ဝၼ်းတီႈ 6/9/2025 (မႅၼ်ႈဝၼ်းသိၼ်ၵၢင်ဝႃႇ) ဝၢႆးဝၼ်း 3 မူင်း ႁၢၼ်ႉၶမ်း သူၺ်ႇၼၵႃး ဢၼ်မီးၾၢႆႇတူၵ်းဝဵင်းမိူင်းယွင်း ၸိုင်ႈတႆးပွတ်းဢွၵ်ႇၼၼ်ႉ ၺႃးၸူၼ်ၶဝ်ႈဢဝ်ၶမ်းၵႂႃႇ ဢမ်ႇယွမ်း 80 ဝၢတ်ႇ ဝႃႈၼႆ။
ၼၢင်းယိင်းၵူၼ်းမိူင်းယွင်း ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၵႂႃႇၸွႆႈတီႈဝတ်ႉသေ မႃးႁိူၼ်းၶိုၼ်းၼၼ်ႉ လႆႈႁၼ်ၵူၼ်းၼႂ်းဝၢၼ်ႈဢုမ်ႇၵၼ်လူင်ဝႆႉ ၊ ႁွႆးဝႃႈ မီးလွင်ႈၸူၼ်လၢၼ်ႉၶမ်း။ၵူၼ်းၸူၼ်မႃးသွင်ၵေႃႉဝႃႈ CCTV ၵေႃႈ ဢမ်ႇလီလႄႈ ဢမ်ႇလႆႈႁၼ်။ တူၺ်းၼႂ်း ၵွင်ႈထၢႆႇ CCTV ႁိူၼ်းဢၼ်ယူႇႁိမ်းၶၢင်ႈၼၼ်ႉတႄႉ လႆႈႁၼ်ၵူၼ်းၸၢႆးမႃး 2 ၵေႃႉ။သုပ်းမၢၵ်ႇႁူဝ်ပူၵ်ႉၼႃႈသေ ၶီႈရူတ်ႉၶိူင်ႈသႅၼ်းမိူင်းၶႄႇမႃး ။ ၶိင်ႇၼၼ်ႉ ၵူၼ်းၶၢင်ႈႁိူၼ်းၵေႃႈ တိုၵ်ႉႁဵတ်းမူၵ်ႇၾႆးယူႇႁိမ်းၶၢင်ႈႁိူၼ်းၼၼ်ႉ သမ်ႉဢမ်ႇတၼ်းၾၢင်ႉမႅၼ်ႈ” – ဝႃႈၼႆ။
လၢၼ်ႉၶမ်းၼႆႉ မီးသွင်ပူႇဢွၵ်ႇလႄႈ ၵူၼ်းထဝ်ႈၵေႃႉၼိုင်ႈ တႃႇဢမ်ႇလီ ။ ၽွင်းမိူဝ်ႈၸူၼ်ၶဝ်ႈမႃးၼၼ်ႉသမ်ႉ မႅၼ်ႈမိူဝ်ႈပေႃႈၸဝ်ႈႁိူၼ်း တိုၵ်ႉၵႂႃႇလႄႇဝႆႉႁိူၼ်းႁိမ်းႁွမ်း။လႆႈငိၼ်းသဵင်ႁွင်ႉမေးၼၢင်းမၼ်း ၸင်ႇလႅၼ်ႈမႃးတီႈႁိူၼ်း သမ်ႉၺႃးၸူၼ်ၼၼ်ႉ ဢဝ်ၵွင်ႈငႃဝႆႉလႄႈ ဢမ်ႇႁတ်းႁဵတ်းသင် ၊ ၵူၼ်းၸူၼ်ၸိူဝ်းၼၼ်ႉၵေႃႈ ဝၢႆးဝၵ်ႉလႆႈၶမ်းၼႂ်းႁၢၼ်ႉယဝ်ႉ ၼႅတ်ႈၶီႈရူတ်ႉၶိူင်ႈဢွၵ်ႇၵႂႃႇဝႆးဝႆး- ဝႃႈၼႆ။
ယၢမ်းလဵဝ်ၶၼ်ၶမ်းၼိုင်ႈဝၢတ်ႇ တူၵ်းငိုၼ်းထႆး 55,000 (မႅၼ်ႈငိုၼ်းမၢၼ်ႈမွၵ်ႈ 720,000 ပျႃး)။ လႆႈၶမ်းၵႂႃႇ 80 ဝၢတ်ႇၼႆလႄႈ တေမီးၶၼ်ငိုၼ်းမွၵ်ႈ 4,400,000 ဝၢတ်ႇ (တေတူၵ်းငိုၼ်းမၢၼ်ႈမွၵ်ႈ 5,700 သႅၼ်ပျႃး)။
ဝၢႆးၺႃးၸူၼ်ယဝ်ႉ ၸဝ်ႈၶွင်ႁၢၼ်ႉၶမ်း သူၺ်ႇၼၵႃး ၵႂႃႇတိူင်ႇလၢတ်ႈပလိၵ်ႈမၢၼ်ႈဝႆႉယဝ်ႉသေတႃႉ ဢမ်ႇႁၼ်လၢၵ်ႇလၢႆးသင်၊ ပလိၵ်ႈမၢၼ်ႈၸိူဝ်းမႃးၵူတ်ႇထတ်းတီႈႁိူၼ်းၵေႃႈ မၢင်ၵေႃႉ သိူဝ်ႈၵေႃႈဢမ်ႇၼုင်ႈ ဢမ်ႇမီးတီႈလီၸႂ်ယႂ်ႇသေဢိတ်း ၵူၼ်းပိုၼ်ႉတီႈလၢတ်ႈၼင်ႇၼႆ။
ၼႂ်းမိူင်းယွင်းၼႆႉ ၸုမ်းယိပ်းၵွင်ႈၵၢင်ႇၵေႃႈ ၵႆႉလူင်းၵဵပ်းၶွၼ်ႇ ၊ သိုၵ်းမၢၼ်ႈၵေႃႈ လူင်းၵဵပ်းသိုၵ်း ၵူၼ်းမိူင်းလႆႈၵူဝ်ၵူႈၸုမ်းၸုမ်း ဢမ်ႇထၢင်ႇႁၢင်ႈယူႇလွတ်ႈလႅဝ်းၵတ်းယဵၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