သိုၵ်းမၢၼ်ႈယိုတ်းမိူင်း ၵူတ်ႇထတ်းသဵၼ်ႈမၢႆႁူဝ်ႁိူၼ်း တီႈၵူၼ်းပၢႆႈၽေးသိုၵ်း ဢၼ်ပွၵ်ႈမိူဝ်းယူႇၶိုၼ်း တီႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇသေ ႁွင်ႉၵူၼ်းၼုမ်ႇ ၵူၼ်းၸၢႆး သူင်ႇၾိုၵ်းၵၢၼ်သိုၵ်း ဝႃႈၼႆ။
ၼႂ်းႁၢင်လိူၼ်ဢေႃးၵတ်ႉသ်ၼႆႉ ယၢမ်းၵၢင်ၶမ်ႈၵၢင်ၶိုၼ်း သိုၵ်းမၢၼ်ႈၶဝ်ႈၵူတ်ႇထတ်းႁိူၼ်းယေးၵူၼ်းမိူင်း တၢင်းဝၢၼ်ႈ မႆႉပူၵ်ႇ၊ တွင်ႇသျေႇ၊ သူၺ်ႇမူၵ်ႉတေႃး၊ ၵၢၼ်ႇၵျီး ဢိၵ်ႇပႃးထႅင်ႈလၢႆလၢႆဝၢၼ်ႈ ၼႂ်းၸႄႈဝဵင်းၼွင်ၶဵဝ်။
ၵူၼ်းပိုၼ်ႉတီႈလၢတ်ႈဝႃႈ-“ၵူၼ်းလုၵ်ႉတၢင်းဝၢၼ်ႈၵၢၼ်ႇၵျီးသေ ပွၵ်ႈၶိုၼ်းယူႇတၢင်းဝၢၼ်ႈတွင်းၶမ်းၸိူဝ်းၼၼ်ႉၺႃးထဵတ်ႈထၢမ်။သိုၵ်းမၢၼ်ႈၶိုၼ်ႈႁိူၼ်းလူင်းႁိူၼ်းသေထၢမ် ၼႂ်းၵူၼ်းႁိူၼ်း ၸွင်ႇမီးၽႂ်ၵႂႃႇႁူမ်ႈတင်း PDF သိုၵ်းထၼု၊ ၵူတ်ႇထတ်းပႃး သဵၼ်ႈမၢႆ မုင်ႉႁေႃႁိူၼ်း၊ သင်ဢမ်ႇမီးၵူၼ်းႁိူၼ်းတဵမ် ၶႅၼ်းထတ်းထၢမ်တႂ်ႈတႂ်ႈၼိူဝ်ၼိူဝ်ၼမ်ႁႅင်း။ မၢင်ၵေႃႉ ၺႃးတီႉၺွပ်းၵႂႃႇ ၵူၼ်းႁိူၼ်းလႆႈဢဝ်ငိုၼ်းၵႂႃႇထုတ်ႇတူဝ်မႃးၶိုၼ်းၼႆ ၵူၼ်းပိုၼ်ႉတီႈဝဵင်းၼွင်ၶဵဝ်” – ဝႃႈၼႆ။
ဝဵင်းၼွင်ၶဵဝ်ၼႆႉ တပ်ႉသိုၵ်းမၢၼ်ႈ လေႃႇတိုၵ်း သိုၵ်းတဢၢင်းလႄႈၸုမ်းၽွမ်ႉႁူမ်ႈသေ ယိုတ်းၵုမ်းလႆႈၶိုၼ်း မိူဝ်ႈဝၼ်းတီႈ 16 လိူၼ်ၵျူႊလၢႆႊ။ ဝၢႆးၼၼ်ႉ ၵႆႉၵူတ်ႇထတ်းၵူၼ်းမိူင်း သင်မီးလွင်ႈထၢင်ႇထိူမ် တီႉၺွပ်းၵႂႃႇ၊ တေႃႇထိုင်ယၢမ်းလဵဝ် ၵူၼ်းမိူင်း တၢင်းဝၢၼ်ႈၵၢၼ်ႇၵျီး မႆႉပူၵ်ႇၸိူဝ်းၼၼ်ႉ ၺႃးသိုၵ်းမၢၼ်ႈတီႉၺွပ်းၵႂႃႇ 30 ပၢႆယဝ်ႉ ၊ ၵမ်ႈၼမ်ပဵၼ်ၵူၼ်းဝၢၼ်ႈတၢင်း ဝၢၼ်ႈၼွင်ၶဵဝ်ဢွၼ်ႇ၊ ဝၢၼ်ႈမႆႉပူၵ်ႇ၊ ၼွင်လႅင်၊ ၼွင်ဢေႃး ၊ ၺၢၼ်ႇတေႃး၊ သူၺ်ႇတုၼ်းလႄႈ သူၺ်ႇပျီႇၺုၼ်ႉ ၸိူဝ်းၼႆႉ။ ၵမ်ႉၼမ်ပဵၼ်ဝၢၼ်ႈၸၢဝ်းထၼုၶဝ်ယူႇသဝ်း ဝႃႈၼႆ။
လိူဝ်ၼၼ်ႉ သိုၵ်းမၢၼ်ႈထႅမ်ႁႅင်းသိုၵ်း ႁႅင်းၵွင်ႈၵၢင်ႇသေ ထူဝ်းသိုၵ်းလေႃႇတိုၵ်းထႅင်ႈၸုမ်းႁူမ်ႈႁွမ်းသိုၵ်းတဢၢင်း ၼိူဝ်သဵၼ်ႈတၢင်း ၼွင်ၶဵဝ် မိူင်းၵုတ်ႈလႄႈ ၼွင်ၶဵဝ် – ၵျွၵ်ႉမႄး ၸိူဝ်းၼႆႉ သွင်ၾၢႆႇတိုၵ်ႉၶဵင်ႈၶႅင်ၵၢၼ်သိုၵ်းၵၼ်ဝႆႉႁၢဝ်ႈႁႅင်း ၵူၼ်းမိူင်းပိုၼ်ႉတီႈၼပ်ႉႁူဝ်ႁဵင် လႆႈငိူင်ႉပၢႆႈၽေးသိုၵ်းဝႆႉ။
တႅမ်ႈၾၢႆႇမၢၼ်ႈ- ၸၢႆးၶႂၢၼ်မိူင်း
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