ယၢမ်းလဵဝ် ၵူၼ်းပၢႆႈၽေးသိုၵ်း ၼႂ်းထုင်ႉၼွင်ပိင် ၸႄႈဝဵင်းၵျွၵ်ႉမႄး ႁူဝ်ၵူၼ်းမိုၼ်ႇပၢႆ ၸိူဝ်းလႆႈပၢႆႈၽေး ပၢင်တိုၵ်းဝႆႉၼၼ်ႉ ထူပ်းတၢင်းယၢပ်ႇၽိုတ်ႇလွင်ႈၶဝ်ႈၼမ်ႉတၢင်းၵိၼ်လႄႈ ယႃႈယႃ ၸိူဝ်းၼႆႉ ယွၼ်ႉပၢင်တိုၵ်းသေ ၵမ်ႈၽွင်ႈ ဢမ်ႇတၼ်းလႆႈႁၢင်ႈႁႅၼ်းသင် ၼႆယဝ်ႉ။

ၵူၼ်းပၢႆႈၽေးသိုၵ်း ထုင်ႉၼွင်ပိင် လၢတ်ႈတီႈၽူႈတွႆႇႁွၵ်ႈဝႃႈ – “ၶၼ်ၸႂ်ၶႃႈဢေႃႈ မၼ်းၵိုင်ႉၵၢင်ႉလႆႈပၢႆႈမႃးၶႃႈၼႃႇ မၢင်ၸိူဝ်းတၢင်းဢမ်ႇလႆႈမႃးၶူဝ်းလဵင်းၵွၼ်ႇဢေႃႈၼႆႉ။ မၼ်းၵိုင်ႉ ၵၢင်ႉပဵၼ်သေ ၵိုင်ႉၵၢင်ႉတူၵ်းၸႂ် ၼႃႇဢႃးလႃးၶႃႈဢေႃႈ။ မိူဝ်ႈတႄႇမၼ်း တီႈၼွင်ပိင်ၼႆႉ မၼ်းတေလွတ်ႈၽေးယူႇ ၽႂ်ၵေႃႈဢမ်ႇဝႆႉလမ်ႇလွင်ႈၼၼ်ႉၶႃႈၼႃႇ။ ပေႃးဝႃႈပဵၼ်မႃးၵေႃႈ မၢၵ်ႇၼႆႉထပ်းထပ်းတၢမ်းတၢမ်းၵၼ်သေ ဢမ်ႇပၢႆႈဢမ်ႇလႆႈယဝ်ႉ ႁဵတ်းၼၼ်ဢေႃႈ။ ပေႃးပၢင်တိုၵ်းပဵၼ်ႁိုင် လႆႈပၢႆႈ 9-10 ဝၼ်းတႄႉ တေယၢပ်ႇတႄႉတႄႉၶႃႈယဝ်ႉ။ လွင်ႈၶူဝ်းၼုင်ႈတၢင်းဝႂ် ၸိူဝ်းၼႆႉ ပေႃးပဵၼ်ၼၢင်းယိင်း မႄႈလုၵ်ႈဢွၼ်ႇတႄႉ ၶၼ်ၸႂ်ဢိူဝ်ႈ လႆႈမႆႈၸႂ်လွင်ႈ ပၢႆႈယူႇလီ လွင်ႈယူတ်းယႃၸိူဝ်းၼႆႉ မၼ်းႁိုဝ်တဵမ်ထူၼ်ႈလႃႇၼေႃ ဢၼ်လႂ်ၵေႃႈ လူဝ်ႇယဝ်ႉ”- ဝႃႈၼႆ။

ယွၼ်ႉပၢင်တိုၵ်းသိုၵ်းမၢၼ်ႈတင်း သိုၵ်းတဢၢင်း TNLA ၼႆႉသေ ႁဵတ်းႁႂ်ႈၵူၼ်းဝၢၼ်ႈၼႂ်းထုင်ႉၼွင်ပိင် ၸိူဝ်းလႆႈပၢႆႈၽေးသိုၵ်းၼႆႉ ဢမ်ႇယွမ်း 10 ဝၢၼ်ႈ။ ၵမ်ႈၼမ် တေပဵၼ်မႄႈလုၵ်ႈဢွၼ်ႇ၊ ၼၢင်းယိင်းလႄႈ လုၵ်ႈဢွၼ်ႇ ၸိူဝ်းၼႆႉ။

