လူမ်းလႅင်ႉၽတ်ႉၶဝ်ႈ  ၼွင်ႁၢႆးယႃႈလႄႈ ၼႂ်းၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း  ႁိူၼ်းယေးလႄႈႁူင်းႁဵၼ်း လူႉၵွႆၼမ် လူဝ်ႇတင်းၸွႆႈထႅမ်ပူၵ်းပွင်ၶိုၼ်း  ။

ၼႂ်းဝၼ်းတီႈ 26/8/2025 ယၢမ်းဝၢႆးဝၼ်း 1 မူင်း ၾူၼ်တူၵ်း လူမ်းလႅင်ႉၶဝ်ႈ ဝၢၼ်ႈ လူင်ပႅၼ်ႈ ဝၢၼ်ႈမွၵ်ႇ လႄႈ ဝၢၼ်ႈဢၼ်မီးၼႂ်းဢိူင်ႇၼမ်ႉတူၵ်း ၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း။ လင်ၶႃးႁိူၼ်းယေးၵူၼ်းမိူင်း ဢိၵ်ႇႁူင်းႁဵၼ်း ပိဝ်ၸွမ်းလူမ်းတင်းၼမ်။  

ၵူၼ်းၸၢႆးဢႃယု 50 ပီၵူၼ်းမိူင်းဝဵင်းပၢင်လွင်း လၢတ်ႈၽူႈတွႆႇႁွၵ်ႈဝႃႈ -“ႁူင်းႁဵၼ်းသွင်လင်ၼႆႉ ၸွမ် မၼ်းပိဝ်မူတ်း ၊ မိူဝ်ႈၼႆႉၾူၼ်တိုၵ်ႉတူၵ်းယူႇ  ႁူင်းႁဵၼ်းၵေႃႈ ဢမ်ႇၸၢင်ႈပိုတ်ႇ လႆႈပိၵ်ႉဝႆႉ ၊ လုၵ်ႈႁဵၼ်းၵေႃႈဢမ်ႇလႆႈႁဵၼ်းလိၵ်ႈ ၊ ႁူင်းႁဵၼ်းၼႆႉ တိုၵ်ႉႁႃပိုတ်ႇလႆႈ 10 ဝၼ်းၵူၺ်း ၊ လူဝ်ႇမႄး  ၸွမ်ႁူင်းႁဵၼ်းဝႆးဝႆးဢွၼ်တၢင်း ပေႃးဢမ်ႇၼၼ် လုၵ်ႈႁဵၼ်းတေဢမ်ႇၸၢင်ႈႁဵၼ်းလိၵ်ႈ ”- ဝႃႈၼႆ ။

ယၢမ်းလဵဝ်ၵူၼ်းပိုၼ်ႉတီႈ ၸႅင်ႈဝႆႉတီႈ ၽူႈမီးပုၼ်ႈၽွၼ်း ႁွင်ႈၵၢၼ်ၾၢႆႇပၢႆးပၺ်ႇၺႃႇ ၼႂ်းပိုၼ်ႉတီႈဝႆႉသေ ၵူၼ်းဝၢၼ်ႈၼင်ႇၵၼ်ဢွၼ်ၵၼ်ၸွႆႈၵၼ်မႄးသၢင်ႈမႄးမုင်းၶိုၼ်းယူႇၼႆ- ၵူၼ်းပိုၼ်ႉတီႈလၢတ်ႈ ။

 ႁူင်းႁဵၼ်းၸၼ်ႉၵၢင်တီႈဝၢၼ်ႈမွၵ်ႇ  ဢၼ်ၺႃးလူမ်းလႅင်ႉဢဝ်လင်ၶႃးမၼ်းၵႂႃႇၼႆႉၸင်ႇႁႃပိုတ်ႇမိူဝ်ႈ  ဝၼ်းတီႈ 12/8/2025 ၼႆႉၵူၺ်း။ တီႈႁူင်းႁဵၼ်းၼၼ်ႉ မီးလုၵ်ႈႁိူၼ်း  150 ၵေႃႉ   ။

