 100 ပီ ၶိုၼ်ႈၼိူဝ် မီးထိုင် 99,763 ၵေႃႉ ႁွင်ႈၵၢၼ်ၾၢႆႇပၢႆးယူႇလီ မိူင်းၵျပၼ်ႊ ပိုၼ်ၽၢဝ်ႇဝႆႉၼင်ႇၼႆ။

ၼႂ်းလုမ်ႈၾႃႉၼႆႉ မိူင်းၵျပၼ်ႊ ပဵၼ်မိူင်းဢၼ်မီးၵူၼ်းဢႃယုယၢဝ်းသုတ်းၼႂ်းလုမ်ႈၾႃႉ၊ လႆႈၶဝ်ႈသဵၼ်ႈမၢႆ ၵိုၵ်းပိုၼ်းမႃးတႃႇသေႇ။  

 ဢၼ်ႁဵတ်းႁႂ်ႈ မိူင်းၵျပၼ်ႊ မီးၵူၼ်းဢႃယုယၢဝ်း  ၼမ်ၶိုၼ်ႈမႃးဝႆးၼႆႉ ပဵၼ်ယွၼ်ႉ ပိူင်ယူႇသဝ်းၵိၼ်သၢင်ႈ ဢၼ်မႅၼ်ႈၸွမ်းပၢႆးယူႇလီ  ။ ၾၢႆႇၼိုင်ႈၵေႃႈ မိူင်းၵျပၼ်ႊ လႆႈႁူပ်ႉပၼ်ႁႃ လွင်ႈၵိူတ်ႇလဵင်ႉလုၵ်ႈဢွၼ်ႇ ယွမ်းလူင်းမႃးတိၵ်းတိၵ်း။

ၼႂ်းၶၢဝ်းတၢင်း ၼိုင်ႈပီၵူၺ်း ၵူၼ်းၸိူဝ်းဢႃယု 100 ပီၶိုၼ်ႈၼိူဝ် တီႈမိူင်းၵျပၼ်ႊ တိူဝ်းၼမ်မႃးမွၵ်ႈ 5 မိုၼ်ႇၵေႃႉ  ။

ၵူၼ်းၵေႃႉဢႃယုယႂ်ႇလိူဝ်ပိူၼ်ႈ ၼႂ်းမိူင်းၵျပၼ်ႊယၢမ်းလဵဝ် ပဵၼ်ထဝ်ႈယိင်း သျီႊၵေႊၵူဝ်ႊ ၵႃႊၵႃႊဝႃႊ မီးဢႃယု 114 ပီ။ လႄႈ ထဝ်ႈၸၢႆး ၵီႊယူဝ်ႊတႃႊၵႃႊ မီႊၸူႊၼူဝ်ႊ ဢႃယု 111 ပီ။  

ၵွပ်ႈၼႆလႄႈ ၼၢင်းယိင်း ၸိူဝ်းဢႃယု 100 ပီၶိုၼ်ႈၼိူဝ် တီႈမိူင်းၵျပၼ်ႊ တင်းမူတ်းမီး 87,784 ၵေႃႉ၊ ၵူၼ်းၸၢႆးမီး 11,979 ၵေႃႉၼႆ –  ၽူႈမီးပုၼ်ႈၽွၼ်းၾၢႆႇၵဵပ်းသဵၼ်ႈမၢႆၵူၼ်းလႄႈၾၢႆႇပၢႆးယူႇလီ မိူင်းၵျပၼ်ႊၶဝ် ပိုၼ်ၽၢဝ်ႇဝႆႉ ၵွၼ်ႇၼႃႈ ဝၼ်းၵူၼ်း ထဝ်ႈၵူၼ်းၵႄႇ (ဝၼ်းတီႈ 15 လိူၼ်သႅပ်ႊထႅမ်ႊပိူဝ်ႊ) ၼင်ႇၼႆ။