တႄႇၵၢင်လိူၼ်သႅပ်ႊထႅမ်ႊပိူဝ်ႊၼႆႉမႃး တၢမ်တူဝ် ၶွမ်ႊမသျိၼ်ႊပၢင်လိူၵ်ႈတင်ႈ ဢွၼ်ႁူဝ်ၼမ်းၼႃႈသေ ၸတ်းႁဵတ်းပၢင်သွၼ် ၵၢၼ်ၸႂ်ႉတိုဝ်းၶိူင်ႈၸၢၵ်ႈ တႃႇပၼ်ၶႅပ်းၵၢင်ၸႂ် (MEVM) တီႈၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း  ။  

ၼႂ်းဝၼ်းတီႈ 13/9/2025  ယၢမ်းၵၢင်ၼႂ် 10 မူင်း ၽူႈၵွၼ်းၶွမ်ႊမသျိၼ်ႊပၢင်လိူၵ်ႈတင်ႈၸႄႈဝဵင်း ၾၢႆႇတႂ်ႈသိုၵ်းမၢၼ်ႈ ( မြို့နယ်ရွေးကောက်ပွဲကော်မရှင်အဖွဲ့ခွဲ ဦးစီးအရာရှိ ) တေႃႇၼၢင်းမဵဝ်းမဵဝ်းဢွင်ႇ ဢွၼ်ႁူဝ် ၸုမ်းႁၢပ်ႇၵၢၼ်ၾၢႆႇၽွင်းငမ်းလႄႈ ၵူၼ်းၼႂ်းပိုၼ်ႉတီႈ ၸတ်းႁဵတ်းပၢင်သွၼ် ၵၢၼ်ၸႂ်ႉတိုဝ်းၶိူင်ႈၸၢၵ်ႈ တႃႇပၼ်ၶႅပ်းၵၢင်ၸႂ် တီႈၼႂ်းဢိူင်ႇပဵင်းသႄႇ (ပိန်းဆည်) တီႈဝၢၼ်ႈၵုင်းၵၢတ်ႇ (ဈေးကုန်း) ႁွင်ႉၵူၼ်းမႃးၶဝ်ႈႁူမ်ႈ 200 ၵေႃႉ   ။

ၼၢင်းယိင်းဢႃယု 40 ပီ လၢတ်ႈၽူႈတွႆႇႁွၵ်ႈဝႃႈ -“ တီႈဝဵင်းၼမ်ႉၸၢင်ၼႆႉၶဝ်တႄႇပၼ်ပၢင်သွၼ်မႃးၸဵမ်မိူဝ်ႈႁူဝ်လိူၼ်ၼႆႉ ၊ တလဵဝ် ၶဝ်လူင်းပၼ်ၼႂ်းဢိူင်ႇၼႂ်းဝၢၼ်ႈၵူႈဝၼ်း ၊ တီႈၼႂ်းဝဵင်းတႄႉ ဢမ်ႇမီး ၵူၼ်းၵႂႃႇၶဝ်ႈႁူမ်ႈမၼ်းၼမ်”- ဝႃႈၼႆ ။

ၼႂ်းဝၼ်းတီႈ 12/9/2025 ယၢမ်းၵၢင်ၼႂ် 10 မူင်း ႁူဝ်ပဝ်ႈၵေႃႇမတီႇၾၢႆႇၽွင်းငမ်ႊလႄႈၸတ်းၵၢၼ်ၸႄႈဝဵင်း  (မြို့နယ်စီမံခန့်ခွဲရေးနှင့် အုပ်ချုပ်ရေးကော်မတီ ဥက္ကဌ ) ဢူးၼေႇမဵဝ်းထုၼ်း ဢွၼ်ႁူဝ် ၵၢင်ႉၵႄႇၼႂ်းဝၢၼ်ႈလႄႈၵူၼ်းဝၢၼ်ႈပိုၼ်ႉတီႈ ပၼ်ပၢင်သွၼ် တႃႇပၼ်ၶႅပ်းၵၢင်ၸႂ် (MEVM) တီႈၵျွင်းမုၼ်ႇၸဝ်ႈ ဝၢၼ်ႈၼမ်ႉမူဝ် ၼႂ်းဢိူင်ႇၼွင်ႁီး ၵူၼ်းၶဝ်ႈႁူမ်ႈမီး 110 ၵေႃႉ  ။

