ၶူဝ်ၶၢမ်ႈၼမ်ႉၼႂ်းႁူၺ်ႈၵိုတ်ႈ ၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇၼႆႉ ယၢမ်းလဵဝ်မီးၶၢဝ်ႇဢွၵ်ႇမႃးဝႃႈ ၸုမ်းသိုၵ်းမၢၼ်ႈမႄးၶိုၼ်းယဝ်ႉသေ ပၼ်ရူတ်ႉၵႃးတႆႇၶၢမ်ႈၵႂႃႇမႃးလႆႈယဝ်ႉသေတႃႉ ၵူၺ်းၵႃႈ တႃႇၵူၼ်းမိူင်းတႄႉ ယင်းပႆႇပၼ်ၶႂၢင်ႉၵႂႃႇမႃး။

ၵူၼ်းပိုၼ်ႉတီႈ ဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ၼိူဝ်သတၢင်းဢၼ်ၶဝ်တၢင်ႇ (ဂုတ်တွင်းဘီလီတံတား) ၼၼ်ႉ တီႈတႄႉမၼ်း ၶဝ်ပႆႇပၼ်ၵႂႃႇမႃး တေႁိုဝ်ထႅင်ႈယူႇမွၵ်ႈ 1 လိူၼ်ၼႆႉ။ ၶဝ်ဝႃႈ ပေႃးပႆႇသိမ်းလႆႈၵျွၵ်ႉမႄးတႄႉ ၶဝ်တေပႆႇပၼ်ၵႂႃႇမႃး ၼိူဝ်သဵၼ်ႈတၢင်းၼႆႉ။ ၶူဝ်ၼၼ်ႉၵေႃႈ ၶဝ်တေမႄးတႃႇ ထႅမ်ႁႅင်းသိုၵ်းၶဝ်ၵူၺ်း ဢမ်ႇၸႂ်ႈတႃႇၵူၼ်းမိူင်းတႆႇ”- ဝႃႈၼႆ။

ၶူဝ်ႁူၺ်ႈၵိုတ်ႈ ဢၼ်တိုၵ်းမႄးၶိုၼ်းယဝ်ႉၼႆႉ ရူတ်ႉၵႃးတပ်ႉသိုၵ်းမၢၼ်ႈၶဝ် ၸႂ်ႉတိုဝ်းၵႂႃႇမႃးၶိုၼ်းယဝ်ႉ။ ၵူၺ်းၵႃႈ တွၼ်ႈတႃႇၵူၼ်းဝၢၼ်ႈၵူၼ်းမိူင်းတႄႉ ယင်းပႆႇပၼ်ၶႂၢင်ႉၵႂႃႇမႃးလႆႈ – ၵူၼ်းမိူင်းဝဵင်းၼွင်ၶဵဝ် လၢတ်ႈၼႄၼင်ႇၼႆ။

ၶူဝ်ႁူၺ်ႈၵိုတ်ႈၼႆႉ ၶဝ်ႈပႃးၼႂ်းသဵၼ်ႈတၢင်းဢၼ်လမ်ႇလွင်ႈ တႃႇတေႃႉၶူဝ်းၵုၼ်ႇတၢင်းမိူင်းၶႄႇ၊ မိူင်းတႆး၊ မိူင်းမၢၼ်ႈ ၵႂႃႇမႃးႁႃၵၼ်ဢၼ်ၼိုင်ႈ။ ယၢမ်းလဵဝ်သမ်ႉ ၵႂႃႇမႃးၵႃႉၶၢႆဢမ်ႇလႆႈလႄႈ ႁဵတ်းႁႂ်ႈၶူဝ်းသူၼ်ၵူၼ်းမိူင်း ၶၢႆဢမ်ႇလႆႈၵႃႈၶၼ် ၼႆယဝ်ႉ။

ၶဝ်ႈၵၢပ်ႇဢၼ်ဢွၵ်ႇၼႂ်းၸႄႈဝဵင်းၼွင်ၶဵဝ်ၼႆႉ မိူဝ်ႈသဵၼ်ႈတၢင်းၵႂႃႇမႃးလႆႈလီၼၼ်ႉ ၼိုင်ႈၸွႆႉလႆႈ 6 ႁဵင်ပျႃးသေတႃႉ ယၢမ်းလဵဝ် ယွၼ်ႉသဵၼ်ႈတၢင်းပိၵ်ႉဝႆႉလႄႈ လႆႈၶၢႆၼိုင်ႈၸွႆႉလႂ် 1,300 ပျႃးၵူၺ်း ဝႃႈၼႆ။

