ၼုမ်ႇယိင်း ၵူၼ်းၼႂ်းထုင်ႉၼွင်ႁၢႆးယႃႈ ဢၼ်မႃးႁဵတ်းၵၢၼ် တီႈႁၢၼ်ႉၶၢႆၵုၼ်ႇယွႆႈ ၼႂ်းပွၵ်ႉၽြႃး ၽိူၵ်ႇ ၶဵတ်ႇမၢႆ 5 ဝဵင်းတူၼ်ႈတီႈ ၼၼ်ႉ ႁၢႆၵႂႃႇလႆႈ 5 ဝၼ်းယဝ်ႉ ပႆႇႁၼ်ၶိုၼ်း တူဝ်ဝႆႉႁိုင်ၶၢဝ်းတၢင်း 5 ဝၼ်းပႆႇထူပ်းႁၼ်ၶိုၼ်း ဝႃႈၼႆ ။
ယိင်းၼုမ်ႇၵေႃႉဢၼ် ႁၢႆတူဝ်ၵႂႃႇၼၼ်ႉ ၸိုဝ်ႈႁွင်ႉ မသူႉပျေႉဢွင်ႇ (မစုပြည့်အောင်) ဢႃယု 20 ပီ ပဵၼ်လုၵ်ႈယိင်း လုင်းဝုၼ်းၽေႇ လႄႈ ပႃႈငူၺ်ႇယဵၼ်ႇ ယူႇ ဝၢၼ်ႈပူင်းမူႉ ထုင်ႉၼွင်ႁၢႆးယႃႈ ဝႃႈၼႆ ။
ၼႂ်းဝၼ်းတီႈ 27/8/2025 ယၢမ်းၵၢင်ဝၼ်း ၼၼ်ႉ မသူႉပျေႉဢွင်ႇ လႆႈၵပ်းသိုပ်ႇဢုပ်ႇၵၼ် တင်းၵူၼ်းတီႈႁိူၼ်း ပဵၼ်ၵမ်းလိုၼ်းသုတ်း ။ ၽွင်းၼၼ်ႉ လုင်းဝုၼ်းၽေႇ ၵေႃႉပဵၼ်ပေႃႈ မၼ်းၼၢင်း ဢမ်ႇယူႇလီလႄႈ လႆႈမႃးၵူတ်ႇထတ်း ယူတ်းယႃတူဝ်တီႈႁူင်းယႃဝဵင်းတူၼ်ႈတီး။ ယူတ်းယႃတူဝ်ယဝ်ႉသေဢၢၼ်းတေပွၵ်ႈမိူဝ်းၶိုၼ်း ၼႂ်းၼွင်။ မၼ်းၼၢင်းဢၢၼ်းတေ ပွၵ်ႈႁိူၼ်း ၸွမ်းပေႃႈမၼ်း၊ လုၵ်ႉတီႈႁၢၼ်ႉၶၢႆၵုၼ်ႇၼၼ်ႉသေ မၼ်းၼၢင်းၸၢင်ႈရူတ်ႉ ၵႂႃႇၸူးၵေႃႉပဵၼ်ပေႃႈ တီႈႁူင်းယႃ။ ၵူၺ်းၵႃႈ ဢမ်ႇထိုင်တီႈပေႃႈမၼ်းသေ မၼ်းၼၢင်းႁၢႆၵႂႃႇၵၢင်တၢင်း ဝႃႈၼႆ။
ၵူၼ်းၸမ်ၸႂ်မုင်ႉႁေႃႁိူၼ်း မပျေႉသူႉဢွင်ႇလၢတ်ႈၽူႈတွႆႇႁွၵ်ႈဝႃႈ – “ ဢၼ်ပေႃႈမႄႈၶဝ် ႁူႉဝႆႉ သမ်ႉဝႃႈ မၼ်းၵႂႃႇႁဵတ်းၵၢၼ်တီႈႁၢၼ်ႉၶၢႆၶဝ်ႈမုၼ်း ၼႂ်းပွၵ်ႉၽြႃးၽိူၵ်ႇၼႆ ၊ ၵူၺ်းၵႃႈၵူၼ်းၼႂ်းပွၵ်ႉ ၽြႃးၽိူၵ်ႇသမ်ႉဝႃႈ ၼႂ်းပွၵ်ႉၶဝ်ဢမ်ႇမီးႁၢၼ်ႉၶၢႆၶဝ်ႈမုၼ်း ထိုင်တီႈလႆႈၸၢင်ႈၵူၼ်း တၢင်းၼွၵ်ႈမႃး