ၼၢင်းယိင်းၸိူဝ်းၸႂ်ႉတိုဝ်း သိုဝ်ႇတူင်ႇဝူင်းၵူၼ်း Tiktok သေ ႁူၺ်းႁွင်ႉဢဝ်ၼၢင်းယိင်းသၢဝ် ၵႂႃႇႁဵတ်းၵၢၼ်ၸွမ်းလႅၼ်လိၼ် မိူင်းၶႄႇ- မိူင်းမၢၼ်ႈ ၼႂ်းၸႄႈဝဵင်းမူႇၸေႊ ဝၢင်းၽႅၼ်ဢဝ်ၵႂႃႇၶၢႆ ႁဵတ်းမေးၶႄႇၼၼ်ႉ ၺႃးၸုမ်းပလိၵ်ႈ တီႉၺွပ်း ၵုမ်းၶင်တူဝ်ဝႆႉ ၼႆယဝ်ႉ။

မိူဝ်ႈဝၼ်းတီႈ 2 ယၢမ်းၵၢင်ၶမ်ႈ လိူၼ်သႅပ်ႊထႅမ်ႊပိူဝ်ႊ ၶွမ်ႊမသျိၼ်ႊသိုၵ်းမၢၼ်ႈ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ ၼၢင်းယိင်း ၸိူဝ်းၺႃးတီႉၺွပ်းၼႆႉ တင်းသဵင်ႈမီးယူႇ 4 ၵေႃႉ ပဵၼ်ၸၢဝ်းၶိူဝ်းမၢၼ်ႈ ယူႇဝဵင်းမူႇၸေႊ ၸိုဝ်ႈႁွင်ႉ ဢေးမျၢတ်ႉမုၼ်ႇ၊ ဢေးဢီႉမုၼ်ႇ၊ မမူဝ်းတူႇသႃႇ (ႁွင်ႉ) မၶျူဝ်ႇ လႄႈ ပွႆးၸႃး တေႃႇတၢၼ်းဢေး (ႁွင်ႉ) ပီႇယိၼ်း ယူႇဝဵင်းမၢၼ်းတလေး။

ယၢမ်းလဵဝ် ၼၢင်းယိင်းၸိူဝ်းၼၼ်ႉ လွၵ်ႇလႅၼ်ဢဝ်ၼၢင်းယိင်းၸိူဝ်းၶႂ်ႈႁဵတ်းၵၢၼ် ဢၢၼ်းသူင်ႇၶဝ်ႈၵႂႃႇၶၢႆၼႂ်းမိူင်းၶႄႇလႄႈ ႁွင်ႈၵၢၼ် ၾၢႆႇလုမ်းတတ်းသိၼ် (လုမ်းတြႃး) ၸေႈတွၼ်ႈ ဢွင်ႇမျေႇတႃႇသၢၼ်ႇ (အောင်မြေသာဇံ)  ဢဝ်လိူင်ႈလူၺ်ႈပၵ်းပိူင်ၾိင်ႈမိူင်း ၵၢၼ်ၽဵဝ်ႈမူၺ်ႉႁေႉႁၢမ်ႈလွင်ႈၵႃႉၶၢႆၵူၼ်း တွၼ်ႈ 35/44 ပၼ်တၢမ်ႇတူၵ်းၶွၵ်ႈၶင် လႄႈ ႁဵတ်းၵၢၼ်ပႃး ၶၢဝ်းတၢင်း 10 ပီ ၼႆယဝ်ႉ။

ပိူင်ပဵၼ်မၼ်းတႄႉ ၼၢင်းယိင်းၸိူဝ်းၼၼ်ႉ လုၵ်ႉၼႂ်းတိၵ်းတွၵ်ႇ (Tiktok) ႁူၺ်းႁွင်ႉ လွၵ်ႇလႅၼ်ဢဝ် ၼၢင်းယိင်း လႄႈ ယိင်းသၢဝ် ၸိူဝ်းမီးဢႃႇယု 24 ပီ  တၢင်းၸႄႈမိူင်းၶၢင် ဝဵင်းမိူင်းယၢင်း ၵေႃႉၼိုင်ႈ၊ ၼႂ်းတိူင်းမၢၼ်းတလေး ၸႄႈဝဵင်းတွင်ႇတႃႇၵေႃႉၼိုင်ႈသေ ႁူၺ်းသူၼ်းလၢတ်ႈဝႃႈတေလႆႈၵႂႃႇႁဵတ်းၵၢၼ်ၼႂ်း မိူင်းၶႄႇ တေၵပ်းသိုပ်ႇပၼ်ပေႃႈလဵင်ႉၸၢဝ်းၶႄႇ။ ပေႃးၵႂႃႇယူႇၼႂ်းမိူင်းၶႄႇသေ ၵိၼ်ၸၢင်ႈႁဵတ်း မေးၵူၼ်းၸၢႆးၶႄႇ တႃႇၶၢဝ်းတၢင်း ၼိုင်ႈပီၼႆႉ တေလႆႈငိုၼ်းၶႄႇ  ၼိုင်ႈမိုၼ်ယႂၼ်ႊ  (တူၵ်းမႅၼ်ႈငိုၼ်းမၢၼ်ႈ ၶၼ်ယၢမ်းလဵဝ်မွၵ်ႈ 60 သႅၼ်ပျႃး) ဝႃႈၼႆ။  

