ၼႂ်းဝၼ်းတီႈ 26/08/2025 မိူင်းဢိၼ်ႊတီႊယႃႊ ပိုတ်ႇၾၢႆၼမ်ႉလႄႈ ႁဵတ်းႁႂ်ႈၼမ်ႉ ၼွင်းထူမ်ႈ ပိုၼ်ႉတီႈဢၼ်ယူႇတႅမ်ႇ ၼႂ်းမိူင်း ပႃႊၵိတ်ႊသထၢၼ်ႊ၊ ၵူၼ်းမိူင်း သႅၼ်ပၢႆ လႆႈၶၢႆႉပၢႆႈတီႈယူႇ ႁူပ်ႉလွင်ႈယၢပ်ႇၽိုတ်ႇ ဝႃႈၼႆ။

ၵႄႈၵၢင် မိူင်းဢိၼ်ႊတီႊယႃႊ တင်း မိူင်းပႃႊၵိတ်ႊသထၢၼ်ႊၼႆႉ မီးလွင်ႈၶဵင်ႈၶႅင်ၵၼ်ဝႆႉသေ ၼႂ်းလၢႆလိူၼ်ပူၼ်ႉမႃးၼႆႉၵေႃႈ လႆႈတတ်းၶၢတ်ႇ ၵၢၼ်ၵပ်းသိုပ်ႇၽွင်းတၢင် ၵၼ်ဝႆႉ။

ၵူၺ်းၵႃႈ ၼႂ်းဝၼ်းတီႈ 25/08/2025 ၾၢႆႇမိူင်းဢိၼ်ႊတီႊယႃႊ ၵပ်းသိုပ်ႇလၢတ်ႈၵႂႃႇတီႈ မိူင်းပႃႊၵိတ်ႊသထၢၼ်ႊ ဝႆႉဝႃႈ ၾၢႆႇမိူင်းဢိၼ်ႊတီႊယႃႊ ၸၢင်ႈတေပိုတ်ႇၾၢႆၼမ်ႉလႄႈ ၼမ်ႉတေ ၼွင်းထူမ်ႈ ထိုင် ၼႂ်းမိူင်းပႃႊၵိတ်ႊသထၢၼ်ႊ – ၼႆသေထႅင်ႈ ဝၼ်းၼိုင်ႈၵေႃႈ မိူင်းၵြႃးပိုတ်ႇၾၢႆၼမ်ႉတႄႉ။

ယူႇတီႈၸုမ်း ၾၢႆႇၶိုင်ပွင်ၸတ်းၵၢၼ် ၽေးသၽႃႇဝ NDMA မိူင်းပႃႊၵိတ်ႊသထၢၼ်ႊ လႆႈပၼ်ၾၢင်ႉၵႂႃႇတီႈ ၽူႈမီးပုၼ်ႈၽွၼ်းၼႂ်းပိုၼ်ႉတီႈ ႁႂ်ႈၸွႆႈၶၢႆႉၵူၼ်းမိူင်း ၵႂႃႇယူႇသဝ်းဢွင်ႈတီႈလွတ်ႈၽေး ဝႃႈၼႆ။

ၵူၼ်းမိူင်းၸိူဝ်းလႆႈၶၢႆႉပၢႆႈၼၼ်ႉ ပဵၼ်ၼႂ်းၸေႈတွၼ်ႈ ၵႃႊသူႊ(Kasur)၊ ၸေႈတွၼ်ႈ ပၼ်ႊၵျပ်ႉ (Punjab) ႁူဝ်ၵူၼ်း 14,000 ပၢႆလႄႈ ၵူၼ်းမိူင်းၼႂ်းဝဵင်း ပႁႃႊဝႃႊလ်ၼၵႃႊ (Bahawalnagar) ႁိမ်းလႅၼ်လိၼ်မိူင်း ဢိၼ်ႊတီႊယႃႊ ႁူဝ်ၵူၼ်း 89,000 ၵေႃႉ။
ၼႂ်းၶၢဝ်းတၢင်းလၢႆဝၼ်းမႃးၼႆႉ ၸိုင်ႈမိူင်းၼႂ်းၵုၼ်ၶဵဝ်ဢေႊသျႃႊ ပႃးၸဵမ်မိူင်းဢိၼ်ႊတီႊယႃႊလႄႈ မိူင်း ပႃႊၵိတ်ႊသထၢၼ်ႊ ၸိူဝ်းၼႆႉ ၾူၼ်တူၵ်းႁႅင်း ထပ်းၵၼ်လၢႆဝၼ်းဝႆႉ။

ပူၼ်ႉမႃးပႆႇပေႃးႁိုင်ၼႆႉၵေႃႈ ယွၼ်ႉၾူၼ်တူၵ်းႁႅင်းၼႂ်းမိူင်း ပႃႊၵိတ်ႊသထၢၼ်ႊ သေ ႁဵတ်းႁႂ်ႈၼမ်ႉထူမ်ႈ၊ လိၼ်ၵူၼ်ႇပင်း ၵူၼ်းမိူင်းလူႉႁၢႆတၢႆၵႂႃႇ 800 ပၢႆ ၼႆယဝ်ႉ။