တင်ႈတႄႇပဵၼ်ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 မႃး ယေးငိုၼ်း (ပၢၼ်ႇ) တီႈဝဵင်းလႃႈသဵဝ်ႈ လႆႈဢိုတ်းဝႆႉ ႁိုင်ၶၢဝ်းတၢင်းၸမ် 2 ပီလႄႈ ၸဝ်ႈၵၢၼ်ပၢႆးမၢၵ်ႈမီးဢွၼ်ႇ ၸိူဝ်းပဵၼ်ၵူၼ်းၵႃႉၵူၼ်းၶၢႆ၊ ၵူၼ်းလႅၵ်ႈငိုၼ်း ၼႂ်းမိူင်းတႆးပွတ်းႁွင်ႇ ႁူပ်ႉတၢင်းယၢပ်ႇ တႃႇလႆႈတူဝ်ငိုၼ်းလႄႈ ထွၼ်ထႅမ်သႂ်ႇငိုၼ်းၼႂ်းပၢၼ်ႇ ဝႃႈၼႆ။

တႃႇလႆႈတူဝ်ငိုၼ်း ဢမ်ႇၼၼ် ထႅမ်ထွၼ် လႅၵ်ႈငိုၼ်းသႂ်ႇၼႂ်းယေးငိုၼ်း ၸဝ်ႈၵဝ်ႇလႆႈၼၼ်ႉ ယၢပ်ႇၵိၼ်းႁႅင်းၼႃႇၼႆ – ၵူၼ်းမိူင်း ပိုၼ်ႉတီႈၵေႃႉယူႇဝႆႉၼႂ်းဝဵင်းလႃႈသဵဝ်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“တီႈလႃႈသဵဝ်ႈၼႆႉ မိူဝ်ႈလဵဝ် ၵူၼ်းႁဵတ်းၵၢၼ်လႅၵ်ႈငိုၼ်းယၢပ်ႇၼႃႇ။ တႃႇလႆႈတူဝ်ငိုၼ်းၵေႃႈ ဢမ်ႇငၢႆႈ။ ၵေႇပေး (K – pay) ၵေႃႈႁႃယၢပ်ႇၼႃႇ။ မၢင်ၸိူဝ်း မီးဝႆႉတူဝ်ငိုၼ်းၼမ် ၶႂ်ႈဢဝ်သႂ်ႇၼႂ်းပၢၼ်ႇၼႆႉ သမ်ႉပေႃးလႆႈ ႁွပ်ႇထူင်ငိုၼ်း ၵႂႃႇယွၼ်းလႅၵ်ႈတီႈႁၢၼ်ႉၶၢႆၶမ်း။ ဢမ်ႇမီးပၢၼ်ႇ ဢၼ်လႂ်ပိုတ်ႇယဝ်ႉၼႃႇ”။

မိူၼ်ၼႆ ၵူၼ်းၸိူဝ်းၶႂ်ႈဢဝ်တူဝ်ငိုၼ်းၵႂႃႇဝႆႉ ၼႂ်းယေးငိုၼ်း ၼမ်လူၼ်ႉႁႅင်းၼႃႇလႄႈ ထိုင်တီႈယေးငိုၼ်း ပေႃးလႆႈမၵ်းတတ်းဝႆႉတင်းၼမ်ငိုၼ်း ဢၼ်ၸၢင်ႈထႅမ်သႂ်ႇၼႂ်းဢၵွင်ႉၽႂ်မၼ်းၼႆ – ၵူၼ်းၵႃႉၶၢႆ ၼႂ်းဝဵင်းမူႇၸေႊ ၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“မိူဝ်ႈလဵဝ် ၼႂ်းပၢၼ်ႇၵေႃႈ ဢမ်ႇပေႃးမီးငိုၼ်းၵႃႈႁိုဝ်။ မိူဝ်ႈဝႃး ၶႃႈဢဝ်ငိုၼ်းၵႂႃႇ ဢၢင်ႈသႂ်ႇဝႆႉၼႂ်းပၢၼ်ႇ ၼိုင်ႈၵေႃႉၼႆႉ ၶဝ်ပၼ်သႂ်ႇတႃႇ 5 သႅၼ်ပျႃးၵူၺ်း”။

ၼႂ်းမိူင်းတႆးပွတ်းႁွင်ႇၼႆႉ ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃး တႃႇထွၼ်ထႅမ်ငိုၼ်းၼႂ်းပၢၼ်ႇလႆႈၼၼ်ႉ ၵူၼ်းမိူင်းလႆႈပိုင်ႈဢိင် ၵူၼ်းႁဵတ်းၵၢၼ်လႅၵ်ႈငိုၼ်းသေ ၸၢႆႇၵႃႈထွၼ်ထႅမ်ငိုၼ်း ၼိုင်ႈသႅၼ်လႂ် 1,000 ပျႃး (1%)။ မၢင်တီႈ ယွၼ်ႉလႅင်းဢိၼ်ႊထိူဝ်ႊၼႅတ်ႊၵေႃႈ ပိူင်ၼိုင်ႈ၊ ၸိူဝ်းပဵၼ်ၸွမ်းဝၢၼ်ႈၸိုင် ၼိုင်ႈသႅၼ်လႂ် လႆႈပၼ်ထိုင်ယူႇ 5,000 ပျႃး (5%) ၼႆယဝ်ႉ။

ၼႂ်းဝဵင်းလႃႈသဵဝ်ႈၼႆႉ မီးယေးငိုၼ်း ဢၼ်ယူႇတႂ်ႈဢႃႇၼႃႇသိုၵ်းမၢၼ်ႈ ယိုတ်းမိူင်းၵုမ်းၵမ်ၼၼ်ႉ ပိုတ်ႇဝႆႉယူႇသေတႃႉ ၵၢၼ်ထွၼ်ထႅမ်ငိုၼ်း ဢမ်ႇပေႃးၶိုတ်းတၼ်း မိူၼ်ၼင်ႇ ယေးငိုၼ်း – KBZ ၊ AYA ၊ CB ၸိူဝ်းပဵၼ်ယေးငိုၼ်းသုၼ်ႇလဵဝ်ၼႆႉလႄႈ ၵူၼ်းမိူင်း ၸိူဝ်းယူႇၼႂ်းပိုၼ်ႉတီႈ ၸင်ႇဢမ်ႇပေႃးၸႂ်ႉတိုဝ်းၵၼ် ၼႆယဝ်ႉ။

တႅမ်ႈ – ၽူၺ်းၼုမ်ႇ