ၼႂ်းႁၢင်လိူၼ်ဢေႃႊၵတ်ႊသ်ပူၼ်ႉမႃးၼႆႉ ယိင်းသၢဝ် မေႃသွၼ်လိၵ်ႈၶႄႇ တီႈႁူင်းႁဵၼ်းၶႄႇ ထုၵ်ႇၵၼ်ႉၸၼ်လူလၢႆယဝ်ႉ ၶႃႈႁႅမ်တၢႆပႅတ်ႈ ၼႂ်းၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ။

မေႃသွၼ်လိၵ်ႈၶႄႇ ၵေႃႉထုၵ်ႇၶႃႈႁႅမ်တၢႆၼၼ်ႉ ပဵၼ်ၵူၼ်းဝၢၼ်ႈမၢၼ်ႈပၢင်ႇ ႁိမ်းဝၢၼ်ႈပၢင်ၼႃး ယၢၼ်ၵႆၵၼ်တင်း ဝဵင်းသႅၼ်ဝီမွၵ်ႈ 6 လၵ်း။ လွင်ႈပိူင်ပဵၼ်တႄႉပဵၼ်ၸိူင်ႉႁိုဝ် ၽႂ်ၵေႃႉလူလၢႆၶႃႈႁႅမ်တၢႆၵႂႃႇၼႆၼၼ်ႉ ၾၢႆႇသိုၵ်းၵဝ်ႈၵၢင်ႉၶဝ် ဢိုတ်းၶၢဝ်ႇဝႆႉ ဢမ်ႇပၼ်ၶၢဝ်ႇႁူဝ်ႈဢွၵ်ႇၼႆ – ၵူၼ်းမိူင်း ၵေႃႉယူႇဝႆႉၼႂ်းဝဵင်းသႅၼ်ဝီ လၢတ်ႈၼႄတီႈၸုမ်းၶၢဝ်ႇၽူႈတွႆႇႁွၵ်ႈၼင်ႇၼႆ။

“လွင်ႈၼႆႉ ႁဝ်းလႆႈငိၼ်းမႃးၼႂ်းၵၢတ်ႇ။ ၼၢင်းယိင်းသၢဝ်ၵေႃႉၼၼ်ႉ ပဵၼ်မေႃသွၼ် လိၵ်ႈၶႄႇတီႈဝၢၼ်ႈပၢင်ၼႃးၼႆဢေႃႈ။ ၺႃးၵၼ်ႉၸၼ်ယဝ်ႉႁႄ ႁႅမ်တၢႆပႅတ်ႈ။ လွင်ႈၼႆႉ သိုၵ်းၵဝ်ႈၵၢင်ႉၶဝ် ဢိုတ်းၶၢဝ်ႇဝႆႉ။ ဢမ်ႇပၼ်ပိူၼ်ႈႁူႉၸွမ်း။ ပဵၼ်ၵႂႃႇၼႂ်းဝၼ်းတီႈ 27-28 ၸိူဝ်းၼၼ်ႉယဝ်ႉ။ ၵမ်ႈၼမ် ဢွၼ်ၵၼ်ဝႃႈ ၵူၼ်းႁဵတ်းမၼ်းၼၼ်ႉ ပဵၼ်ၵူၼ်းသိုၵ်းၵဝ်ႈၵၢင်ႉၼႆ ဢေႃႈ။ ၵမ်ႈၽွင်ႈတၼ်းႁၼ် တီႈၵူၼ်ပွတ်းယိင်းသၢဝ်ၼၼ်ႉ ၵူဝ်ႈလိူတ်ႈဝႆႉၼႆ”။

