သိုၵ်းမၢၼ်ႈပိုၼ်ၽၢဝ်ႇဝႃႈတေၸွႆႈၵူၼ်းထူပ်းၽေးၽႅၼ်ႇလိၼ်ဝႆ ၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈၼႆသေတႃႉ ၵူၼ်းထူပ်းၽေးတႄႉတႄႉ ၸိူဝ်းဢမ်ႇၸႂ်ၸႂ်ၵၢင်ႉၵႄႇ ဢမ်ႇလႆႈငိုၼ်းၵမ်ႉၸွႆႈ၊ ၸိူဝ်းလႆႈၵေႃႈ ဢမ်ႇလႆႈတဵမ်ၼင်ႇၶဝ်ပိုၼ်ၽၢဝ်ႇ၊လႆႈၼိုင်ႈၶိုင်ႈၵူၺ်းဝႃႈၼႆ။

ၵူၼ်းမိူင်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ထူပ်းၽေးၽႅၼ်လိၼ်ဝႆ လႆႈမႃးၶၢဝ်းတၢင်း 5 လိူၼ်ပၢႆယဝ်ႉ သိုၵ်းမၢၼ်ႈၸင်ႇမႃးပိုၼ်ၽၢဝ်ႇဝႃႈတေၸွႆႈထႅမ်။

ၼႂ်းဝၼ်းတီႈ 8/9/2025 လူင်ပွင်ၸိုင်ႈမိူင်းတႆး တႂ်ႈသိုၵ်းမၢၼ်ႈၵုမ်းၵမ် ၵမ်ႉၸွႆႈငိုၼ်းတွင်း ပၼ်ၵူၼ်းထူပ်းၽေး ၽႅၼ်ႇလိၼ်ဝႆ တီႈၼႂ်းထုင်ႉၼွင်ႁၢႆးယႃႈ  တႃႇငိုၼ်း 5 ႁဵင်သႅၼ်ပျုး ။ ၵၢင်ႉၵႄႇၵဵပ်းသဵၼ်ႈမၢႆသေ လၢတ်ႈဝႃႈတေၸႅၵ်ႇပၼ် ၼိုင်ႈႁိူၼ်း180 သႅၼ်ပျႃးဝႃႈၼႆသေတႃႉ ၵူၼ်းၸိူဝ်း ႁိူၼ်းယေးလူႉၵွႆၵူၼ်ႇပင်း ဢမ်ႇလႆႈႁပ်ႉတၢင်းၸွႆႈထႅမ်တင်းမူတ်း။ ၸိူဝ်းလႆႈႁပ်ႉတၢင်းၸွႆႈထႅမ်ၵေႃႈ ဢမ်ႇလႆႈငိုၼ်းတဵမ်ၼင်ႇသိုၵ်းမၢၼ်ႈလႄႈၵၢင်ႉၵႄႇပိုၼ်ၽၢဝ်ႇဝႆႉ ။  ၼိုင်ႈလင်တေလႆႈ  72 သႅၼ်ပျႃးၵူၺ်းဝႃႈၼႆသေတႃႉၵေႃႈတေႃႇထိုင်ယၢမ်းလဵဝ်ငိုၼ်းပႆႇထိုင်ၼႂ်းမိုဝ်းဝႃႈၼႆ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ မၢင်ၸိူဝ်းႁိူၼ်းဢမ်ႇလူႉၵွႆၵေႃႈ တၢင်ႇသဵၼ်ႈမၢႆပႃး ၊ ၵၢင်ႉၵႄႇၼႂ်းပွၵ်ႉ 1 သႂ်ႇသဵၼ်ႈမၢႆႁိူၼ်းယေးပီႈၼွင်ႉၶဝ်ပႃး ၊ လွင်ႈၼႆႉၵူၼ်းၼႂ်းပိုၼ်ႉတီႈၵေႃႈပဵၼ်ပၼ်ႁႃၵၼ် ၊ ၵူၼ်းၸိူဝ်းႁိူၼ်းၵူၼ်ႇပင်းလူႉၵွႆၶဝ်ၵေႃႈဝႃႈ-  ႁိူၼ်းၶဝ်ဢမ်ႇလူႉၵွႆၶဝ်တင်းလႆႈ ၵိုင်ႇလီၽႄပၼ်ပႃးႁဝ်းယူႇ  – ၼႆၵေႃႈမီး  ၊  ထႅင်ႈဢမ်ၼိုင်ႈ- ၼႂ်းၶၢဝ်ႇ MRTV သမ်ႉ ပိုၼ်ၽၢဝ်ႇမႃးဝႃႈ  ၵမ်ႉၸွႆႈၼိုင်ႈႁိူၼ်း 180 သႅၼ်ပျႃး၊  ၵူၺ်းၵႃႈၵၢင်ႉၵႄႇ သမ်ႉလၢတ်ႈဝႃႈတေပၼ်  72 သႅၼ်ပျႃးၵူၺ်း။  ၵူၼ်းၼႂ်းပွၵ်ႉ 1 တင်းပွၵ်ႉ2 တႄႉ လႆႈၵူႈႁိူၼ်း  ။ တၢင်ႇဝၢၼ်ႈသမ်ႉဢမ်ႇလႆႈၵူႈႁိူၼ်း။ လၢႆးၶဝ်ႁဵတ်းၼႆႉ ႁဵတ်းႁႂ်ႈၵူၼ်းဝၢၼ်ႈၼင်ႇပၼ်ၵေႃႈ မီးပၼ်ႁႃၵၼ်ထႅင်ႈ” – ဝႃႈၼႆ ။

