ၼႂ်းၸႄႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇၼႆႉ ႁၢၼ်ႉ KTV လႄႈ ႁူင်းမိပ်ႇၼူတ်ႈလိူင်ႇၼမ်မႃးႁႅင်း လုၵ်ႈဢွၼ်ႇၸိူဝ်းဢႃယုပႆႇတဵမ် 18 ပီ ၵႆႉၵႂႃႇလႄႇလၢဝ်းၼမ် ၵူၼ်းမိူင်းမႆႈၸႂ် ၵူဝ်ၾိင်ႈယၢမ်ႈၵူၼ်းၼုမ်ႇလူႉ။

တႄႇဢဝ် ႁူဝ်ပီ 2023 ၼၼ်ႉမႃး သိုၵ်းမၢၼ်ႈ ယိုတ်းမိူင်းတင်း တပ်ႉသိုၵ်းဝႃႉ UWSA ႁူမ်ႈၵၼ်ၽွင်းငမ်းဝႆႉ ၼႂ်းၸႄႈဝဵင်းတၢင်ႉယၢၼ်း ဝၢႆးၼၼ်ႉ ႁဵတ်းႁႂ်ႈႁၢၼ်ႉ KTV လႄႈ ႁူင်းမိပ်ႇၼူတ်ႈ ၸိူဝ်းၼႆႉ လိူင်ႇၼမ်မႃး တင်းမူတ်းဢမ်ႇယွမ်း 60 ႁၢၼ်ႉ ၼႆယဝ်ႉ။

ၵူၼ်းပိုၼ်ႉတီႈ ဝဵင်းတၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ -“တင်း KTV တင်းႁၢၼ်ႉမိပ်ႇၼူတ်ႈၼႆႉ ႁူမ်ႈၵၼ်တင်းမူတ်းတေမီးယူႇ 60 ပၢႆ။ လုၵ်ႈဢွၼ်ႇ ဢႃယု 14−15 ၸိူဝ်းၼႆႉ ၵေႃႈ ၾိင်ႈယၢမ်ႈလူႉသေ ၵႂႃႇၵၼ်ဢိူဝ်ႈမိူဝ်ႈလဵဝ်။ ၸိူဝ်းပဵၼ်ပေႃႈႁိူၼ်းၼႆၵေႃႈ လႄႇၸႃး၊ လႄႇလၢဝ်းလႄႇလိုၵ်း၊ လဵၼ်ႈၽူႈယိင်း ၽူႈယႃႈၼၼ်ႉၼႃႇ ပဵၼ်ၼၼ်ဝႆႉဢိူဝ်ႈမိူဝ်ႈလဵဝ်။ ပေႃးမႃးတူၺ်းတင်းမူတ်းၼႆႉ ႁၢၼ်ႉၶၢႆတူဝ်ၼႆ တေဢမ်ႇယွမ်း 20 ႁၢၼ်ႉလူးၵွၼ်ႇ”- ဝႃႈၼႆ။

ယွၼ်ႉႁၢၼ်ႉ KTV လႄႈ ႁူင်းမိပ်ႇၼူတ်ႈ တီႈဝဵင်းတၢင်ႉယၢၼ်းၼႆႉသေ ၵူၼ်းမိူင်း ယင်းလႆႈမႆႈၸႂ် ၵူဝ်ၵူၼ်းၼုမ်ႇၶဝ် တိတ်ႉၸပ်းတၢင်းပဵၼ် HIV ၸိူဝ်းၼႆႉပႃးထႅင်ႈ ၼႆယဝ်။

ၵူၼ်းပိုၼ်ႉတီႈ ဝဵင်းတၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ -“ႁဝ်းၶႃႈ ၵူၼ်းပိုၼ်ႉတီႈတႄႉ ဢမ်ႇၶႂ်ႈႁႂ်ႈမၼ်းပဵၼ်မႃး၊ မီးမႃးလွင်ႈ ၸိူင်ႉၼႆ။ ယွၼ်ႉသင်ၼႆ မၼ်းႁဵတ်းႁႂ်ႈၼေႃႇတႅၼ်း ၶိူဝ်းႁဝ်း ၸိူဝ်းၼႆႉ ၾိင်ႈယၢမ်ႈလူႉသေ တူင်ႇဝူင်းၵူၼ်းၵေႃႈလူႉၸွမ်း ဢၼ်တေမႃးၸွမ်းလင်သမ်ႉ မိူဝ်းၼႃႈထႃႈပႆမႃး လွင်ႈတၢင်းပဵၼ်ယေႃးၵႃႇ ၸိူဝ်းၼႆႉၵေႃႈ ၸၢင်ႈတေမီးမႃးၼမ်။ မိူၼ်ၼင်ႇ လွင်ႈၸပ်းတၢင်းပဵၼ် HIV ၸဵမ်ၸိူဝ်းၼႆႉ။ ၵွပ်ႈပိူဝ်ႈမၼ်းၸၢင်ႈပဵၼ်မႃးလႄႈ လွင်ႈၼႆႉ မၼ်းတုမ်ႉတိူဝ်ႉတူင်ႇဝူင်းၵူၼ်းဢိူဝ်ႈ။ ႁဝ်းၶႃႈတႄႉ ဢမ်ႇၶႂ်ႈႁႂ်ႈပဵၼ် ယဝ်ႉၵေႃႈ ဢမ်ႇၶႂ်ႈႁႂ်ႈမီး ၸိူဝ်းၼႆႉ”- ဝႃႈၼႆ။

ၽွင်းပီ 2022 ၼႆႉ တီႈဝဵင်းတၢင်ႉယၢၼ်း မီးႁၢၼ်ႉ KTV လႄႈ ႁူင်းမိပ်ႇၼူတ်ႈၸိူဝ်းၼႆႉ မွၵ်ႈ 10 ႁၢၼ်ႉ ၸိူဝ်းၼႆႉၵူၺ်း။ ထိုင်မႃး ပီ 2025 လိူၼ်သႅပ်ႊထႅမ်ႊပိူဝ်ႊၼႆႉ တိူဝ်းၼမ်မႃး မွၵ်ႈ 50 ႁၢၼ်ႉၵူၺ်းဢမ်ႇၵႃး မၢင်ႁၢၼ်ႉၼႆႉ သင်ႇသိုဝ်ႉယႃႈမဝ်ႈၵမ်လႆႈငၢႆႈငၢႆႈလူမ်လူမ်လူးၵွၼ်ႇၼႆ – ၵူၼ်းၼုမ်ႇဝဵင်းတၢင်ႉယၢၼ်း ၵေႃႉၼိုင်ႈ လၢတ်ႈၼႄၼင်ႇၼႆ။

ႁၢၼ်ႉ KTV လႄႈ ႁူင်းမိပ်ႇၼူတ်ႈၸိူဝ်းၼႆႉ မီးလွင်ႈၵဵဝ်ႇၶွင်ႈၵၼ်တင်း ၾၢႆႇၽွင်းငမ်းၸႄႈဝဵင်း ၸိူဝ်းၼႆႉယူႇ ယင်းသႂ်ႇၶွၼ်ႇပၼ်ပႃး တီႈၸုမ်းယိပ်းၵွင်ႈၵၢင်ႇၼႂ်းပိုၼ်ႉတီႈ ၸိူဝ်းၼႆႉထႅင်ႈတင်းၼမ်ၼႆ ၵူၼ်းပိုၼ်ႉတီႈ ဢၼ်ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈ လၢတ်ႈၼႄၼင်ႇၼႆ။