မိူဝ်ႈၼႆႉ ဝၼ်းတီႈ 10/09/2025 ယၢမ်းၵၢင်ၼႂ် 8 မူင်းၶိုင်ႈ ၾႆးမႆႈႁူင်းၵဵပ်းၶူဝ်းၵုၼ်ႇ (ဂို‌ဒေါင်) တီႈပွၵ်ႉ 2 ဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ လူႉသုမ်းၵႂႃႇၶၼ်ငိုၼ်းမွၵ်ႈ 10 သႅၼ်ပျႃး။

ၵူၼ်းပိုၼ်ႉတီႈ ဝဵင်းတၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်သႂၢင်းၾႆးသႅင်လႅတ်ႇဝႆႉလႄႈ ၵိုင်ႉၵၢင်ႉသျွတ်ႉသေ ၾႆးမႆႈၵူဝ်ႇတွင်ႇၶဝ်ၼႆၶႃႈဢေႃႈ။ ၼႂ်းၼၼ်ႉ မီးၶဝ်ႈမုၼ်းၶဝ်ႈပွင်းၵူၺ်းၼင်ႇၵဝ်ႇ။ လွင်ႈလူႉသုမ်းတႄႉ တေတူၵ်းၶၼ်ငိုၼ်းမွၵ်ႈ 10 သႅၼ်ပျႃးၼႆႉၵႂႃႈ။ လွင်ႈၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီးၶႃႈ”- ဝႃႈၼႆ။

ႁူင်းၵဵပ်းၶူဝ်းၵုၼ်ႇ ဢၼ်ၺႃးၾႆးမႆႈၵႂႃႇၼႆႉ ယူႇတီႈ ၵူၼ်းၼႂ်းပွၵ်ႉသေ ႁူမ်ႈတင်း ၸုမ်းၾၢႆႇၶႄၾႆးၶဝ် ၸွႆႈၶႄၵႂႃႇ။ ဝၢႆးၼၼ်ႉ ပလိၵ်ႈမၢၼ်ႈ ႁွင်ႉဢဝ်ၸဝ်ႈၶွင်ႁၢၼ်ႉၶၢႆၵုၼ်ႇၼႆႉ ၵႂႃႇၸႅတ်ႈထၢမ်ဝႆႉတီႈႁူင်းပလိၵ်ႈ။ တေၺႃးတၢမ်ႇႁိုဝ် တေၺႃးပၼ်ၾၢင်ႉႁိုဝ် ဢၼ်ဝႃႈၼၼ်ႉတႄႉ ပႆႇလႆႈႁူႉၼႆ – ၵူၼ်းပိုၼ်ႉတီႈလၢတ်ႈ။

ၸုမ်းၾၢႆႇၶႄၾႆး တီႈဝဵင်းတၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ -“တီႈၵူဝ်ႇတွင်ႇၶဝ်ၼၼ်ႉ မီးဝႆႉတူႈယဵၼ်၊ ပႅတ်ႇထရီႇ၊ ၼမ်ႉဢႅတ်ႉသ်သိၵ်ႇ၊ သူဝ်ႇလႃႇပျႃး ၸိူဝ်းၼႆႉဝႆႉ။ ႁဝ်းၶႃႈထၢင်ႇတႄႉ တေပဵၼ်ယွၼ်ႉၾႆးသူဝ်ႇလႃႇတင်း ပႅတ်ႇထရီႇ သျွတ်ႉၵူၺ်း။ ႁဝ်းၶႃႈ လႆႈဢဝ်ၵႃးၵႂႃႇၸွႆႈၶႄၾႆး တင်းမူတ်း 3 လမ်းၶႃႈဢေႃႈ”- ဝႃႈ ၼႆ။

ပီၼႆႉ တီႈဝဵင်းတၢင်ႉယၢၼ်းၼႆႉ မီးလွင်ႈၾႆးမႆႈမႃး သွင်ပွၵ်ႈပႃးပွၵ်ႈၼႆႉယဝ်ႉ မိူဝ်ႈၵမ်းဢွၼ်တၢင်းၼၼ်ႉ ပဵၼ်ၵႂႃႇမိူဝ်ႈဝၼ်းတီႈ 09/03/2025 ၼၼ်ႉၵေႃႈ ၾႆးမႆႈႁိူၼ်းၵူၼ်းဝၢၼ်ႈ တီႈပွၵ်ႉ 3 ႁိမ်းၵၢတ်ႇၵဝ်ႇ ဝဵင်းတၢင်ႉယၢၼ်း ယိင်းဢွၼ်ႇ ဢႃယု 18 ပီ ၵေႃႉၼိုင်ႈ ၼွၼ်းလပ်းသေ မႆႈပႃးၵႂႃႇၸွမ်းၾႆး။

ပူၼ်ႉမႃး မိူဝ်ႈဝၼ်းတီႈ 03/07/2023 ၼၼ်ႉၵေႃႈ ၾႆးမႆႈႁၢၼ်ႉၶၢႆၵုၼ်ႇယွႆႈႁၢၼ်ႉၼိုင်ႈ ၼႂ်းဝၢၼ်ႈပၢင်ဢုမ် ဢိူင်ႇမိူင်းတွမ်း ၸႄႈဝဵင်းတၢင်ႉယၢၼ်း မီးလွင်ႈလူႉယႂ်ႇသုမ်းၼမ် ၼႆယဝ်ႉ။