ဝၼ်းတီႈ 2/9/2025 ပျီႇတူႉၸိတ်ႉပဢူဝ်း တီႉၺွပ်းၵူၼ်းဝၢၼ်ႈ တႃႈမၢၵ်ႇၵႅင်း(မကျည်းဆိပ် /မၵျီးသဵၵ်ႉ) ၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ၊ ဢဝ်ၵႂႃႇပေႃႉထုပ်ႉထိုင်တၢႆယဝ်ႉ ႁႂ်ႈၵူၼ်းႁိူၼ်းဢဝ်ငိုၼ်းမႃးထုတ်ႇဢဝ်တူဝ်တၢႆ။
ၵူၼ်းၸၢႆးဢၼ်ထုၵ်ႇတီႉၵႂႃႇၼၼ်ႉ ပဵၼ်ၵူဝ်ႇဢွင်ႇမဵဝ်းဝုၼ်း ဢႃယု 42 ပီ ပဵၼ်ၸၢဝ်းၼွင် မီးလုၵ်ႈသွင်ၵေႃႉ။ ၺႃးတီႉၺွပ်းဝၼ်းတီႈ 2 ယၢမ်းၵၢင်ၶိုၼ်း 11 မူင်း၊ ၺႃးပျီႇတူႉၸိတ်ႉမႃးႁွင်ႉဢဝ်မၼ်းၸၢႆးတီႈႁိူၼ်းၼႆ ၽူႈၸၢႆး ဢႃယု 30 ပီၵူၼ်းဝၢၼ်ႈတႃႈမၢၵ်ႇၵႅင်း လၢတ်ႈၽူႈတွႆႇႁွၵ်ႈ- ၼင်ႇၼႆ။
“ ၶဝ်တေမီးလွင်ႈသင်ၵၼ်တႄႉတႄႉဢမ်ႇႁူႉ၊ ၶဝ်သိုပ်ႇၾူင်းမႃးၸူးႁဝ်းဝႃႈ ၵူၼ်းဝၢၼ်ႈသူ ၺႃးတီႉဝႆႉလႄႈ ႁႂ်ႈၵူၼ်းႁိူၼ်းမၼ်းဢဝ်ငိုၼ်းမႃးထုတ်ႇဢဝ်တူဝ်မၼ်းၸၢႆးၶိုၼ်းလႄႈ – ဝႃႈၼႆၵေႃႈ ။ ၽိူဝ်ႇႁဝ်းၶႃႈၵႂႃႇထိုင်တီႈၶဝ်တီႉဝႆႉမၼ်းၼၼ်ႉၼႆ ၶဝ်ပေႃႉဝႆႉမၼ်းၸဵပ်းဝႆႉႁႅင်းၼႃႇ သမ်ႉပေႃးၶႂ်ႈၸမ်တၢႆယဝ်ႉၶႃႈၼႃႇ။ ၶဝ်ပေႃႉထုပ်ႉၵူၺ်းဢမ်ႇၵႃး ဢဝ်မိတ်ႈတႅင်းၸွမ်းၶႃမၼ်းၸိူဝ်းၼႆႉ ပၢတ်ႇဝႆႉတီႈတိၼ်မၼ်းၼႆႉ ဢဵၼ်တီႈတိၼ်ပေႃးၶၢတ်ႇပေႃးပႅၼ်ဝႆႉၵႂႃႇမူတ်းယဝ်ႉ။ ႁဝ်းၶႃႈၼႅတ်ႈဢဝ်တူဝ်မၼ်းဢွၵ်ႇမႃးသေ ဢၢၼ်းၵႂႃႇသူင်ႇႁူင်းယႃဝႆးဝႆး။ ၵူၺ်းၵႃႈလိူတ်ႈမၼ်းဢွၵ်ႇၼမ်ပူၼ်ႉလူၼ်ႉႁႅင်းလႄႈ ဢမ်ႇတၼ်းထိုင်ႁူင်းယႃမၼ်းတၢႆၵႂႃႇပႅတ်ႈဢေႃႈ။ ” ။
ပျီႇတူႉၸိတ်ႉ PNO ၸႂ်ႉၵူၼ်းႁိူၼ်းဢဝ်ငိုၼ်းၵႂႃႇထုတ်ႇဢဝ်တူဝ် ၵူဝ်ႇဢွင်ႇမဵဝ်းဝုၼ်းၼၼ်ႉ ၶိုၼ်း လူၺ်ႈငိုၼ်း 100 သႅၼ်ပျုး။ ၵူၼ်းႁိူၼ်းသမ်ႉဝႃႈဢမ်ႇပွင်ပဵၼ်လႆႈ – မီးငိုၼ်း 10 သႅၼ်ပျႃးၵူၺ်းၼႆၵေႃႈ ၸုမ်းပျီႇတူႉၸိတ်ႉဢဝ်ငိုၼ်း 10 သႅၼ်ၼၼ်ႉယဝ်ႉၸင်ႇပၼ်ၵႂႃႇဢဝ်တူဝ် ၵူဝ်ႇဢွင်ႇမဵဝ်းဝုၼ်း ဢၼ်ၸမ်တၢႆၼၼ်ႉဢွၵ်ႇမိူဝ်း – လႆႈႁူႉၼင်ႇၼႆ။