 ၼၢင်းယိင်းဢႃႇယု 39 ပီ ထႅင်ႈၵေႃႉၼိုင်ႈ ၵူၼ်းမိူင်းဝဵင်းလႃႈသဵဝ်ႈ ၼၼ်ႉၵေႃႈ ထုၵ်ႇဢေးမျၢတ်ႉမုၼ်ႇ  မူႇၸေႊ  ႁူၺ်းႁွင်ႉတၢင်း တိၵ်းတွၵ်ႇ (TikTok) သေလၢတ်ႈဝႃႈ ပေႃးၵႂႃႇၵိၼ်ၸၢင်ႈႁဵတ်းမေးၶႄႇၼႆႉ တေလႆႈငိုၼ်းၶႄႇ 15000 ယႂၢၼ်ႊ တေႃႇပီ(ငိုၼ်းမၢၼ်ႈ မွၵ်ႈ 100 သႅၼ်ပျႃး) ၼႆသေ ႁူၺ်းႁွင်ႉဢဝ်ၵႂႃႇတၢင်း ဝဵင်းမၢၼ်းတလေး။ ၽွင်းတိုၵ်ႉယူႇသဝ်းတီႈႁူင်းႁႅမ်း ၼႂ်းဝဵင်းမၢၼ်းတလေး ပႂ်ႉႁဵတ်းပပ်ႉၶၢမ်ႈမိူင်း လႄႈ ႁဵတ်းဝီႇသႃႇ တႃႇၵႂႃႇမိူင်းၶႄႇ ၸွမ်းပွႆးၸႃး တေႃႇတၢၼ်းဢေး (ႁွင်ႉ) ပီႇယိၼ်း ယူႇၼၼ်ႉ ၺႃးၸဝ်ႈၼႃႈ တီႈၶဝ် ၵူတ်ႇထတ်းၸႅတ်ႈထၢမ်သေ တီႉၺွပ်းဝႆႉၼႆယဝ်ႉ။

လိူဝ်ၼၼ်ႉ ၼၢင်းယိင်းဢႃႇယု 19 ပီ ၵေႃႉယူႇၼႂ်းတိူင်းတႃႈၵုင်ႈၼၼ်ႉၵေႃႈ ထုၵ်ႇၼၢင်းယိင်းဢၼ်ယူႇၼႂ်းဝၢၼ်ႈလဵဝ်ၵၼ် ႁူၺ်းႁွင်ႉ ဝႃႈ တေလႆႈႁဵတ်းၵၢၼ်ၼႂ်းႁူင်းၵၢၼ် ႁဵတ်းၶူၼ်ႁူဝ်ပွမ် လႄႈ ၼဵပ်ႉမိုဝ်းပွမ် ၼႆသေ ဝၢႆးလင် ႁွတ်ႈၽႅဝ်ၵႂႃႇၼႂ်းမိူင်းၶႄႇယဝ်ႉ  ၵေႃႉထုၵ်ႇႁူၺ်းမႃးၼၼ်ႉ ၸင်ႇႁူႉဝႃႈ တေလႆႈႁဵတ်းမေးၶႄႇ၊ သင်ဢမ်ႇႁဵတ်းမေးၶႄႇၸိုင် လူဝ်ႇသၢႆႈတႅၼ်းပၼ်ၶိုၼ်း ငိုၼ်းၵႃႈၸႂ်ႉၸၢႆႇ တင်းသဵင်ႈ ဝႃႈၼႆ။  

ဝၢႆးလင် ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 မႃး ၸွမ်းလႅၼ်လိၼ် မိူင်းၶႄႇ- မိူင်းမၢၼ်ႈ လႄႈ ၼႂ်းမိူင်းတႆးပွတ်းႁွင်ႇ၊ ဢိၵ်ႇပႃး မိူင်းၶၢင် ပိုၼ်ႉတီႈၸိူဝ်းပဵၼ်ပၢင်တိုၵ်းသိုၵ်းသိူဝ်ယူႇၼၼ်ႉ ၵူၼ်းမိူင်းဢမ်ႇမီးၵၢၼ်ငၢၼ်းတႃႇႁဵတ်းႁႃၵိၼ်လဵင်ႉတွင်ႉ ႁႂ်ႈၵုမ်ႇထူၼ်ႈ ပဵင်းပေႃးလႄႈ ႁဵတ်းႁႂ်ႈပွႆးၸႃးၶဝ် လွၵ်ႇလႅၼ်ႁွင်ႉဢဝ် ၼၢင်းယိင်း ၊ ယိင်းသၢဝ်ၵမ်ႈၼမ် ၵႂႃႇႁဵတ်းမေးၶႄႇလႆႈငၢႆႈလူမ်လိူဝ်ၵဝ်ႇ။

