ပေႃးႁိုင်ထႅင်ႈ 120 ဝၼ်း ၶွမ်ႊသျိၼ်ႊသိုၵ်းမၢၼ်ႈ တေၸတ်းႁဵတ်းပၢင်လိူၵ်ႈတင်ႈ ပွင်ႈတီႈ ႞ ယဝ်ႉလႄႈ လႆႈႁၼ်ပႃႇတီႇပၢႆးမိူင်း ၸိူဝ်းလႆႈမၢႆၾၢင်ဝႆႉၼၼ်ႉ ၼႅတ်ႈမၢင်ႉႁႃႁွမ်ၵူၼ်း ၶိုင်ပိုတ်ႇလုမ်းယူႇ ၵူဝ်ဢမ်ႇတဵမ်ပဵင်း ၶေႃႈမၵ်းတတ်းၶၢတ်ႈၶွပ်ႇ ၶွင်ၶွမ်ႊသျိၼ်ႊၵမ်ၵၢၼ်ၼၼ်ႉယူႇ၊ ႁူႉႁၼ်ပွင်ႇၸႂ်ယူႇႁွႆးဝႃႈ ၶေႃႈမၵ်းတတ်းၶၢတ်ႈၶွပ်ႇၼၼ်ႉ ဢမ်ႇတဵင်ႈထမ်း၊ ၵူၺ်းသမ်ႉ ဢမ်ႇႁတ်းထဵင်။

သုတ်းတီႈ ၽွၼ်းၵၢၼ်ပၢင်လိူၵ်ႈတင်ႈၼႆႉ တေလႆႈပဵၼ်ၸွမ်းၼင်ႇတပ်ႉသိုၵ်းၶႂ်ႈလႆႈၶႂ်ႈပဵၼ်ၵူၺ်းဝႃႈ ၼႆဝႆႉသႅၵ်ႇလႅၵ်ႇၵေႃႈ ယင်းယွမ်းလူင်းလိူၵ်ႈတင်ႈလႆႈယူႇလႄႈ ၼမ်ႉႁိဝ်ႈၸင်ႈ ၵၢၼ်မိူင်း မိူင်းႁဝ်းၼႆႉ ဢမ်ႇတၢပ်ႈၼိူင်းၸွမ်း လၵ်းၸဵင်တီႊမူဝ်ႊၶရေႊၸီႊၵူႈမိူင်းမိူင်းယဝ်ႉ ပေႃးဝႃႈၼႆတေဢမ်ႇၽိတ်း။

သိၼ်ၵၢၼ်မိူင်း၊ သလေႇၵၢၼ်မိူင်းလႄႈ ၾိင်ႈတိုဝ်းၵမ်ၵၢၼ်မိူင်းၸိူဝ်းၼႆႉ လွင်ႈလၼ်ႈတႂ်ႈလၢႆႇၼမ်ႉ ဢႃႇၼႃႇၵႂႃႇပႅတ်ႈ ၸမ်ၶႂ်ႈၸွတ်ႇၵူႈလၢပ်ႈယဝ်ႉ။

ၸိူဝ်းၶတ်းၼမ်ႉၸႅဝ်ႈမီးယူႇၵေႃႈ ၸိူဝ်းၸူးငၢႆႈဝၢႆႈလွင်ႈၸွမ်းၼမ်ႉသူင်ႇ ႁၢမ်ႉၶႂ်ႈၼမ်ဝႆႉ ၼင်ႇႁူႉၵၼ်ယဝ်ႉ။

ၵူၼ်းၵၢၼ်မိူင်းၼႆႉ ဢမ်ႇမီးလွင်ႈႁပ်ႉပုၼ်ႈၽွၼ်းတီႈၵူၼ်းမိူင်းသေတႃႉ တေဢၢၼ်းဢိုၼ်ၵူမ်ဢိုၼ် ၵၢမ် ဢူးလိင်းပႃးလိင်းၵၼ်ၵႂႃႇၵူၺ်းယူဝ်ႉ ပေႃးဝႃႈၼႆသမ်ႉ တေမီးၵႂၢမ်းတွပ်ႇ ၶိုၼ်းဝႃႈ ထႃႈဢမ်ႇႁူႉၸၵ်းပုၼ်ႈၽွၼ်း တေႁဵတ်းႁိုဝ်ႁပ်ႉပုၼ်ႈၽွၼ်း၊ ထႃႈဢမ်ႇႁူႉၸၵ်းဝႃႈ ပဵၼ်ပုၼ်ႈၽွၼ်းတူဝ်ၵဝ်ႇ သမ်ႉတေႁဵတ်းႁိုဝ်ႁၢပ်ႇၵိုတ်ႉပုၼ်ႈၽွၼ်း ၼႆယူႇ။

