ၸူဝ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း၊ ၶိူင်ႈတရူၼ်ႊ၊ ၶိူင်ႈၵွင်ႈလူင်ၵူႈသႅၼ်းသႅၼ်း လႄႈ ၸုတ်ႇၽဝ် ႁိူၼ်းယေးၵူၼ်းမိူင်း ။ ဢဝ်ၵူၼ်းမိူင်းႁဵတ်းပဵၼ်တူဝ်ယိူဝ်ႇ ၼႂ်းပၢင်တိုၵ်းသေ ယိုဝ်းၵူၼ်းမိူင်းတၢႆ မီးၸမ်မွၵ်ႈ 7000 ၵေႃႉ၊ ႁိူၼ်းၵူၼ်း မိူင်းလူႉၵွႆၵႂႃႇ သႅၼ်ပၢႆယဝ်ႉ ဝႃႈၼႆ။
ဝၼ်းတီႈ 25/08/2025 ၸုမ်းၸွႆႈထႅမ်ၵူၼ်းတူၵ်းၶွၵ်ႈ ၵၢၼ်မိူင်း AAPP ပိုၼ်ၽၢဝ်ႇဝႆႉဝႃႈ – တင်ႈတႄႇသိုၵ်းမၢၼ်ႈယိုတ်းမိူင်းမႃး ပီ 2021 တေႃႇထိုင် ပီ 2025 ၼႂ်းၶၢဝ်းတၢင်း ၵၢၼ်လုၵ်ႉၽိုၼ်ႉ ၶၢဝ်းႁွင်ၼႆႉ ၵူၼ်းၸိူဝ်းတူင်ႉၼိုင် ႁဵတ်းသၢင်ႈတႃႇၵၢၼ် တီႊမူဝ်ႊၶရေႊ သီႊ လႄႈ ၵူၼ်းမိူင်း ၼႂ်းမိူင်းႁူမ်ႈတုမ်ပတ်းပိုၼ်ႉ လူႉတၢႆၵႂႃႇယွၼ်ႉ သိုၵ်းမၢၼ်ႈ မီး 7128 ၵေႃႉယဝ်ႉဝႃႈၼႆ။
လိူဝ်ၼၼ်ႉ ၵူၼ်းၸိူဝ်းၺႃးသိုၵ်းမၢၼ်ႈ တီႉၺွပ်း ၵဵဝ်ႇလူၺ်ႈယွၼ်ႉၵၢၼ်သိမ်းဢႃႇၼႃႇဝၢၼ်ႈမိူင်းၼႆႉ မီးယူႇ 29585 ၵေႃႉ၊ ၼႂ်းၼၼ်ႉ တႃႇ 22339 ၵေႃႉ ယင်းတိုၵ်ႉထုၵ်ႇၵုမ်းၶင်တူဝ်ဝႆႉ။ တႃႇႁူဝ်ၼပ်ႉၵူၼ်း 11013 ၵေႃႉၼႆႉ ၺႃးတူတ်ႈတၢမ်ႇၶွၵ်ႈဝႆႉ။
ၼႂ်းဝူင်ႈပူၼ်ႉမႃးၼႆႉ သိုၵ်းမၢၼ်ႈၸႂ်ႉႁိူဝ်းမိၼ်တိုၵ်းသေ ပွႆႇမၢၵ်ႇသႂ်ႇ ၼႂ်းတိူင်းၸႄႈၵႅင်း၊ တိူင်းမၵူၺ်း၊ တိူင်းပႃႇၵိူဝ်၊ ၸႄႈမိူင်းရၶႅင်ႇ၊ မိူင်းတႆးပွတ်းႁွင်ႇ လႄႈ ၸႄႈမိူင်းမွၼ်း ၸိူဝ်းပဵၼ်ဢွင်ႈတီႈၸုမ်းသိုၵ်းၸၢဝ်းၶိူဝ်းလုၵ်ႉၽိုၼ်ႉၶဝ်ယူႇသဝ်းဝႆႉၼၼ်ႉသေ ၵူၼ်းမိူင်း လူႉတၢႆၵႂႃႇၸွမ်း မၢတ်ႇၸဵပ်းၵႂႃႇၸွမ်း ၼပ်ႉႁူဝ်ပၢၵ်ႇၵေႃႉ ၼႆယဝ်ႉ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