တႄႇၵၢင်လိူၼ်ဢေႃႊၵတ်ႊသ်မႃး တေႃႇထိုင်ယၢမ်းလဵဝ်ၼႆႉ သိုၵ်းမၢၼ်ႈ ၸိူဝ်းပၵ်းတပ်ႉဝႆႉတီႈဝဵင်းၼမ်ႉ လၼ်ႈၼၼ်ႉ ၵူတ်ႇထတ်းရူတ်ႉၵႃးၸိူဝ်းတေႃႉတၢင်ႇၶူဝ်းၵုၼ်ႇ တၢင်းမိူင်းတႆးပွတ်းႁွင်ႇ – မိူင်းတႆးပွတ်းၸၢၼ်း လတ်းၽၢၼ်ႇၵဵတ်ႉလၢၼ်ႇ တီႈတၢင်းၶဝ်ႈတၢင်းဢွၵ်ႇ ဝဵင်းၼမ်ႉလၼ်ႈ ႁၢဝ်ႈႁႅင်း။  

ၵူၼ်းပိုၼ်ႉတီႈ ဝဵင်းၼမ်ႉလၼ်ႈ ၵေႃႉၼိုင်ႈ လၢတ်ႈၼႄဝႃႈ -“မိူဝ်ႈလဵဝ် ၸဝ်ႈလႅင်းၵႃးၶဝ် တမ်ႉဢမ်ႇပေႃး လႆႈဢွၵ်ႇ။ ရူတ်ႉၵႃး ၸိူဝ်းလုၵ်ႉတၢင်းမိူင်းတႆးပွတ်းႁွင်ႇ – လတ်းၵႂႃႇတၢင်းမိူင်းတႆးပွတ်းၸၢၼ်းၼၼ်ႉၵေႃႈ ဢေႇႁႅင်းလူင်းၵႂႃႇတႄႉတႄႉဝႃႈဝႃႈ။ ဢမ်ႇမိူၼ် မိူဝ်ႈဢွၼ်တၢင်း။ ၶူဝ်းၼုင်ႈ ဢၼ်လုၵ်ႉတၢင်းမိူင်းၶႄႇ၊ မိူင်း ထႆး၊ ၶဝ်ႈမႃးၼၼ်ႉၵေႃႈ ဢမ်ႇတေႃႉသင်လႆႈႁႄမဵဝ်းယဝ်ႉ”- ဝႃႈၼႆ။

လႆႈႁူႉဝႃႈ တီႈၵဵတ်ႉလၢၼ်ႇဢွင်ႈတီႈမီးသိုၵ်းမၢၼ်ႈ ပႂ်ႉၵူတ်ႇထတ်းၼၼ်ႉ ၶဝ်ႈသၢၼ်၊ ယႃႈယႃ ၸိူဝ်းၼၼ်ႉၵေႃႈ ဢမ်ႇပၼ်လတ်းၶၢမ်ႈ ၵဵတ်ႉလၢၼ်ႇလႃးလႃး ၵူၺ်းဢမ်ႇၵႃး ရူတ်ႉၵႃး ၸိူဝ်းတေႃႉတၢင်ႇမႃး ၼၼ်ႉၵေႃႈ ၺႃးတီႉၺွပ်း ၵိုတ်းဝႆႉၾၢႆႇၼွၵ်ႈဝဵင်းတင်းသဵင်ႈ ၼႆယဝ်ႉ။

လိူဝ်ၼၼ်ႉ ရူတ်ႉၵႃးတေႃႉတၢင်ႇၵုၼ်ႇ ၸိူဝ်းၺႃးသိုၵ်းမၢၼ်ႈ တီႉၺွပ်းဝႆႉတီႈဝဵင်းႁူဝ်ပူင်း၊ မိူင်းတႆးပွတ်းၸၢၼ်း ၼၼ်ႉၵေႃႈ မီးယူႇမွၵ်ႈ 60 လမ်း၊ ႁၢၼ်ႉတေႃႇထိုင်ယၢမ်းလဵဝ် ႁိုင်ၶၢဝ်းတၢင်းၸမ် 5 လိူၼ် ယဝ်ႉၵေႃႈ သိုၵ်းမၢၼ်ႈ ပႆႇပွႆႇပၼ်ၶိုၼ်းလႄႈ ႁဵတ်းႁႂ်ႈၸဝ်ႈရူတ်ႉၵႃး ႁူပ်ႉတၢင်းယၢပ်ႇ ၵၢၼ်ႁႃၵိၼ်လဵင်ႉၼႃႈႁိူၼ်း ၼႆယဝ်ႉ။

ယွၼ်ႉသိုၵ်းမၢၼ်ႈ ဢမ်ႇယွမ်းပွႆႇ တီႉၺွပ်းဢဝ်ရူတ်ႉၵႃးၸိူဝ်းတၢင်ႇၵုၼ်ႇဝႆႉလႄႈ ၵူၼ်းႁေႃႈရူတ်ႉၵႃးတၢင်ႇၵုၼ်ႇၶဝ် ဢမ်ႇတမ်းၸႂ်ရူတ်ႉၵႃးသေ လႆႈၼွၼ်းပႂ်ႉၵႃးဝႆႉ၊ ၾၢႆႇၸဝ်ႈၵၢၼ်သမ်ႉ ဢမ်ႇဢွၵ်ႇပၼ်ငိုၼ်းၵႃႈ ၸႂ်ႉၸၢႆႇ၊ ၸဝ်ႈၼႃႈတီႈပလိၵ်ႈလႄႈ သိုၵ်းမၢၼ်ႈၵေႃႈ ဢမ်ႇပၼ်ဢွင်ႈတီႈယူႇသဝ်းၸွမ်းၶဝ်သေ ႁဵတ်းႁႂ်ႈၵူၼ်းႁေႃႈရူတ်ႉၵႃးၶဝ် ထူပ်းတၢင်းယၢပ်ႇၽိုတ်ႇဝႆႉ ၼႆယဝ်ႉ။

မိူဝ်ႈပူၼ်ႉမႃး လိူၼ်ဢေႊပရိူဝ်ႊၼၼ်ႉ ၵႃးတၢင်ႇၵုၼ်ႇမွၵ်ႈ 120 လမ်း ၸိူဝ်းလုၵ်ႉတၢင်းမိူင်းလႃးလႄႈ တႃႈၶီႈလဵၵ်းမႃး ၺႃးသိုၵ်းမၢၼ်ႈ ဢၼ်ပၵ်းတပ်ႉဝႆႉတီႈ ဝဵင်းႁူဝ်ပူင်း မိူင်းတႆးပွတ်းၸၢၼ်းၼၼ်ႉ တီႉၺွပ်းၵုမ်းၶင်ဝႆႉ ၼႆယဝ်ႉ။

တႅမ်ႈ – ၽူၺ်းၼုမ်ႇ