မိူၼ်ၼင်ႇၼႆ ၼႂ်းဝၼ်းတီႈ 26/8/2025 ယၢမ်းဝၢႆးဝၼ်း ၾူၼ်တူၵ်းဢမ်ႇထၢတ်ႇ လူမ်းလႅင်ႉၶဝ်ႈၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း။  ႁိူၼ်းၵူၼ်း ႁူဝ်ၼွင်(ကန်ခေါင်း) လႄႈ ဝၢၼ်ႈၸၢင်ႈၶမ်း (စန်ခန့်)  65 လင်  ၊ ႁိူၼ်းၵူၼ်းဝၢၼ်ႈ ႁၢတ်ႇပူင်း (ဟတ်ပုံး)  56  လင် လူႉၵွႆယွၼ်ႉလူမ်း ။   ယၢမ်းလဵဝ်လူဝ်တၢင်းၸွႆႈထႅမ်ဝႆႉ ႁၢဝ်ႈႁႅင်းဝႃႈၼႆ ။

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ဢၼ်တုမ်ႉတိူဝ်ႉၼမ်သုတ်း ပဵၼ်ဝၢၼ်ႈႁူဝ်ၼွင် ၊   ႁိူၼ်း ၼႂ်းၼွင်ၼႆႉ လႆႈထူပ်းၽေးသၽႃဝ မဵဝ်းယဝ်ႉမဵဝ်းလႄႈ ပေႃးဢမ်ႇၶႂ်ႈၶၢမ်ႇယူႇယဝ်ႉ ၊ မိူဝ်ႈဝႃးၾူၼ်တူၵ်းၼႆႉ သဵင်ၾူၼ်သဵင်လူမ်းၼႆႉလင်ႁႅင်းၼႃႇ ႁိူၼ်းၼႆႉပေႃးသၼ်ႇ ၊  လူမ်းလႅင်ႉသမ်ႉမႃးဢဝ်ၸွမ်ႁိူၼ်းၸွမ်ၵျွင်းမုၼ်ၸဝ်ႈၸိူဝ်းၼႆႉ ပႃးၵႂႃႇမူတ်း ၵၢင်ၶမ်ႈပေႃးဢမ်ႇႁတ်းၼွၼ်း  ”- ဝႃႈၼႆ ။

ယၢမ်းလဵဝ် တီႈၼႂ်းၼွင်ႁၢႆးယႃႈ ၾူၼ်တူၵ်းဢမ်ႇထၢတ်ႇ ၼမ်ႉၶိုၼ်ႈမႃးသေ ႁိူၼ်းၸိူဝ်းဢၼ်ထုၵ်ႇလူမ်းပတ်ႉၵွႆၸိူဝ်းၼၼ်ႉ ယူႇတီႈၵူၼ်းၼႂ်းဝၢၼ်ႈၼႂ်းဢိူင်ႇ ၸွႆႈၵၼ် မႄးၶိုၼ်း လူဝ်ႇတင်းၸွႆႈထႅမ်ဝႆႉ ဝႃႈၼႆ ။

ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈဝႃးလူမ်းပတ်ႉၼႆႉ လီၵူဝ်ႁႅင်းၼႃႇ ထိုင်တလဵဝ်ၵေႃႈ ၼႂ်းၸႂ်ၼႆႉ ဢမ်ႇလီသေဢိတ်း ၊ ၵူၼ်းမိူင်းလဵၵ်ႉယႂ်ႇၼုမ်ႇထဝ်ႈ တုမ်ႉတိူဝ်ႉပၢႆးတူဝ်ပၢႆးၸႂ်ၼႃႇယဝ်ႉ”- ဝႃႈၼႆ ။

ႁွင်ႈၵၢၼ်ၾၢႆႇၾိင်ႈၾႃႉၾူၼ်လူမ်း မိူင်းမၢၼ်ႈ ၶၢတ်ႈလၢမ်းဝႆႉဝႃႈ –  ဝၼ်းတီႈ 27/08/2025  ၼႆႉ လူမ်းလႅင်ႉႁႅင်းလဵၵ်ႉ တေၶဝ်ႈၸွမ်း လႅၼ်လိၼ် မိူင်းထႆး – မိူင်းလၢဝ်း – မိူင်းမၢၼ်ႈ၊ ၼႂ်းဝၼ်းတီႈ 28 သမ်ႉ လူမ်းလႅင်ႉ ၶႃႊၵျိၵိ ႁႅင်းတေဢူၼ်ႈၵႂႃႇသေ ၽတ်ႉထွင်ႈၶဝ်ႈၼႂ်း မိူင်းတႆးပွတ်းဢွၵ်ႇ လႄႈ ပွတ်းၸၢၼ်း ဝႃႈၼႆ ။