လႆႈႁူႉဝႃႈ ဝၢၼ်ႈမၢၼ်ႈပၢင်ႇၼႆႉ မီးၸၢဝ်းၶိူဝ်းၶႄႇယူႇသဝ်းဝႆႉၼမ်လိူဝ်ပိူၼ်ႈသုတ်း။ ထိုင်ဝၼ်းမိူဝ်ႈၼႆႉ ၽႂ်ၵေႃႉၶႃႈႁႅမ်တၢႆပႅတ်ႈ ၼၢင်းယိင်းသၢဝ် ၵေႃႉႁဵတ်းမေႃသွၼ်လိၵ်ႈၶႄႇၼၼ်ႉ ၵေႃႈ ဢမ်ႇလႆႈႁူႉၸွမ်း။ ၾၢႆႇသိုၵ်းၵဝ်ႈၵၢင်ႉၵေႃႈ ဢမ်ႇဢဝ်လိူင်ႈ ဢမ်ႇၸွမ်းႁႃတူဝ်ၵေႃႉႁဵတ်းၽိတ်း ၼၼ်ႉၵူၺ်းဢမ်ႇၵႃး ၽွင်းဢဝ်တူဝ်တၢႆၵႂႃႇပႅတ်ႈၼၼ်ႉၵေႃႈ ဢမ်ႇပၼ်ၽႂ်ႁူႉၸွမ်းၼႆ – ၵူၼ်းၵေႃႉၸွႆႈထႅမ် တူင်ႉၼိုင်ႁဵတ်းၵၢၼ်ဝႆႉ ၼႂ်းၸုမ်းတူင်ႇဝူင်းၵူၼ်း ၼႂ်းဝဵင်းသႅၼ်ဝီ လၢတ်ႈၼႄၽူႈတွႆႇႁွၵ်ႈၼင်ႇၼႆ။

“လိူင်ႈၼႆႉ ၵူၼ်းၵေႃႈဢမ်ႇပေႃးႁူႉၼမ်။ ၵူၼ်းၵေႃႉဢၼ်တၢႆၵႂႃႇၼႆႉ ပဵၼ်မေႃသွၼ်လိၵ်ႈၶႄႇ။ ပဵၼ်ၽႂ်ၵေႃႉၵၼ်ႉၸၼ် ၽႂ်ၵေႃႉၶႃႈ ႁႅမ်တၢႆပႅတ်ႈၵေႃႈ ဢမ်ႇလႆႈႁူႉၸွမ်း။ တူဝ်တၢႆၵေႃႈ ၶဝ်တေႃႉၵႂႃႇပႅတ်ႈႁင်းၵူၺ်းၶဝ်။ ဝၢၼ်ႈၶဝ်ၼၼ်ႉ မီးၾၢႆႇပုၼ်ႉဝၢၼ်ႈမွၵ်ႈၸလီႇ ၵွၼ်ႇပႆႇထိုင်ဝၢၼ်ႈပၢင်ၼႃးၼၼ်ႉ။ ပဵၼ်ဝၢၼ်ႈၶႄႇယူႇၼမ်ဝႆႉ။ ယၢမ်းလဵဝ် ၵူၼ်းပႅၵ်ႇၼႃႈၼမ် ၵူၼ်းသိုၵ်း၊ ၵူၼ်းၸၢဝ်းၶႄႇၵေႃႈ ၼမ်မႃးႁႅင်း ၸိူဝ်းပဵၼ်ၼၢင်းယိင်းသၢဝ် ၵူၼ်းၼုမ်ႇၸိူဝ်းၼႆႉ လီမႆႈၸႂ်ႁႅင်းၼႃႇ”။

ၵဵဝ်ႇလူၺ်ႈလွင်ႈၼႆႉ ယူႇတီႈ ၸုမ်းၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇၸူး သိုၵ်းၵဝ်ႈၵၢင်ႉၼႂ်းပိုၼ်ႉတီႈယူႇၵေႃႈ ၵပ်းသိုပ်ႇဢမ်ႇလႆႈ။ ငဝ်းလၢႆးသိုပ်ႇပဵၼ်ႁိုဝ်ထႅင်ႈၼႆ ၶတ်းၸႂ်ၸွပ်ႇထၢမ်ဝႆႉတူၺ်းယူႇ။