ၵဵဝ်ႇၵပ်းလွင်ႈၸႅၵ်ႇပၼ်ငိုၼ်းတွင်းၵမ်ႉၸွႆႈ ဢမ်ႇတဵမ်၊  ၵူၼ်းထူပ်းၽေးဢမ်ႇလႆႈလွင်ႈၵမ်ႉၸွႆႈ ၵူႈႁိူၼ်း ၼႆႉသေ  ၵူၼ်းၼႂ်းပိုၼ်ႉတီႈၵေႃႈ မီးလွင်ႈထဵင်မေႃႈၵၼ်  ။

  ဢၼ်လႆႈထူပ်းၽေးၽႅၼ်ႇလိၼ်ဝႆသေလူႉၵွႆႁႅင်းၼႆႉ ပဵၼ်ဝၢၼ်ႈလူင်ၼမ်ႉပၼ်ႇ မီး 4 ပွၵ်ႉယွမ်ႇ ။ ၼႂ်းၼၼ်ႉယၢမ်းလဵဝ်လႆႈ လႆႈတင်းၵမ်ႉၸွႆႈငိုၼ်းၼႆႉပဵၼ် ပွၵ်ႉယွမ်ႇ 1 တင်း 2 ၵူၺ်း ၊ သိုၵ်းမၢၼ်ႈပိုၼ်ၽၢဝ်ႇဝႃႈ ႁိူၼ်းပႅၼ်ႈသွင်ၸၼ်ႉတေပၼ်180 သႅၼ်ပျႃး ၊ ႁိူၼ်းၼိုင်ႈၸၼ်ႉ 100 သႅၼ်ပျႃး ၊ ႁိူၼ်းၽၢၵ်ႈၼိုင်ႈလင် 20 သႅၼ်ပျႃးဝႃႈၼႆသေတႃႉ ထိုင်တီႈၵၢင်ႉၵႄႇလူင်းမႃးလၢတ်ႈ ႁိူၼ်းပႅၼ်ႈသွင်ၸၼ်ႉၼၼ်ႉလႆႈ 72 ပျႃးၵူၺ်း။

လုင်းၸၢႆး ၵူၼ်းဝၢၼ်ႈၵေႇလႃႇလၢတ်ႈၽူႈတွႆႇႁွၵ်ႈဝႃႈ -“  ၶဝ်တေပၼ်ႁိူၼ်း ဢၼ် လူႉၵွႆႇၵႂႃႇယွၼ်ႉၽႅၼ်ႇလိၼ်ဝႆၼၼ်ႉၵူၺ်း ၊ ၵူၼ်းၼႂ်းပိုၼ်ႉတီႈသမ်ႉဢမ်ႇၽွမ်ႉၶႃႈလွင်ႈၼႆႉ။ ႁိူၼ်း ဢမ်ႇပင်းမူတ်းၵေႃႈ မၢင်ၵေႃႉ ၵူၼ်ႇပႅတ်ႈၽၢၵ်ႇၼိုင်ႈၵေႃႈမီး။ ဢမ်ႇၼၼ် ပင်းၵႂႃႇဢိတ်းဢွတ်း ၵေႃႈမီးၸိူဝ်းၼၼ်ႉ   ၽႂ်ၵေႃႈၶႂ်ႈလႆႈလွင်ႈၵမ်ႉၸွႆႈ ၊  ငိုၼ်းတႄႉဢမ်ႇပႆႇႁွတ်ႈထိုင် ၼႂ်းမိုဝ်းၵူၼ်းပိုၼ်ႉတီႈ ၊ တေႁဵတ်းႁိုဝ်ၸႅၵ်ႇပၼ်ဢၼ်ႇဝႃႈၼၼ်ႉၵေႃႈ  ပႆႇလႆႈႁူႉၸွမ်း”- ဝႃႈၼႆ ။

