ၾူၼ်တူၵ်းဢမ်ႇထၢတ်ႇ ၼမ်ႉႁူၺ်ႈၼမ်ႉလွႆၼွင်း ႁဵတ်းႁႂ်ႈၵူၼ်းမိူင်းၼႂ်းၸႄႈဝဵင်းပၢင်လွင်း မၢတ်ႇၸဵပ်းလူႉတၢႆ ႁိူၼ်းယေးၵူၼ်းမိူင်းလူႉၵွႆ တီႈဝၢၼ်ႈပွင်းလွင်း ၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း ဝႃႈၼႆ။
ၼႂ်းဝၼ်းတီႈ 27/08/2025 ယၢမ်းၵၢင်ၼႂ် 1 မူင်းၶိုင်ႈ ၾူၼ်တူၵ်းႁၢဝ်ႈႁႅင်း ႁဵတ်းႁႂ်ႈလိၼ်ၵူၼ်ႇ ၼမ်ႉႁူၺ်ႈၼမ်ႉလွႆၼွင်း ႁိူၼ်းၵူၼ်းဝၢၼ်ႈဢေႇတိၼ်ႇ ဢိူင်ႇသပေႇၵုင်း ဝဵင်းပွင်းလွင်း ၸႄႈဝဵင်းပၢင်လွင်း ၵူၼ်းမိူင်းလူႉတၢႆ 2 ၵေႃႉ မၢတ်ႇၸဵပ်းႁၢဝ်ႈႁႅင်း 2 ၵေႃႉလႄႈ ႁိူၼ်းယေးၵူၼ်းဝၢၼ်ႈ လွင်ႈၸွမ်းၼမ်ႉလူႉၵွႆ 13 လင်။
ၵူၼ်းၵႂႃႇၸွႆႈထႅမ် လၢတ်ႈၽူႈတွႆႇႁွၵ်ႈဝႃႈ -“ၾူၼ်တူၵ်းဢမ်ႇထၢတ်ႇ ႁဵတ်းႁႂ်ႈလိၼ်ၵူၼ်ႇၼမ်ႉႁူၺ်ႈ ၼမ်ႉလွႆၵိုင်ႉၵၢင်ႉၼွင်း ပႃးလိၼ်ပႃးႁိၼ်၊ ပႃးတူၼ်ႈမႆႉ လုၵ်ႉၼိူဝ်လွႆလူင်းမႃး တဵင်သႂ်ႇႁိူၼ်းယေး ၵူၼ်းမိူင်း၊ ၽွင်းၼၼ်ႉ ၵူၼ်းဝၢၼ်ႈတိုၵ်ႉၼွၼ်းယူႇလႄႈ ဢမ်ႇတၼ်းႁူႉ။ ဢမ်ႇတၼ်းၵဵပ်းၶူဝ်းၶွင်သင် – လႆႈဢဝ်သၢႆၸႂ်လွတ်ႈၵူၺ်းယဝ်ႉ။ ပၢႆႈဢမ်ႇတၼ်းပူၼ်ႉလႄႈ ၵူၼ်းၸၢႆး ၵေႃႉၼိုင်ႈ၊ ၼၢင်းယိင်း ၵေႃႉၼိုင်ႈ လွင်ႈၸွမ်းၼမ်ႉတၢႆ”- ဝႃႈၼႆ။
ၵူၼ်းဢၼ်လူႉတၢႆၵႂႃႇၼၼ်ႉ ၼၢင်းယိင်းဢႃယုၸမ် 60 ၵေႃႉၼိုင်ႈ၊ ၵူၼ်းၸၢႆးၼုမ်ႇ ဢႃယု 20 ပၢႆ ၵေႃႉ ၼိုင်ႈလႄႈ မီးၵူၼ်းမၢတ်ႇၸဵပ်း 2ၵေႃႉ။ ၵေႃႉၼိုင်ႈ မၢတ်ႇတီႈၶႃ၊ ထႅင်ႈ ၵေႃႉၼိုင်ႈ ႁူဝ်တႅၵ်ႇ ယၢမ်းလဵဝ် သူင်ႇယူတ်းယႃႇတူဝ်ဝႆႉတီႈဝဵင်းပၢင်လွင်း။ လိူဝ်ၼၼ်ႉ ႁိူၼ်းၵူၼ်းဝၢၼ်ႈ လွင်ႈၵႂႃႇၸွမ်းၼမ်ၼႆႉ မီး 8 လင် ၸူမ်လိၼ်ၵႂႃႇ 5 လင် ဝႃႈၼႆ။
ဝၢၼ်ႈဢေႇတိၼ်ႇၼႆႉ မီးလင်ႁိူၼ်း 100 ပၢႆ မီးၼိူဝ်သဵၼ်ႈတၢင်းလူင်ရူတ်ႉၵႃး ၵႂႃႇတိတ်းၸပ်းတိၼ်လွႆ။ ယွၼ်ႉၼၼ် ၽွင်းၾူၼ်တူၵ်းဢမ်ႇထၢတ်ႇႁဵတ်းႁႂ်ႈၼမ်ႉႁူၺ်ႈၼမ်ႉလွႆ ၼွင်းထူမ်ႈ ႁိူၼ်းယေးၵူၼ်းဝၢၼ်ႈ ၸိူဝ်းမီးတိၼ်လွႆသေ ယၢမ်းလဵဝ် လူဝ်ႇတၢင်းၸွႆႈထႅမ်ဝႆႉ ႁၢဝ်ႈႁႅင်း။
