ၼႂ်းၶၢဝ်းတၢင်းသွင်လိူၼ်ပူၼ်ႉမႃးၼႆႉ သၢႆၵၢၼ်မိၼ် ဢၼ်လုၵ်ႉတၢင်းတႃႈၵုင်ႈ ဢွၵ်ႇၶၢဝ်းတၢင်းမႃး ဝဵင်းတႃႈၶီႈလဵၵ်း လႅၼ်လိၼ်တႆး – ထႆးၼႆႉ မီးၵူၼ်းၼုမ်ႇ ၶီႇမႃးၸွမ်းၵူႈလမ်းလႄႈ ႁဵတ်းႁႂ်ႈဝႂ်ႁိူဝ်းမိၼ် ၶၢႆလီႁႅင်းသေ ၵူၼ်းၶၢႆဝႂ်ႁိူဝ်းမိၼ် ၸင်ႇဢဝ်တိုဝ်ႉတၢင်းၼႆႉ ၶိုၼ်ႈၵႃႈၶၼ်ဝႂ်ႁိူဝ်းမိၼ် တူပ်ႉၼႅပ်ႇ ၼႆယဝ်ႉ။

ၵႃႈၶၼ်ဝႂ်ႁိူဝ်းမိၼ် ဢၼ်ၶွမ်ႊပၼီႊသၢႆၵၢၼ်မိၼ်ၶဝ် မၵ်းမၼ်ႈဝႆႉၼၼ်ႉတႄႉ တႃႈၵုင်ႈ (ယၼ်ႇၵုင်ႇ) – တႃႈၶီႈလဵၵ်းၼႆႉ မီးယူႇမွၵ်ႈ 7 သႅၼ်ပျႃးၵူၺ်းၼႆ – ၵူၼ်းၸၢႆး ဢႃယု 40 ပီပၢႆ ၵေႃႉၸမ်ၸႂ်ၵၼ်တင်း ၵူၼ်းၶၢႆဝႂ်ႁိူဝ်းမိၼ် တီႈဝဵင်းတႃႈၶီႈလဵၵ်း လၢတ်ႈၼႄၼင်ႇၼႆ။

“မိူဝ်ႈလဵဝ်ၼႆႉ ၵႃႈၶၼ်ဝႂ်ႁိူဝ်းမိၼ် ပေႃးတေလုၵ်ႉဝဵင်းတႃႈၵုင်ႈ (ယၼ်ႇၵုင်ႇ) မႃးတၢင်း ဝဵင်းတႃႈၶီႈလဵၵ်းၼႆ ၸိုင် လႆႈပၼ်ၼိုင်ႈဝႂ် 13 သႅၼ် တေႃႇ 15 သႅၼ်ပျႃး။ ပေႃးၵူၼ်းၸိူဝ်းဢမ်ႇမီးငိုၼ်းတႄႉ ဢမ်ႇၸၢင်ႈသိုဝ်ႉ ၶီႇလႆႈယဝ်ႉ။ ၶၼ်တႄႉမၼ်း ဢၼ်ၶွမ်ႊပၼီႇ တၢင်းသၢႆၵၢၼ်မိၼ်ၶဝ် တမ်းဝၢင်းဝႆႉပၼ်ၼၼ်ႉ တေမီးယူႇ  780,000 ပျႃး။ ၽွင်းဝၢၼ်ႈမိူင်းသုၵ်ႉသၵ်ႉ ၸိူင်ႉၼႆ ပွႆးၸႃး ၵူၼ်းၸိူဝ်းႁပ်ႉသိုဝ်ႉၶၢႆ ဝႂ်ႁိူဝ်းမိၼ်ၶဝ်ႁမ်ႉ ယူႇၼႂ်းၵၢင်မၼ်းႁႄ ႁဵတ်းၵိၼ်ၸိူင်ႉၼႆတႄႉ ဢမ်ႇလီပဵၼ်။ ၵူၼ်းမိူင်းၼႆႉ ယၢပ်ႇယဝ်ႉယၢပ်ႇထႅင်ႈ။ ၶုၼ်မိူင်း မိူၵ်ႈၶဝ်ႁမ်ႉ မိပ်ႇတၢင်းၼိုင်ႈ၊ ၸဝ်ႈၵၢၼ်မၢၵ်ႈမီးၶဝ်ႁမ်ႉ ႁၼ်ပုၼ်ႈသုၼ်ႇတူဝ်ႁႄ ႁႃၵိၼ်ၼမ်ႉတွၼ်း ၼိူဝ်ၵူၼ်းမိူင်းၼင်ႇၵၼ်ၸိူင်ႉၼႆၼႆႉ မၼ်းႁၢင်ႈႁၢႆႉႁႅင်းၼႃႇ”။