ၼႂ်းၼွင်ႁၢႆးယႃႈ ႁိူၼ်းယေး ဢၼ်လႆႈလူႉၵွႆၵႂႃႇယွၼ်ႉၽႅၼ်လိၼ်ဝႆၼႆႉ  တၢင်းမူတ်း မီး 19 ဝၢၼ်ႈ ၊ လင်ႁိူၼ်မီး  2400 လင်  ။    သဵၼ်ႈမၢႆ ဝၢၼ်ႈတေလႆႈငိုၼ်းၵမ်ႉၸွႆႈၼႆႉယၢမ်းလဵဝ်ပႃးဝႆႉ 5 ဝၢၼ်ႈ- ပဵၼ်ၼႂ်းဢိူင်ႇဝၢၼ်ႈၵေႇလႃႇ ၊ ပလႄးဢူး ၊ ဝၢၼ်ႈလူင်ႁၢႆးယႃႈ ၊ မျွင်းဝႃႉၵျီး ၊ ၺွင်ႇဝိၼ်း ၸိူဝ်းၼႆႉၵူၺ်း။ တၢင်ႇဝၢၼ်ႈဢၼ် ႁိူၼ်း လူႉၵွႆၵူၼ်ႇပင်းၵေႃႈမီးယူႇၵူၺ်းၵႃႈဢမ်ႇပႃးၼႂ်းသဵၼ်ႈမၢႆလႄႈ တေလႆႈႁိုဝ်ဢမ်ႇလႆႈ ယင်းဢမ်ႇႁူႉ၊ ဝႃႈတေပၼ်ၼႆ လၢတ်ႈလၢႆလၢႆ ငိုၼ်းၵေႃႈပႆႇထိုင်ၼႂ်းမိုဝ်း –   ၵူၺ်းၵႃႈၵၢင်ႉၵႄႇ ၸႂ်ႉၵႂႃႇလူင်းလၢႆးမိုဝ်း တီႈႁူင်းပလိၵ်ႈဝႆႉယဝ်ႉ ဝႃႈၼႆ။  

ၼၢင်းယိင်းၵူၼ်းဝၢၼ်ႈ တွင်ႇပူဝ်ႉၵျီးလၢတ်ႈၽူႈတွႆႇႁွၵ်ႈဝႃႈ -“ ငိုၼ်းတႄႉပႆႇလႆႈမႃးၵူၺ်း ၸႂ်ႉၵူၼ်းဝၢၼ်ႈ ၵႂႃႇလူင်းလၢႆးမိုဝ်းတီႈ ႁူင်းပလိၵ်ႈဝႆႉယဝ်ႉ  ၊ ၵူၼ်းပိုၼ်ႉတီႈၵေႃႈ ဢွၼ်ၵၼ်ၶႂ်ႈလႆႈၵႂႃႇလူင်းလၢႆးမိုဝ်း တင်းၼမ်ဢေႃႈ ၊ ၽႂ်ၽႂ်ၵေႃႈၶႂ်ႈလႆႈလူး  ၵိၼ်းၸႂ်ၵၼ်ၶႃႈလူး ၊ တေႁဵတ်းႁိုဝ်ၸႅၵ်ႇပၼ်ၵၼ် တေလႆႈ လၢႆႁိူၼ်း ဢၼ်ဝႃႈၼၼ်ႉတႄႉ ဢမ်ႇပႆႇတူၵ်းလူင်းၵၼ်”- ဝႃႈၼႆ ။

ၽႅၼ်ႇလိၼ်ဝႆသမ်ႉပေႃးလႆႈပဵၼ် 5 လိူၼ်ပၢႆယဝ်ႉသိုၵ်းမၢၼ်ႈၸင်ႇမႃးထၢမ်ပၼ်လွင်ႈၸွႆႈထႅမ်ယၢမ်းလဵဝ်ၼႆႉတႄႉ ပဵၼ်လွၵ်းလၢႆးသူၼ်းတုမ်တႃႇပၢင်လိူၵ်ႈတင်ႈၵူၺ်း – ၼႆ မၼ်းၸၢႆးသိုပ်ႇလၢတ်ႈထႅင်ႈၼင်ႇၼႆ။