ယွၼ်ႉသဵၼ်ႈတၢင်းၼႂ်းႁူၺ်ႈၵိုတ်ႈ ဢမ်ႇပႆႇပိုတ်ႇပၼ်ၵႂႃႇမႃးလႄႈ ႁဵတ်းႁႂ်ႈၵူၼ်းမိူင်း လႆႈလဵပ်ႈၵႂႃႇတၢင်း ၾၢႆႇၵျွၵ်ႉၵူႇ – ဢၢင်ႇတေႃး သဵၼ်ႈတၢင်းၼၼ်ႉသမ်ႉလူႉၵွႆၼမ်လႄႈ လႆႈၸႂ်ႉၶၢဝ်းယၢမ်း ၵႂႃႇမႃးႁိုင်ၼၢၼ်း ၼႆယဝ်ႉ။

“သဵၼ်ႈတၢင်းၼႆႉ ဢမ်ႇၽုၺ်ႇလႄႈ ႁဝ်းၶႃႈလႆႈၵႂႃႇတၢင်းၵျွၵ်ႉၵူႇ သဵၼ်ႈတၢင်းၼၼ်ႉသမ်ႉယၢပ်ႇၼႃႇ သေဢမ်ႇၵႃး လႆႈပၼ်ၶၢဝ်းယၢမ်းႁိုင် မၼ်းဢမ်ႇငၢႆႈၶႃႈ။ ၵျွၵ်ႉၵူႇၵေႃႈ ၵႆၶႃႈလူင်။ ပေႃးဝႃႈ တၢင်းၼႆႉ တၢၼ်ႇလီပႂ်ႉၼိုင်ႈဝၼ်းၼႆ တၢင်းပုၼ်ႉသမ်ႉ လႆႈပႂ်ႉ 2 ဝၼ်း”- ၵူၼ်းပိုၼ်ႉတီႈ ဝဵင်းၼွင်ၶဵဝ် သိုပ်ႇလၢတ်ႈၼႄၼင်ႇၼႆ။

မိူဝ်ႈလိူၼ်ၵျူႊလၢႆႊ ပီ 2025 ပူၼ်ႉမႃးၼၼ်ႉ မိူဝ်ႈၽွင်းၸုမ်းသိုၵ်းမၢၼ်ႈလႄႈ ၸုမ်းသိုၵ်းတဢၢင်း TNLA ပဵၼ်ပၢင်တိုၵ်းၵၼ်ၼၼ်ႉ ၶူဝ်ၶၢမ်ႈၼမ်ႉၼႂ်းႁူၺ်ႈၵိုတ်ႈ ၺႃးႁၢင်ႈမၢၵ်ႇသေလႆႈႁၵ်းတူၵ်းၵႂႃႇ တေႃႇထိုင်ဝၼ်းမိူဝ်ႈၼႆႉ ပဵၼ်ၸုမ်းလႂ် ႁၢင်ႈမၢၵ်ႇယႃႉၵွႆ ဢၼ်ဝႃႈၼၼ်ႉ ယင်းပႆႇလႆႈႁူႉတႅတ်ႈတေႃး။

တီႈၼႂ်းၸႄႈဝဵင်းၼွင်ၶဵဝ်တႄႉ ဝၢႆးၸုမ်းသိုၵ်းမၢၼ်ႈၶဝ် ၵုမ်းၵမ်လႆႈၶိုၼ်းယဝ်ႉၼၼ်ႉ မီးလွင်ႈထႅမ်ႁႅင်း သိုၵ်းတင်းၼမ်သေ တိုၵ်ႉသိုပ်ႇပဵၼ်ပၢင်တိုင်းၵၼ်တင်း ၸုမ်းသိုၵ်းတဢၢင်း TNLA ၼႂ်းၸႄႈဝဵင်းၵျွၵ်ႉ မႄးထႅင်ႈယူႇ ၼႆယဝ်ႉ။