ဢၼ်ၼႆႉ ပဵၼ်လွင်ႈႁဵတ်းႁႂ်ႈၵူၼ်းမိူင်းလူႉၵွႆ ပဵၼ်ဢၼ်ႁဵတ်းႁႂ်ႈၸိုင်ႈမိူင်းၵူၼ်ႇပင်းတူၵ်းသုမ်းယဝ်ႉၼႆ ႁၼ်ယူႇသႅၵ်ႇလႅၵ်ႇ ၵမ်ႈၽွင်ႈယင်းပႆႇၶႂ်ႈယွမ်းႁပ်ႉၵွၼ်ႇ။

ၸိုင်ႈမိူင်းၼႆႉ ၵူၼ်ႇပင်းတူၵ်းသုမ်းဝႆႉယဝ်ႉၼႆ ႁဵတ်းႁိုဝ်လႄႈ ဝႃႈလႆႈၶႃႈလႃႇ။ ဢဝ်ၽူႈလူင်ႉလႅၼ်ႇၶဝ်ဝႃႈၸိုင် ပေႃးဝႃႈဢမ်ႇၵွၼ်းၵုမ်းလႆႈၸိုင်ႈမိူင်းယဝ်ႉလႂ်၊ ပေႃးဝႃႈ ဢမ်ႇႁပ်ႉပွင်ပၼ်လႆႈတၢင်းလူဝ်ႇပိုၼ်ႉထၢၼ် ၶွင်ၵူၼ်းမိူင်းလီငၢမ်းယဝ်ႉလႂ်၊ ပေႃးဝႃႈ ၵၢၼ်မၢၵ်ႈမီးပိၼ်ႈလူမ်ႉၸိူင်ႇၸၢင် ၵႂႃႇယဝ်ႉလႂ်၊ ပေႃးဝႃႈ ၵူၼ်းမၢၼ်ႈၵူၼ်းမိူင်း လႆႈၺႃးပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်းဝႆႉယဝ်ႉလႂ်၊ ပေႃးဝႃႈ ဢမ်ႇၵွၼ်းၵုမ်းလႆႈ ပတိၵ်ႈၶၢတ်ႈၼႂ်းမိူင်းယဝ်ႉလႂ်၊ ပေႃးဝႃႈ ဢမ်ႇမီးၽႂ်လႂ်မၵ်းမၼ်ႈ ပဵၼ်လူင်ပွင်ၸိုင်ႈၶဝ်ႈတၢင်းၵၢၼ်ယဝ်ႉလႂ်ၸိုင် မိူင်းလုၵ်ႈ ၼၼ်ႉ ပိူၼ်ႈဢွၼ်မၵ်းတတ်းဝႃႈ မၼ်းၵူၼ်ႇပင်းတူၵ်းသုမ်းယဝ်ႉသႄႈ။

ၵမ်းၼႆႉ တီႈဢၼ်ဝႃႈ ၵွၼ်းၵုမ်းလႆႈၸိုင်ႈမိူင်းၼၼ်ႉ ဢမ်ႇၵွမ်ႉၵူၺ်းတေႃႉတႄႉ ၵွၼ်းလႆႈၵုမ်းလႆႈပိုၼ်ႉ တီႈၸႄႈဝဵင်းၵမ်ႈၽွင်ႈ။

မၢႆထိုင်ဝႃႈ ၸႄႈဝဵင်းၵူႈတူင်ႇ၊ ၼႃႈတီႈၵူႈလႅၼ်ဢေႃႈ။ ဢမ်ႇၵႃးၵူၺ်းၼိူဝ်ဝဵင်း တေႃႇထိုင်ၸိၵ်းလွႆၵူၼ်ႈႁူၺ်ႈ ပိၵ်ႇထိူၼ်ႇႁၢင်ၶိူဝ်း ၵႃႈပဵၼ်ၼႂ်းၶွပ်ႇလႅၼ်မိူင်း တေလႆႈၵွၼ်းၵုမ်းထိုင်လႆႈမူတ်းမူတ်းၵွၼ်ႇ။

ပဵၼ်ဝႆႉလူင်ပွင်ၸိုင်ႈၶဝ်ႈတၢင်းၵၢၼ်သေ ပဵၼ်ဝႆႉၸုမ်းယိပ်းၵွင်ႈၵၢင်ႇၶဝ်ႈတၢင်းၵၢၼ်သေ တမ်ႉဢမ်ႇၽွင်းငမ်းလႆႈ လူၺ်ႈပၵ်းပိူင်ၾိင်ႈမိူင်း၊ တမ်ႉဢမ်ႇမီးၼမ်ႉၵတ်ႉ ၸတ်းပွင်လႆႈႁႂ်ႈၼိမ်တဵင်ႈပဵၼ်ထမ်းၼႆပႄႇ ပွင်ႇဝႃႈပဵၼ်ၸိုင်ႈမိူင်းၵူၼ်ႇပင်းတူၵ်းသုမ်းၵူၺ်းယဝ်ႉ။