“ၶဝ်မႃးၵမ်ႉၸွႆႈပၼ်ငိုၼ်း ၼႆႉတႄႉ လီယူႇၵူၺ်း ၊ ၽႅၼ်ႇလိၼ်ဝႆၼႆႉႁိုင်ယဝ်ႉၶႃႈဢေႃႈ ၊ ၼႂ်းၵႄႈမၼ်းၼႆႉ တီႈၼႂ်းၼွင်ႁၢႆးယႃႈ ထူပ်းၽေးၼမ်ႉ ၊ ၽေးလူမ်းထႅင်ႈ ၊ ငိုၼ်းဢၼ်ၶဝ်မႃးၵမ်ႉၸွႆႈၼၼ်ႉပဵၼ်ငိုၼ်း ဝၢၼ်ႈမိူင်းႁႃႉ ဢမ်ႇၼၼ် ငိုၼ်းတၢင်ႇမိူင်းဢၼ်မႃးၵမ်ႉၸွႆႈႁႃႉ ဢမ်ႇႁူႉ ၊ မႃးၵမ်ႉၸွႆႈၽွင်းပၢင်လိူၵ်ႈတင်ႈၸိူင်ႉၼႆ ပဵၼ်လွၵ်းလၢႆး သူၼ်းတုမ်ၵူၺ်းၶႃႈ” – ဝႃႈၼႆ ။  

ၽႅၼ်ႇလိၼ်ဝႆ (ဢိင်ႇသၼ်ႇ) ဝၼ်းတီႈ 28/03/2025 ယၢမ်းၵၢင်ဝၼ်း 1 မူင်း ဢၼ်သုၼ်ၵၢင် ပဵၼ်တီႈ တိူင်းၸႄႈၵႅင်း ႁႅင်းသၼ်ႇဝႆ 7.7 မႅၵ်ႊၼီႊၵျုတ်ႉ ၼၼ်ႉႁဵတ်းႁႂ်ႈ ၵူၼ်းၼႂ်းထုင်ႉၼွင်ႁၢႆးယႃႈ လူႉတၢႆ 100 ပၢႆ  ၊ ႁိူၼ်းယေးလူႉၵွႆ  2 ႁဵင်ပၢႆ   တေႃႇထိုင်ဝၼ်းမိူဝ်ႈၼႆႉ လူဝ်တင်းၸွႆႈထႅမ် ဝႆႉ ၊ ပႆႇတဵမ်ထူၼ်ႈ  ။

ၾၢႆႇၼိုင်ႈသိုၵ်းမၢၼ်ႈပိုၼ်ၽၢဝ်ႇတေ ၸတ်းပွႆးၽြႃးၸၢမ်ၵဝ်ႈတွၼ်ႈ ၽွင်ႇတေႃႇဢူး  ၼွင်ႁၢႆးယႃႈ တႄႇဝၼ်းတီႈ 22/9 /2025  ၊ တေပၼ်ႇလဵပ်ႈၶဝ်ႈ ဢွၵ်ႇဝၢၼ်ႈ လိုဝ်ႈၵိင်းတီႈဝတ်ႉၼႂ်းၼွင် 21 တီႈ ၊ ထိုင်ဝၼ်းတီႈ 9/10/2025 ၸင်ႇတေယေႃးမုၼ် ၶဝ်ႈဝတ်ႉၵျွင်းလူင်ၸၢမ်ၵဝ်ႈတွၼ်ႈၶိုၼ်းဝႃႈၼႆ ။

ယွၼ်ႉလွင်ႈၼႆႉသေ သိုၵ်းမၢၼ်ႈလိုပ်ႈၵူၼ်းပၢႆႈၽေးသိုၵ်းၸိူဝ်းမႃးလိုဝ်ႈယူႇၸွမ်းဝၢတ်ႉဝႃးၽႃသိူဝ်ႇၼႂ်းၼွင်ႁၢႆးယႃႈ ႁႂ်ႈဢွၵ်ႇၵႂႃႇယူႇတၢင်ႇတီႈ တီႈဢၼ်ၵႆတႃၵူၼ်းတေမႃးဝႆႈၽြႃး ၼႆဝႆႉ။