လႆႈႁူႉဝႃႈ ယၢမ်းလဵဝ် လွင်ႈလွၵ်ႇလႅၼ်ဢဝ်ၼၢင်းယိင်းၵႂႃႇၶၢႆသေ တဵၵ်းၸႂ်ႉႁဵတ်းမေးၼၢင်းၸၢဝ်းၶိူဝ်းၶႄႇၼႆႉ ၼမ်မႃးလိူဝ်ၵဝ်ႇတေႉ တေႉဝႃႈဝႃႈၼႆ ၸုမ်းၾၢႆႇၸွႆႈထႅမ် ၼၢင်းယိင်းၸိူဝ်းၺႃးလွၵ်ႇလႅၼ်ႁွင်ႉၵႂႃႇၶၢႆတူဝ်ၼၼ်ႉ လၢတ်ႈၼႄၼင်ႇၼႆ။

ၵူၼ်းၸိူဝ်းၺႃးႁွင်ႉၵႂႃႇၶၢႆတူဝ် ၸွမ်းလႅၼ်လိၼ် မိူင်းၶႄႇ-မိူင်းမၢၼ်ႈ လႄႈ ၼႂ်းမိူင်းၶႄႇၼႆႉ ပဵၼ်ၼၢင်းယိင်းၸိူဝ်းမီးဢႃႇယု 20 ပီပၢႆ ၵမ်ႈၼမ်သေ ပဵၼ်ၵူၼ်းမိူင်းၸိူဝ်းယူႇသဝ်း ၼႂ်းတိူင်းမၵူၺ်း၊ ပၶူၵ်ႉၵူႇ၊ တႃႈၵုင်ႈ လႄႈ ၸႄႈဝဵင်းၸိူဝ်းယူႇသဝ်းၸွမ်း လႅၼ်လိၼ် မိူင်းၶႄႇ။

ၼၢင်းယိင်းၸိူဝ်းၼႆႉ ထုၵ်ႇပွႆးၸႃး(ၵူၼ်းယူႇၵႄႈၵိၼ်ၵၢင်) ၶဝ် ပၼ်တၢင်းမုင်ႈမွင်းဝႃႈ တေလႆႈငိုၼ်း ၵႃႈတူဝ်ၼိုင်ႈၵေႃႉလႂ် ငိုၼ်း ၶႄႇမွၵ်ႈ 5 မိုၼ်ႇယႂၼ်ႊ (ငိုၼ်းမၢၼ်ႈ မွၵ်ႈ 280 သႅၼ်ပျႃး) ၼႆသေထုၵ်ႇသူင်ႇတူဝ်ၵႂႃႇၶၢႆထိုင် ၼႂ်းမိူင်းၶႄႇ ဝဵင်းယုၼ်ႊၼၢၼ်ႊ  ။

ၵဵဝ်ႇလူၺ်ႈလိူင်ႈၵၢၼ်ၵႃႉၶၢႆၵူၼ်း (ၼၢင်းယိင်း) ၸိူဝ်းၼႆႉသေ ပိူဝ်ႈတႃႇမိူင်းမၢၼ်ႈ တင်း မိူင်းၶႄႇ တေႁူမ်ႈမိုဝ်းၵၼ် ၸတ်းၵၢၼ် တီႉၺွပ်း ဢဝ်လိူင်ႈၵႂႃႇၼၼ်ႉ မီးလွင်ႈယၢပ်ႇၽိုတ်ႇလိူဝ်ႁႅင်း၊ ၾၢႆႇလင် ၵၢၼ်ၵႃႉၶၢႆၵူၼ်းၼႆႉ မီးၸုမ်းယိပ်းၵွင်ႈၵၢင်ႇ၊ ၸုမ်းတူင်ႇဝူင်း ၵူၼ်း လႄႈ ၽူႈမီးဢႃႇၼႃႇၶဝ်တင်းၼမ် ၵဵဝ်ႇၶွင်ႈၸွမ်းဝႆႉၼႆ ၸုမ်းၾၢႆႇၸွႆႈထႅမ်လွင်ႈၵႃႉၶၢႆၵူၼ်းၶဝ် လၢတ်ႈၼႄဝႆႉၼင်ႇၼႆ။

တႅမ်ႈ- ၽူၺ်းၼုမ်ႇ