မိူၼ်ၼႆၼင်ၵဝ်ႇ ၼႂ်းဝၼ်းတီႈ 12/9/2025 ယၢမ်းၵၢင်ၼႂ် 10 မူင်းယူႇတီႈၵၢင်ႉၵႄႇဝဵင်းၶူဝ်လမ် (ခိုလမ်မြို့ အုပ်ချုပ်ရေးမှူး ) ဢူးဢွင်ႇမိၼ်းသူဝ်း ဢွၼ်ႁူဝ်သေ ပၼ်ပၢင်သွၼ် တႃႇပၼ်ၶႅပ်းၵၢင်ၸႂ် (MEVM) ၼႂ်းဢိူင်ႇမၢၵ်ႇမူင်ႈလဝ်း မီးၵူၼ်းၶဝ်ႈႁူမ်ႈ 100 ၵေႃႉ လႄႈတီႈ ဝၢၼ်ႈၽႃငၢၵ်ႈ ၼႂ်းဢိူင်ႇၵႃလိူဝ်ႇ   သမ်ႉမီးၵူၼ်းၶဝ်ႈႁူမ်ႈ 350 ၵေႃႉလႆႈႁူႉၼင်ႇၼႆ ။

ၵဵဝ်ၵပ်းလွင်ႈၼႆႉ ၽူႈၸၢႆး ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“တႃႇတွတ်ႈမႄးၵေႃႈ တေလႆႈပၼ်ၽႂ်ၵေႃႈပေႃးဢမ်ႇႁူႉယဝ်ႉ ပီၼႆႉ ၊ မီး 4-5 ၸုမ်း ဢမ်ႇဢွၵ်ႇၸႂ်ၶႂ်ႈပၼ်ၶႅပ်းၵၢင်ၸႂ်ၶဝ်သေၸုမ်း ၊ ပေႃးလိူၵ်ႈလႆႈ ဢမ်ႇပၼ်ၵေႃႈလႆႈၼႆ တေဢမ်ႇၵႂႃႇပၼ်ၵူၺ်းယဝ်ႉ ၊ ႁဵတ်းပၢင်လိူၵ်ႈတင်ႈၵေႃႈ ၵူၼ်းမိူင်းလႆႈယၢပ်ႇထႅင်ႈၵူၺ်း ၊ ဢမ်ႇၸၢင်ႈမုင်ႈမွင်းသင်”- ဝႃႈၼႆ ။

ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်း တေဢွၼ်ၼမ်းၸတ်းႁဵတ်းၼႆႉ တေပဵၼ် 28/12/2025  ။

ၼႂ်းဝၼ်းတီႈ 20 /08/2025  ယၢမ်းၵၢင်ၶမ်ႈ ၶွမ်ႊမသျိၼ်ႊ ပၢင်လိူၵ်ႈတင်ႈမိူင်းႁူမ်ႈတုမ် တႂ်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇမႃး သဵၼ်ႈမၢႆၸႄႈဝဵင်း 102 ဝဵင်း ဢၼ်တေၸတ်းႁဵတ်း ပၢင်လိူၵ်ႈတင်ႈ တွၼ်ႈၼိုင်ႈၼႆႉ။

ၼႂ်းမိူင်းတႆး 12 ၸႄႈဝဵင်း တေပဵၼ်တီႈၸႄႈဝဵင်း တူၼ်ႈတီး၊ ပၢင်လႃႈ၊ ႁူဝ်ပူင်း၊ ၼွင်ၶဵဝ်၊ ၵဵင်းတုင်၊ တႃႈၶီႈလဵၵ်း၊ ၼမ်ႉၸၢင်၊ မူႇၸေႊ၊ မိူင်းသၢတ်ႇ၊ လႃႈသဵဝ်ႈ၊ လၢင်းၶိူဝ်းလႄႈ ၸႄႈဝဵင်းလွႆလႅမ်ၸိူဝ်းၼႆႉ။