ႁဵတ်းၵၢၼ်ၸွမ်းၼႆဝႃႇ။ မၼ်းပိူင်ႈၵၼ်ၸိူင်ႉႁိုဝ်ဢမ်ႇႁူႉၼၼ်ႉ။ မိူဝ်ႈမၼ်းၵပ်းၾူၼ်ႊႁႃ ပေႃႈမၼ်း မၼ်းဝႃႈ – ထုၵ်ႈငိုၼ်းလိူၼ်လႄႈ တေမိူဝ်းႁိူၼ်းၸွမ်းပေႃႈမၼ်းၼႆႁေၵေႃႈ ႁၢႆၵႂႃႇ ၸဵမ်ဝၼ်းၼၼ်ႉ ၵပ်းသိုပ်ႇၵေႃႈဢမ်ႇလႆႈ” – ဝႃႈၼႆ ။
ဝၢႆးမၼ်းၼၢင်းႁၢႆၵႂႃႇ ၵူၼ်းတီႈႁိူၼ်း ၵပ်းၾူၼ်ႊတူၺ်းတီႈႁၢၼ်ႉၶၢႆၵုၼ်ႇသမ်ႉဝႃႈ မသူႉပျေႉဢွင်ႇ ဢွၵ်ႇၵၢၼ်ၵႂႃႇမီး 5 လိူၼ်ယဝ်ႉ ။ ထၢမ်တူၺ်းဢူၺ်းၵေႃႉမၼ်းၼၢင်းသမ်ႉဝႃႈ ဢမ်ႇႁၼ်ၵၼ်ႁိုင်ယဝ်ႉ- ဝႃႈၼႆ။
ဢိင်ၼိူဝ် လွင်ႈၼႆႉသေ ၵူၼ်းႁိူၼ်းမၼ်းၼၢင်းတႄႉလၢတ်ႈဝႃႈ – သင်ဝႃႈၽူႈလႂ်ၽႂ် ထူပ်းႁၼ်မႅၼ်ႈၸိုင် ၶႅၼ်းတေႃႈ ၵပ်းၸူးမၢႆၾူၼ်းမၢၼ်ႈ 09-255500692 ဢမ်ႇၼၼ် မၢႆၾူၼ်းထႆး 09-88683833 သေၵမ်း ဝႃႈၼႆဝႆႉ။
ၽွင်းငဝ်းလၢႆးဝၢၼ်ႈမိူင်းဢမ်ႇၼိမ်ၼႆႉ ယႃႈမဝ်းၵမ်လိူင်ႇၼမ် KTV ႁၢၼ်ႉၵိၼ်ၵျေႃႇၵေႃႈလိူင်ႇၼမ် ၵၢၼ်လွၵ်ႇလႅၼ်ၵိၼ်ၵၼ် ၵျႃႊၽျႅၼ်ႉ ၵေႃႈလိူင်ႇၼမ်။ ၵူၼ်းၼုမ်ႇ လုၵ်ႈဢွၼ်ႇမိူင်းတႆး ၵႆႉႁၢႆ ၵမ်ႈၽွင်ႈထုၵ်ႇဢဝ်ၵႂႃႇၶၢႆၵိၼ် ၵမ်ႈၽွင်ႈၵႂႃႇႁဵတ်းၵၢၼ်တီႈပၢင်တေႃႇလွင်း ၸွမ်းဝဵင်းယႂ်ႇဝဵင်းလူင် မၢင်ၵေႃႉၵေႃႈႁၼ်ၶိုၼ်း မၢင်ၵေႃႉၵေႃႈဢမ်ႇႁၼ်ၶိုၼ်း။ ၵွပ်ႈၼႆ ၼင်ႇႁိုဝ် လုၵ်ႈလၢင်း လၢၼ်ၸဝ်ႈၵဝ်ႇတေဢမ်ႇႁၢႆၼၼ်ႉ ၵူၼ်းႁိူၼ်းၵေႃႈထုၵ်ႇႁူမ်ႈၵၼ်သႂ်ႇၸႂ်လုမ်းလႃး၊ ၵူၼ်းၼုမ်ႇလုၵ်ႈဢွၼ်ႇယိင်းၸၢႆးၵေႃႈ တေၵႂႃႇတၢင်းလႂ်ႁႂ်ႈၵူၼ်းႁိူၼ်းႁူႉၸွမ်းတႃႇသေႇ – ၼႆ ၸုမ်းၸွႆႈထႅမ် ၼႂ်းပိုၼ်ႉတီႈလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