“ၵူၼ်းတၢင်းၼွင်ပိင်၊ ၼၢင်းၽႆး၊ ပၢင်တီးၸိူဝ်းၼႆႉတႄႉ မႃးမီးတီႈၼမ်ႉႁၢင်ႈၶိူင်ႈလႄႈ ႁၢႆးၵုၺ်ၸိူဝ်းၼႆႉ မူတ်းယဝ်ႉ တီႈၼွင်ပိင်တႄႉ ပိူၼ်ႈပေႃးပၢႆႈမူတ်းယဝ်ႉၶႃႈ။ တေမီးမွၵ်ႈၼိုင်ႈမိုၼ်ႇ ၸိူဝ်းၼႆႉဢေႃႈ။ ပႃးတၢင်းထုင်ႉပုင်ႇဝူင်းၶႃႈယဝ်ႉ။ ယူႇၸွမ်းဝၢၼ်ႈ ၸွမ်းၵျွင်းမုၼ်ၸဝ်ႈလႄႈ ၸွမ်းၵျွင်းသြႃႇ ၸိူဝ်းၼႆႉၶႃႈ။ မၼ်းတဵမ်ၵႂႃႇၶႃႈဢေႃႈ မိူၼ်ၼင်ႇ တီႈၵျွင်းသြႃႇၶဝ် ၵျွင်းမုၼ်ၸဝ်ႈၼႆႉ မၼ်းတဵမ်ၵႂႃႇသေ ၸိူဝ်းဢၼ်တူၵ်း လႃႈတူၵ်းလိုၼ်းၸိူဝ်းၼၼ်ႉ မႃးယူႇၼိူဝ်ၵႃးသေ ႁုင်ၵိၼ်တီႈတႂ်ႈဢဝ်ၸိူင်ႉၼၼ်ၵေႃႈ မီးၼမ်ဢေႃႈ။ ဢၼ်လႆႈပၢႆႈၼမ်ၼႆႉ မၼ်းပဵၼ်ၼၢင်းယိင်းလႄႈ လုၵ်ႈဢွၼ်ႇ၊ ၼၢင်းယိင်းဢွၼ်ႇလႄႈ မႄႈလုၵ်ႈမႄႈလၢင်း ၸိူဝ်းၼႆႉၵမ်ႈၼမ်”- ၵူၼ်းပၢႆႈၽေးသိုၵ်း ထုင်ႉၼွင်ပိင် သိုပ်ႇလၢတ်ႈၼႄၼင်ႇၼႆ။

ပၢင်တိုၵ်း သိုၵ်းမၢၼ်ႈတင်း သိုၵ်းတဢၢင်း TNLA တီႈၼႂ်းထုင်ႉၼွင်ပိင်ၼႆႉ တေႃႇထိုင်ဝၼ်းမိူဝ်းၼႆႉ တိုၵ်ႉသိုပ်ႇပဵၼ်ပၢင်တိုၵ်းၵၼ် ႁၢဝ်ႈႁႅင်းဝႆႉယူႇ။ ၵူၼ်းပၢႆႈၽေးသိုၵ်းၶဝ် ယင်းလၢတ်ႈထႅင်ႈဝႃႈ ယၢမ်းလဵဝ် တီႈၼွင်ပိင်ၼႆႉ သိုၵ်းမၢၼ်ႈၶဝ်ႁႄႉႁၢမ်ႈ ဢမ်ႇပၼ်ၵူၼ်းဝၢၼ်ႈၶဝ်ႈဢွၵ်ႇဝၢၼ်ႈလူးၵွၼ်ႇ ၼႆယဝ်ႉ။