ပေႃးလၢတ်ႈဝႃႈ လူင်ပွင်ၸိုင်ႈၼႆ မီးၸွမ်းၶေႃႈထၢမ်ဢၼ်ဝႃႈ ၸွင်ႇၽိူမ်ႉထႅမ်ပၼ်လႆႈ တၢင်းလူဝ်ႇၵူၼ်းမိူင်းႁိုဝ်ၼႆ ပႃးဝႆႉၵမ်းလဵဝ်ယဝ်ႉ။ ၵွပ်ႈပိူဝ်ႈဝႃႈ လူင်ပွင်ၸိုင်ႈၼႆ တၵ်းလႆႈပွင်ႇ ၸႂ်ဝႆႉဝႃႈ ပဵၼ်ဝႆႉပိူဝ်ႈတႃႇ ႁပ်ႉပွင်ပုၼ်ႈၵူၼ်းမိူင်းယဝ်ႉလူး။

လူင်ပွင်ၸိုင်ႈၼႆႉ ဢမ်ႇၸႂ်ႈတႃႇၼႄဢႃႇၼႃႇတေႃႇ ၵူၼ်းမိူင်းမႃႇလၢႆၼႆ တၵ်းလႆႈပွင်ႇၸႂ်ဝႆႉယဝ်ႉ။ ဢဝ်ၸဵမ် ပၢႆးပၺ်ႇၺႃႇ၊ ပၢႆးယူႇလီ တေႃႇထိုင်ၵၢၼ်မၢၵ်ႈမီးလႄႈ ၵၢၼ်ပၵ်းပိူင်ၾိင်ႈမိူင်းသုမ်ႇငမ်း ၸဵမ်ၸိူဝ်းၼႆႉ တၵ်းလႆႈႁပ်ႉပွင်ပၼ်ယဝ်ႉ၊ လူင်ပွင်ၸိုင်ႈၼႆႉ ပဵၼ်တႃႇၵူၼ်းမိူင်းၸႂ်ႉၵိၼ်လူး၊ လူင်ပွင်ၸိုင်ႈၼႆႉ ဢမ်ႇၸႂ်ႈတႃႇၸႂ်ႉၵိၼ်ၵူၼ်းမိူင်းၼႆ ဝူင်ႈပူၼ်ႉၵေႃႈ လၢတ်ႈမႃးယူႇ။

တီႈဝႃႈ ၵၢၼ်မၢၵ်ႈမီးၼႆၵေႃႈ ဢမ်ႇမေႃသေၵေႃႈယဝ်ႉ၊ ၽိတ်းပိူင်ႈသေၵေႃႈယႃႇ ပေႃးတင်းဝႃႈ ႁဵတ်းႁႂ်ႈယူင်ႉၵၢၼ်မၢၵ်ႈမီးၸိုင်ႈမိူင်းလူႉလႅဝ်ၵူၼ်ႇပင်း၊ ၽိူဝ်ႇတေႁဵတ်းႁႂ်ႈၵူၼ်းမိူင်းလူမ်ၸႂ်မၢၵ်ႈမုၼ်းသမ်ႉ ၵုမ်ႇႁဵတ်းႁႂ်ႈယၢပ်ႇယၢၵ်ႈၵွတ်းၽၢၼ် တုၵ်ႉယၢၵ်ႈၶၢၼ်ၸႂ်ဢမ်ႇယဝ်ႉဢမ်ႇဝၢႆးၼႆပႄႇ ႁိုဝ်ၵိုင်ႇထိူၵ်ႈဝႃႈ မၼ်းၸႂ်ႈလူင်ပွင်ၸိုင်ႈယဝ်ႉသႄႈ။

တေႃႉတႄႉႁပ်ႉၸိုဝ်ႈလူင်ပွင်ၸိုင်ႈသေ ၵဝ်းယႃႉမၢၼ်ႈမိူင်းၵူၼ်ႇပင်းလုသုမ်းၵူၺ်း တေလႆႈဝႃႈ ၼႆယဝ်ႉ။