ၵူၼ်းၸၢႆးဢႃယု 50 ပီ ယူႇဝဵင်းပၢင်လွင်း လၢတ်ႈၽူႈတွႆႇႁွၵ်ႈဝႃႈ -“တလဵဝ်ၵေႃႈ ၾူၼ်တိုၵ်ႉတူၵ်း ဢမ်ႇထၢတ်ႇလႄႈ လူဝ်ႇတင်းၸွႆႈထႅမ်ႁၢဝ်ႈႁႅင်းဝႆႉဢေႃႈ။ ၵူၼ်းၸိူဝ်းၺႃးၼမ်ႉထူမ်ႈၼၼ်ႉ ယၢမ်းလဵဝ် လႆႈပၢႆႈ ၽေးၼမ်ႉၵႂႃႇမီးဝႆႉတီႈၵျွင်းၽြႃးၶရိယၼ်ႇ Church ႁူဝ်ၵူၼ်းမီးမွၵ်ႈ 30 ၵေႃႉ၊ လူဝ်ႇၶဝ်ႈၼမ်ႉတၢင်းၵိၼ်၊ ၶူဝ်းလဵင်းၸိူဝ်းၼႆႉ။ ယွၼ်ႉသင်ၼႆ ၶူဝ်းႁိူၼ်း ၶူဝ်းယေးၸိူဝ်းၼႆႉပႃးၵႂႃႇၸွမ်းၼမ်ႉမူတ်းယဝ်ႉ”- ဝႃႈၼႆ။
ဝၢၼ်ႈဢေႇတိၼ်ႇၼႆႉ ပေႃးၾူၼ်တူၵ်းႁႅင်းၼႆၸိုင် လိၼ်ၵူၼ်ႇ ၼမ်ႉထူမ်ႈၼမ်ႉၼွင်းပဵၼ်ၵူႈပီ။ ၵူၺ်းၵႃႈ ဢမ်ႇႁၢႆႉႁႅင်းထိုင်တီႈၵူၼ်းလူႉတၢႆ ၸိူင်ႉၼႆ။ ၼမ်ႉထူမ်ႈထိုင်တီႈၵူၼ်းပေႃးတၢႆၼႆႉ ပွၵ်ႈၼႆႉ ပဵၼ်ပွၵ်ႈဢွၼ် တၢင်းသုတ်း။ ယွၼ်ႉၼၼ် ပေႃးၾူၼ်တူၵ်းဢမ်ႇထၢတ်ႇၼႆ ၶႂ်ႈႁႂ်ႈၾၢင်ႉၵၼ်ထွမ်ႇၶၢဝ်ႇၾိင်ႈၾႃႉရႃသီႇသေ ၾၢင်ႉၵၼ်ၵႂႃႇမႃး – ၵူၼ်းပိုၼ်ႉတီႈလၢတ်ႈ။
ၼႂ်းဝၼ်းတီႈ 26/08/2025 ယၢမ်းဝၢႆးဝၼ်း 1 မူင်း ၾူၼ်တူၵ်းလူမ်းလႅင်ႉၶဝ်ႈ ဝၢၼ်ႈလူင်ပႅၼ်ႈ ဝၢၼ်ႈမွၵ်ႇလႄႈ ဝၢၼ်ႈဢၼ်မီးၼႂ်းဢိူင်ႇၼမ်ႉတူၵ်း ၸႄႈဝဵင်းပၢင်လွင်း လင်ၶႃးႁိူၼ်းယေးၵူၼ်းမိူင်း ဢိၵ်ႇႁူင်းႁဵၼ်း ပိဝ်ၸွမ်းလူမ်း ယၢမ်းလဵဝ် လူဝ်ႇတၢင်းၸွႆႈထႅမ် တႃႇပူၵ်းပွင်ႇမႄးသၢင်ႈၶိုၼ်းဝႆႉ ဝႃႈၼႆ။
မိူၼ်ၼင်ႇၼႆ ၼႂ်းဝၼ်းတီႈ 26/08/2025 ယၢမ်းဝၢႆးဝၼ်း ၾူၼ်တူၵ်းဢမ်ႇထၢတ်ႇ လူမ်းလႅင်ႉၶဝ်ႈၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း။ ႁိူၼ်းၵူၼ်းႁူဝ်ၼွင် (ကန်ခေါင်း) လႄႈ ဝၢၼ်ႈၸၢင်ႈၶမ်း (စန်ခန့်) 65 လင်၊ ႁိူၼ်းၵူၼ်းဝၢၼ်ႈႁၢတ်ႇပူင်း (ဟတ်ပုံး) 56 လင် လူႉၵွႆယွၼ်ႉလူမ်း။ ယၢမ်းလဵဝ် လူဝ်တၢင်းၸွႆႈထႅမ်ဝႆႉ ႁၢဝ်ႈႁႅင်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