တႄႇႁူဝ်လိူၼ်သႅပ်ႊထႅမ်ႊပိူဝ်ႊၼႆႉမႃး သိုၵ်းမၢၼ်ႈ ၸိူဝ်းပၵ်းတပ်ႉပၢင်သဝ်းဝႆႉၸွမ်းသဵၼ်ႈတၢင်းၵႂႃႇမႃး မိူင်းတႆးပွတ်းႁွင်ႇ၊ ပွတ်းၸၢၼ်း တင်ႈၵဵတ်ႉလၢၼ်ႇသေ ၵူတ်ႇထတ်းၶူဝ်းၵုၼ်ႇ ၸွမ်းရူတ်ႉၵႃးႁၢဝ်ႈႁႅင်း ၼႆယဝ်ႉ။

တပ်ႉသိုၵ်းမၢၼ်ႈ ဢၼ်ပၵ်းတပ်ႉဝႆႉ ၼိူဝ်သဵၼ်ႈတၢင်းၵႂႃႇ ၸႄႈဝဵင်းမိူင်းၵိုင်တင်း ဝဵင်းၼမ်ႉလၼ်ႈၼၼ်ႉ တင်ႈၵဵတ်ႉလၢၼ်ႇသေ ၵူတ်ႇထတ်းရူတ်ႉၵႃး ႁႄႉႁၢမ်ႈဢမ်ႇပၼ်ၵူၼ်းမိူင်းတေႃႉတၢင်ႇယႃႈယႃလႄႈ ၶဝ်ႈသၢၼ်လတ်းၽၢၼ်ႇၵႂႃႇလႃးလႃးၼႆ – ၵူၼ်းမိူင်း ၵေႃႉဢွၵ်ႇၶၢဝ်းတၢင်း လုၵ်ႉမိူင်းၵိုင် – ၵႂႃႇတၢင်းဝဵင်းလႃႈသဵဝ်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“သိုၵ်းမၢၼ်ႈ တီႈတပ်ႉ 506 ၼၼ်ႉယဝ်ႉ ၶဝ်ထတ်းၵျၢမ်းၼႃႇ။ မိူဝ်ႈဢွၼ်တၢင်းၶဝ်ထတ်းလႅင်းၵႃးၵူၺ်း၊ မိူဝ်ႈလဵဝ် ၵႃးၵူၼ်းႁိူၼ်းၶီႇၵေႃႈ ၶဝ်ထတ်းမူတ်း။ ၶႃႈသိုဝ်ႉယႃႈယႃတၢင်းမိူင်း ၵိုင်ၼႆႉသေ ဢၢၼ်းမိူဝ်းလႃႈသဵဝ်ႈ။ ၵႃႈၶၼ်မၼ်းဢမ်ႇပေႃးၵႃႈယႂ်ႇၼင်ႇၵဝ်ႇ။ မီးမွၵ်ႈ 5 သႅၼ်ၸိူဝ်းၼႆႉၵူၺ်း။ ယႃႈယႃၵေႃႈ မီးယွပ်းဢွၼ်ႇၼိုင်ႈၵူၺ်း။ ႁမ်ႉပႃးၶဝ်ႈသၢၼ် သွင်သၢမ်ထူင်ၼႆႉ ၶဝ်မႃးၵူတ်ႇႁၼ်ၼႂ်းၵႃးၶႃႈ။ ၶဝ်တိုၼ်းဝႃႈဢမ်ႇ ပၼ်ၶၢမ်ႈ။ ၸႂ်ႉၶႃႈႁူၼ်လင်ၵႂႃႇၶျႃႉၶိုၼ်းယဝ်ႉ ၸင်ႇပၼ်ၶႃႈၶၢမ်ႈၵဵတ်ႉၶဝ်”။

လႆႈႁူႉဝႃႈ ၸွမ်းသဵၼ်ႈတၢင်းၼႂ်းမိူင်းတႆးပွတ်းႁွင်ႇ ဢွင်ႈတီႈမီးသိုၵ်းမၢၼ်ႈတင်ႈၵဵတ်ႉလၢၼ်ႇပႂ်ႉဝႆႉၼၼ်ႉ ၵူတ်ႇထတ်းရူတ်ႉၵႃး ၵူၼ်းမိူင်း ၸိူဝ်းတေႃႉတၢင်ႇၶူဝ်းၵုၼ်ႇႁၢဝ်ႈႁႅင်း၊ သဵၼ်ႈတၢင်းမိူင်းယႆၵႂႃႇတၢင်း ၼႃးမၢၵ်ႇၶေႃ ၼၼ်ႉၵေႃႈ ၾၢႆႇသိုၵ်းမၢၼ်ႈၶဝ် ဢိုတ်းဝႆႉႁိုင် ၶၢဝ်းတၢင်းသၢမ်ဝၼ်းယဝ်ႉ ဝႃႈၼႆ။

ဝၢႆးလင် သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇၵၢၼ်ႁႄႉႁၢမ်ႈ ဢိုတ်းပႅတ်ႈ လွင်ႈတေႃႉၶူဝ်းၵုၼ်ႇ ၶိူင်ႈၸႂ်ႉ တိုဝ်းၵူၼ်းမိူင်း 35 မဵဝ်း ၼႂ်းၵၢင်လိူၼ်ဢေႃႊၵတ်ႊသ်ၼႆႉမႃး ၸဝ်ႈရူတ်ႉ ၸဝ်ႈၵႃး၊ ၸဝ်ႈၵၢၼ်ပၢႆးမၢၵ်ႈမီး၊ ၵူၼ်းမိူင်းၸိူဝ်းပိုတ်ႇႁၢၼ်ႉၶၢႆၵုၼ်ႇ ႁဵတ်းႁႃၵိၼ်လဵင်ႉၼႃႈႁိူၼ်းၵေႃႈ ႁူပ်ႉလွင်ႈယၢပ်ႇၽိုတ်ႇ ၵၢၼ်တေႃႉသူင်ႇၶူဝ်းၵုၼ်ႇႁၢဝ်ႈႁႅင်း။

ယၢမ်းလဵဝ် တုမ်ႉတိူဝ်ႉပႃးၵူၼ်းမိူင်း ၸိူဝ်းဢွၵ်ႇၶၢဝ်းတၢင်း ၼႂ်းမိူင်းတႆးပွတ်းႁွင်ႇ၊ မိူင်းတႆးပွတ်းၸၢၼ်း ၸဵမ်ၸိူဝ်းၼႆႉ။

တႅမ်ႈ – ၽူၺ်းၼုမ်ႇ