ပဵၼ်လွင်ႈတၢင်းသင် ပၼ်ႁႃယႂ်ႇၵႃႈႁိုဝ်ၵေႃႈယဝ်ႉ ဢမ်ႇထုၵ်ႇလီႁဵတ်းၵၼ်ထိုင်တၢႆ – ယွၼ်ႉပိူဝ်ႈၸၢင်ႈပဵၼ်ပၼ်ႁႃၸၢဝ်းၶိူဝ်း -ၼႆ ၵူၼ်းၸၢႆးၵေႃႉယူႇၼႂ်းၼွင်ႁၢႆးယႃႈ ၵေႃႉၼိုင်ႈၵေႃႈလၢတ်ႈၼင်ႇၼႆ။
“တလဵဝ် ၵူၼ်းႁိူၼ်းမၼ်းလႄႈ ၵူၼ်းဝၢၼ်ႈႁူမ်ႈၵၼ်ၵႂႃႇပိုတ်ႇ ဢမူႉ ဝႆႉယူႇဢေႃႈ ။ ၼႆႉၸၢင်ႈပဵၼ်မႃး ပၼ်ႁႃ ၼႂ်းၵႄႈၸၢဝ်းၶိူဝ်းၼင်ႇၵၼ် ၊ ပေႃးဢမ်ႇဢဝ်လိူင်ႈသေ ဝႆႉၸိူင်ႉၼႆ မိူဝ်းၼႃႈမႃး ၸၢင်ႈပဵၼ်ႁၢႆႉႁႅင်း လိူဝ်ၼႆႉထႅင်ႈ ၊ မီးတင်းၽိတ်းသင်ၵေႃႈ ထုၵ်ႇလီၵႄႈလိတ်ႈဢဝ်လူၺ်ႈလၢႆးၵတ်းယဵၼ်၊ ဢမ်ႇထုၵ်ႇလီ ၵႄႈလိတ်ႈ လၢႆးႁုၵ်ႉႁၢႆႉၸိူင်ႉၼႆ။ ဢၼ်ၼႆႉပေႃႉၵၼ်ပေႃးတၢႆၼႆႉတႄႉလိူဝ်ၸႂ်ႁႅင်းဝႆႉဢေႃႈ ”- ဝႃႈၼႆ ။
ယၢမ်းလဵဝ် တီႈဝၢၼ်ႈ မၵျီးသဵၵ်ႉ (တႃႈမၢၵ်ႇၵႅင်း) ၼႂ်းၼွင်ႁၢႆးယႃႈၼႆႉ ပျီႇတူႉၸိတ်ႉပဢူဝ်း ၶဝ်ႈတဝ် ၼႂ်းဝၢၼ်ႈ တင်းၶမ်ႈတင်းၶိုၼ်းသေ ၵႆႉလႄႇတီႉၺွပ်းၵူတ်ႇထတ်းၵူၼ်းဝၢၼ်ႈ ၵူၼ်းသူၼ် ဢၼ်ၶဝ်ထၢင်ႇထိူမ် ၊ လိူဝ်ၼၼ်ႉ ႁူမ်ႈတင်းသိုၵ်းမၢၼ်ႈသေ ယွၼ်းငိုၼ်းတီႈၵူၼ်းဝၢၼ်ႈ ဝႃႈတႃႇၵမ်ႉၸွႆႈၵူၼ်းႁၢပ်ႇၵၢၼ်သိုၵ်း၊ ယူႇယူႇၵႆႉမႃးၶၢၼ်းႁေႃႇၶဝ်ၸွၵ်းၽၵ်း တီႈၵူၼ်းမိူင်း ဢမ်ႇမီးၽႂ်ၵႅတ်ႇၶႄႁႄႉၵင်ႈပၼ်ၵူၼ်းမိူင်းသေဢိတ်းယဝ်ႉ- ၵူၼ်းပိုၼ်ႉတီႈလၢတ်ႈၼင်ႇၼႆ ။
မိူၼ်ၼင်ႇၼႆ ၼႂ်းဝၼ်းတီႈ 5 လိူၼ် သႅပ်ႊတိၼ်ႊပိူဝ်ႊယၢမ်းႁူဝ်ၶမ်ႈ 5 မူင်း ၼၼ်ႉၵေႃႈ ၵူၼ်းပွမ်ႇႁဵတ်း ပျီႇတူႉၸိတ်ႉပဢူဝ်း ႁႄႉလမ်းၼိုင်ႈဢၼ်တိုၵ်ႉ ၵႂႃႇဝႆႈ ၽြႃးသူၺ်ႇၽူင်းပုၼ်ႉ ဝဵင်းတူၼ်ႈတီးသေလူင်းလွႆမႃးၶိုၼ်းၼၼ်ႉယဝ်ႉ ဢဝ်မိတ်ႈၸမ်ႈ ယွၼ်းငိုၼ်းၵူၼ်းၼႂ်းၵႃး- လႆႈႁူႉၼင်ႇၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