ၼႂ်းဝၼ်းတီႈ 02/09/2025 ၼႆႉ ၽူႈပွင်ၵၢၼ်သိုၵ်း သုင်သုတ်း (စစ်ဦးစီးချုပ်) တပ်ႉသိုၵ်း မိူင်းဢိတ်ႉသ်ရေႊ Eyal Zamir လၢတ်ႈဝႃႈ – ၵွၼ်ႇပႆႇႁွတ်ႈထိုင်ယိူင်းမၢႆၼႆႉ တိုၼ်းတေဢမ်ႇၵိုတ်းပၢင်တိုၵ်း ဝႃႈၼႆ။

မၼ်းၸၢႆးလၢတ်ႈၵႂႃႇ တီႈၼႂ်းတပ်ႉပၢင်သဝ်းသိုၵ်းၼၼ်ႉဝႃႈ – “ႁဝ်းၶႃႈ ႁၢင်ႈႁႅၼ်းဝႆႉတွၼ်ႈတႃႇ ပၢင်တိုၵ်း ဢၼ်တိုၵ်ႉသိုပ်ႇပဵၼ်ဝႆႉၼႆႉယူႇ။ လိူဝ်ၼၼ်ႉ တေတိူဝ်းႁဵတ်းသၢင်ႈ ၵၢၼ်တိုၵ်းတေႃးၵႂႃႇထႅင်ႈ။ ယၢမ်းလဵဝ် လႆႈတႄႇၽႅၼ်ၵၢၼ်တိုၵ်းၼိူဝ်လိၼ် တီႈထုင်ႉၵႃႊသႃႊဝႆႉယဝ်ႉ”- ဝႃႈၼႆ။

ၾၢႆႇပွႆႇသဵင်ဢွမ်လူမ်း တပ်ႉသိုၵ်းမိူင်းဢိတ်ႉသ်ရေႊ ပိုၼ်ၽၢဝ်ႇ မိူဝ်ႈဝၼ်းတီႈ 2 ၼႆႉဝႃႈ ၽူႈၶဝ်ႈၸုမ်း တပ်ႉၵႅမ်တပ်ႉသိုၵ်းဢိတ်ႉသ်ရေႊ ဢဵၼ်ႁႅင်းမွၵ်ႈ 4 မိုၼ်ႇၵေႃႉ တႄႇႁၢပ်ႇၵၢၼ် ၵႂႃႇ ၼႂ်းၽႅၼ်ၵၢၼ် တေၶဝ်ႈယိုတ်းဝဵင်းၵႃႊသႃႊၼၼ်ႉ ဝႃႈၼႆ။

ၽူႈမီးပုၼ်ႈၽွၼ်း ၾၢႆႇဢိတ်ႉသ်ရေႊၶဝ် ၶၢတ်ႈလၢမ်းဝႃႈ ၼႂ်းၵူၼ်းမိူင်း ၸိူဝ်းၺႃးၺွပ်းပဵၼ်တူဝ်ယိူဝ်ႇဝႆႉ တီႈထုင်ႉၵႃႊသႃႊ 48 ၵေႃႉၼၼ်ႉ တႃႇ 20 ၵေႃႉ တိုၵ်ႉမီးသၢႆၸႂ်ဝႆႉယူႇ။ ယၢမ်းလဵဝ် ဢိတ်ႉသ်ရေႊၶဝ် ယိုတ်းၵုမ်းလႆႈထုင်ႉၵႃႊသႃႊဝႆႉ 75% ယဝ်ႉ။

ၵဵဝ်ႇလူၺ်ႈၽႅၼ်ၵၢၼ် တႃႇၶဝ်ႈယိုတ်းဝဵင်းၵႃႊသႃႊၼၼ်ႉ ၽူႈမီးပုၼ်ႈၽွၼ်းၸၼ်ႉသုင် ၼႂ်းမိူင်းဢိတ်ႉသ်ရေႊၶဝ် မီးလွင်ႈပၼ်ၾၢင်ႉယူႇသေတႃႉ ၸွမ်ၽွင်းလူင် ပႅၼ်ႇၵျမိၼ်ႇ ၼေႇတၼ်ႇယႃႇႁူႇ (Benjamin Netanyahu) တႄႉ မီးၵၢင်ၸႂ် ၶႂ်ႈတိူဝ်းႁဵတ်းသၢင်ႈၽႅၼ်ၵၢၼ်ဢၼ်ၼႆႉဝႆႉယူႇ ဝႃႈၼႆ။  

ၼႂ်းလိူၼ်ပူၼ်ႉမႃးၼႆႉ ၸုမ်းၸွမ်ၽွင်းလူင် ၾၢႆႇႁူမ်ႇလူမ်ႈ မိူင်းဢိတ်ႉသ်ရေႊ ဢၼ်ၼေႇတၼ်ႇ ယႃႇႁူႇ ဢွၼ်ႁူဝ်ဝႆႉၼၼ်ႉ ယိုၼ်ယၼ်ဝႃႈ တႃႇတေၵုမ်းထိင်းလႆႈ ဝဵင်းၵႃႊသႃႊ ၼၼ်ႉ တေတိူဝ်းႁဵတ်ႈသၢင်ႈလွင်ႈတူင်ႉၼိုင်ၵၢၼ်သိုၵ်းၵႂႃႇ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။