မိူဝ်ႈဝၼ်းတီႈ 3/9/2025 ယၢမ်းၵၢင်ဝၼ်း မၢၵ်ႇၵိုတ်းၶင်ႉ ဝႆႉၸဵမ်မိူဝ်ႈပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ၼၼ်ႉ တႅၵ်ႇၽူင်ႉသႂ်ႇႁိူၼ်း ဢွင်ႈတီႈသိုဝ်ႉလဵၵ်းၵဝ်ႇ တီႈပွၵ်ႉ1 မၢႆ 8 သဵၼ်ႈတၢင်းၼိၼ်းသီႇ မၢႆ (4) ၾၢႆႇလင်ၽြႃးယၼ်ႇတၢႆးဢွင်ႇ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ၸၢၵ်ႇမၢၵ်ႇ တိူဝ်ႉၺႃးၵူၼ်းမိူင်း 4 ၵေႃႉ ၵူၼ်းမိူင်း ဝဵင်းလႃႈသဵဝ်ႈ လၢတ်ႈၼႄၼင်ႇၼႆ။
“ငိၼ်းဝႃႈ ၶဝ်ၸုတ်ႇၵွင်ယုၵ်းယၢၵ်းႁႄ ၾႆးမႆႈၺႃးမၢၵ်ႇႁႄတႅၵ်ႇၼႆဢေႃႈ။ မၢင်ၵေႃႉၵေႃႈဝႃႈ ၶဝ်ၵႂႃႇတွႆႇၺႃးႁႄတႅၵ်ႇ။ မၢၵ်ႇဢၼ်တႅၵ်ႇၼႆႉ ဢမ်ႇၸႂ်ႈမၢၵ်ႇပွမ်း၊ ပဵၼ်မၢၵ်ႇသႅၼ်း 40 မမ။ ယၢမ်းလဵဝ် ၵူၼ်းမၢတ်ႇၸဵပ်းၼႆႉ ဢဝ်ၵႂႃႇယူတ်းယႃတူဝ်ဝႆႉ တီႈႁူင်းယႃလူင်ယဝ်ႉ။”
မိူဝ်ႈပီ 2024 လိူၼ်ၵျူႊလၢႆႊ ၸုမ်းသိုၵ်းၵဝ်ႈၵၢင်ႉလႄႈသိုၵ်းၽွမ်ႉႁူမ်ႈ ၶဝ်ႈလူမ်ႇတိုၵ်းသိုၵ်းမၢၼ်ႈ ထိုင်ၼႂ်းဝဵင်းလႃႈသဵဝ်ႈ ၊သိုၵ်းမၢၼ်ႈသုမ်းၵၢၼ်ႉသေလႆႈထွႆဢွၵ်ႇပၼ် မိူဝ်ႈ 3/8/ 2024 ။
ဝၢႆးလင်ၼၼ်ႉဢမ်ႇႁိုင် တူဝ်တႅၼ်းလူင်ပွင်ၸိုင်ႈမိူင်းၶႄႇ ယူႇၵၢင်ႁဵတ်းၶဵဝ်ပၼ်သေ ႁႂ်ႈတင်းသွင်ၾၢႆႇဢုပ်ႇဢူဝ်းငူပ်ႉငီႉၵၼ်၊ ၾၢႆႇၼိုင်ႈ ၵေႃႈမိူင်းၶႄႇ မိပ်ႇငႅၼ်းႁႂ်ႈသိုၵ်းၵဝ်ႈၵၢင်ႉထွႆႇဢွၵ်ႇဝဵင်းၵေႃႈပိူင်ၼိုင်ႈလႄႈ မိူဝ်ႈသၼ်းတီႈ 22 လိူၼ်ဢေႊပရႄႊ ပီ 2025 သိုၵ်းမၢၼ်ႈ ၶိုၼ်းလႆႈၶဝ်ႈမႃးၵုမ်းၵမ်ၼႂ်းဝဵင်းလႃႈသဵဝ်ႈ တႃႇ 12 ပွၵ်ႉ။
ၼႂ်းၶၢဝ်းတၢင်းသိုၵ်းၵဝ်ႈၵၢင်ႉ လႄႈ သိုၵ်းမၢၼ်ႈ ၵုမ်းၵမ်ဝဵင်းလႃႈသဵဝ်ႈ ဝၢႆးလင် ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ၼႆႉ ဢမ်ႇမီးၸုမ်းလႂ်ႁႃသွၵ်ႈ ၽဵဝ်ႈပၼ်မၢၵ်ႇမႅင်းၸိူဝ်းၵိုတ်းၶင်ႉဝႆႉ ၼႂ်းဝၢင်းႁိူၼ်းယေး လႄႈ ၸွမ်းသဵၼ်ႈတၢင်းၵူၼ်းမိူင်းၵႂႃႇမႃး ၼႆယဝ်ႉ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