ၵဵဝ်ႇလူၺ်ႈသုၼ်ႇလႆႈသုၼ်ႇပဵၼ်သေ ပေႃးဝႃႈလူင်ပွင်ၸိုင်ႈၼႆႉ ၵေႃႉလူလၢႆပူၼ်ႉပႅၼ် တေႃႇၵူၼ်းမိူင်းတင်းလၢႆၼႆၸိုင် လွင်ႈၽွင်းငမ်းတဵင်ႈထမ်းၼႆ ႁိုဝ်တေၸၢင်ႈမီးယဝ်ႉ။ ယူႇမႃႇလၢႆၺႃးတီႉၺွပ်း၊ ၺႃးၶီႇၼဵၵ်းတဵၵ်းငႅၼ်း၊ ၺႃးၶႃႈၸႂ်ႁႅမ်တၢႆ၊ ၺႃးႁုပ်ႈယိုတ်းႁိမ်လၢႆ၊ ၺႃးၵၼ်ႉၸၼ်ၽဝ်ၸုတ်ႇ ထၢၼ်ႈပေႃးၶႂ်ႈလိုမ်းပၢၼ်ပဵၼ်ၵူၼ်းၼႆတႄႉ တိုၼ်းၶဝ်ႈပဵၼ်ၸိုင်ႈမိူင်းတူၵ်းသုမ်းၵူၼ်ႇပင်းယဝ်ႉ။

ၵမ်းၼႆႉ တႃႇတေမၢၵ်ႈမုၼ်းၶိုၼ်ႈယႂ်ႇၼႆၼၼ်ႉ လမ်ႇလွင်ႈတႄႉမၼ်း လူဝ်ႇလႆႈငမ်းယဵၼ်ၶႃႈလူး။ ၸွတ်ႇၸိုင်ႈတူဝ်ႈမိူင်း ဢူၼ်ဢုင်းလုၵ်ႉၽိုၼ်ႉ ပိုတ်းယိုဝ်းတိုၵ်းတေႃးၵၼ် ပေႃးပၼ်းႁူၼ်ႈႁူၼ်ႈ ၵူၼ်းၶိူဝ်းလဵဝ်မိူင်းလဵဝ်ၵၼ် ပေႃးဢမ်ႇၸၢင်ႈႁတ်းယုမ်ႇယမ် ယူႇလူၺ်ႈၵၼ်တမ်းၸႂ်တမ်းၶေႃး၊ ၵုမ်ႇလႆႈပဵၼ်ၸၢၵ်ႇသိုၵ်းယိူဝ်ႇသိုၵ်းယူႇတင်းၶိင်ႇ တေႁဵတ်းႁိုဝ်ဝႃႈလႆႈ မိူင်းႁူမ်ႇလူမ်ႈ။

လိုၼ်းသုတ်းတႄႉ ၸဵမ်မိူဝ်ႈဝႃႈ ႁပ်ႉပဵၼ်လူင်ပွင်ၸိုင်ႈၼၼ်ႉ လွင်ႈၾိင်ႈၸႂ်လူႉ၊ သိၼ်ၵၢၼ်လႅဝ်၊ ၵိၼ်သူးလၢပ်ႈငိုၼ်းမွၼ်ထွၼ်ယဵတ်ႈ၊ ၶွင်တင်းလၢႆ ႁုပ်ႈႁဵတ်းၶွင်သုၼ်ႇလဵဝ် ၸုမ်းလဵဝ်၊ ၶွင်ၵူၼ်းမိူင်း ဝႆႉမိူၼ်ၶွင်ပူၺ်ႈတူဝ်ၵဝ်ႇသေ ႁိမ်လိပ်းၸူၼ်လိပ်းယူႇၸိူင်ႉၼၼ်ၵေႃႈ ၶဝ်ႈပဵၼ်ပိူင်ၾၢင်ၸိုင်ႈမိူင်း ၵူၼ်ႇပင်းတူၵ်းသုမ်းယဝ်ႉ။

ပေႃးၼႆ ဢၼ်တေပိၼ်ႇလႅၵ်ႈမႄးလီလႆႈၶိုၼ်း လွင်ႈလူႉလႅဝ်ၵူၼ်ႇပင်းၸိူဝ်းၼၼ်ႉၼႆႉ ၵွမ်ႉၵႃႈပိၼ်ႇ လႅၵ်ႈၵူၼ်းၵူၺ်း တမ်ႉဢမ်ႇမႄးပိူင်ၼႆၸိုင် မိူဝ်ႈလႂ်တေပဵၼ်လႆႈၶီး၊ ၵူၼ်းၵေႃႈ ၶိုၼ်းပဵၼ်ၵူၼ်းၵဝ်ႇ၊ ပိူင်ၵေႃႈဢမ်ႇၸႂ်ႈ ပိူင်မႂ်ႇ၊ လၢႆးၵေႃႈဝႃႈ သုၵ်ႈၼမ်ႉတႃးမုၼ်ႈသေၸႂ်ႉၶိုၼ်းၵူၺ်းပေႃးၼႆပႄႇ ႁိုဝ်တေပႃႈပူၼ်ႉလွတ်ႈလႆႈ လၢႆးၵၢၼ်ပွင်မိူင်းၼမ်ႉလၢႆးတႃးယႃမူၼ်ႇ ၼႆ ၶႂ်ႈယွၼ်းထတ်းသၢင်ၼင်ႇၼႆဢေႃႈ။