ၸၢၵ်ႈပၼ်ၶႅပ်းမႄးဢၼ်သိုၵ်းမၢၼ်ႈႁဵတ်းဢွၵ်ႇႁင်းၵူၺ်း သေဢဝ်မႃးၸႂ်ႉၼႂ်းပၢင်တွတ်ႈၶႅပ်းၵၢင်ၸႂ် MEVM ၵမ်းၼႆႉၼႆႉ ပိူင်လူင်တေမီးဝႆႉ 3 တွၼ်ႈ။ တွၼ်ႈၸၢၵ်ႈပၼ်ၶႅပ်းၵၢင်ၸႂ် (Ballot Unit-BU)၊ တွၼ်ႈၸၢၵ်ႈၵုမ်း(Control Unit -CU) လႄႈတွၼ်ႈပၼ်ၶေႃႈတွပ်ႇဝႃႈ ပၼ်ၶႅပ်းၵၢင်ၸႂ်ယဝ်ႉ(Verification Unit -VU) ၸဵမ်ၸိူဝ်းၼႆႉ။ ပိူင် MEVM ပၼ်ၶႅပ်းၵၢင်ၸႂ်လူၺ်ႈၸၢၵ်ႈၼႆႉ ဢမ်ႇလႆႈၸႂ်ႉဝႂ်ၶႅပ်းမႄး။ ႁဝ်းၶႂ်ႈလိူၵ်ႈပၼ်ၽွင်းတႅၼ်းၵေႃႉလႂ်ၵေႃႈ ႁဝ်းမႃးတဵၵ်းၸိုဝ်ႈၵေႃႉၼၼ်ႉၵူၺ်း။ ပေႃးတဵၵ်းၸိုဝ်ႈယဝ်ႉၼႆ တေမီးၸေႈဢွၼ်ႇပိတ်းၼိုင်ႈဢွၵ်ႇမႃးတီႈၸၢၵ်ႈ။ ၼႂ်းၸေႈၼၼ်ႉတေၼႄဝႆႉဝႃႈႁဝ်းပၼ်ၶႅပ်းၵၢင်ၸႂ်ၽႂ်ၵေႃႉလႂ်။ ႁဝ်းၸၢင်ႈထတ်းတူၺ်းဝႃႈၸွင်ႇမၼ်းမႅၼ်ႈဢမ်ႇမႅၼ်ႈၵၼ်တင်းဢၼ်ႁဝ်းတဵၵ်းပၼ်ၼၼ်ႉ – ၼႆသိုၵ်းမၢၼ်ႈတႄႉပိုၼ်ၽၢဝ်ႇဝႆႉၼင်ႇၼႆ။

ၵူၺ်းၵႃႈ ပိူင်ပၼ်ၶႅပ်းမႄးတင်းၸၢၵ်ႈၼႆႉ ဢမ်ႇၸႂ်ႈပိူင် Automatic- တေမီးၵူၼ်းၵုမ်းၶိူင်ႈၸၢၵ်ႈပႃး – ပဵၼ်ပိူင် Manualလႄႈ ဢမ်ႇမီးလွင်ႈႁူမ်ႇလူမ်ႈ ဢမ်ႇၸၢင်ႈယုမ်ႇယမ်လႆႈသေဢိတ်း။ ယဝ်ႉၵေႃႈ သင်ဝႃႈၼပ်ႉၽိတ်းသေၶႂ်ႈၶိုၼ်းၼပ်ႉ ၶႂ်ႈၶိုၼ်းတူၺ်းၼႆၵေႃႈ ဢမ်ႇၸၢင်ႈ။ ယွၼ်ႉဝႃႈဢမ်ႇၸႂ်ႉၸေႈ ၶႅပ်းဝႂ် လႄႈ တေဢမ်ႇမီးသၢၵ်ႈသေႇလၵ်းထၢၼ်သင် ၶမ်ဝႆႉၼႂ်းၸၢၵ်ႈ ။ ၵွပ်ႈၼႆ ၾၢႆႇသိုၵ်းမၢၼ်ႈ ၶႂ်ႈလႆႈၶေႃႈတွပ်ႇ ၽွၼ်းၵၢၼ်လိူၵ်ႈတင်ႈပဵၼ်ၸိူင်ႉႁိုဝ်ၵေႃႈ ယူႇၼႂ်းမိုဝ်း ၽူႈၵုမ်းႁူင်းတွတ်ႈၶႅပ်းမႄးလႄႈၶွမ်ႊမသျိၼ်ႊပၢင်လိူၵ်ႈတင်ႈၼႂ်းပိုၼ်ႉတီႈ ၵူၺ်းၼႆ ၵူၼ်းၵႂႃႇၶဝ်ႈႁူမ်ႈပၢင်သွၼ်လၢႆးၸႂ်ႉၸၢၵ်ႈၼၼ်ႉလၢတ်ႈၼင်ႇၼႆ။

ယၢမ်းလဵဝ် သိုၵ်းမၢၼ်ႈၼႆႉ လူင်းပၼ်ပၢင်သွၼ်လၢႆးၸႂ်ႉၸၢၵ်ႈတွတ်ႈၶႅပ်းၵၢင်ၸႂ်ယူႇၵူႈတီႈ ဝႃႈၼႆသေတႃႉ ၶိူင်ႈၸၢၵ်ႈ MEVM ၼႆႉ ၸႂ်ႉလွၵ်းလၢႆးပၢႆးၸၢင်ႈၸိူင်ႉႁိုဝ်သေႁဵတ်းမႃးၼႆတိုၼ်းဢမ်ႇသပ်းလႅင်းၼေပႃး။ တေႃႉတႄႉၼေလၢႆးၸႂ်ႉတိုဝ်းလႄႈလၢႆးၵုမ်းၶိူင်ႈၸၢၵ်ႈၵႂႃႇၵူၺ်း ၼႆၵူၼ်းၵႂႃႇၶဝ်ႈႁူမ်ႈပၢင်သွၼ်မႃး ၶိုၼ်းလၢတ်ႈၼေၼင်ႇၼႆ။