မိူဝ်ႈၼႆႉ ဝၼ်းတီႈ 3 လိူၼ်သႅပ်ႊထႅမ်ႊပိူဝ်ႊ ယၢမ်းၵၢင်ဝၼ်း 1 မူင်းၶိုင်ႈ သိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းဝၢၼ်ႈမေႃႇၵိူဝ် 2 လုၵ်ႈ တူၵ်းတိူဝ်ႉႁိူၼ်းယေးၵူၼ်းမိူင်း လႄႈ ၽြႃးၵၢင်ႉမေႃႇ (မေႃႇၵိူဝ်/ ပေႃႇၵျူဝ်ႇ) ဢၼ်ၸိုဝ်ႈသဵင်လိုဝ်းလင်ၵေႃႈ လူႉၵွႆပႃး။
ယွၼ်ႉသိုၵ်းမၢၼ်ႈ ပွႆႇမၢၵ်ႇလူင်တူၵ်းသႂ်ႇၼႂ်းဝၢၼ်ႈလႄႈ တိူဝ်ႉၺႃးၵူၼ်းမိူင်းမၢတ်ႇၸဵပ်းၸွမ်းၵေႃႉၼိုင်ႈ ၸိုဝ်ႈႁွင်ႉ ဢူးမွင်ႇသေႃႇ ဢႃႇယု 45 ပီ၊ ႁိူၼ်းယေးၵူၼ်းမိူင်းၵေႃႉလူႉၵွႆၵႂႃႇပႃး 3 လင်ၼႆ ၾၢႆႇသိုၵ်းတဢၢင်း ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉၼင်ႇၼႆ။
ၵူၼ်းၸၢႆး ဢႃႇယု 30 ပၢႆ ၵေႃႉယူႇဝႆႉ ၼႂ်းဝဵင်းသီႇပေႃႉသေ ၸွႆႈထႅမ်ႁဵတ်းသၢင်ႈၵၢၼ်တူင်ႇဝူင်းၵူၼ်း လၢတ်ႈၼႄတီႈၽူႈတွႆႇႁွၵ်ႈဝႃႈ -“ႁဝ်းၵႂႃႇတူၺ်းမႃးဢွင်ႈတီႈဢၼ်မၢၵ်ႇမႃးတူၵ်းၼၼ်ႉမိူဝ်ႈၵႆႈ။ ၶဝ်မႃးပွႆႇၵႂႃႇ 2 လုၵ်ႈ။ တႃႇၼိုင်ႈလုၵ်ႈၼႆႉ တူၵ်းသႂ်ႇၼိူဝ်ႁိူၼ်းလီလီ” ဝႃႈၼႆ။
လိူဝ်ၼၼ်ႉ ဢွင်ႈတီႈမၢၵ်ႇမႃးတူၵ်းလႄႈ ဢွင်ႈတီႈမီးၽြႃးၵဝ်ႇၵႄႇ ဝတ်ႉမေႃႇၵိူဝ် ဢမ်ႇပေႃးႁၢင်ႇၵႆၵၼ်လႄႈ ၸၢၵ်ႇမၢၵ်ႇသဵၼ်ၵႂႃႇ တိူဝ်ႉသႂ်ႇမၢၼ်ႇၵႅဝ်ႈ ၽြႃးၵၢင်ႉမေႃႇ လူႉၵွႆၽွင်ႈ ၼႆယဝ်ႉ။
ဝဵင်းသီႇပေႃႉၼႆႉ ဝၢႆးလင်ပၢင်တိုၵ်း ၽႅၼ်ၵၢၼ်ယၼ်ႇသိုၵ်း ပွၵ်ႈၵမ်း 2 မႃး သိုၵ်းတဢၢင်း ၵုမ်းၵမ်ဝႆႉၸူဝ်ႈၶၢဝ်းသေ တင်ႈတႄႇ ၵၢင်ပီ 2025 မႃးႁၢၼ်ႉတေႃႇထိုင်ယၢမ်းလဵဝ် ၺႃးသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇဢမ်ႇထၢတ်ႇ။ ၶၢဝ်းတၢင်းသၢမ်လိူၼ်ၵွႆး သိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ်တိုၵ်းပွႆႇမၢၵ်ႇသႂ်ႇ ဢမ်ႇယွမ်း 10 ပွၵ်ႈ။
ပူၼ်ႉမႃး ဝၼ်းတီႈ 18 လိူၼ်ဢေႃးၵၢတ်ႉသ်ၼၼ်ႉၵေႃႈ ႁိူဝ်းမိၼ်တိုၵ်း သိုၵ်းမၢၼ်ႈ ပွႆႇမၢၵ်ႇလူင်သႂ်ႇ ၼႂ်းပွၵ်ႉၾၢႆႇတူၵ်း လႄႈ ပွၵ်ႉတၢင်းၸၢၼ်းဝဵင်းသီႇပေႃႉသေ ၵူၼ်းမိူင်းမၢတ်ႇၸဵပ်းၸွမ်း 2 ၵေႃႉ ႁိူၼ်းယေးၵူၼ်းမိူင်းလူႉၵွႆၸွမ်း တင်းၼမ် ၼႆယဝ်ႉ။
တႅမ်ႈ-မူၺ်ၶမ်း
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