မိူၼ်ၼႆ မိူဝ်ႈပူၼ်ႉမႃး ၶၢဝ်းလိူၼ်ႁႃႈ ၼႂ်းပီ 2025 ၼႆႉၵူၺ်းၼင်ႇၵဝ်ႇ လိူင်ႈပိူင်ပဵၼ်ၸိူင်ႉၼႆ ယၢမ်ႈၵိူတ်ႇပဵၼ်တၢင်းထုင်ႉမိူင်းပႃး ၸႄႈဝဵင်းသႅၼ်ဝီ ပွၵ်ႈၼိုင်ႈ။ ၵူၺ်းပွၵ်ႈၼၼ်ႉ ၼၢင်းယိင်းသၢဝ်ဢွၼ်ႇ ၺႃးၵၼ်ႉၸၼ်လူလၢႆၵူၺ်း ဢမ်ႇထုၵ်ႇၶႃႈႁႅမ်တၢႆ။ ပွၵ်ႈၼၼ်ႉၵေႃႈ ၽူႈမီးပုၼ်ႈၽွၼ်းၼႂ်းၸုမ်းသိုၵ်းၵဝ်ႈၵၢင်ႉၶဝ် ဢမ်ႇပၼ်တူတ်ႈတၢမ်ႇ ၵူၼ်းသိုၵ်းၵေႃႉႁဵတ်းၽိတ်းၼၼ်ႉၼႆ – ၵူၼ်းမိူင်းပိုၼ်ႉတီႈ ၵေႃႉႁူႉႁၼ်ၸွမ်း ပိူင်ပဵၼ်ၼႆႉ လၢတ်ႈၼႄၼင်ႇၼႆ။

ဝဵင်းသႅၼ်ဝီၼႆႉ ၸဵမ်မိူဝ်ႈပၢင်တိုၵ်း ၽႅၼ်ယၼ်ႇသိုၵ်း 1027 ပွၵ်ႈၵမ်းၼိုင်ႈယဝ်ႉ သိုၵ်းၵဝ်ႈၵၢင်ႉ ၵုမ်းၵမ်ဝႆႉသေ ပၼ်ႇၵၢၼ်ၽွင်းငမ်းဝႆႉ ႁၢၼ်ႉတေႃႇထိုင်ယၢမ်းလဵဝ် ႁိုင်မႃးၶၢဝ်းတၢင်း ၼိုင်ႈပီပၢႆ။ ၼႂ်းၶၢဝ်းတၢင်း သိုၵ်းၵဝ်ႈၵၢင်ႉၵုမ်းၵမ်မႃးၼႆႉ ၵူၼ်းမိူင်းႁူပ်ႉတၢင်းယၢပ်ႇ လွင်ႈၵၢၼ်ႁႃၵိၼ်လဵင်ႉတွင်ႉၵူၺ်းဢမ်ႇၵႃး ၼၢင်းယိင်းလဵၵ်ႉၼုမ်ႇထဝ်ႈ ၸိူဝ်းယူႇၸွမ်းဝၢၼ်ႈၸွမ်းသူၼ် ၺႃးၵူၼ်းသိုၵ်းၵဝ်ႈၵၢင်ႉ လူလၢႆပူၼ်ႉတိၼ်ပႅၼ်မိုဝ်းတေႃႇ ႁဵတ်းပူၼ်ႉပႅၼ်ၼိူဝ်သုၼ်ႇလႆႈၼၢင်းယိင်း ၸဵမ်ၸိူဝ်းၼႆႉႁၢဝ်ႈႁႅင်းၼႆ – ၵူၼ်းပိုၼ်ႉတီႈလၢတ်ႈ။

တႅမ်ႈ – ၽူၺ်းၼုမ်ႇ