လူမ်းလႅင်ႉႁႅင်းယႂ်ႇ ၶႃႊၵျိၵိ KAJIKI ၶဝ်ႈ တီႈမိူင်းဝႅတ်ႉၼၢမ်းမိူဝ်ႈဝၼ်းတီႈ 25/08/2025 ၼၼ်ႉ ၵူၼ်းမိူင်းတၢႆ 3 ၵေႃႉ၊ ၼႂ်းဝဵင်းလူင် ႁၢတ်ႇၼွႆႉ Hanoi ၵေႃႈပဵၼ်ၼမ်ႉပဵၼ်ၼွင်တင်းဝဵင်းၼႆ ႁွင်ႈၵၢၼ်ၶၢဝ်ႇမိူင်းဝႅတ်ႉၼၢမ်း ဢွၵ်ႇဝႆႉၼင်ႇၼႆ။
လူမ်းလႅင်ႉ တၢႆႊၾုၼ်ႊ ၶႃႊၵျိၵိ KAJIKI ၼႆႉ ၶဝ်ႈမိူင်းဝႅတ်ႉၼၢမ်းယဝ်ႉ သိုပ်ႇမုင်ႈၼႃႈၶိုၼ်ႉၾင်ႇ မိူင်းလၢဝ်း သိုပ်ႇၶၢဝ်းတၢင်းႁွတ်ႈထိုင် မိူင်းထႆးပွတ်းႁွင်ႇ မိူဝ်ႈဝႃး ဝၼ်းတီႈ 26/08/2025 ။
လူမ်းလႅင်ႉၶႃႊၵျိၵိၼႆႉ ႁႅင်းၽတ်ႉပဝ်ႇ 133 ၵီႊလူဝ်ႊ တေႃႇ 1 ၸူဝ်ႈမူင်း ။ ႁဵတ်းႁႂ်ႈႁိူၼ်းယေးၵူၼ်းမိူင်း လူႉၵွႆၵႂႃႇ မွၵ်ႈ 70,00 လင်၊ သူၼ်ႁႆႈလွၵ်းၼႃး တီႈလိၼ်ၽုၵ်ႇသွမ်ႈ ၺႃးၼမ်ႉထူမ်ႈၵႂႃႇ 28,800 ႁႅၵ်ႊတိူဝ်ႊ(Hectare)၊ တူၼ်ႈမႆႉယႂ်ႇလူင် ႁၢၵ်းလူမ်ႉၵွႆဢမ်ႇယွမ်း 20,000 တူၼ်ႈ လႄႈ သဝ်လၵ်းၾႆးႁၢၵ်းၵွႆ 331 လၵ်း ဝႃႈၼႆ။
တေႃႇထိုင်ၼႂ်းဝၼ်းတီႈ 26/08/2025 ယၢမ်းၵၢင်ဝၼ်းၼႆႉ ယွၼ်ႉလူမ်းလႅင်ႉလူင်ၼၼ်ႉသေ မီးၵူၼ်းလူႉတၢႆ 3 ၵေႃႉ၊ မၢတ်ႇၸဵပ်းဢမ်ႇယွမ်း 10 ၵေႃႉ။ ပဵၼ်ၵူၼ်းၼႂ်းၸႄႈတွၼ်ႈ ထႅၼ်ႊႁႂႃႊ Thanh Hóa, ငေႇဢၢၼ်ႊ Nghệ An, ႁႃႇတိင်ႊ Hà Tĩnh, ထႆႇငႂႅၼ်ႊThái Nguyễn လႄႈ Phu Tho ၾူႊထေႃႊ ၸိူဝ်းၼႆႉ ဝႃႈၼႆ။
ယၢမ်းလဵဝ် တီႈမိူင်းဝႅတ်ႉၼၢမ်း ႁႅင်းလူမ်းလႅင်ႉ လူတ်းယွမ်းႁႅင်းဢႄႇၵႂႃႇတႄႉတႄႉဝႃႈဝႃႈယဝ်ႉၼႆသေတႃႉ ၾူၼ်တႄႉတိုၵ်ႉသိုပ်ႇတူၵ်းယူႇတိၵ်းတိၵ်း။
သိုဝ်ႇၶၢဝ်ႇၸိုင်ႈမိူင်းတႄႉပိုၼ်ၽၢဝ်ႇဝႃႈ – ယွၼ်ႉပိူဝ်ႈၾၢႆႇလူင်ပွင်ၸိုင်ႈ ႁူႉသေပိုၼ်ၽၢဝ်ႇဝႆႉလူင်ႈၼႃႈသေဢမ်ႇၵႃး ပႃးတင်းၸုမ်းၸွႆႈထႅမ်ဢွၼ်ၵၼ်ၶၢႆႉတီႈယူႇၵူၼ်းမိူင်းၸူဝ်းယူႇသဝ်းၼႂ်းပိုၼ်ႉတီႈသၢႆတၢင်းလူမ်းလႅင်ႉၸိူဝ်းၼၼ်ႉ ပၢႆႈယူႇဝႆႉတၢင်ႇတီႈတီႈလွတ်ႈၽေးဝႆႉလူင်ႈၼႃႈလႄႈ ၸင်ႇဝႃႈ မီးၵူၼ်းမၢတ်ႇၸဵပ်းလူႉတၢႆဢေႇ ဝႃႈၼႆ။
မိူဝ်ႈပီၵၢႆ လူမ်းလႅင်ႉ တၢႆႊၾူၼ်ႊ ယႃႊၵီႊ ၽတ်ႉၶဝ်ႈ မိူင်းဝႅတ်ႉၼၢမ်း ၼၼ်ႉတႄႉ မီးၵူၼ်းလူႉတၢႆ 300 ပၢႆ ။
ယွတ်ႈပၢႆလူမ်းလႅင်ႉၶႃႊၵျိၵိ ၼႆႉၽတ်ႉၶဝ်ႈၼႂ်းမိူင်းထႆးတွၼ်ႈၼိူဝ် ၼႂ်းၸႄႈတွၼ်ႈ ၵဵင်းမႂ်ႇ၊ ၼၢၼ်ႉ၊ မႄႈႁွင်ႈသွၼ်။ ၼမ်ႉႁူၺ်ႈၼမ်ႉလွႆၼွင်းၶဝ်ႈဝၢၼ်ႈၶဝ်ႈဝဵင်း။ လၢၵ်ႈဢဝ်ႁိူၼ်းယေးလႄႈရူတ်ႉၵႃးၵူၼ်းမိူင်းလွင်ႈလႆၸွမ်း။ လိၼ်ၵူၼ်ႇတဵင်ႁိူၼ်းၵူၼ်းတီႈၸႄႈဝဵင်းမႄႈၸႅမ်ႇ။ ၵူၼ်းမိူင်းထႆး လွင်ႈလႆၸွမ်းၼမ်ႉ 3 ၵေႃႉ။ မၢတ်ႇၸဵပ်းတႄႉမီးတင်းၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