ႁိူဝ်းမိၼ်ဢၼ်လုၵ်ႉတၢင်း ဝဵင်းတႃႈၵုင်ႈ မႃးဝဵင်းတႃႈၶီႈလဵၵ်းၼႆႉ ၼိုင်ႈလိူၼ်ၼႆႉ မႃးလူင်းယူႇမွၵ်ႈ 5 လမ်း ၼႂ်းၼၼ်ႉ မီးၵူၼ်းၼုမ်ႇၸၢႆး၊ ယိင်း ၸိူဝ်းယူႇၼႂ်းဝဵင်းလူင်မိူင်းမၢၼ်ႈၶဝ် ၶီႇမႃးၸွမ်းတဵမ်ၵူႈလမ်းၼႆ – ၵူၼ်းၶၢႆဝႂ်ႁိူဝ်းမိၼ် တီႈဝဵင်းတႃႈၶီႈလဵၵ်း ၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ႁိူဝ်းမိၼ်ၼိုင်ႈလမ်းၼႆႉ ၶီႇလႆႈတႃႇၵူၼ်းမွၵ်ႈ 200 ၵေႃႉ။ ၵူၼ်းၸိူဝ်းၼႆႉ ႁဵတ်းဝီႊသႃႊပဵၼ်တၢင်းၵၢၼ် ယဝ်ႉႁႄ မႃးၶၢမ်ႈၶူဝ်တီႈလႅၼ်လိၼ်။ ပေႃးၶဝ်တေၶီႇႁိူဝ်းမိၼ်တီႈတႃႈၵုင်ႈ (ယၼ်ႇၵုင်ႇ) ဢွၵ်ႇၵႂႃႇမိူင်းထႆး ၵမ်းသိုဝ်ႈၼႆ တီႈၶူင်ႇႁိူဝ်းမိၼ်ၼႆႉ ၵူတ်ႇထတ်းႁႅင်းၼႃႇ။ ယွၼ်ႉၼၼ် ယၢမ်းလဵဝ် ၵမ်ႈၼမ် ဢွၼ်ၵၼ်မႃး တၢင်းသၢႆလႅၼ်လိၼ်တႆး – ထႆးၼႆႉ။ သဵၼ်ႈ ၼႆႉ ပေႃးမီးဝီႊသႃႊတဵမ်ထူၼ်ႈၼႆ ဢမ်ႇပေႃးၵူတ်ႇထတ်းႁႅင်း”။

ဝၢႆးလင် ၸွမ်ၸိၵ်းသိုၵ်း မိၼ်းဢွင်ႇလၢႆႇ သိုၵ်းမၢၼ်ႈ ယိုတ်းမိူင်း ပိုၼ်ၽၢဝ်ႇ ပၵ်းပိူင်ၾိင်ႈမိူင်း ႁႂ်ႈၵူၼ်းၼုမ်ႇၸိူဝ်းဢႃယုတဵမ်ၸွမ်းၼင်ႇၶဝ်မၵ်းမၼ်ႈဝႆႉ ၶဝ်ႈႁၢပ်ႇၵၢၼ်သိုၵ်း ၵူႈၵေႃႉ ၼၼ်ႉ ၵူၼ်းၼုမ်ႇၼႂ်းမိူင်း မၢၼ်ႈဢွၼ်ၵၼ် ႁႃလၢႆးတၢင်းဢွၵ်ႇၼွၵ်ႈမိူင်းဢမ်ႇထၢတ်ႈ ႁၢၼ်ႉတေႃႇထိုင်ယၢမ်းလဵဝ်။

တႅမ်ႈ – ၽူၺ်းၼုမ်ႇ