လုၵ်ႈဢွၼ်ႇၸၢႆး  3 ၵေႃႉ ၵႂႃႇလဵၼ်ႈၼမ်ႉၼွင် ဢၢင်ႇယႃး (အိုင်ယား) ဢၼ်မီးတီႈၼႂ်းဝၢၼ်ႈ ဢၢင်ႇယႃး တီႈဝဵင်းဢွင်ႇပၢၼ်း(ဢုမ်ႇပဝ်း) ၸိုင်ႈတႆးပွတ်းၸၢၼ်းၼၼ်ႉ  ၸူမ်ၼမ်ႉ  2 ၵေႃႉ  တၢႆ ၵေႃႉၼိုင်ႈ၊ တၼ်းၸွႆႈလႆႈၵေႃႉၼိုင်ႈ  ။

ၼႂ်းဝၼ်းတီႈ 14/9/2025 ယၢမ်းႁူဝ်ၶမ်ႈ 4 မူင်း ၽွင်းလဵၼ်ႈၼမ်ႉယူႇၼၼ်ႉ  လုၵ်ႈဢွၼ်ႇၸၢႆး ၸူမ်ၼမ်ႉ 2 ၵေႃႉ တႃႇၵေႃႉၼိုင်ႈတႄႉ ၵူၼ်းႁိမ်းၼၼ်ႉတၼ်းလူင်းၸွႆႈလႆႈဢွၵ်ႇမႃးၶိုၼ်း၊ ထႅင်ႈၵေႃႉၼိုင်ႈတႄႉ ၸူမ်ႁၢႆၵႂႃႇတင်းၶိုၼ်း ၵူၼ်းဝၢၼ်ႈလႄႈ ၸုမ်းၸွႆႈထႅမ် မႃးၸွႆႈၵၼ်ႁႃ ၵေႃႈဢမ်ႇႁၼ်။  

ထိုင်မႃး ဝၼ်းတီႈ15 /9/2025 ယၢမ်းၵၢင်ၼႂ် 7 မူင်း ၸင်ႇထူပ်းႁၼ်   ။

ၸုမ်းၸွႆႈထႅမ်ပရႁိတ လၢတ်ႈၽူႈတွႆႇႁွၵ်ႈဝႃႈ -“  ၼမ်ႉဢၢင်ႇယႃးၼႆႉပဵၼ်ၼွင်တိုၼ်ႈၵူၺ်းသေတႃႉ  ပိုၼ်ႉၼမ်ႉၼၼ်ႉ မၼ်းမီးၵူမ်ႇမီးဢုင် မၢင်တီႈပဵၼ်သၢႆး၊ မၢင်တီႈလိုၵ်ႉ မၢင်တီႈတိုၼ်ႈ။  ပိုၼ်ႉမၼ်းဢမ်ႇပဵင်းၵၼ် ႁဵတ်းႁႂ်ႈၶႃၸူမ်ၼမ်ႉ။  ၸွႆႈဢွၵ်ႇမႃးလႆႈၵေႃႉၼိုင်ႈ ထႅင်ႈၵေႃႉၼိုင်ႈတႄႉ ႁႃမိူဝ်ႈဝႃးတၢင်းၶမ်ႈဢမ်ႇႁၼ်။ ၼႂ်ၼႆႉၶိုၼ်းၵႂႃႇႁႃထႅင်ႈ  ႁၼ်တူဝ်တၢႆ လွင်ႈၵႂႃႇၶၢင်ႉၶမ်ဝႆႉတီႈတူၼ်ႈမႆႉ ၵၢင်ၼွင်ၼၼ်ႉ  ”- ဝႃႈၼႆ ။

ၵေႃႉၸူမ်ၼမ်ႉတၢႆၼၼ်ႉပဵၼ် မွင်ႇတေႃႇတေႃႇလိၼ်း (မောင်သော်သော်လင်း ) ဢႃယု 15 ၶူပ်ႇ ။ ပဵၼ်လုၵ်ႈၸၢႆး လုင်းၺၢၼ်ႉဝုၼ်း ယူႇပွၵ်ႉဝၢၼ်ႈမႂ်ႇ ( ရွာသစ်ရပ်ကွက် ) ဝဵင်းဢွင်ႇပၢၼ်း  ။

ၽွင်းၶၢဝ်းၾူၼ်ၼႆႉယွၼ်ႉၽေးၵိုင်ႉၵၢင်ႉ မိူၼ်ၼင်ႇ ၼမ်ႉၵိုင်ႉၵၢင်ႉၶိုၼ်ႈသုင် ၊ ၼမ်ႉႁူၺ်ႈၼမ်ႉလွႆၼွင်း   ၵႆႉပဵၼ်လိၼ်ၵူၼ်ႇလိၼ်ပင်းလႄႈ ယူႇတီႈၵူၼ်းပိုၼ်ႉတီႈႁႂ်ႈၾၢင်ႉ ၵႂႃႇမႃး ၾၢင်ႉလုၵ်ႈလၢၼ်ၸဝ်ႈၵဝ်ႇ ယႃႇလႃႈလီပၼ်ၵႂႃႇလဵၼ်ႈၼမ်ႉလဵၼ်ႈၼွင် ဝႃႈၼႆ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၶၢဝ်းၾူၼ်ပေႃးၼမ်ႉၵႆႉထူမ်ႈၵႆႉၼွင်းၸိူင်ႉၼႆ ဢမ်ႇၵႂႃႇလဵၼ်ႈ ၼမ်ႉႁွင်ႈၼႆႉ လီသေပိူၼ်ႈယဝ်ႉ ၊ ယွၼ်ႉၼမ်ႉၵိုင်ႉၵၢင်ႉၵႆႉထူမ်ႈ ၊ ၼမ်ႉႁူၺ်ႈၼမ်ႉလွႆၼွင်းလႄႈ ၸၢင်ႈႁဵတ်းႁႂ်ႈ ပဵၼ်ၽေးတေႃႇသၢႆၸႂ်  ပေႃးတေလႆႈၸႂ်ႉသဵၼ်ႈတၢင်းၼမ်ႉၵေႃႈ ႁႂ်ႈၾင်ႉၵၼ် ၊ ယူႇတီႈပေႃႈမႄႈလုၵ်ႈဢွၼ်ႇၵေႃႈ ၵႆႉပၼ်ၾၢင်ႉလုၵ်ႈလၢင်းၸဝ်ႈၵဝ်ႇ၊ လူလွမ်လုမ်းလႃးတူၺ်းထိုင်ၵၼ်လီလီ ”- ဝႃႈၼႆ ။

ၼမ်ႉႁွင်ႈ ဢၢင်ႇယႃးၼႆႉ ပဵၼ်ၼမ်ႉႁွင်ႈတိုၼ်ႈ လွင်ႈမီးၵူၼ်းၸူမ်ၼမ်ႉတၢႆၼႆႉၵေႃႈ ပဵၼ်ပွၵ်ႈၵမ်းႁႅၵ်ႈ ။ ပဵၼ်ၼမ်ႉၼွင်ဢၼ်ၵူၼ်းပိုၼ်ႉတီႈၵႆႉၵႂႃႇ ဢၢပ်ႇၼမ်ႉ ၵႂႃႇတဵၵ်းမႃးၸႂ်ႉသွႆၼႆယဝ်ႉ ။