“မၢၵ်ႇၼႆႉ ၶဝ်ပွႆႇၵူႈဝၼ်းၶႃႈယဝ်ႉ မိူဝ်ႈလဵဝ်ၼႆႉတႄႉ တီႈမၢၼ်ႈၵၢတ်ႇၼႆႉ ၵိုတ်းသိုၵ်းလွႆ ၸွမ်းပၢတ်ႈပၢတ်ႈလႄႇသေ သိုၵ်းမၢၼ်ႈသမ်ႉ မီးတၢင်းၼႂ်းဝၢၼ်ႈ ႁဵတ်းၼၼ်သေ ယိုဝ်းၵၼ် ၶႃႈဢေႃႈ။ ငိၼ်းဝႃႈ ၶဝ်ယိုဝ်း ၵၼ်တၢင်းမၢၼ်ႈၵၢတ်ႇ ၼိူဝ်လွႆၵွင်းမူး တၢင်းႁွင်ႇၼွင်ပိင်။ မၢၼ်ႈၵေႃႈ ဢမ်ႇပႆႇပၼ်ၶဝ်ႈၼႂ်းမၢၼ်ႈ ၵၢတ်ႇၶႃႈ။ ၵမ်ႈၽွင်ႈဝႃႈတႄႉ တိုၵ်ႉၵိုတ်းယူႇ ဝႃႇ ၼႆႉ။ ဢၼ်ဢမ်ႇဢွၵ်ႇသေၶမ်ဝႆႉၼႂ်းဝၢၼ်ႈၵေႃႈမီး မၢင်ၸိူဝ်းပဵၼ်ၵူၼ်းထဝ်ႈ ဢမ်ႇမေႃၶီႇရူတ်ႉၶိူင်ႈ ဢမ်ႇမီးပီႈမီးၼွင်ႉ ၸိူဝ်းၼၼ်ႉ။ ၵမ်ႈၽွင်ႈ တိုဝ်သေယူႇဝႆႉ ၵေႃႈမီး တီႈမၢၼ်ႈၵၢတ်ႇၼႆႉ ႁႂ်ႈပေႃးၵိုတ်းၼမ်တႄႉ ဢမ်ႇၵိုတ်းယဝ်ႉ”- ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆထႅင်ႈ။

တႄႇဢဝ်ဝၼ်းတီႈ 20/08/2025 ၼႆႉမႃး သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်းပွႆႇမၢၵ်ႇသႂ်ႇ ၼႂ်းထုင်ႉၼွင်ပိင်ၼႆႉ လႆႈဝႃႈႁၢဝ်ႈႁႅင်းမႃး၊ ပွႆႇထပ်းၵၼ်ၵူႈဝၼ်းလႄႈ ၵူၼ်းမိူင်း ၸင်ႇလႆႈဢွၼ် ၵၼ်ပၢႆႈၽေးသိုၵ်း။

ဝၼ်းတီႈ 25 ၼႆႉ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်းပွႆႇမၢၵ်ႇသႂ်ႇ တီႈပွၵ်ႉ 7 လႄႈ ႁဵတ်းႁႂ်ႈမၢၵ်ႇတူၵ်းသႂ်ႇဝတ်ႉဝႃႇသူဝ်ႇသေ ၸၢၵ်ႇမၢၵ်ႇတိူဝ်ႉၺႃးၸဝ်ႈသၢင်ႇ 3 ပႃးမၢတ်ႇၸဵပ်း။ ႁိူၼ်းယေးၵူၼ်းဝၢၼ်ႈၸိူဝ်းၼႆႉၵေႃႈ လႆႈလူႉၵွႆၵႂႃႇယွၼ်ႉၸၢၵ်ႇမၢၵ်ႇၼႆႉ ဢမ်ႇယွမ်း 20 လင်။

လိူဝ်ၼၼ်ႉ ၽွင်းသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်းပွႆႇမၢၵ်ႇသႂ်ႇ ၼႂ်းထုင်ႉၼွင်ပိင် ၶၢဝ်းတၢင်း 1 ဝူင်ႈၼႆႉၵူၺ်း ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း လႆႈလူႉတၢႆၵႂႃႇ 20 ပၢႆလႄႈ မၢတ်ႇၸဵပ်း ဢမ်ႇယွမ်း 50 ၵေႃႉ ၼႆယဝ်ႉ။