ဝၼ်းတီႈ 08/09/2025 ၼႆႉ ၵူၼ်းမိူင်းၼီႇပေႃး ဢွၼ်ၵၼ်ဢွၵ်ႇၼႄၵၢင်ၸႂ်တေႃႇ လွင်ႈလူင်ပွင်ၸိုင်ႈ ပိၵ်ႉဢိုတ်းပႅတ်ႈသိုဝ်ႇတူင်ႇဝူင်းၵူၼ်း (Social Media)၊ လွင်ႈၵိၼ်သူးၵိၼ်လၢပ်ႈလႄႈ လွင်ႈပိုၼ်ၽႄႈမူႇဝႃႇတၾၢႆႇလဵဝ် ၸိူဝ်းၼႆႉ။
သိုဝ်ႇၶၢဝ်ႇ The Guardian ႁၢႆးငၢၼ်းဝႃႈ – ၸုမ်းပလိၵ်ႈၶဝ် ၸႂ်ႉတိုဝ်းဢဵၼ်ႁႅင်းတင်းၼမ်သေ ႁႄႉႁၢမ်ႈ ၵူၼ်းမိူင်းၸိူဝ်းၼႄၵၢင်ၸႂ်ၼၼ်ႉ မီးလွင်ႈလူႉတၢႆ ဢမ်ႇယွမ်း 19 ၵေႃႉ၊ မၢတ်ႇ ၸဵပ်း 200 ပၢႆ – ဝႃႈၼႆ။
ၸွမ်းၼင်ႇမၢႆမီႈပၵ်းပိူင်မႂ်ႇ လူင်ပွင်ၸိုင်ႈမိူင်းၼီႇပေႃးသေ တႄႇဢဝ်ဝၼ်းတီႈ 04/09/2025 ၼႆႉ ၾၢႆႇလူင်ပွင်ၸိုင်ႈ လႆႈပိၵ်ႉဢိုတ်းပႅတ်ႈ application ၸိုဝ်ႈလိုဝ်းလင် ဢၼ်မီးၵူၼ်းၸႂ်ႉတိုဝ်းၼမ် ၼႂ်း Social Media တႃႇ 26 ဢၼ် မိူၼ်ၼင်ႇ Facebook ၊ Instagram ၊ WhatsApp ၊ LinkedIn ၊ Pinterest ၊ Reddit ၊ Signal ၊ X လႄႈ ဢိၵ်ႇထႅင်ႈလၢႆလၢႆ ဢၼ်။
ဝၢႆးလင်ၼၼ်ႉယဝ်ႉ ႁဵတ်းႁႂ်ႈမီးလွင်ႈတုမ်ႉတိူဝ်ႉ ၼႂ်းၵၢၼ်ပၢႆးမၢၵ်ႈမီး၊ ၵၢၼ်ဢွၵ်ႇၶၢဝ်းတၢင်းလႄႈ ၵၢၼ်ၵပ်းသိုပ်ႇတေႃႈၵၼ် ၸိူဝ်းၼႆႉ။
ယွၼ်ႉၼၼ်လႄႈ ၼႂ်းဝၼ်းတီႈ 8 ၼၼ်ႉ ၵူၼ်းၼုမ်ႇဢွၼ်ႁူဝ် ၵူၼ်းၸိူဝ်းယူႇသဝ်းၼႂ်းဝဵင်းဢွၼ်ႇဝဵင်းလူင် ၸိူဝ်းဢမ်ႇပဵင်းပေႃးႁၢၼ်ႉၸႂ်ၼိူဝ် လွင်ႈႁဵတ်းသၢင်ႈလူင်ပွင်ၸိုင်ႈၼၼ်ႉ ဢွၼ်ၵၼ်ဢွၵ်ႇ မႃးၼႄၵၢင်ၸႂ်ႁၢဝ်ႈႁႅင်း လူၺ်ႈသႂ်ႇၸိုဝ်ႈဝႃႈ ပၢင်ၼႄၵၢင်ၸႂ် “Gen Z” ၼႆယဝ်ႉ။
တီႈပၢင်ၼႄၵၢင်ၸႂ် ၼႂ်းဝဵင်းလူင် Kathmandu ၼၼ်ႉ ၵူၼ်းၸိူဝ်းၼႄၵၢင်ၸႂ် ၶဝ်ႈၵႂႃႇၼႂ်းလုမ်းသၽႃးသေ ဢၢၼ်းၸုတ်ႇၽဝ်၊ ၺႃးၾၢႆႇပလိၵ်ႈၶဝ် လႆႈၸႂ်ႉတိုဝ်းမၢၵ်ႇပွမ်း ဢၼ်သၢင်ႈႁူၺ်ႇတႃ၊ ၶွၼ်ႉ၊ မၢၵ်ႇၵွင်ႈရႃႇပႃႇလႄႈ လွတ်ႇၼမ်ႉႁူတ်းၾႆး ၸိူဝ်းၼၼ်ႉသေ ႁႄႉႁၢမ်ႈႁၢဝ်ႈႁႅင်း ဝႃႈၼႆ။
ယွၼ်ႉၵူၼ်းမိူင်း ဢွၵ်ႇၼႄၵၢင်ၸႂ်တုၵ်းယွၼ်းလႄႈ ၾၢႆႇၸုမ်းလူင်ပွင်ၸိုင်ႈ လႆႈၸတ်းႁဵတ်းပၢင်ၵုမ် ၶိုၵ်ႉၶၵ်ႉသေ ပိုတ်ႇပၼ်ၵူၼ်းမိူင်းၸႂ်ႉတိုဝ်း Social Media ၵႂႃႇၶိုၼ်းၼႂ်းဝၼ်းတီႈ 9 ၼႆႉ။ လိူဝ်ၼၼ်ႉ ၾၢႆႇလူင်ပွင်ၸိုင်ႈ တေပၼ်ငိုၼ်းၵမ်ႉၸွႆႈတီႈ မုင်ႉႁေႃႁိူၼ်း ၵူၼ်းၸိူဝ်းလူႉတၢႆ၊ ၸိူဝ်းမၢတ်ႇၸဵပ်းဝႆႉၵေႃႈ ယူတ်းယႃတူဝ်လႆႈ လူၺ်ႈဢမ်ႇလူဝ်ႇသဵင်ႈငိုၼ်း ဝႃႈၼႆ။
တီႈမိူင်းၼီႇပေႃးၼႆႉ မိူဝ်ႈပီ 2023 ၼၼ်ႉၵေႃႈ ယွၼ်ႉမီးလွင်ႈမႆႈၸႂ် ၼႂ်းၵၢၼ်ႁဵတ်းၽိတ်းပူၼ်ႉပႅၼ် ၾၢႆႇသၢႆႊပိူဝ်ႊလႄႈ ၶေႃႈၵႂၢမ်းပႅင်းၸင်းၼႆသေ မီးလွင်ႈပိၵ်ႉဢိုတ်းၵၢၼ်ၸႂ်ႉတိုဝ်း TikTok မႃးၵမ်းၼိုင်ႈ မိူၼ်ၵၼ် – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