ၼႂ်းၶၢဝ်းတၢင်း 3 လိူၼ်မႃးၼႆႉ ၵူၼ်းမိူင်းႁူမ်ႈတုမ်မၢၼ်ႈ ၸိူဝ်းသိုဝ်ႉႁွင်ႈၶွၼ်ႊတူဝ်ႊ(Condo) တီႈမိူင်းထႆး ၵိုင်ႉၵၢင်ႉပုင်ႈၶိုၼ်ႈသုင်မႃးႁႅင်း ဝႃႈၼႆ။
ၸွမ်းၼင်ႇ သုၼ်ၶေႃႈမုလ်း ၵႃႉၶၢႆတီႈလိၼ်ႁိူၼ်းယေးမိူင်းထႆး (REIC) ပိုၼ်ၽၢဝ်ႇဝႆႉသေ ၼႂ်းၶိုင်ႈပီ 2025 ၼႆႉ လႆႈၶၢႆႁွင်ႈၶွၼ်ႊတူဝ်ႊပၼ် တီႈၵူၼ်းၼွၵ်ႈမိူင်းတႃႇ 7,167 ႁွင်ႈ၊ ၵိုင်ႇၵႃႈၶၼ် ငိုၼ်းထႆး 28.71 ပီႊလီႊယၼ်ႊဝၢတ်ႇ ဝႃႈၼႆ။
ပိုၼ်ႉတီႈဢၼ်ၵူၼ်းၼွၵ်ႈမိူင်းၶဝ် လိူၵ်ႈသိုဝ်ႉႁွင်ႈၶွၼ်ႊတူဝ်ႊၼၼ်ႉ တႃႇ 80% ပဵၼ်တီႈဝဵင်းၵုင်းထဵပ်ႈလႄႈ ၶျွၼ်ႊပူႊရီႊ။ ၵူၼ်းမိူင်းၶႄႇ တိုၵ်ႉသိုဝ်ႉႁွင်ႈၶွၼ်ႊတူဝ်ႊဝႆႉ ၼမ်လိူဝ်ပိူၼ်ႈယူႇသေတႃႉ ႁႅင်းသိုဝ်ႉတႄႉ ၸိူင်ႉထိူင်းလူင်းၵႂႃႇ – REIC လၢတ်ႈၼင်ႇၼႆ။
ၵူၼ်းၼွၵ်ႈမိူင်း ၸိူဝ်းသိုဝ်ႉႁွင်ႈၶွၼ်ႊတူဝ်ႊ ၼႂ်းမိူင်းထႆး ၼမ်လိူဝ်ပိူၼ်ႈထီႉသွင်သမ်ႉ ပဵၼ်ၵူၼ်းမိူင်းမၢၼ်ႈ။ ၼႂ်းလိူၼ်ဢေႊပရိူဝ်ႊထိုင် လိူၼ်ၵျုၼ်ႊ ပီ 2025 (ၶၢဝ်းတၢင်း 3 လိူၼ်) ၵူၼ်းမိူင်းမၢၼ်ႈ သိုဝ်ႉႁွင်ႈၶွၼ်ႊတူဝ်ႊ ၼႂ်းမိူင်းထႆး 533 ႁွင်ႈ၊ သင်တႅၵ်ႈၵၼ်တင်းမိူဝ်ႈ 3 လိူၼ်ပူၼ်ႉမႃးၸိုင် ၼမ်ၶိုၼ်ႈမႃး 119.3%၊ ၵႃႈၶၼ်ငိုၼ်းဢၼ်ၸႂ်ႉတိုဝ်းၵေႃႈ ၼမ်ၶိုၼ်ႈမႃးထိုင် 1.34 ပီႊလီႊယၼ်ႊဝၢတ်ႇ ၼႆယဝ်ႉ။
လွင်ႈၼႆႉ ယူႇတီႈ REIC ထတ်းသၢင်ဝႃႈ – ၼႂ်းႁၢင်လိူၼ်မၢတ်ႊၶျ် ပီ 2025 ၼႆႉ ယွၼ်ႉၽႅၼ်ႇလိၼ်ဝႆ ႁႅင်းယႂ်ႇသၼ်ႇၶွၼ်းၵႂႃႇတီႈၼႂ်းမိူင်းမၢၼ်ႈလႄႈ ၵူၼ်းမိူင်းမၢၼ်ႈ ၸင်ႇဢွၼ် ၵၼ်ၶဝ်ႈသိုဝ်ႉႁွင်ႈၶွၼ်ႊတူဝ်ႊ ၼႂ်းမိူင်းထႆး ၼမ်ၶိုၼ်ႈမႃး – ဝႃႈၼႆ။
ပိုၼ်ႉတီႈဢၼ်ၵူၼ်းမိူင်းမၢၼ်ႈၶဝ် လိူၵ်ႈသိုဝ်ႉႁွင်ႈၶွၼ်ႊတူဝ်ႊ ၼမ်လိူဝ်ပိူၼ်ႈတႄႉ ပဵၼ်ဝဵင်းၵဵင်းမႂ်ႇ၊ ၶျွၼ်ႊပူႊရီႊလႄႈ ၵုင်းထဵပ်ႈ – သိုဝ်ႇၶၢဝ်ႇ The Nation ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