ဝၼ်းတီႈ 29/08/2025 ယၢမ်းၵၢင်ၼႂ်ၸဝ်ႉ 3 မူင်း 20 မိၼိတ်ႉ ၵူၼ်းၼုမ်ႇတႆးၸုမ်းၼိုင်ႈ (မီး 6 ၵေႃႉ) လမ်းၽၼ်းၵူၼ်းၼုမ်ႇထႆး (မီး 6 ၵေႃႉၼင်ႇၵၼ်) မၢတ်ႇၸဵပ်းႁႅင်းၵေႃႉၼိုင်ႈ ပလိၵ်ႈထႆးလမ်းတီႉ ၵူၼ်းၼုမ်ႇတႆးလႆႈဝႆႉ 5 ၵေႃႉ၊ တႃႇၵေႃႉၼိုင်ႈ တိုၵ်ႉပၢႆႈလွတ်ႈဝႆႉ။

ဝၼ်းၼၼ်ႉယၢမ်းၵၢင်ၼႂ်ၸဝ်ႉ 3 မူင်းၶိုင်ႈ ၸုမ်းၵူၼ်းၼုမ်ႇထႆး ယူႇဝႆႉၼိူဝ်ၶူဝ် “ၸၼ်သူမ်” ၶၢမ်ႈၼမ်ႉပိင်း ၼႃႈၵၢတ်ႇလူင်။ မီးၸုမ်းၵူၼ်းၼုမ်ႇတႆးၸုမ်းၼိုင်ႈ တၢင်းၵၢတ်ႇလူင်လူင်းမႃး၊ မႃးၺႃးၵၼ်ၵၢင်တၢင်းသေ လမ်းၽၼ်းၵၼ်။ ၵူၼ်းၼုမ်ႇထႆး မၢတ်ႇၸဵပ်းၵႂႃႇၵေႃႉၼိုင်ႈ၊ လႅၼ်ႈပၢႆႈ 5 ၵေႃႉ။

ၸုမ်းၵူၼ်းၼုမ်ႇထႆးၼၼ်ႉ ပဵၼ်လုၵ်ႈႁဵၼ်းၸၼ်ႉၸွမ်ၼႆ ၶၢဝ်ႇထႆး CM 108 ပိုၼ်ၽၢဝ်ႇဝႆႉၼင်ႇၼႆ။

ၸုမ်းၵူၼ်းၼုမ်ႇထႆးၼၼ်ႉ ဢွၼ်ၵၼ်ၵႂႃႇတိူင်ႇလၢတ်ႈတီႈတပ်ႉပလိၵ်ႈလႄႈ ပလိၵ်ႈ တူၺ်းၵွင်ႈထၢႆႇ CCTV သေၸွမ်းလမ်းတီႉၸုမ်းၵူၼ်းၼုမ်ႇ ဢၼ်လမ်းၽၼ်းပိူၼ်ႈ။ ထိုင်ယၢမ်းၵၢင်ၼႂ်မိူင်းပႆႇလႅင်းလီ ၼႂ်ၼၼ်ႉၵူၺ်း ပလိၵ်ႈတီႉလႆႈၼုမ်ႇၸၢႆးတႆး 5 ၵေႃႉၼၼ်ႉ။ တီႉလႆႈပႃးၽႃႉမိတ်ႈလႄႈ ရူတ်ႉၶိူင်ႈၸိူဝ်းၶဝ်ၶီႇ ဢိၵ်ႇပႃးတင်းသိူဝ်ႈၶူဝ်းၶဝ် ဢၼ်ပဵၼ်လၵ်းထၢၼ်သၢၵ်ႈသေႇၸိူဝ်းၼၼ်ႉ ဝႃႈၼႆ။

ၸၢႆးၼုမ်ႇတႆး ဢၼ်ပလိၵ်ႈတီႉလႆႈ 5 ၵေႃႉၼၼ်ႉ ပဵၼ် – ၸၢႆးဢွင်ႇငိုၼ်း (ဢႃယု 20 ပီ)၊ ၸၢႆးၼမ်ႇၶိူဝ်း (ဢႃယု 19 ပီ) ၸၢႆးထူဝ်ႉ(ဢႃယု 19 ပီ) ၸၢႆးႁၢၼ် (ဢႃယု 20 ပီ) ၸၢႆးၸိူင်း ႁၢၼ် (ဢႃယု 19 ပီ) ။ ဢၼ်ပၢႆႈလွတ်ႈဝႆႉၵေႃႉၼိုင်ႈ ပဵၼ်ၸၢႆးၸွမ်မႂ်ႇ(ဢႃယု 22 ပီ)။ ၸိူဝ်းၶဝ်တင်းမူတ်းပဵၼ်ၵူၼ်းလုၵ်ႉမိူင်းမၢၼ်ႈမႃးၼႆ – ပလိၵ်ႈထႆး ပိုၼ်ၽၢဝ်ႇဝႆႉၼင်ႇၼႆ။

ၸိူဝ်းၶဝ် 5 ၵေႃႉ လၢတ်ႈတီႈပလိၵ်ႈဝႃႈ – ၸိူဝ်းၶဝ်ဢမ်ႇႁူႉၸၵ်းၵၼ်တင်းၵူၼ်းၼုမ်ႇထႆးၸိူဝ်းၼၼ်ႉ။ ၵူၺ်းၵႃႈ ၽွင်းလမ်းၽၼ်းၵၼ်ၼၼ်ႉ ယူႇၾၢႆႇလုၵ်ႈဢွၼ်ႇတႆးၸိူဝ်းၼၼ်ႉသမ်ႉ မဝ်းလဝ်ႈဝႆႉႁႅင်းသေ ၾၢႆႇၼိုင်ႈၵေႃႈ သမ်ႉထၢင်ႇဝႃႈၵူၼ်းၼုမ်ႇထႆးၸိူဝ်းၼၼ်ႉ တေမႃးႁဵတ်းႁၢႆႉတီႈၶဝ်လႄႈ ၶဝ်ၸင်ႇလႆႈလမ်း ၽၼ်းၵူၼ်းၼုမ်ႇထႆး – ဝႃႈၼႆ။

ယၢမ်းလဵဝ် ၵူၼ်းၼုမ်ႇတႆး 5 ၵေႃႉၼၼ်ႉ ပလိၵ်ႈၵုမ်းၶင်ဝႆႉၼႂ်းၶွၵ်ႈသေ ပိုတ်ႇဢဝ်လိူင်ႈဝႆႉလူၺ်ႈ – ႁူမ်ႈၵၼ်တင်ႈၸႂ်ႁဵတ်းႁၢႆႉတီႈပိူၼ်ႈ ႁႂ်ႈပိူၼ်ႈလႆႈမၢတ်ႇၸဵပ်း၊ ယိပ်းၽႃႉမိတ်ႈလႄႈ မဵဝ်းၶူမ်းၽၢႆၼႂ်းပိုၼ်ႉတီႈ ၵူၼ်းတင်းၼမ် လူၺ်ႈဢမ်ႇလႆႈၶႂၢင်ႉ(ဢၼုယၢတ်ႈ)- ၸဵမ်ၸိူဝ်းၼႆႉၼႆ – ၶၢဝ်ႇထႆး CM 108 News ပိုၼ်ၽၢဝ်ႇဝႆႉၼင်ႇၼႆ။